ᐊᒃᖤ ᖁᑭᖅᑕᐅᓪᓗᓂ ᐊᒻᒪ ᑐᖁᑕᐅᕗᖅ ᑲᖏᖅᖠᓂᐅᑉ ᖃᓂᒋᔭᖓᓂ

For the English version of this story, please see Grizzly bear shot and killed near Rankin Inlet.

ᐊᒃᖤᒥ ᖁᑭᖅᑕᐅᓪᓗᓂ ᐊᒻᒪ ᑐᖁᑕᐅᓚᐅᖅᐳᖅ ᔪᓚᐃ 11−ᒥ ᑕᑯᔭᐅᓚᐅᖅᑎᓪᓗᒍ ᐱᓱᕋᔭᒃᑐᒥ ᑲᖏᖅᖠᓂᐅᑉ ᖃᓂᒋᔭᖓᓂ ᖃᓂᓗᐊᕋᓗᒃᖢᓂ ᓄᓇᓕᖕᓄᑦ.

“ᑕᐃᒪᐃᒐᔪᙱᕕᒡᔪᐊᖅᑐᖅ. ᑕᑯᓚᐅᓲᖑᕙᕗᑦ ᑕᐅᕙᓂ ᓄᓇᒥ, ᑭᓯᐊᓂ ᑕᐃᒪᓐᓇᑎᒋ ᖃᓂᑎᒋᔪᒥᐅᙱᑦᑐᖅ,” ᒪᐃᔭ ᕼᐃᐊᕆ ᑕᐅᑐᙱ ᐅᖃᓚᐅᖅᐳᖅ ᐅᖃᓘᑎᒃᑯᑦ ᐊᐱᖅᓱᖅᑕᐅᓂᐅᔪᒥ.

ᕼᐋᒻᓚᒃᑯᑦ ᑲᑎᒪᔨ ᒪᐃᑯᓪ ᓲᓪᑕᐃᔅ ᐅᖃᓚᐅᖅᐳᖅ ᕙᐃᔅᐳᒃᑯᑦ ᐅᖃᐅᓯᒃᓴᓕᐊᖑᔪᒥ ᐊᒃᖤ ᓯᕗᓪᓕᕐᒥ ᑕᑯᔭᐅᓚᐅᖅᐳᖅ ᖁᑭᖅᓴᕐᕕᖕᒥ ᑭᓛᒥᑐᑐᐃᓐᓇᕐᒥ ᕼᐋᒻᓚᒃᑯᑦ ᓯᓚᑖᓂ.

ᐊᓱᐃᓛᒃ ᓅᓚᐅᖅᐳᖅ Landing Lake ᑎᓴᒪᓂ ᑭᓛᒥᑐᐸᓗᖕᓂ ᑲᖏᖅᖠᓂᕐᒥ. ᓄᓇᓕᖕᓂ ᐊᖑᓇᓱᒃᑎ ᑰᐱ ᑳᓇᓕ ᖁᑭᖅᓯᓚᐅᖅᐳᖅ ᐊᒃᖤᒥ, ᐅᖃᓚᐅᖅᐳᖅ.

ᑕᐅᑐᙱ ᐅᖃᓚᐅᖅᐳᖅ ᐊᔪᕐᓇᖅᐳᖅ ᓇᓚᐅᑦᑖᕆᓂᕐᒥ ᖃᓄᖅ ᐊᖏᑎᒋᓂᖓᓂ ᐊᒃᖤᒥ, ᑭᓯᐊᓂ ᐃᓐᓇᐅᔪᒃᓴᐅᕗᖅ “ᒥᑭᓗᐊᕌᓗᖅᑰᔨᓇᓂ.”

ᐃᓐᓇᐃᑦ ᐊᖑᓴᓪᓗᑦ ᐊᒻᒪ ᐊᕐᓇᕐᓗᑦ ᐊᒃᖤᐃᑦ ᐅᖁᒪᐃᓐᓂᖃᕈᓐᓇᖅᐳᑦ ᕿᑎᐊᓂ 145 ᑭᓗᒍᕌᒻᓂ (320 ᐸᐅᓐᐸᓗᖕᓂ) ᐊᒻᒪ 380 ᑭᓗᒍᕌᒻᓄᑦ (825 ᐸᐅᓐᐸᓗᖕᓂ) ᐊᒻᒪ ᐱᕈᓲᖑᕗᑦ 2.6 ᒦᑕᐸᓗᖕᓄᑦ ᑕᑭᓂᖓᓂ (8 ½ ᐃᓯᒐᓪᓗᐊᓄᑦ), ᐅᖃᐅᓯᐅᓪᓗᓂ ᓄᓇᕗᒻᒥ ᒐᕙᒪᒃᑯᓐᓄᑦ.

“ᑲᑉᐱᐊᓇᖅᑐᖅ, ᑭᓯᐊᓂ ᐅᔾᔨᖅᓱᑦᑎᐊᕆᐊᖃᖅᐳᑎᑦ ᑕᖅᑳᓂ ᐊᒻᒪ ᖃᐅᔨᓴᑦᑎᐊᕆᐊᖃᖅᐳᑎᑦ ᖃᓂᒡᓕᓗᐊᖅᑕᐃᓕᓂᖓᓂ ᐃᓄᖕᓄᑦ,” ᑕᐅᑐᙱ ᐅᖃᓚᐅᖅᐳᖅ.

ᑕᐅᑐᙱ ᓇᓗᓇᐃᖅᓯᓚᐅᖅᐳᖅ ᐅᖃᓘᑎᕋᓛᑎᒍᑦ ᑎᑎᕋᕐᓂᐅᔪᒥ ᐊᒃᖤ ᑐᖁᑕᐅᓚᐅᕐᓂᖓᓂ.

ᐊᒃᖤᐃᑦ ᓇᓂᔭᐅᔪᓐᓇᖅᐳᑦ ᑕᐅᕙᓂᓗᒃᑳᖅ ᑭᕙᓪᓕᕐᒥ ᐊᕕᒃᑐᖅᓯᒪᓂᐅᔪᒥ ᐊᒻᒪ ᐊᖏᔪᒥ ᐃᓚᖏᓐᓂ ᕿᑎᕐᒥᐅᓂ ᐊᒻᒪ ᕿᑭᖅᑖᓗᖕᒥ, ᓄᓇᕗᒻᒥ ᒐᕙᒪᒃᑯᓐᓄᑦ ᐃᑭᐊᖅᑭᕕᖓᓐᓂ ᐅᖃᓚᐅᖅᐳᖅ, ᐅᓄᕐᓂᖏᓐᓂ ᓇᓚᐅᑦᑖᖑᔪᓂ “ᐱᑕᖃᙱᓗᐊᖅᐳᖅ” ᓄᓇᕗᒻᒥ, ᐅᖃᐅᓯᐅᓪᓗᓂ ᒐᕙᒪᑐᖃᒃᑯᑦ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᓂ 2016−ᒥ.

ᐊᒃᖤᐃᑦ ᐱᑕᖃᒐᔪᒃᐸᓪᓕᐊᓕᖅᐳᑦ ᐅᑭᐅᖅᑕᖅᑐᒥ ᒫᓐᓇᓕᓴᐅᔪᓂ ᐊᕐᕌᒎᔪᓂᑦ, ᑕᐅᑐᙱ ᐅᖃᓚᐅᖅᐳᖅ.

“ᒪᒃᑯᖕᓂᖅᓴᐅᑎᓪᓗᑕ, ᖃᐅᔨᒪᓗᐊᓚᐅᙱᓚᒍᑦ ᐊᒃᖤ ᑭᓲᓂᖓᓂ,” ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐊᕐᕌᒍᓂ 15−ᓂ 20−ᓄᑦ ᖄᖏᖅᓯᒪᓕᖅᑐᓂ ᐊᖑᓇᓱᒃᑏᑦ ᑕᑯᖃᑦᑕᓕᓚᐅᖅᐳᑦ, ᐃᓚᖃᖅᑐᒥ ᖃᕝᕕᒑᕐᔪᖕᓂ ᐱᓂᖅᓴᐅᔪᒥ ᐊᕕᒃᑐᖅᓯᒪᓂᐅᔪᒥ.

“ᓇᐹᖅᑐᖃᕐᓂᕐᒥ ᐃᑭᑦᑐᓂᐅᔪᓐᓇᖅᐳᖅ ᐅᕝᕙᓘᓐᓃᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᖃᐅᔨᒪᕐᔪᐊᙱᓚᖓ ᐆᒥᖓ,” ᑕᐅᑐᙱ ᐅᖃᓚᐅᖅᐳᖅ.