‘ᐱᐅᕗᖅ ᐊᒻᒪ ᓂᕿᑦᑎᐊᕙᐅᕗᖅ’: ᐱᕈᖅᑐᓕᐅᕐᕕᖕᒥ ᒪᑐᐃᕐᓂᐊᖅᑐᖅ ᓴᓪᓗᓂᑦ

For English version, see ‘It’s good and nutritious’: New greenhouse set to open in Salluit

ᑮᓇᐅᔾᔭᒃᓴᕈᑕᐅᙱᑦᑐᒥ ᑲᑐᔾᔨᖃᑎᒌᖑᔪᒥ ᓴᓪᓗᓂᑦ ᐃᖏᕐᕋᔮᖅᐸᓪᓕᐊᕗᖅ ᐱᔭᕇᖅᓯᓂᕐᒥ ᓄᓇᓕᖕᓂ ᓯᕗᓪᓕᖅᐹᖑᔪᒥ ᐱᕈᖅᑐᓕᐅᕐᕕᒃᓴᖓᓂ. ᐱᔭᕇᖅᑕᐅᔪᒃᓴᐅᑕᐅᕗᖅ ᐅᒃᑐᐱᕆᒥ ᐊᒻᒪ ᐸᕐᓇᒃᓯᒪᓗᓂ ᒪᑐᐃᖅᑕᐅᓂᖓᓂ ᐱᕈᖅᑐᕕᓂᕐᓂ ᐊᕝᕗᕐᓂᐅᔪᒥ ᐊᕐᕌᒍᒥ ᐅᐱᕐᙶᖅ 2025−ᒥ.

ᑲᑐᔾᔨᖃᑎᒌᒃᑯᑦ ᖁᕝᕙᖅᓴᐃᔪᓂ ᓂᕿᓂ ᐊᑦᑕᓇᔾᔭᐃᖅᓯᓯᒪᓂᕐᒥ ᓴᓪᓗᓂᑦ ᐱᓕᕆᒋᐊᓚᐅᖅᐳᑦ ᐱᓕᕆᐊᒃᓴᐅᔪᒥ ᓴᓇᓂᕐᒥ ᐱᕈᖅᑐᓕᐅᕐᕕᖕᒥ 2018−ᒥ. ᑲᒪᒋᔭᖃᖅᑐᒥ ᓯᑏᕙᓐ ᒍᕌᓱᕐ, ᓯᕗᓂᐊᓂ ᑲᑎᕕᒃ ᐊᕕᒃᑐᖅᓯᒪᔪᓂ ᒐᕙᒪᒃᑯᓐᓂ ᐱᕙᓪᓕᐊᔪᓕᕆᓂᕐᒥ ᐱᓕᕆᕝᕕᐅᔪᒥ ᐃᓂᖃᓚᐅᖅᐳᖅ.

“ᕿᒥᕐᕈᔪᒪᓚᐅᖅᐳᒍᑦ ᐊᔾᔨᒌᙱᑦᑐᓂ ᓂᕿᒃᓴᖃᖅᑎᑦᑎᐊᕐᓂᕐᒥ ᐊᑲᐅᙱᓕᐅᕈᑕᐅᔪᓂ ᐊᒻᒪ ᐱᒋᐊᖅᑎᑦᑎᓗᑕ ᓄᓇᓕᖕᓂ ᐱᒋᐊᕈᑕᐅᔪᒥ ᐅᓇᐅᙱᖔᖅᑐᒥ ᐱᒋᐊᕈᑕᐅᔪᒥ ᐅᐊᖕᓇᒥ ᕼᐋᒻᓚᐅᔪᒥ ᓄᓇᒥ ᑎᒍᒥᐊᖅᑎᐅᔪᓂ ᑎᒥᖁᑕᐅᔪᒥ,” ᐅᖃᓚᐅᖅᐳᖅ.

ᓴᖅᑭᑎᑦᑎᓚᐅᖅᑎᓪᓗᒋᑦ ᑲᑎᒪᔨᐅᔪᓂ, ᑐᒃᓯᕋᓚᐅᖅᐳᑦ ᑮᓇᐅᔭᖃᖅᑎᑕᐅᓂᐅᔪᒥ ᐊᒻᒪ ᐅᑕᖅᑭᓪᓗᑎᒃ ᐊᕐᕌᒍᓄᑦ -ᒪᕐᕉᖕᓄᑦ ᓄᕙᒡᔪᐊᕐᓇᖅ-19−ᒥ ᐊᒥᓱᓂ ᖃᓂᒪᓐᓇᐅᔪᒥ ᓄᖅᑲᖅᑎᑦᑎᓂᐅᔪᒥ, ᐱᓕᕆᐊᒃᓴᖅ ᐱᒋᐊᓚᐅᖅᐳᖅ.

ᑲᑎᙵᓂᐅᔪᑦ ᐱᓇᓱᐊᓚᐅᖅᐳᑦ ᐊᕐᕌᒍᓄᑦ ᒪᕐᕉᖕᓄᑦ ᓇᓂᓯᓇᓱᐊᕐᓂᕐᒥ ᑳᓐᑐᕌᒃᑎᐅᔪᒥ ᓇᑉᐸᖅᑎᕆᓂᕐᒥ ᐱᕈᖅᑐᓕᐅᕐᕕᖕᒥᑦ, ᐱᔪᓐᓇᓚᐅᙱᖦᖢᑎᒃ. ᐊᓱᐃᓛᒃ, ᓂᕈᐊᓚᐅᖅᐳᑦ ᐱᓕᒻᒪᒃᓴᐃᓂᕐᒥ ᐃᓄᖕᓂ ᓄᓇᓕᖕᓂ ᓇᑉᐸᖅᑎᕆᓂᕐᓂ ᐱᓕᕆᔾᔪᓯᐅᔪᓂ ᐊᒻᒪ ᐱᓕᕆᓂᕐᒥ ᕿᑯᖅᑎᕆᓂᕐᒥ.

“ᐃᓱᒪᓂᐅᔪᒥ ᐱᓕᕆᐊᖑᔪᒧᑦ ᐃᓄᖕᓂ ᐊᓕᐊᓇᐃᒍᓱᓕᕐᓂᖏᓐᓂ ᓂᕆᖃᑦᑕᕐᓂᕐᒥ ᐱᕈᖅᑐᕕᓂᕐᓂ ᐊᒻᒪ ᓰᕐᓇᖅᑐᓂ ᐱᕈᖅᑐᕕᓂᕐᓂ,” ᒍᕌᓱᕐ ᐅᖃᓚᐅᖅᐳᖅ.

ᑖᔅᓱᒧᖓ ᐱᔾᔪᑕᐅᔪᒥ, ᐱᕈᖅᑐᓕᐅᕐᕕᒃ ᐊᑐᖅᑐᐊᕐᓂᕐᒧᑦ ᐊᑭᓕᐅᓯᖃᔾᔮᙱᓚᖅ ᐊᑐᖅᑎᖏᓐᓄᑦ.

ᒍᕌᓱᕐ ᐃᒃᐱᒍᓱᒃᐳᖅ ᐱᕈᖅᑐᕕᓂᕐᓂ ᐃᓂᖏᑦ ᐸᐸᑕᐅᓪᓗᐊᕐᓂᖏᓐᓂ ᓄᓇᓕᖕᓄᑦ ᐊᒻᒪ ᑐᓂᐅᖅᑲᖅᑕᐅᓗᑎᒃ ᑲᑐᔾᔨᖃᑎᒌᖑᔪᓄᑦ ᓲᕐᓗ ᐸᐃᕆᕝᕕᖕᒧᑦ ᐊᒻᒪ ᐊᕐᓇᓄᑦ ᕿᒫᕝᕕᖕᒧᑦ.

“ᓂᕿᑖᕐᔪᐊᓲᖑᕗᖓ ᐊᖑᓇᓱᒃᑎᓂ ᐃᑲᔪᖅᓱᐃᓂᕐᒥ ᐱᓕᕆᐊᖑᔪᒥ,” ᒍᕌᓱᕐ ᐅᖃᓚᐅᖅᐳᖅ. “ᐅᓇ ᑕᑯᔭᐅᖁᕙᕋ ᐊᔾᔨᐸᖃᓗᖕᓂᖓᓂ ᐊᖑᓇᓱᒃᑎᒧᑦ ᐃᑲᔪᖅᓱᐃᓂᐅᔪᒥ ᐱᓕᕆᐊᖑᔪᒥ.”

ᒍᕌᓱᕐ ᓇᓚᐅᑦᑖᕆᕗᖅ ᐱᓕᕆᐊᒃᓴᐅᔪᒥ ᐊᑭᖃᕐᓂᐊᕐᓂᖓᓂ ᑕᑉᐸᐅᖓ $400,000−ᓄᑦ.

“ᐃᑲᔪᖅᓱᐃᓂᖃᕐᔪᐊᖅᐳᒍᑦ ᓇᑉᐸᖅᑎᕆᓂᕐᒥ ᑲᒻᐸᓂᐅᔪᓂ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᓇᖕᒥᓂᕆᔭᐅᔪᑦ ᐊᒻᒪ ᓇᑉᐸᖅᑎᕆᓂᕐᒥ ᑲᒻᐸᓂᐅᔪᑦ ᓄᓇᓕᖕᓂ ᐃᑲᔪᖅᓱᐃᓚᐅᖅᐳᑦ ᐱᓕᕆᐊᒃᓴᐅᔪᒥ ᐊᒻᒪ ᐊᑐᐃᓐᓇᖃᖅᑎᑦᑎᓪᓗᑎᒃ ᐃᖅᑲᓇᐃᔭᖅᑎᓂ ᐊ.ᐅᕆᓂᖓᓂ ᐱᔭᕇᖅᑕᐅᓂᖓᓄᑦ.

“ᑮᓇᐅᔭᖅ ᑭᓱᓕᒫᖑᙱᓚᖅ ᐱᓕᕆᐊᒃᓴᐅᔪᒥ, ᑲᑐᔾᔨᖃᑎᒌᖕᓂᐅᔪᓂ ᓴᓇᔭᕐᓂᑦ.”

ᐱᕈᖅᑐᓕᐅᕐᕕᒃ ᐃᒡᓗᖁᑎᖓ ᐅᖓᕙᕆᐊᖅᑕᐅᓯᒪᔪᒥ ᐊᓂᐊᑎᑦᑎᓂᐅᔪᒥ ᐱᓕᕆᔾᔪᓯᖃᖅᐳᖅ, ᓇᓗᓇᖅᑐᒥ ᐆᒪᔪᒥ ᐃᔾᔪᕐᒥ ᑲᑎᙵᓂᖃᖅᑐᒥ ᖁᐱᕐᕈᓂᑦ ᐊᒻᒪ ᐊᓯᖏᓐᓂ ᓱᓇᑐᐃᓐᓇᐃᑦ ᐆᒪᔪᓂ ᓴᓇᓂᕐᒥ ᐱᐅᔪᒥ ᐊᑯᓂᐅᔪᒥ ᐊᑐᖅᑕᐅᓂᖓᓄᑦ, ᐊᒻᒪ ᕿᑯᕐᒥ ᐊᑖᓃᑦᑐᒥ ᒪᕐᕉᖕᓂ ᐃᓯᒐᓪᓗᐊᖑᔪᒥ ᓯᓕᒃᑎᒋᔪᒥ.

“ᐊᒃᓱᐊᓗᒃ−ᐊᒃᑐᖅᑕᐅᓴᕋᐃᙱᓚᖅt” ᓴᓇᓯᒪᓂᐅᔪᒥ, ᐅᖃᓚᐅᖅᐳᖅ ᖁᕝᕙᖅᓴᐃᔨᐅᔪᖅ ᓂᕿᑦᑕᓂᒃ ᐱᕈᖅᓰᖃᑦᑕᕐᓂᕐᒧᑦ ᓵᒻ ᓴᐅᕕᑦ, ᖃᐅᔨᓴᖅᑎᐅᔪᖅ ᐱᓕᕆᕝᕕᖕᒥ ᐃᓅᖃᑎᒌᖑᔪᓄᑦ ᐃᓱᒪᑐᓂᐅᔪᒥ ᓂᕿᑦᑕᓂᒃ ᐱᕈᖅᓰᖃᑦᑕᕐᓂᕐᒥ, Victoriaville Cégep−ᒥ.

ᐱᓕᕆᖃᑕᐅᓪᓗᓂ ᐃᓚᐅᖃᑕᐅᓂᖃᖅᐳᖅ ᓴᖅᑭᑎᑦᑎᓂᐅᔪᒥ ᐊᒻᒪ ᐸᖅᑭᔭᐅᑦᑎᐊᕐᓂᖓᓂ ᑕᒪᒃᑭᓂ ᑰᔾᔪᐊᕐᒥ ᐊᒻᒪ ᑲᖏᖅᓱᐊᓗᔾᔪᐊᕐᒥ ᐱᕈᖅᑐᓕᐅᕐᕕᖏᓐᓂᑦ, ᐊᒻᒪ ᒫᓐᓇ ᖃᓂᑦᑐᒥ ᐱᓕᕆᖃᑎᖃᖅᐳᖅ ᒍᕌᓱᕐᒥ ᓄᑖᖑᓛᖑᔪᒥ ᐃᓚᒋᐊᕈᑕᐅᔪᒥ ᓴᓪᓗᓂᑦ.

ᓴᐅᕕᑦ ᐳᓚᕋᓲᖑᕗᖅ ᑕᒪᒃᑭᓂ ᐱᖓᓱᓂ ᓄᓇᓕᐅᔪᓂ ᖃᔅᓯᐊᕐᔪᖕᓂ ᐱᓇᓱᐊᕈᓯᕐᓂ ᐊᑕᐅᑦᑎᒥᒃ, ᐊᕐᕌᒍᑕᒫᒥ. ᑕᐃᑲᓃᑎᓪᓗᒍ, ᐊᑐᐃᓐᓇᖃᖅᑎᑦᑎᓲᖑᕗᖅ ᖃᓄᐃᓕᐅᕈᑎᒃᓴᓂ ᒪᒃᑯᒃᑐᓄᑦ ᐊᒻᒪ ᐱᕈᖅᓴᐃᕕᖕᒥ ᐊᓕᐊᓇᐃᒋᔭᖃᖅᑐᓂ ᐱᕈᖅᓯᐊᑦ ᐃᓅᓯᖓᓐᓂ ᐱᓕᖅᑭᒃᑕᕐᓂᐅᔪᓂ, ᖃᓄᖅ ᐊᑐᕐᓂᕐᒥ ᐱᓕᕆᔾᔪᑎᓂ, ᐊᒻᒪ ᖃᓄᖅ ᓇᖕᒥᓂᖃᕐᓂᕐᒥ ᐊᒻᒪ ᐸᖅᑭᓂᕐᒥ ᐃᒪᕐᒥ−ᑐᙵᕕᓕᖕᒥ ᓂᕿᒃᓴᖃᖅᑎᑦᑎᔪᒥ ᐱᕈᖅᓴᐃᓂᕐᒧᑦ ᐱᕈᖅᓯᐊᓂ ᐊᖏᕐᕋᒥ.

ᑕᐅᑐᒃᖢᒍ ᓴᓪᓗᓂᑦ, ᑰᔾᔪᐊᕐᒥ ᐱᕈᖅᑐᓕᐅᕐᕕᒃ, ᓴᖅᑭᑎᑕᐅᓯᒪᔪᒥ 2015−ᒥ, ᐊᐅᓚᑕᐅᕗᖅ ᓄᓇᓕᖕᓂ. ᑲᑎᒪᔨᖏᑦ ᐱᔭᕆᐊᖃᖅᐳᑦ ᑕᒪᒃᑭᒐᓚᖕᓂ ᐃᓱᒪᓕᐊᖑᔪᓂ ᐃᓄᖕᒧᑦ ᑲᒪᒋᔭᖃᖅᑐᒧᑦ ᐅᑭᐅᖅᑕᖅᑐᒥ ᕼᐋᒻᓚᐅᔪᒧᑦ.

45−ᓂ ᐃᓂᒃᓴᐅᔪᓂ ᐊᑐᐃᓐᓇᖃᖅᐳᖅ, ᑕᒪᒃᑭᑦ ᐱᔭᐅᓪᓗᑎᒃ ᐃᓄᑐᐃᓐᓇᕐᓂ ᐅᕝᕙᓘᓐᓃᑦ ᑲᑐᔾᔨᖃᑎᒌᖑᔪᓄᑦ. ᓯᕗᓪᓕᐅᑎᑕᐅᓲᖑᕗᑦ ᐃᓄᖕᓄᑦ ᓄᓇᖃᐃᓐᓇᖅᓯᒪᔪᓄᑦ ᑰᔾᔪᐊᕐᒥ, ᐊᓱᐃᓛᒃ ᓯᕗᓪᓕᐅᑎᑕᐅᓂᖓ ᑐᓂᔭᐅᕗᖅ ᖃᓄᖅ ᐊᑯᓂᐅᑎᒋᔪᒥ ᐃᓄᑦ ᓄᓇᖃᖅᓯᒪᓂᖓᓂ ᓄᓇᓕᖕᓂ, ᐱᒋᐊᖅᖢᓂ ᐊᕐᕌᒍᑦ 10 ᐅᖓᑖᓂ ᐊᕐᕌᒍᓄᑦ ᐱᖓᓱᓄᑦ.

ᑭᓯᐊᓂ, ᓴᐅᕕᑦ ᐅᖃᓚᐅᖅᐳᖅ ᑕᑯᓯᒪᕗᖅ ᖃᓄᖅ ᐊᔪᕐᓇᕐᓂᖓᓂ ᐋᖅᑭᐅᒪᑎᑦᑎᓂᕐᒥ ᑕᐃᒪᐃᖏᓐᓇᖅᑐᒥ ᐊᑭᓕᖅᓱᖅᑕᐅᓇᑎᒃ ᐃᑲᔪᖅᑎᓂ−ᑐᙵᕕᓕᖕᓂ ᐃᖅᑲᓇᐃᔭᖅᑎᐅᔪᓂ ᐸᖅᑭᓂᕐᒧᑦ ᐱᕈᖅᑐᓕᐅᕐᕕᒃ ᐅᓪᓗᓕᒫᖑᔪᒥ.

ᓂᕆᐅᒃᐳᖅ ᒪᕐᕈᓪᓗᐊᓂ ᐃᓄᖕᓂ ᐊᒥᖅᑳᕈᓐᓇᕋᔭᕐᓂᖏᓐᓂ ᐃᑲᕐᕋᓂ−50-ᓂ-ᐱᓴᓱᐊᕈᓯᑕᒫᒥ ᐱᔭᒃᓴᖃᕐᓂᐅᔪᒥ ᐋᖅᑭᐅᒪᑎᑦᑎᓂᕐᒥ ᐱᔭᕆᐊᖃᖅᑎᑦᑎᔪᒥ, ᑕᐃᒫᒃ ᐸᖅᑭᓂᖃᐃᓐᓇᕈᓐᓇᕐᓂᖓᓂ ᐱᕈᖅᓯᐊᓄᑦ ᐊᒻᒪ ᐃᔾᔪᕐᒧᑦ.

ᑕᐃᓐᓇ ᐅᖃᓚᐅᖅᖢᓂᐅᒃ, ᓴᐅᕕᑦ ᐅᖃᐅᓯᖃᓚᐅᖅᐳᖅ ᖁᕕᐊᓐᓂᐅᔪᒥ ᐱᕈᖅᑐᕕᓂᕐᓂ ᐱᓕᕆᓂᐅᔪᒥ.

“ᐅᓇ ᖃᖅᑯᕐᓂᐅᔪᒥ, ᐅᓇ ᑎᐱᖓ, ᐱᐅᕗᖅ ᐊᒻᒪ ᓂᕿᑦᑎᐊᕙᐅᕗᖅ,” ᐅᖃᓚᐅᖅᐳᖅ ᓂᕆᑎᓪᓗᒍ ᑭᐅᑲᒻᐳᒥ ᐊᕝᔪᖅᑕᐅᓵᓚᐅᖅᑐᒥ.

“ᐊᒥᓱᓂ ᐊᔾᔨᒌᙱᑦᑑᑕᐅᔪᓂ ᑭᓱᑐᐃᓐᓇᓂ ᐅᕙᓂ ᐱᕈᖅᑎᑕᐅᔪᓐᓇᖅᑐᓂ, ᑕᐃᒫᒃ ᑕᐃᒪᐃᓕᐅᓚᐅᖅᑕ?”