ᐃᓄᖕᓄᑦ ᐊᐅᓚᑕᐅᔪᑦ ᐱᕙᓪᓕᓂᒃᑯᑦ ᐱᐅᓂᕐᓴᐅᓇᔭᕐᑐᖅ ᑲᓇᑕᒧᑦ: ᐅᐱᐊᑦ

For the English version of this story, please see Give Inuit greater role in Arctic security or risk ‘malicious’ foreign investment.

ᒐᕙᒪᒃᑯᑦ “ᐃᓄᖕᓂ ᐱᕕᖃᖅᑎᑦᑎᔭᕆᐊᓖᑦ ᓇᖕᒥᓂᖅ ᐱᓇᓱᒍᑎᒃᓴᖏᓐᓂᒃ ᐊᒻᒪ ᓈᒻᒪᒃᑐᓂᒃ ᐱᖁᑎᖃᖅᑎᑦᑎᓗᑎ ᓄᓇᖏᔭᑦᑎᓐᓂ,” ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓ ᐅᖃᓚᐅᕐᑐᑦ ᓴᓇᑦᑯᑦ ᑲᑎᒪᔨᕐᔪᐊᖏᓐᓂᑦ ᑲᓇᑕᒥ ᓴᐳᓐᓂᐊᕐᓂᕐᒨᖓᔪᓄᑦ ᓄᕕᐱᕆ 17-ᖑᑎᓪᓗᒍ.

ᐅᕝᕙᓘᓐᓃᑦ, ᐅᖃᕐᑐᖅ, “ᐃᓱᒪᔪᓐᓇᕐᑐᖓᓕ ᑕᒪᓐᓇ ᐋᖅᑭᒃᓱᖅᑕᐅᔭᕆᐊᒃᓴᖓᓂ ᓄᓇᖃᕐᑐᑐᖃᐅᙱᑦᑐᓄᑦ ᑮᓇᐅᔭᑎᒍᑦ ᐱᓕᕆᐊᖑᑐᐃᓐᓇᕆᐊᖃᕐᓂᖓᓂ ᑖᒃᑯᐊᓗ ᐃᑲᔪᕐᓂᕐᒧᑦ ᐅᕝᕙᓘᓐᓃᑦ ᐃᑲᔪᕐᓂᕐᒨᙱᑐᐃᓐᓇᕆᐊᖃᖅᖢᓂ.”

ᒫᓐᓇᓕ ᐃᓄᖕᓄᑦ ᐱᒋᔭᐅᓂᕐᓴᑎᒍᑦ ᓇᓯᑦᑐᖅ ᑯᐊᐳᕇᓴᓐᑯ ᐊᐅᓚᑦᑎᒻᒪᑕ 47-ᓂ ᐅᑭᐅᕐᑕᖅᑐᕐᒥ ᓴᐳᓐᓂᐊᖅᑎᒃᑯᑦ ᑲᒪᒋᔭᖏᓐᓂᒃ (North Warning System) ᐅᑭᕐᑕᖅᑐᕐᒦᑦᑐᓂ. ᐊᒻᒪᓗ ᐅᒃᑑᐱᕆᒥ ᕿᑭᖅᑖᓗᒃ ᑯᐊᐳᕇᓴᓐᑯᑦ – ᐱᓕᕆᐊᒃᓴᓕᕆᔭᐅᔪᑦ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᓄᑦ – ᐱᓕᕆᖃᑎᖃᖅᖢᑎᒃ ᐋᑐᕚᒦᑦᑐᒥ ᑮᓇᐅᔭᖅᑐᔪᓄᑦ ᐊᒻᒪ ᓴᐳᓐᓂᐊᖅᑎᓄᑦ ᐱᓕᕆᑎᑦᑎᔨᑦ ᐋᖅᑭᒃᓱᐃᓂᐊᖅᑐᓂᒃ ᓴᐳᔾᔨᔩᑦ ᐃᖕᒃ., ᑖᓐᓇᓗ ᓯᕗᓪᓕᖅᐹᖑᓪᓗᓂ ᐃᓄᐃᑦ ᓴᐳᓐᓂᐊᕈᑎᒋᓂᐊᖅᑕᖓ.

ᑭᓯᐊᓂᓕ ᐱᑕᖃᒃᑲᓐᓂᕆᐊᖃᕐᒪᑦ ᐃᓄᖕᓄᑦ ᐊᐅᓚᑕᐅᔪᓂ ᐱᓕᕆᐊᒃᓴᓂ ᓴᐳᔾᔨᓯᒪᓂᕐᒧᑦ ᓄᓇᖏᓐᓂ ᐊᒻᒪᓗ ᓴᐳᓐᓂᐊᕐᓂᕐᒧᑦ ᑐᕌᒐᕆᔭᐅᔪᓂᒃ, ᐅᐱᐊᑦ ᐅᖃᕐᑐᖅ. ᐅᓇᓘᓐᓃᑦ ᐱᔭᐅᓇᓱᒃᑐᖅ ᐃᓄᐃᑦ ᓄᓇᖓᑦ ᓯᓚᑦᑐᖅᓴᕐᕕᒃᓴᖅ ᐃᑲᔫᑎᐅᔪᓐᓇᕋᔭᕐᑐᖅ ᓴᐳᓐᓂᐊᕐᓂᕐᒥ ᐅᕝᕙᓘᓐᓃᑦ ᐅᓇᑕᕐᑐᖃᓕᕐᓂᕐᒥᒃ ᖃᐅᔨᓴᕐᓂᒃᑯᑦ.

“ᑲᓇᑕ ᑭᖑᕙᓯᒃᓯᒪᒻᒪᕆᖕᒪᑕ ᓴᐳᓐᓂᐊᕐᓂᕐᒧᑦ ᐃᑲᔫᑎᖃᕋᓱᖕᓂᒃᑯᑦ,” ᐅᐱᐊᑦ ᐅᖃᓚᐅᕐᑐᖅ ᓴᓂᑐᓄᑦ.

ᒐᕙᒪᑐᖃᒃᑯᑦ ᐊᐅᓚᑦᑎᔾᔪᑎᖏᑦ, ᑖᓐᓇᓗ ᐊᓂᒍᖅᑎᑕᐅᑕᐅᓚᐅᖅᖢᓂ ᑲᑎᒪᔨᕐᔪᐊᓄᑦ ᐱᓇᓱᐊᕈᓯᐅᓚᐅᕐᑐᒥ, ᐊᑐᖁᔨᓯᒪᔪᓂ “ᐊᕐᕌᒍᒐᓴᖕᓂ ᓈᒻᒪᒍᓐᓃᕐᓯᒪᓗᐊᕐᑐᓂ ᐱᖁᑎᓄᑦ” ᐅᑯᓄᖓ ᑲᓇᑕᒥ ᐅᓇᑕᕐᑐᒃᓴᓄᑦ.

2025-26 ᐊᕐᕌᒍᒧᑦ ᐃᓱᓕᓯᒪᓪᓗᓂ ᒫᔅᓯᒧᑦ, ᑲᓇᑕ ᐃᓱᒪᒋᔭᐅᔪᖅ ᐊᑐᕋᔭᕆᐊᒃᓴᖓᓂᒃ ᒫᓂ $62 ᐱᓕᐊᓐ ᑖᓚᓂ ᓴᐳᓐᓂᐊᕐᓂᕐᒧᑦ, ᐊᒻᒪᓗ ᐃᓚᖃᕐᓗᓂ $81.8 ᐱᓕᐊᓐᓂ ᓴᐳᓐᓂᐊᕐᓂᕐᒧᑦ ᐊᑐᕐᓗᑎ ᐊᕐᕌᒍᓄᑦ ᑕᓪᓕᒪᓄᑦ.

ᐃᒪᓐᓇᐅᓂᕐᓴᐅᕙᒃᖢᓂ ᒐᕙᒪᑐᖃᒃᑯᑦ “ᖃᓄᐃᓕᐅᕐᓂᐊᕐᓂᕋᖅᐸᒃᖢᑎᒃ ᐅᑭᐅᕐᑕᖅᑐᕐᒥ ᓴᐳᓐᓂᐊᕈᑎᑎᒍᑦ ᑐᐊᕕᕐᓇᖅᑐᖃᓕᕌᖓ, ᑭᓯᐊᓂᓕ ᑐᐊᕕᕐᓇᖅᑐᕆᔭᐅᓚᐅᕐᑐᖅ ᐊᓂᒍᑐᐊᕐᒪ ᑕᒪᓐᓇ ᐅᖃᐅᓯᐅᓂᑯ ᐊᓯᐅᑐᐃᓐᓇᓕᖅᐸᒃᖢᓂ,” ᐅᖃᓚᐅᕐᑐᖅ ᓅᕙ ᓯᑰᓯᐊᒧᑦ ᓴᓂᑐ ᓯᑖᓐ ᑯᑦᓱ ᑲᑎᒪᔨᑦ ᑲᑎᒪᑎᓪᓗᒋᑦ.

ᐅᐱᐊᑦ ᑭᐅᓚᐅᕐᑐᖅ ᒫᓐᓇᓕ ᓴᐳᓐᓂᐊᕐᓂᖅ ᑐᐊᕕᕐᓇᖅᑐᒃᑯᑦ ᑲᒪᒋᔭᐅᔭᕆᐊᖃᓕᕐᒪ ᑲᓇᑕᒥ.

“ᐊᔾᔨᒋᔭᐅᙱᔾᔪᑎᖓᓕ ᐊᓯᖏᓐ ᓄᓇᓕᕐᔪᐊᑦ ᑮᓇᐅᔭᓂ ᐊᑐᕐᓂᕐᓴᐅᒻᒪᑕ ᓴᐳᓐᓂᐊᕐᓂᕐᒧᑦ, ᓴᐳᓐᓂᐊᖅᑎᓄᑦ, ᐱᕙᓪᓕᐊᔪᓕᕆᓂᕐᒧᑦ ᐊᒻᒪ ᓄᓇᒋᔭᒧᑦ ᐱᖁᑎᓄᑦ ᑕᐅᕙᓂ ᐅᑭᐅᕐᑕᖅᑐᕆᔭᖏᓐᓂ,” ᐅᖃᕐᑐᖅ.

ᑲᓇᑕᐅᑉ ᐅᑭᐅᕐᑕᖅᑐᖓᓄᑦ ᐃᑲᔫᑎᑦ “ᐱᑕᖃᓗᐊᙱᒻᒪᑕ” ᑕᐅᑐᒃᖢᒋᓪᓕ ᖃᓄᐃᓕᐅᖃᑎᒋᔭᐅᔪᑦ ᐊᑐᕐᐸᓪᓕᐊᓂᖏᑦᑎᒍᑦ, ᐅᖃᕐᑐᖅ.

ᓴᐃᓇ – ᐅᖃᐅᓯᕆᓯᒪᔪᑦ “ᐅᑭᐅᕐᑕᖅᑐᕐᒥ ᖃᓂᒋᔭᖓᓂ ᓄᓇᕐᔪᐊᖑᓂᖓᓂ” – ᐊᒻᒪ ᕋᓯᐊᒥᐅᑕᑦ ᐅᑭᐅᕐᑕᖅᑐᕐᒧᑦ ᐊᑐᕐᓂᕐᓴᐅᓯᒪᔪᑦ ᐊᕐᕌᒍᓂ ᐊᑐᓵᕐᓯᒪᔪᓂ.

ᑕᐃᒪᙵᑦ 2003-ᒥ, ᐃᓱᒪᒋᔭᐅᔪᖅ ᓴᐃᓇ ᐊᑐᕐᓯᒪᓕᕐᓂᖏᓐᓂᒃ $90 ᐱᓕᐊᓐ ᑖᓚᓂ ᐅᑭᐅᕐᑕᖅᑐᕐᒧᑦ, ᒪᑯᓄᖓ ᐆᒻᒪᖅᑯᑎᓕᕆᓂᕐᒧᑦ ᐊᒻᒪ ᐅᔭᕋᐅᔭᓕᕆᓂᕐᒨᖓᔪᓄᑦ, ᐅᖃᓚᐅᕐᑐᑦ ᐊᒥᐊᓕᑲᒥ ᑭᒡᒐᖅᑐᐃᔨᑦ ᓄᓇᖅᑲᑎᒋᙱᑕᖏᓐᓄᑦ 2022-ᖑᑎᓪᓗᒍ.

ᐊᒻᒪᓗ ᑕᒪᐃᓐᓂ ᓄᓇᓕᖕᔪᐊᒃ ᖃᐅᔨᓴᕐᓯᒪᓂᕐᓴᐅᓪᓗᑎᒃ ᐅᑭᐅᕐᑕᖅᑐᖏᓐᓂ ᒪᐅᓇ ᕋᓯᐊᑉ ᐅᑭᐅᕐᑕᖅᑑᑉ ᑲᔾᔨᐊᓃᑦᑐᓄᑦ ᐱᓕᕆᐊᖃᕐᓯᒪᓂᖏᓐ. ᐱᓕᕆᖃᑎᖃᕐᓂᒃᑯᑦ ᐃᓄᖕᓂ ᑲᓇᑕᒥᐅᑕᑦ ᓄᓇᖃᙱᑦᑐᓂ ᑲᒪᒋᔭᖃᖅᑎᑦᑎᑦᑕᐃᓕᔪᓐᓇᕐᑐᑦ, ᐅᐱᐊᑦ ᐅᖃᕐᑐᖅ.

“ᑲᓇᑕ ᐅᑭᐅᕐᑕᖅᑐᕐᒥ ᓄᓇᖃᖃᑕᐅᓇᔭᙱᑦᑐᖅ ᐃᓄᖕᓅᙱᑉᐸᑦ,” ᐅᐱᐊᑦ ᐅᖃᕐᑐᖅ. “ᐃᓄᐃᑦ ᐋᖅᑭᒃᓯᓯᒪᖕᒪᑕ ᑲᓇᑕᐅᑉ ᐅᑭᐅᕐᑕᖅᑐᕐᒥ ᐱᖃᖃᑕᐅᓂᖓᓂ ᐊᒻᒪᓗ ᖃᐅᔨᒪᓛᖑᓪᓗᑎᒃ ᐅᑭᐅᕐᑕᖅᑐᕐᒥ.”