ᓄᓇᕐᔪᐊᓕᒫᒥ ᖃᕋᓴᐅᔭᑎᒍᑦ ᐊᑐᐃᓐᓇᐅᙱᓐᓂᖓᓂ ᕿᒪᐃᕗᖅ ᓄᓇᕗᒻᒥ ᐊᒃᑐᖅᑕᐅᙱᐸᓗᖕᓂᖓᓂ

ᐃᓚᖏᑦ ᓂᕿᓄᑦ ᓂᐅᕕᕐᕖᑦ ᓄᓇᕗᒻᒥ ᐅᓂᒃᑳᕆᓚᐅᖅᐳᑦ ᐊᒃᑐᖅᑕᐅᓂᖏᓐᓂ, ᑭᓯᐊᓂ ᐊᓯᐊᒍᑦ ᖃᕋᓴᐅᔭᑎᒍᑦ ᐊᕿᑦᑐᑦ ᐱᓕᕆᔾᔪᑎᖏᑦ ᐊᑐᐃᓐᓇᐅᙱᓐᓂᖓᓂ ᔪᓚᐃ 19−ᒥ ᐱᑎᑦᑎᓚᐅᖅᑐᒥ ᐊᔪᖅᓯᑎᑦᑎᓚᐅᖅᑐᒥ ᓄᓇᕐᔪᐊᓕᒫᒥ ᐊᒃᑐᐃᓂᖃᙱᓐᓂᖅᓴᐅᔫᔮᖅᐳᖅ ᓄᓇᕗᒻᒥ.

ᖃᒪᓂᑦᑐᐊᕐᒥ, ᓂᐅᕕᖅᑎᒃᑯᑦ ᓂᐅᕕᕐᕕᖓ ᒥᒃᖠᒋᐊᖅᑕᐅᓚᐅᖅᐳᖅ ᐊᑕᐅᓯᑐᐊᒥ ᓂᐅᕕᕐᕕᐅᔪᓐᓇᖅᑐᒥ ᕿᓚᒻᒥᐅᔪᒥ ᔪᓚᐃ 19−ᒥ, “ᐱᔾᔪᑎᖃᖅᑐᒥ ᐊᑲᐅᙱᓕᐅᕈᑕᐅᔪᓂ Microsoft−ᒥ,” ᓂᐅᕕᕐᕕᐅᑉ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᔨᖓᑕ ᐅᖃᓚᐅᖅᐳᖅ.

ᑕᐃᔭᐅᔪᒥ ᓄᓇᕐᔪᐊᓕᒫᒥ ᑐᓴᒐᒃᓴᓂ ᓄᑖᙳᖅᐸᓪᓕᐊᓂᖓᓂ ᐊᑐᐃᓐᓇᐅᙱᓐᓂᖓᓂ ᐸᓯᒃᖠᕗᑦ ᐅᔾᔨᖅᓱᕐᓂᕐᒥ ᐊᕿᑦᑐᑦ ᐱᓕᕆᔾᔪᑎᖏᑦᑕ ᑲᒻᐸᓂᖓᓂ CrowdStrike−ᑯᓐᓂ ᐊᒻᒪ ᓄᑖᙳᕆᐊᖅᑎᑕᐅᓂᖓᓂ Falcon Sensor ᐊᕿᑦᑐᑦ ᐱᓕᕆᔾᔪᑎᖏᓐᓂᑦ ᐊᐅᓚᔪᒥ Microsoft Windows−ᓄᑦ ᖃᕋᓴᐅᔭᑎᒍᑦ. ᐊᕿᑦᑐᑦ ᐱᓕᕆᔾᔪᑎᖏᑦ ᐊᑐᖅᑕᐅᓲᖑᕗᖅ ᐅᓇᑕᕐᓂᕐᒥ ᖃᕋᓴᐅᔭᑎᒍᑦ ᐱᒋᐊᖅᑕᐅᓂᐅᔪᓄᑦ.

“CrowdStrike ᓄᓇᕐᔪᐊᒥ ᓄᑖᙳᖅᐸᓪᓕᐅᓂᐅᔪᒥ ᐊᑐᐃᓐᓇᐅᙱᓐᓂᖓᓂ ᐊᒃᑐᐃᓂᖃᖅᓯᒪᕗᖅ ᐃᓚᖏᓐᓂ ᓂᐅᕕᕐᕕᑦᑎᓐᓂ, ᐱᑎᑦᑎᔪᒥ ᕿᓚᒻᒥᐅᔪᒥ ᓄᖅᑲᖅᑎᑦᑎᓂᐅᔪᒥ ᐱᔪᓐᓇᕐᓂᖓᓂ ᐱᓕᕆᓂᕐᓂ ᓂᐅᕕᖅᑐᓄᑦ,” ᐳᕋᓐᑦ ᓯᒥᑦ, ᐊᐅᓚᑦᑎᔨᐅᔪᖅ ᐋᔩᖃᑎᖃᕐᓂᕐᒥ ᐊᒻᒪ ᓯᐊᒻᒪᖅᑎᑦᑎᓂᕐᒥ ᓂᐅᕕᖅᑎᒃᑯᓐᓄᑦ, ᐅᖃᓚᐅᖅᐳᖅ ᐅᖃᐅᓯᒃᓴᓕᐊᒍᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ.

“ᐊᒃᓱᕈᖅᖢᑕ ᐱᓕᕆᕗᒍᑦ ᐅᑎᖅᑎᕆᓂᕐᒥ ᐱᔨᑦᑎᕋᕐᓂᐅᔪᒥ ᕿᓚᒻᒥᐅᓛᖑᔪᒥ ᑕᒪᒃᑭᓄᑦ ᐱᓐᓇᕆᔭᑦᑎᓐᓂ ᓂᐅᕕᖅᐸᒃᑐᓄᑦ,” ᐃᓚᒋᐊᖅᓯᓚᐅᖅᐳᖅ.

ᑐᐊᐃᓐ ᐅᐃᓪᓯᓐ, ᐊᖓᔪᖅᑳᑉ−ᑐᒡᓕᐊ ᐋᔩᖃᑎᒌᖕᓂᕐᒧᑦ ᐅᑭᐅᖅᑕᖅᑐᒥ ᑯᐊᐸᒃᑯᓐᓄᑦ, ᐅᖃᓚᐅᖅᐳᖅ ᑕᒪᒃᑭᑦ ᑯᐊᐸᒃᑯᓐᓂ ᓂᐅᕕᕐᕕᖏᑦ ᐊᒃᑐᖅᑕᐅᓂᖃᓚᐅᙱᓚᑦ, ᐊᒻᒪ ᐃᓚᐃᓐᓇᖏᓐᓂ ᒪᕐᕈᒋᔭᖓᓂ ᐱᓪᓚᕆᐅᙱᑦᑐᓄᑦ ᐱᔨᑦᑎᕋᕐᓂᕐᒥ ᑐᓂᓯᔨᐅᔪᓂ, ᓲᕐᓗ ᖃᖓᑕᓲᒧᑦ ᐊᐅᓪᓚᕐᓂᕐᒧᑦ ᐱᓕᕆᔨᐅᔪᓂ, ᐊᒃᑐᖅᑕᐅᓯᒪᕗᑦ.

ᐊᑐᐃᓐᓇᐅᙱᓐᓂᖓᓂ ᓄᓇᕐᔪᐊᓕᒫᒥᐅᓚᐅᖅᐳᖅ ᐅᓐᓄᖓᓄ ᔪᓚᐃ 18−ᒥ, ᕿᒪᐃᓪᓗᓂ ᐃᓚᖏᓐᓂ Microsoft Windows ᐊᑐᖅᑎᐅᔪᓂ ᑕᑯᓂᖏᓐᓂ “ᑐᖑᔪᖅᑐᒥ ᑕᑯᒃᓴᐅᕝᕕᐊᓂ ᑐᖁᓂᐅᔪᒥ,” ᓴᖅᑭᓲᖑᔪᒥ ᖃᕋᓴᐅᔭᖅ ᐊᑐᖅᑐᒥ Windows ᓄᑖᙳᖅᐸᓪᓕᐊᓂᖓᓂ ᐊᔪᓕᕌᖓᑦ.

ᑲᓇᑕᒥ ᑐᓴᒐᒃᓴᓕᕆᔨᒃᑯᑦ ᐅᓂᒃᑳᕆᓚᐅᖅᐳᑦ ᐱᔨᑦᑎᕋᕐᓂᐅᔪᓂ ᐅᑯᓇᙵᑦ ᐃᓚᖏᓐᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐱᓕᕆᔾᔪᓯᐅᔪᓂ ᖃᖓᑕᓲᓄᑦ ᐊᒻᒪ ᓄᓇᓂ ᑭᒡᓕᐅᔪᓂ ᐱᔨᑦᑎᕋᕐᓂᐅᔪᓂ ᐊᒃᑐᖅᑕᐅᓪᓗᑎᒃ.

ᑕᓇᐃᑎᐊᓐ ᓄᐊᑦᑯᑦ ᐱᓕᕆᔾᔪᓯᖓ ᐊᒻᒪ ᐊᐅᓚᑕᐅᓂᖓ ᐊᒃᑐᖅᑕᐅᓚᐅᙱᓚᑦ ᐊᑐᐃᓐᓇᐅᙱᓐᓂᖓᓂ, ᐅᖃᓚᐅᖅᐳᖅ ᑲᓕ ᓘᕕᔅ, ᐅᖃᐅᔾᔨᔨᒻᒪᕆᒃ ᖃᖓᑕᓲᖑᔪᓄᑦ.

ᑲᒻᐸᓂ ᓇᐅᑦᑎᖅᓱᓚᐅᖅᐳᖅ ᖃᓄᐃᓐᓂᐅᔪᒥ ᐊᒻᒪ ᑐᓂᓯᕙᓪᓕᐊᓗᓂ ᓄᑖᙳᖅᐸᓪᓕᐊᓂᐅᔪᓂ ᐱᔭᕆᐊᖃᕈᓂ, ᓘᕕᔅ ᐃᓚᒋᐊᖅᓯᓚᐅᖅᐳᖅ.

ᐅᖃᐅᓯᒃᓴᓕᐊᖑᔪᒥ CrowdStrike ᐃᑭᐊᖅᑭᕕᖓᓐᓂ ᓇᓗᓇᐃᖅᓯᓚᐅᖅᐳᖅ “ᐊᑲᐅᙱᓕᐅᕈᑕᐅᔪᖅ ᓇᓗᓇᐃᖅᑕᐅᓯᒪᕗᖅ, ᓄᖅᑲᖅᑎᑕᐅᓪᓗᓂ ᐊᒻᒪ ᐋᖅᑭᒃᓯᒥᕐᓯ ᐱᒋᐊᖅᑕᐅᓪᓗᓂ.” ᐅᖃᓚᐅᖅᐳᖅ Mac ᐊᒻᒪ Linux ᐱᓕᕆᔾᔪᓯᐅᔪᓂ ᐊᒃᑐᖅᑕᐅᓚᐅᙱᓚᑦ, ᐊᒻᒪ “ᐅᓇ ᖃᕋᓴᐅᔭᑎᒍᑦ ᐱᒋᐊᕐᓂᐅᓚᐅᙱᓚᖅ.”

ᓄᓇᕗᒻᒥ ᒐᕙᒪᒃᑯᑦ ᐅᖃᓚᐅᖅᐳᖅ ᐅᖃᐅᓯᒃᓴᓕᐊᖑᔪᒥ ᐱᔨᑦᑎᕋᕐᓂᖏᑦ ᐊᒃᑐᖅᑕᐅᓚᐅᙱᓚᑦ ᐊᑐᐃᓐᓇᐅᙱᓐᓂᖓᓂ.

ᐅᖃᓚᐅᖅᐳᖅ ᐃᖃᓗᖕᓂ, ᕿᑭᖅᑕᓂ ᐋᓐᓂᐊᕕᖓᑕ ᐊᐅᓚᑕᐅᓂᖏᑦ ᐊᒻᒪ Meditech ᖃᕋᒪᐅᔭᑎᒍᑦ ᐋᓐᓂᐊᕕᖕᒥ ᑎᑎᖅᑲᖁᑎᖏᑦᑕ ᐊᕿᑦᑐᑦ ᐱᓕᕆᔾᔪᑎᖏᑦ ᓄᓇᕗᑦ ᐊᑐᓲᖑᔪᓂ “ᑕᒪᒃᑭᐅᒪᔪᒥ ᐊᐅᓚᑕᐅᓂᖃᖅᐳᑦ ᐊᑲᐅᙱᓕᐅᕈᑕᐅᔪᓂ ᐅᓂᒃᑳᕆᔭᐅᓚᐅᕐᓇᑎᒃ.”

ᐃᓚᖏᑦ ᑮᓇᐅᔭᓂ ᐃᓕᔭᐅᓂᐅᔪᓂ ᓄᓇᕗᒻᒥ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᔪᓄᑦ ᑭᖑᕙᕆᐊᓚᐅᖅᐳᑦ, ᒐᕙᒪᒃᑯᑦ ᐅᖃᓚᐅᖅᐳᖅ.

“ᓄᓇᕗᒻᒥ ᒐᕙᒪᒃᑯᑦ ᐃᖅᑲᓇᐃᔭᑦᑎᐅᔪᑦ ᑮᓇᐅᔭᖅᑖᕆᔭᐅᔪᓂᒃ ᐴᖅᑕᐅᓂᐅᔪᑦ ᑮᓇᐅᔭᒃᑯᕕᖏᓐᓄᑦ ᑭᖑᕙᕆᐊᓚᐅᖅᐳᑦ ᐱᑎᑕᐅᓂᐅᔪᒥ ᐊᒃᑐᐃᓂᐅᔪᓂ ᑮᓇᐅᔭᒃᑯᕕᖓᓐᓂ ᐱᔨᑦᑎᕋᕐᓂᐅᔪᒥ ᑐᓂᓯᔨᐅᔪᓄᑦ ᒫᓐᓇ ᐱᓯᒪᓕᖅᐳᑦ ᐊᑭᓕᖅᑕᐅᓂᖏᓐᓂ.”

ᒐᕙᒪᒃᑯᑦ ᐅᖃᐅᔾᔨᓚᐅᖅᐳᑦ ᐃᖅᑲᓇᐃᔭᖅᑎᖏᓐᓂ ᖃᐅᔨᒋᐊᕐᓂᕐᒥ ᑮᓇᐅᔭᒃᑯᕕᖓᓐᓂ ᐊᑲᐅᙱᓕᐅᕈᑕᐅᔪᓂ ᑲᔪᓰᓐᓇᖅᐸᑕ.

Northwestel Inc.−ᑯᑦ ᐱᔨᑦᑎᕋᕐᓂᖏᑦ ᐊᒃᑐᖅᑕᐅᓂᖃᓚᐅᙱᓚᑦ, ᐅᖃᓚᐅᖅᐳᖅ ᑲᑕᕆᓐ ᓂᐅᓴᒻ, ᓂᐅᕕᐊᒃᓴᖃᕐᓂᕐᒥ ᐊᒻᒪ ᐋᔩᖃᑎᒌᖕᓂᕐᒥ ᑐᑭᒧᐊᒃᑎᑦᑎᔨ ᑐᓴᐅᒪᑎᑦᑎᔾᔪᑎᓂ ᑐᓂᓯᔨᐅᔪᒥ.

ᖃᕋᓴᐅᔭᑎᒍᑦ ᐱᓕᕆᔾᔪᓯᐅᔪᓂ ᓄᓇᓕᐸᐅᔭᒥ ᐃᖃᓗᖕᓂ ᐊᒃᑐᖅᑕᐅᓚᐅᙱᓚᑦ, ᐅᖃᓚᐅᖅᐳᖅ ᐋᔩᖃᑎᒌᖕᓂᕐᒧᑦ ᐊᐅᓚᑦᑎᔨᐅᓚᐅᑲᒃᑐᖅ ᔭᕗᕆ ᐳᕋᐃᓐ.

ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑎᒥᖁᑎᖓ, ᑐᓂᓯᓚᐅᖅᐳᑦ ᑐᓴᒐᒃᓴᓕᐊᖑᔪᒥ ᔪᓚᐃ 19−ᒥ ᐅᖃᖅᑐᒥ “ᐱᔨᕆᔾᔪᓯᐅᔪᑦ ᐊᒃᑐᐃᓂᖃᙱᓚᖅ ᐅᕝᕙᓘᓐᓃᑦ ᐊᒃᑐᖅᑕᐅᓯᒪᙱᓚᑦ Crowdstrike ᐊᒻᒪ Microsoft ᓄᓇᕐᔪᐊᓕᒫᒥ ᐊᑐᐃᓐᓇᐅᙱᓐᓂᖓᓂ.”