ᓄᓇᕗᒻᒥ ᒐᕙᒪᒃᑯᑦ ᐊᐱᕆᕗᑦ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᖏᓐᓂᑦ ᓄᖅᑲᖅᑎᑦᑎᓂᕐᒥ ᓄᓇᕗᒻᒥ ᑐᙵᕕᒃᑯᑦ ᐅᖃᐅᓯᕐᒧᑦ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ

For the English version of this story, please see GN asks NTI to kill lawsuit over Inuktut language education.

ᓄᓇᕗᒻᒥ ᒐᕙᒪᒃᑯᑦ ᐊᐱᕆᓯᒪᕗᑦ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᓂᑦ ᑐᓵᓂᖓᓂ ᐱᓕᕆᓂᕆᔭᖓᓂ ᑲᔪᓰᓐᓇᖅᑐᒥ ᒪᓕᒐᑎᒍᑦ ᐅᓇᑕᕈᑎᒋᔭᖓᓂ ᓄᓇᕗᒻᒥ ᑐᙵᕕᒃᑯᓐᓂᑦ ᐃᓄᐃᑦ ᐅᖃᐅᓯᖓᓐᓂ ᐃᓕᓐᓂᐊᖅᑎᑦᑎᓂᐅᔪᒥ.

ᒐᕙᒪᒃᑯᑦ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᑦ ᑲᓇᑕᒥ ᑐᓵᖁᔨᕗᑦ ᐊᔪᐃᓐᓇᕆᐊᒃᑲᓐᓂᕐᓂᕐᒥ ᓄᓇᕗᒻᒥ ᐊᔪᐃᓐᓇᕆᐊᒃᑲᓐᓂᕐᕕᒃ ᐃᖅᑲᖅᑑᑎᕕᓂᕐᓄᑦ ᐃᓱᒪᓕᐊᖑᔪᒥ ᐱᔪᓐᓇᖅᑎᑦᑎᓚᐅᖅᑐᒥ ᓄᓇᕗᒻᒥ ᑐᙵᕕᒃᑯᑦ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᒐᕙᒪᒃᑯᓐᓄᑦ ᑲᔪᓯᓂᖓᓂ.

“ᐊᔪᐃᓐᓇᕆᐊᒃᑲᓐᓂᕐᓂᕐᒥᖁᑦᑎᖕᓂᖅᐹᖅ ᐃᖅᑲᖅᑐᐃᔨᒧᑦ ᐱᓕᕆᕝᕕᐅᑐᐃᓐᓇᕆᐊᖃᖅᐳᖅ ᐋᖅᑭᒃᓯᓂᕐᒥ ᐱᒻᒪᕆᐅᔪᒥ ᒪᓕᒐᑎᒍᑦ ᐊᑲᐅᙱᓕᐅᕈᑕᐅᔪᒥ ᐅᕙᓂ ᐱᓕᕆᓂᕐᒥ ᒪᓕᒐᑎᒍᑦ ᖃᓄᐃᓕᐅᕐᓂᖃᕐᓂᕐᒥ ᒥᑭᐸᓗᒃᑐᒥ ᐊᑭᐅᔪᒧᑦ ᐱᓕᕆᖃᑎᒌᒃᑐᓂ,” ᑐᓴᒐᒃᓴᓕᐊᖑᔪᒥ ᑐᓂᔭᐅᔪᒥ ᓯᕗᓕᖅᑎᐅᑉ ᑎᑎᕋᕐᕕᖓᓂ ᐅᓐᓄᒃᑯᑦ ᓄᕕᐱᕆ 1-ᒥ ᐅᖃᓚᐅᖅᐳᖅ.

ᑭᓯᐊᓂ ᓄᓇᕗᒻᒥ ᑐᙵᕕᒃᑯᑦ ᐅᖃᖅᐳᑦ “ᐊᐃᑦᑖᕈᓱᖕᓂᖏᓐᓂ” ᒐᕙᒪᒃᑯᑦ ᓄᖅᑲᖅᑎᑦᑎᓇᓱᐃᓐᓇᕐᓂᖏᓐᓂ ᐱᓕᕆᓂᐅᔪᒥ ᐃᖅᑲᖅᑐᐃᕕᖕᒧᐊᖅᑕᐅᓂᖓᓄᑦ.

ᓯᕗᓕᖅᑎ P.J. ᐊᕿᐊᕈᖅ ᐅᖃᓚᐅᖅᐳᖅ ᒐᕙᒪᖓ “ᐊᖏᖅᓯᒪᓂᖏᓐᓂ ᓇᓗᓇᐃᖅᓯᓂᕐᒥ ᑕᒪᒃᑭᑦ ᓄᓇᕗᒻᒥ ᐃᓕᓐᓂᐊᖅᑎᑦ ᐃᓕᓐᓂᐊᕈᓐᓇᕐᓂᖏᓐᓂ ᐃᓄᒃᑐᑦ.”

ᐊᕿᐊᕈᖅ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᓂᑦ ᓄᖅᑲᖅᑎᑦᑎᓂᕐᒥ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᒐᕙᒪᒃᑯᑦ ᐊᒻᒪ ᓄᓇᕗᒻᒥ ᑐᙵᕕᒃᑯᑦ ᐱᓕᕆᖃᑎᒌᒍᓐᓇᕐᓂᖏᓐᓂ ᐋᖅᑭᒍᑎᒃᓴᒥ.

“ᐃᖅᑲᖅᑐᐃᕕᓕᐊᕐᓂᖅ ᑭᐅᔾᔪᑕᐅᙱᑦᑐᖅ,” ᐊᕿᐊᕈᖅ ᐅᖃᐅᓯᐅᓚᐅᖅᐳᖅ ᐅᖃᓚᐅᕐᓂᖓᓂ ᑐᓴᒐᒃᓴᓕᐊᖑᔪᒥ

ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᐅᖃᓚᐅᖅᐳᖅ ᑲᑐᔾᔨᖃᑎᒌᖑ “ᖁᒃᓴᓪᓚᒃᐳᑦ” ᓄᓇᕗᒻᒥ ᒐᕙᒪᒃᑯᑦ ᖃᓄᐃᓕᐅᕈᑎᖏᓐᓂ.

“[ᑕᐃᒃᑯᐊ] ᐊᑐᐃᓐᓇᖅᐳᑦ ᐱᑕᖃᖅᐸᒌᖅᑐᓂ ᐃᑲᔪᕈᑎᒃᓴᓂ ᑭᖑᕙᕆᐊᖅᑎᑦᑎᓂᕐᒥ ᐃᖅᑲᖅᑐᐃᓂᕐᒥ ᐃᖅᑲᖅᑐᐃᕕᖕᒥ ᐅᑯᓄᖓ ᓄᓇᕗᒻᒥ ᑐᙵᕕᒃᑯᑦ, ᐃᓄᖕᓄᑦ ᐃᓕᓐᓂᐊᖅᑎᓂ ᐊᒻᒪ ᐃᓚᒌᖑᔪᓄᑦ, ᐊᐱᕆᑐᐃᓐᓇᖅᑐᓂ ᐱᓕᕆᐊᖑᓂᖏᓐᓂ ᓇᓕᒧᑎᑕᐅᓗᑎᒃ,” ᑰᑦᑎᖅ ᐅᖃᐅᓯᐅᓚᐅᖅᐳᖅ ᐅᖃᕐᓂᖓᓂ ᑐᓴᒐᒃᓴᓕᐊᖑᔪᒥ ᐅᒃᑐᐱᕆ 31−ᒥ.

ᐃᓕᓐᓂᐊᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ “ᐊᒃᓱᕈᖅᖢᑎᒃ ᐱᓕᕆᕗᑦ” ᐃᓄᒃᑐᑦ ᐃᓕᓐᓂᐊᕈᑎᓕᐅᖅᑕᐅᓯᒪᔪᓂᑦ, ᑐᓴᒐᒃᓴᓕᐊᖅ ᐅᖃᖅᓯᒪᕗᖅ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᐅᖃᓚᐅᕐᓂᖓᓂ.

ᑭᓯᐊᓂ ᐃᖏᕐᕋᓂᖓ ᓱᒃᑲᙱᓗᐊᖅᐳᖅ ᓄᓇᕗᒻᒥ ᑐᙵᕕᒃᑯᓐᓄᑦ, ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᖃᐃᖁᔨᒥᖃᕐᓂᖓᓂ ᐊᕐᕌᒍᓄᑦ-ᑕᓪᓕᒪᓄᑦ ᐸᕐᓇᐅᑎᖓᓂ ᐊᑐᓕᖅᑎᑦᑎᓂᕐᒥ ᐃᓄᐃᑦ ᐅᖃᐅᓯᖓᓐᓂ ᐱᒋᐊᓕᓵᖅᑐᓂ ᖁᑦᑎᖕᓂᓕᖕᒧᑦ 12−ᒧᑦ.

ᓯᑎᐱᕆᒥ ᓄᓇᕘᑉ ᐊᔪᐃᓐᓇᕆᐊᒃᑲᓐᓂᕐᓂᕐᒥ ᐃᖅᑲᖅᑐᐃᕕᖓ ᐃᑲᔪᖅᓱᐃᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓂᑦ, ᐊᖏᙱᖦᖢᑎᒃ ᓄᓇᕗᒻᒥ ᒐᕙᒪᒃᑯᑦ ᓄᖅᑲᖅᑎᑦᑎᓇᓱᐊᕐᓂᖓᓂ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᓄᓇᕗᒻᒥ ᑐᙵᕕᒃᑯᑦ ᓴᖅᑭᑎᓚᐅᖅᑕᖓᓂ ᐅᒃᑐᐱᕆ 2021−ᒥ — ᐊᑯᓂᐅᓂᖅᓴᒥ ᐊᕐᕌᒍᓄᑦ ᐱᖓᓱᓄᑦ ᖄᖏᖅᓯᒪᓕᖅᑐᓂ.

ᓄᓇᕗᒻᒥ ᑐᙵᕕᒃᑯᑦ, ᑲᑐᔾᔨᖃᑎᒌᑦ ᑲᒪᒋᔭᖃᖅᑐᑦ ᓇᓗᓇᐃᖅᓯᓂᕐᒥ ᓄᓇᕗᑦ ᐱᓂᖓᓂ ᐱᕚᓪᓕᕈᑎᓂ ᐱᓪᓗᐊᖅᑕᖏᓐᓂ ᐅᕘᓇ ᓄᓇᕗᒻᒥ ᐊᖏᕈᑕᐅᔪᒥ, ᐃᖅᑲᖅᑐᒐᒃᓴᙳᖅᑎᑦᑎᓚᐅᖅᐳᑦ ᓄᓇᕗᒻᒥ ᒐᕙᒪᒃᑯᓐᓂ, ᐅᖃᖅᖢᑎᒃ ᒐᕙᒪᒃᑯᑦ ᑐᓂᓯᔪᓐᓇᖅᓯᒪᙱᓐᓂᖏᓐᓂ ᐃᓄᒃᑐᑦ ᐃᓕᓐᓂᐊᕐᓂᕐᒥ ᓄᓇᕗᒻᒥ.

ᓄᓇᕗᒻᒥ ᑐᙵᕕᒃᑯᑦ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᐅᖃᐅᓯᖃᓚᐅᖅᐳᖅ ᐃᓚᖓ 15−ᒥ ᑲᓇᑕᒥᐅᑕᓄᑦ ᐱᔪᓐᓇᐅᑏᑦ ᐃᓱᒪᖅᓲᑎᓪᓗ, ᓄᖅᑲᖅᑎᑦᑎᔪᒥ ᐊᔾᔨᒌᙱᑎᑦᑎᓂᕐᒥ ᑐᙵᕕᖃᖅᑐᒥ ᐅᖃᐅᓯᕐᒥ. ᓄᓇᕗᒻᒥ ᑐᙵᕕᒃᑯᑦ ᑭᐅᓗᒃᓯᒪᕗᑦ ᐱᑕᖃᙱᓗᐊᕐᓂᖓᓂ ᐃᓄᐃ−ᐅᖃᐅᓯᖓᓐᓂ ᐃᓕᓐᓂᐊᕐᓂᐅᔪᒥ ᓄᖑᓴᖅᐸᓪᓕᐊᓂᖓᓂ ᐊᑐᕐᓂᕐᒥ ᐃᓄᒃᑐᒻᒥ, ᐊᑦᑎᒃᓯᒋᐊᖅᖢᓂ ᐃᓕᓐᓂᐊᕐᓂᕐᒧᑦ ᐱᓂᕐᒥ ᐊᒻᒪᓗᑦᑕᐅᖅ ᐃᓱᓕᑦᑎᓂᕐᒥ ᐅᓄᕐᓂᐅᔪᓂ ᐃᓄᖕᓂ ᐃᓕᓐᓂᐊᖅᑎᓂᑦ.

ᑕᐃᒪᙵᓂ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᑎᑎᕋᐅᓯᐅᓚᐅᕐᓂᖓᓂ, ᓄᓇᕗᒻᒥ ᒐᕙᒪᒃᑯᑦ ᓄᖅᑲᖅᑎᑦᑎᓇᓱᐊᖅᓯᒪᕗᑦ. ᐊᐃᑉᕆᓕ 2023−ᒥ, ᓄᓇᕗᒻᒥ ᒐᕙᒪᒃᑯᑦ ᐊᔪᐃᓐᓇᕆᐊᒃᑲᓐᓂᖅᑎᑦᑎᓚᐅᖅᐳᑦ ᐃᖅᑲᖅᑐᐃᕕᖕᒥ ᐅᖃᐅᔾᔪᐃᓂᕐᒥ ᐱᔪᓐᓇᖅᑎᑦᑎᔪᒥ ᐃᖅᑲᖅᑐᐃᕕᒃᑯᑦ ᑮᓇᐅᔭᐃᖅᑎᑦᑎᒐᓱᐊᕐᓂᕐᒥ ᑲᔪᓯᓂᖓᓂ. ᓯᑎᐱᕆᒥ ᓄᓇᕗᒻᒥ ᐊᔪᐃᓐᓇᕆᐊᒃᑲᓐᓂᕐᕕᒃ ᐃᖅᑲᖅᑑᑎᕕᓂᕐᓄᑦ ᐊᖏᖃᑎᖃᓚᐅᖅᐳᖅ ᑕᐃᔅᓱᒥᖓ ᐃᓱᒪᓕᐊᖑᓂᐅᔪᒥ.