ᒎᒍᓪ ᑐᑭᓕᐅᕆᓂᕐᒥ ᐃᓚᓯᕗᖅ ᐃᓄᒃᑐᒻᒥ ᐅᖃᐅᓯᖓᓂ ᖃᕋᓴᐅᔭᑎᒍᑦ ᐱᔨᑦᑎᕋᕐᓂᖓᓂ

For the English version of this story, please see Google Translate adds Inuktut language to its online service.

ᐃᓄᒃᑐᑦ ᐅᖃᐅᓯᖓ, ᐅᖃᓪᓚᒃᑕᐅᕙᒃᑐᒥ 40,000−ᐸᓗᖕᓂ ᐃᓄᖕᓄᑦ ᑲᓇᑕᒥ, ᒫᓐᓇ ᐊᑐᐃᓐᓇᐅᓂᖅᐳᖅ ᒎᒍᓪ ᑐᑭᓕᐅᕆᓂᕐᒥ, ᐱᔨᑦᑎᕋᕐᓂᐅᔪᖅ ᐊᑐᖅᑕᐅᕙᒃᑐᒥ ᑐᑭᓕᐅᕆᓂᕐᒥ ᑎᑎᕋᖅᓯᒪᔪᓂ, ᐊᔾᔨᙳᐊᓂ, ᑎᑎᖅᑲᖁᑕᐅᔪᓂ ᐊᒻᒪ ᐃᑭᐊᖅᑭᕕᖕᓂ ᒪᒃᐱᒐᐅᔪᓂ ᐊᑕᐅᓯᕐᒥ ᐅᖃᐅᓯᕐᒥ ᐊᓯᐊᓄᑦ, ᖃᕋᓴᐅᔭᒃᑰᕋᑕᐅᔪᒥ ᐱᓕᕆᔨᕐ)ᐊᑦ ᐅᖃᐅᓯᖃᓚᐅᖅᐳᑦ ᐅᒃᑐᐱᕆ 17−ᒥ.

ᐅᓇ ᓇᓗᓇᐃᖅᓯᕗᖅ ᓯᕗᓪᓕᖅᐸᐅᓪᓗᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᒥ ᑲᓇᑕᒥ ᐃᓚᔭᐅᓂᖓᓂ ᐱᓕᕆᕝᕕᐅᔪᒧᑦ.

ᐃᓄᒃᑐᒻᒥ ᑕᒪᐃᑎᒍᑦ ᐅᖃᐅᓯᐅᕗᖅ ᐃᓚᖃᖅᑐᒥ ᐊᔾᔨᒌᙱᑦᑐᓂ ᐅᖃᓪᓚᐅᓯᓂ ᐃᓄᐃᑦ ᐅᖃᐅᓯᖓᓐᓂ ᐅᖃᓪᓚᒃᑕᐅᕙᒃᑐᒥ ᑲᓇᑕᓕᒫᒥ, ᑲᓛᖦᖡᑦ ᓄᓈᓐᓂ ᐊᒻᒪ ᐊᓛᔅᑲᒥ.

ᐊᐃᓴᒃ ᑳᔅᕕᐅᓪ, ᐊᕿᑦᑐᑦ ᐱᓕᕆᔾᔪᑎᖏᓐᓂ ᑎᑎᕋᐅᔭᖅᑎᒻᒪᕆᒃ ᒎᒍᒃᑯᓐᓂ, ᐅᖃᖅᐳᖅ ᐱᓕᕆᐊᒃᓴᐅᔪᖅ ᐱᒋᐊᓚᐅᖅᐳᖅ ᐃᓚᒋᔭᐅᓪᓗᓂ ᐱᒋᐊᕈᑕᐅᔪᒥ ᓴᖅᑭᑎᑦᑎᓂᕐᒧᑦ ᖃᕋᓴᐅᔭᑎᒍᑦ ᖃᐅᔨᒪᓂᐅᔪᒥ ᐅᖃᐅᓯᕐᒥ ᐆᒃᑑᑎᐅᔪᒥ ᐃᑲᔪᖅᓱᐃᓂᕐᒧᑦ 1,000 ᐅᖃᓪᓚᒃᑕᐅᓛᖑᔪᓂ ᐅᖃᐅᓯᕐᓂ ᓄᓇᕐᔪᐊᓕᒫᒥ.

“ᐱᓕᕆᐊᒃᓴᖅ ᐃᓗᐃᑦᑑᓪᓗᓂ ᐱᒋᐊᓚᐅᖅᐳᖅ 2020−ᒥ ᐃᓚᒋᔭᐅᓪᓗᓂ ᒪᓕᒃᑐᓂ 1,000−ᓂ ᐅᖃᐅᓯᕐᓂ ᐱᒋᐊᕈᑕᐅᔪᒥ, ᐅᕙᖓᓗ ᐊᒻᒪ ᖃᔅᓯᐊᕐᔪᖕᓂ ᐊᓯᖏᓐᓂ ᐃᒃᐱᒍᓱᓚᐅᖅᑐᓂ ᐱᓕᕆᑦᑎᐊᒃᑲᓐᓂᕈᓐᓇᕐᓂᑦᑎᓐᓂ,” ᑳᔅᕕᐅᓪ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ ᐱᒋᐊᖅᑎᑕᐅᓂᖃᓚᐅᖅᑎᓪᓗᒍ.

“ᑕᐃᔅᓱᒪᓂ, ᒎᒍᓪ ᑐᑭᓕᐅᕆᓂᕐᒥ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᖃᓚᐅᙱᓚᑦ ᓇᒥᑐᐃᓐᓇᑦᑎᐊᖅ ᐊᒥᐊᓕᑲᓂ.”

ᐱᔨᑦᑎᕋᕐᓂᖅ ᑐᓂᓯᓂᐊᖅᐳᖅ ᐊᑐᖅᑎᐅᔪᓂ ᐱᔪᓐᓇᕐᓂᕐᒥ ᑐᑭᓕᐅᕆᓂᕐᒥ ᐃᓄᒃᑐᒻᒥ ᖃᓪᓗᓈᑎᑐᒻᒧᑦ ᐅᕝᕙᓘᓐᓃᑦ ᖃᓪᓗᓈᑎᑐᑦ ᐃᓄᒃᑐᒻᒧᑦ.

ᒎᒍᒧᑦ, ᓯᕗᓪᓕᖅᐸᐅᔪᒥ ᐱᓕᕆᓂᐅᔪᒥ ᐱᓕᕆᓂᖓᓂ ᐱᓕᒻᒪᒃᓴᐃᓂᕐᒥ ᐆᒃᑑᑎᖓᓂ ᐃᓕᓴᖅᓯᓂᕐᒥ ᐃᓄᒃᑐᒻᒥ.

ᑲᒻᐸᓂᐅᔪᖅ ᐃᓴᓚᐅᖅᐳᑦ ᐃᓄᒃᑐᒻᒥ ᐅᖃᖅᑎᐅᔪᓄᑦ, ᓄᓇᓕᖕᒥᐅᑕᓄᑦ, ᐊᒻᒪ ᐃᓄᖕᓂ ᓯᕗᓕᐅᖅᑎᐅᔪᓂ ᐅᖃᖃᑎᒌᖕᓂᕐᒧᑦ, ᐃᓚᖃᖅᑐᒥ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᐅᑉ ᐃᓄᖕᓄᑦ ᑲᑐᔾᔨᖃᑎᒌᖑᔪᒥ.

ᐃᓄᐃᑦ ᑕᐱᕇᑦ ᑲᓇᑕᒥ ᐃᑲᔪᓚᐅᖅᐳᖅ ᓇᓗᓇᐃᖅᓯᓂᕐᒥ ᐆᒃᑑᑎᐅᔪᖅ ᐊᓂᐊᑎᑦᑎᓂᖓᓂ ᑕᒻᒪᖅᓯᒪᙱᑦᑐᓂ ᑐᑭᓕᐊᖑᓂᐅᔪᓂ, ᐊᒻᒪ ᐅᖃᐅᔾᔨᓚᐅᕆᕗᑦ ᒎᒍᓪᒥ ᐊᓯᐊᓂ ᑎᑎᕋᕐᓂᕐᒧᑦ ᐱᓕᕆᔾᔪᓯᐅᔪᒥ ᐊᓯᐊᓂ ᐃᓄᒃᑎᑑᖅᑐᒥ ᐃᓄᒃᑐᒻᒧᑦ.

“ᓲᖃᐃᒻᒪ, ᐆᒃᑑᑎᐅᔪᖅ ᑕᒻᒪᖅᓯᒪᓂᖃᕐᓂᐊᖅᐳᖅ, ᐱᐅᓪᓚᕆᒃᑐᒥ ᖃᕋᓴᐅᔭᑎᒍᑦ ᑐᑭᓕᐅᕆᓂᖃᙱᓚᖅ. ᑭᓯᐊᓂ ᐃᓄᐃᑦ ᑕᐱᕇᑦ ᑲᓇᑕᒥ ᐅᕙᑦᑎᓐᓂ ᐃᑲᔪᓚᐅᖅᐳᑦ ᐃᓱᒪᓕᐅᕆᓂᕐᒥ ᑭᒡᓕᐅᔪᒥ ᑕᒻᒪᖅᓯᒪᓂᐅᔪᓂ ᖁᑦᑎᓗᐊᕐᓂᖏᓐᓂ ᐋᒃᑲᓘᓐᓃᑦ,” ᑳᔅᕕᐅᓪ ᐅᖃᓚᐅᖅᐳᖅ.

ᐃᓄᒃᑐᒻᒥ ᐊᑐᓲᖑᕗᑦ ᒪᕐᕉᖕᓂ ᑎᑎᕋᕐᓂᕐᒧᑦ ᐱᓕᕆᔾᔪᓯᐅᔪᓂ, ᖃᓄᐃᔮᖅᐸᐃᑦ (ᐃᓄᒃᑎᑐᑦ) ᐊᒻᒪ ᖃᓗᐃᔮᖅᐸᐃᑦ, ᐊᑕᐅᓯᙳᖅᑎᑕᐅᓯᒪᔪᒥ ᖃᓗᐃᔮᖅᐸᐃᒥ ᑭᒡᒐᖅᑐᐃᓂᖃᖅᑐᒥ ᓂᕆᓂᑦ ᑕᒪᒃᑭᓂ ᐅᖃᓪᓚᐅᓯᓂ ᐊᒻᒪ ᐊᑐᓲᖑᕗᖅ ᐃᓅᔨᖓᔪᕐᒥ ᑎᑎᕋᐅᓯᐊᓂ.

ᒎᒍᓪ ᑐᑭᓕᐅᕆᓂᕐᒥ ᑕᒪᒃᑭᓂ ᑎᑎᕋᕐᓂᕐᒧᑦ ᐱᓕᕆᔾᔪᓯᖃᖅᐳᑦ ᐊᑐᐃᓐᓇᐅᔪᓂ ᐊᑐᖅᑕᐅᓂᕐᒧᑦ ᐱᔨᑦᑎᕋᕐᓂᐅᔪᒥ.

“ᓇᓗᓇᐃᖅᓯᔪᒪᓚᐅᖅᐳᒍᑦ ᑕᒪᒃᑭᐅᒪᔪᒥ ᐃᑲᔪᖅᓱᐃᓂᖃᕈᓐᓇᕐᓂᑦᑎᓐᓂ ᑕᒪᒃᑭᓂ ᑎᑎᕋᕐᓂᐅᔪᓂ ᓴᖅᑭᑎᑕᐅᓚᐅᖅᑳᕐᓇᓂ ᐃᓄᓕᒫᓄᑦ ᐊᒻᒪ ᒥᒃᖠᒋᐊᖅᑎᑦᑎᓂᕐᒥ ᐊᑑᑎᖃᕐᓂᖓᓂ ᐱᓕᕆᓂᐅᔪᓂ ᐱᓕᕆᓯᒪᔭᖏᓐᓂ.”

ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᕐᕕᐅᔪᓐᓇᓚᐅᙱᓚᑦ ᐅᖃᐅᓯᒃᓴᓕᐅᕐᓂᕐᒧᑦ ᓄᑖᖑᔪᒥ ᐱᔨᑦᑎᕋᕐᓂᖅ ᐱᒋᐊᖅᑎᓪᓗᒍ, ᑭᓯᐊᓂ ᑎᑎᕋᓚᐅᖅᐳᑦ ᐅᖃᐅᓯᒃᓴᓕᐊᖑᔪᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᔨᐅᔪᓄᑦ ᓂᕆᐅᖕᓂᖏᓐᓂ ᓄᑖᖑᔪᖅ ᐱᓕᕆᔾᔪᑎ ᐃᑲᔪᕐᓂᐊᕐᓂᖓᓂ ᖁᕝᕙᖅᓴᐃᓂᖓᓂ ᐊᖏᒡᓕᒋᐊᖅᑐᒥ ᖃᐅᔨᒪᓂᐅᔪᒥ ᐃᓄᒃᑐᒻᒥ ᐊᒻᒪ ᐃᓄᖕᓂ.

ᑳᔅᕕᐅᓪ ᐅᖃᓚᐅᖅᐳᖅ ᒎᒍᓪ ᕿᒥᕐᕈᓯᒪᕗᖅ ᐃᓚᒋᐊᖅᓯᓂᕐᒥ ᐊᓯᖏᓐᓂ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᓂᑦ, ᓲᕐᓗ ᐅᔨᑉᐅᐊᐃ ᐅᕝᕙᓘᓐᓃᑦ ᑯᕇᒥ, ᑭᓯᐊᓂ ᒫᓐᓇᐅᔪᒥ ᐱᕙᕆᑐᓂᖓᓄᑦ ᐊᔪᕐᓇᓚᐅᑲᒃᐳᖅ.

“ᐊᖏᓂᖓ ᖃᐅᓕᓴᖅᑕᐅᓂᑯᓂ ᑎᑎᕋᖅᓯᒪᔪᓂ, ᐃᓚᐃᓐᓇᖏᓐᓂᓪᓘᓐᓃᑦ ᑐᑭᓕᐊᖑᔪᓂ ᑐᑭᓕᐅᕆᔨᒻᒪᕆᐅᔪᓂ, ᓈᒻᒪᓚᐅᙱᓚᖅ ᐊᐅᓚᓂᐅᔪᒥ ᐆᒃᑑᑎᖃᕐᓂᖓᓂ,” ᐅᖃᓚᐅᖅᐳᖅ.

“ᐱᒻᒪᕆᐅᓇᓱᒋᕙᕋ ᐅᕙᑦᑎᓐᓄᑦ ᐊᑐᕐᓂᕐᒥ ᑲᒪᒋᔭᒃᓴᕆᔭᑦᑎᓐᓂ ᖁᕝᕙᕆᐊᖅᑎᑦᑎᑐᐃᓐᓇᙱᓐᓂᕐᒥ ᑲᑎᙵᓂᐅᔪᓂ ᐊᓯᐊᒎᖅᑐᒥ ᐱᔪᓐᓇᕐᓂᖄᓂᒃᑐᓂ ᐊᕐᕌᒍᒐᓵᓗᖕᓄᑦ, ᑭᓯᐊᓂᑦᑕᐅᖅ ᑲᑎᙵᓂᐅᔪᑦ ᑕᐃᔅᓱᒪᓂᑐᖃᖅ ᑭᓲᙱᑎᑕᐅᓂᑰᔪᓂ ᓲᕐᓗ ᓄᓇᖃᖅᑳᖅᓯᒪᔪᓄᑦ ᐃᓄᖕᓂᑦ ᐊᒥᐊᓕᑲᒥ,” ᑳᔅᕕᐅᓪ ᐅᖃᓚᐅᖅᐳᖅ.