ᓴᕚᓇ ᐱᑯᔭᒃ ᐅᕙᓂ ᐊᔾᔨᖃᕐᑐᖅ ᐊᓈᓇᖓᑕ ᑐᓂᓂᑯᖓᓂ. (ᐊᔾᔨᙳᐊᖅ ᐅᕙᙵᑦ ᓰᐸ ᐱᑯᔭᒃ)

ᓄᓇᕗᒥ ᒐᕙᒪᒃᑯ ᑐᓴᖅᑎᑦᑎᔪ ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᖅᑕᖃᓕᕐᓂᖓᓂᒃ ᐃᓱᒪᒋᓪᓗᒍ ᓴᕚᓇ ᐱᑯᔭᒃ

22-ᓂ ᐅᑭᐅᓕᒃ ᐃᓕᓐᓂᐊᖅᑎ ᑐᖁᑕᐅᓚᐅᕐᒪᓐ ᐋᑐᕚᙵ ᓯᑎᐱᕆ 11-ᒥ: ᐊᕐᕌᒍᒧᑦ ᐃᓕᓐᓂᐊᕐᓂᕐᒧᑦ ᐃᑲᔫᑎ ᑎᑭᓯᒪᔪᖅ $5,000-ᒧ ᐊᑕᐅᓯᕐᒥ ᓄᓇᕗᒥᐅᑕᒥ ᐃᑲᔫᑎᐅᓇᔭᕐᑐᖅ ᐃᓕᓐᓂᐊᕐᓂᖓᓄᑦ

By ᔨᐊᕝ ᐱᐊᑦᓯᐃ
ᓄᓇᓕᖕᓂ ᑐᓴᒐᒃᓴᓕᐅᕐᑎᐅᓂᕐᒧᑦ ᐱᓕᕆᐊᒃᓴᓄᑦ ᑐᓴᒐᒃᓴᓕᐅᕐᑎ

For English version, see GN announces scholarship in memory of Savanna Pikuyak

ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᒥ ᐋᖅᑭᒃᓯᓚᐅᕐᑐᑦ ᐃᓱᒪᒋᓪᓗᒍ ᐊᕐᓇ ᐃᓐᓇᕈᓕᓵᕐᓂᑯ ᓴᓂᕋᔭᒃᒥᐅᑕᒥ ᑐᖁᑕᐅᓚᐅᕐᑐᒥ ᐋᑐᕚᙵ ᑖᓐᓇ ᑕᖅᑭᖅ ᐱᒋᐊᓕᓵᕐᓯᒪᓕᕐᑎᓪᓗᒍ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐅᖃᓚᐅᕐᑐᑦ ᓯᑎᐱᕆ 21-ᒥ.

ᐋᑐᕚᒥ ᐸᓖᓯᒃᑯᑦ ᓇᓗᓇᐃᕐᓯᓚᐅᕐᓯᒪᖕᒪᑕ ᓯᑎᐱᕆᒥ 11-ᒥ ᐃᓄᐊᖅᑕᐅᓚᐅᕐᑐᒥ ᐅᓇᐅᓂᕋᐃᓪᓗᑎᒃ ᓴᕚᓇ ᐱᑯᔭᒃ, 22-ᓂ ᐅᑭᐅᓕᒃ. ᑎᒥᖓ ᓇᓂᔭᐅᓚᐅᕐᓯᒪᖕᒪ ᐃᒡᓗᓂ ᐋᑲᓐᑐᐃᓐ ᓯᓚᑦᑐᖅᓴᕐᕕᐅᑉ ᖃᓂᒋᔭᖓᓂ ᐋᑐᕚᒥ, ᑕᒫᓂ ᐃᓕᓐᓂᐊᕆᐊᖅᑎᓪᓗᒍ ᐃᖢᐊᕐᓴᐃᔨᐅᓂᕐᒥ.

ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᑦ 33-ᓂ ᐅᑭᐅᓕᖕᒥ ᓂᑯᓚᔅ ᐊᐃᐱᒥ ᑐᖂᑦᑎᓂᕋᖅᑕᐅᓪᓗᓂ.

“ᓴᕙᓇ ᐱᓕᕆᓂᒃᑯᑦ ᒪᓕᒍᒥᓇᓚᐅᕐᑐᖅ ᐊᒻᒪᓗ ᐃᓄᑦᑎᐊᕙᐅᓪᓗᓂ,” ᒥᓂᔅᑕ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᔮᓐ ᒪᐃᓐ ᐅᖃᓚᐅᕐᑐᖅ ᑐᓴᒐᒃᓴᓕᐊᒃᑯᑦ.

“ᐃᒻᒥᓂ ᐊᔪᕈᓐᓃᖅᐹᓪᓕᕈᒪᓚᐅᕐᑐᖅ ᓄᓇᕗᒥᑦ ᐃᑲᔪᕈᒪᓪᓗᓂ.”

ᐅᓇ $5,000 ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᓂ ᐊᕐᕌᒍᑕᒫᓐ ᑐᓐᓂᓯᖃᑦᑕᕐᓂᐊᕐᒪᑕ ᓄᓇᕗᒥᒃ ᐃᓄᖕᒧᑦ ᐃᖢᐊᕐᓴᐃᔨᐅᓂᕐᒥᒃ ᐃᓕᓐᓂᐊᕈᒪᔪᒧᑦ ᓄᓇᕗᒥᑦ ᓯᓚᑦᑐᖅᓴᕐᕕᒃᒥᑦ, ᑐᓴᒐᒃᓴᐃᑦ ᐅᖃᕐᓯᒪᓚᐅᕐᑐᑦ.

ᑖᔅᓱᒥᖓ ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᖅᑖᕈᓐᓇᕐᓂᐊᕐᓗᓂ ᑕᒪᒃᑯᐊ ᐱᓇᓱᒃᑐᑦ ᑎᑎᕋᕆᐊᖃᕋᔭᖅᑐᑦ 500-ᓂ ᐅᖃᐅᓯᓕᖕᒥ ᐅᓂᒃᑳᓂᒃ, ᐃᓚᖃᕐᓗᓂ ᓇᐃᑦᑐᒥ ᓇᓗᓇᐃᔭᕈᑎᒥ ᑭᓇᐅᖕᒪᖔᑕ ᐅᖃᕐᓯᒪᔪᓂᒃ ᓄᓇᖏᓐᓂ, ᑐᑭᓯᒋᐊᖅᑎᑦᑎᓯᒪᓗᑎᒃ ᖃᓄᐃᒻᒪ ᐃᖢᐊᕐᓴᐃᔨᐅᓂᕐᒥᒃ ᐃᓕᓐᓂᐊᕈᒪᖕᒪᖔᑕ ᐊᒻᒪᓗ ᖃᓄᖅ ᐃᖢᐊᕐᓇᐃᔨᐅᓕᖅᐸ ᐃᑲᔪᕈᓐᓇᕋᔭᕐᒪᖔᑦ ᓄᓇᕗᒥᐅᓂᒃ.

ᐱᓇᓱᖕᓇᖅᑐᖅ ᐃᓱᓕᕝᕕᖃᖅᖢᓂ ᑕᒪᑐᒪᓂ ᐃᓕᓐᓂᐊᕐᓇᒧᑦ ᐃᑲᔫᑎᒃᓴᓂᒃ ᐅᒃᑑᐱᕆ 14-ᒥ. ᑐᓐᓂᖅᑯᑎᐅᓇᔭᕐᑐᖅ ᖁᕕᐊᓲᑎᖃᕐᓇᒥ ᑕᒪᓐᓇᓗ ᖃᑯᒎᓛᕐᒪᖔᑦ ᓇᓂᐅᓂᐊᕐᒪᖔᓪᓘᓐᓃᑦ ᐅᖃᐅᓯᐅᓛᖅᖢᓂ.

“ᓴᕚᓇᐅᑉ ᐃᓅᔪᓐᓃᕐᓂᖓ ᖁᕕᐊᓇᙱᓗᐊᖅᑐᖅ ᐃᓚᖏᓐᓄᑦ, ᐱᖃᓐᓇᖏᓐᓄᑦ, ᓄᓇᓕᖕᓄᑦ ᐊᒻᒪᓗ ᓄᓇᕗᒻᒥᐅᓕᒫᓄᑦ,” ᒪᐃᓐ ᐅᖃᕐᑐᖅ.

“ᓴᕚᓇᐅᑉ ᐃᓚᖏᑦ ᖃᐅᔨᖁᕙᒃᑲ ᓇᒡᓕᒋᕙᒃᑲ ᓄᓇᖃᑎᖏᓪᓗ. ᑕᐃᒪᑐᖅ ᐅᓇ ᖃᓄᐃᓕᐅᕐᓂᖅ ᐊᑎᖓᒍᑦ ᐃᑲᔪᕈᑎᐅᓂᐊᕐᐳᖅ ᒪᒥᑉᐸᓪᓕᐊᓇᓱᖕᓂᖏᓐᓄᑦ.”

ᓄᓇᕗᒥᑦ ᒐᕙᒪᒃᑯᑦ ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᖏᑦ ᐃᓚᒋᔭᐅᔪᖅ ᑖᔅᓱᒧᖓ ᐃᓱᒪᒋᔭᖃᖅᑐᓂᒃ ᑕᒪᑐᒪᓂ ᐱᓇᓱᐊᕈᓯᕐᒥ ᐃᓚᖃᖅᖢᓂ ᑕᐃᒪᙵ ᐱᑯᔭᒃ ᐃᓅᔪᓐᓃᓚᐅᕐᑎᓪᓗᒍ.

ᓯᑎᐱᕆ 15-ᒥ, ᐱᖃᓐᓇᕆᔭᐅᔪᑦ ᐊᒻᒪ ᐃᓚᒋᔭᐅᔪᑦ ᑲᑎᓚᐅᕐᓯᒪᔪᑦ ᐃᒡᓘ ᓯᓚᑖᓂ ᐃᓄᐊᖅᑕᐅᕝᕕᖓᑕ. ᐊᒻᒪᓗ ᖃᕋᓴᐅᔭᒃᑯᑦ ᐅᖃᐅᓯᐅᑲᑕᒃᑐᑦ ᓴᖅᑭᑎᑕᐅᖃᑦᑕᓚᐅᖅᖢᑎᒃ ᐅᑯᓇᙵᑦ ᐋᑲᓐᑯᐃᓐ ᓯᓚᑦᑐᖅᓴᕐᕕᒃᒥ ᐊᒻᒪᓗ ᓄᓇᕗᑦ ᓯᕗᓂᒃᓴᕗᑦᒥ, ᐃᓄᖕᓄᑦ ᓯᓚᑦᑐᖅᓴᕐᕕᒃ ᐋᑐᕚᒥ ᐃᓕᓐᓂᐊᕆᐊᕐᕕᒋᓂᑯᖓᓂᒃ.

“ᓂᕿᓕᐅᒃᑳᓘᓚᐅᕐᒥᔪᖅ ᐊᒻᒪᓗ ᖃᐅᔨᒪᕈᓘᔭᖅᖢᓂ ᑭᓱᓕᒫᐸᓗᖕᓂ,” ᐅᖃᓚᐅᕐᑐᖅ ᓰᐸ ᐱᑯᔭᒃ, ᓴᕚᓇᐅ ᐊᓈᓇᖓ, ᕙᐃᔅᐳᒃᑯᑦ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

“ᑭᐅᑲᐅᖅᑐᕈᓘᔭᖅᐸᓚᐅᕐᑐᖅ ᓲᖃᐃᒻᒪ ᐃᓄᖕᓂ ᖁᖓᑎᑦᑎᓇᓱᒃᖢᓂ ᐊᒻᒪ ᐃᒡᓚᖅᑎᑦᑎᓇᓱᒃᖢᓂ.”

Share This Story

(0) Comments