ᐱᓕᕆᖃᑎᒌᒃᑐᑦ ᐱᔪᒪᓕᕐᑐᑦ ᓄᑖᒥ ᑐᑭᒧᐊᖅᑕᐅᔾᔪᑎᒃᓴᓂᒃ ᐃᓐᓇᑐᖃᐃᑦ ᐃᒡᓗᒃᓴᖓᓄᑦ

For English version, see Group calls for new direction in providing elders’ housing in Nunavut

ᐃᒡᓗᓕᐅᓕᕐᓂᐊᕋᓱᒋᔭᐅᔪᑦ ᐊᕐᕌᒍ ᐊᑭᖃᓪᓗᐊᖅᑐᒥᓐ $60-ᒥᓕᐊᓐ ᐃᒡᓗᒃᓴᐃᑦ ᖁᓕᕇᒡᓗᑎᒃ ᐃᖃᓗᖕᓂ ᓈᒻᒪᒃᓯᑎᑕᐅᒃᑲᓐᓂᕋᓱᒃᖢᓂ ᐊᑕᐅᓯᕐᒧᑦ ᐋᖅᑭᓱᐃᖃᑕᐅᔪᒧᑦ ᑕᐃᓪᓗᓂᐅᒃ ᐃᓐᓇᑐᖃᕐᓄᑦ “ᐃᒡᓗᓂ ᓈᒻᒪᙱᓕᐅᕈᑎᓄᑦ.”

ᐋᓐ ᑯᕌᕗᑦ, ᐱᓕᕆᐊᒃᓴᒧᑦ ᑐᑭᒧᐊᖅᑎᑦᑎᔨ ᐅᑯᓇᓂ ᐸᐃᕆᔩᑦ ᑎᒍᒻᒥᐊᖅᑎᒃᑯᓐᓄᑦ, ᐅᖃᕐᑐᖅ ᐃᓐᓇᑐᖃᐃᑦ ᐊᓯᐊᓅᖅᑕᐅᕙᖕᓂᖏᑦ ᑲᒪᒋᔭᐅᑯᑖᖕᓂᐊᕐᓗᑎᒃ ᓄᓇᓕᖕᓂ “ᑎᒡᓕᑲᑕᖕᓂᖏᓐᓂᑦ” ᐃᓐᓇᑐᖃᐃᑦ ᖃᐅᔨᒪᔭᖏᓐᓂᒃ. (ᐊᔾᔨᓕᐅᕆᔨ ᐋᑎ ᓴᑮᓯᐊᓐ)

“ᐃᓱᒪᒋᒃᑲᓐᓂᕆᐊᖃᕋᑦᑎᒍᑦ ᐃᓄᒋᐊᓂ ᑲᒪᒋᔭᖃᕐᓂᐊᕐᓂᖅ,” ᐅᖃᕐᑐᖅ ᐋᓐ ᑯᕌᕗᑦ, ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᐅᑯᓇᓂ ᐸᐃᕆᔩᑦ ᑐᒍᒻᒥᐊᖅᑎᒃᑯᓐᓄᑦ ᐅᕝᕙᓘᓐᓃᑦ ᐃᖃᓗᖕᓂ ᐃᓐᓇᑐᖃᐃᑦ ᑲᑐᔾᔨᖃᑎᒌᓄᑦ, ᑖᓐᓇᓕ ᐃᓚᒋᔭᐅᓯᒪᓪᓗᓂ. ᑕᐃᒪᙵᑦ 2022-ᒥ.

ᐅᒃᑑᐱᕆ 22-ᖑᑎᓪᓗᒍ ᐅᖃᓪᓚᓚᐅᕐᓯᒪᔪᖅ ᑲᑎᖃᑎᒌᖕᓂᕐᒥ ᐅᕙᓂ ᐃᓐᓇᑐᖃᐃᑦ ᑲᑐᔾᔨᖃᑎᒌᓂᑦ ᓄᓇᕗᒥᑦ ᒐᕙᒪᒃᑯᓐᓂ ᐅᖃᐅᔾᔨᑎᓪᓗᒋᑦ ᓄᑖᒥ ᑐᑭᒧᐊᕈᑎᑕᖃᕆᐊᖃᕐᓂᖓᓂᒃ ᐃᓐᓇᑐᖃᐃᑦ ᐃᒡᓗᒃᓴᖓᓂ. ᐅᕙᓂ ᑲᑎᒪᓚᐅᕐᑐᑦ ᖃᐅᔨᒋᐊᕐᑏᑦ ᐋᓐᓂᐊᕕᖕᒧᑦ ᖃᐅᔨᓴᕐᕕᒃᒥᑦ ᒫᓂᓗ 12-ᖏᓐᓃᑦᑐᓂ ᐃᓄᖕᓂ ᐅᐸᒃᑕᐅᓪᓗᓂ.

ᐅᓇ ᐸᕐᓇᐅᑎ ᓴᓇᔪᒪᓂᕐᒥ ᐃᒡᓗᕐᔪᐊᕐᒥ ᖁᓕᕇᒃᑐᓂ ᐃᓐᓇᑐᖃᕐᓄᑦ ᒫᓂ ᐊᑖᓂ ᓚᐃᓐᓗ, ᑰᒐᓛᖅ ᐊᑐᕆᐊᓪᓗ ᐊᒻᒪ ᓂᐱᓴ ᐊᑐᕆᐊᑉ ᐊᑯᓐᓂᐊᓂ. ᐋᖅᑭᒃᑕᐅᓯᒪᔪᖅ ᒫᓂ 45-ᓂ ᐃᒡᓗᓕᐅᕐᓗᑎᒃ ᐊᒻᒪ ᐃᓄᒋᐊᒡᕕᒃᓴᐅᓂᐊᖅᑐᓂᒃ, ᒥᕐᓱᕐᕕᖃᕐᓗᓂ, ᐃᓅᓕᓴᐅᑎᑖᕐᕕᖃᕐᓗᓂ, ᐸᐃᕆᕝᕕᖃᕐᓗᓂ, ᒥᑭᑦᑐᒥ ᑐᒃᓯᐊᕐᕕᖃᕐᓗᓂ ᐊᒻᒪ ᓇᖕᒥᓂᖅ ᔭᓄᕇᑕᖃᕐᓗᓂ.

ᓴᓇᔭᐅᕌᓂᖕᓂᐊᕋᓱᒋᔭᐅᔪᖅ 2027-ᒥ, ᐱᓕᕆᐊᒧᑦ ᖃᐅᔨᒋᐊᕐᕕᒃ ᔨᒥ ᕕᓕᐅᕋᑎ ᐅᖃᓚᐅᕐᑐᖅ. ᐃᑲᔫᑎᑖᕐᓯᒪᔪᑦ ᓄᓇᕗᑦ ᑐᙵᕕᒃᑯᓐᓂᑦ ᐊᒻᒪᓗ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐱᕙᓪᓕᐊᔪᓕᕆᔨᒃᑯᓐᓂᑦ.

ᒫᓐᓇᓕ ᒫᓂ 1,700-ᖏᓐᓃᒻᒪᑕ ᓄᓇᕗᒻᒥᐅᑕᑦ ᐊᕐᕌᒍᖃᖅᑐᑦ 65-ᓂ ᐅᖓᑖᓄᑦ, ᐅᓂᒃᑳᓕᐊᕕᓃᑦ ᔭᓄᐊᕆᒥ ᐃᓐᓇᑐᖃᐃᑦ ᑲᑐᔾᔨᖃᑎᒌᖏᑦᑕ ᐅᖃᕐᓯᒪᓚᐅᕐᑐᖅ.

ᑖᒃᑯᓇᙵᓪᓕ 29 ᐳᓴᓐᑎᖏᑦ ᐊᖏᕐᕋᖃᖅᑐᑦ ᐃᒡᓗᖏᑦ ᓴᓇᔭᐅᔭᕆᐊᖃᒻᒪᕆᒃᖢᑎᒃ — ᐅᓂᕐᓂᕐᓴᐅᔪᑦ ᐅᓄᕐᓂᖏᑦ 6-ᖏᕐᓱᖅᓯᒪᓪᓗᓂ ᑲᓇᑕᓕᒫᖅ ᑕᐅᑐᒃᖢᒍ — ᐊᒻᒪᓗ 31 ᐳᓴᓐᑎ ᐊᖏᕐᕋᖃᖅᖢᑎᒃ “ᓈᒻᒪᙱᑐᓪᓛᓗᖕᓂᑦ” ᑖᓐᓇᓗ ᖁᕝᕙᓯᖕᓂᕐᓴᐅᓪᓗᓂ 11-ᖏᕐᓱᖅᖢᓂ ᐳᓴᓐᑎᒋᔭᐅᔪᑦ.

ᑯᕌᕗᑦ ᐅᖃᐅᓯᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐸᕐᓇᐅᑎᖏᑦ ᐋᖅᑭᒃᑕᐅᓯᒪᖁᓪᓗᓂᒋ ᓴᓇᓂᐊᕐᓗᑎᒃ ᐱᖓᓱᓂ ᐃᓐᓇᒃᑯᕕᒃᓴᓂ ᐅᑯᓇᓂ ᑲᖏᖅᖠᓂᖅ, ᐃᖃᓗᐃᑦ ᐊᒻᒪ ᐃᖃᓗᒃᑑᑦᑎᐊᕐᒥ “ᐊᑕᐅᓯᖅ ᑭᒃᑯᓕᒫᓄᑦ ᓈᒻᒪᓈᕐᓯᒪᓗᓂ.”

ᐃᖃᓗᖕᓂ ᐃᓐᓇᑐᖃᐃᑦ ᑲᑐᔾᔨᖃᑎᒌᖏᑦ ᖃᐅᔨᓚᐅᕐᒪᑕ 87 ᐳᓴᓐᑎ ᒐᕙᒪᒃᑯᑦ “ᐃᓐᓇᑐᖃᕐᓄᑦ ᑐᕌᖓᔪᑦ ᐃᑲᔫᑎᒃᓴᑦ” ᐊᑭᓕᐅᑎᐅᓂᐊᕐᓗᓂ ᐃᓄᒋᐊᓂ ᑲᒪᒋᔭᖃᕐᕕᒃᓴᓄᑦ, ᑕᒪᐃᓐᓂ ᑎᐅᕆᑑᕆᓃᑦᑐᓂ ᐊᒻᒪᓗ ᐆᒥᖓ ᐊᒻᐸᓯ ᕗᐃᐊᔅᑦ ᐃᓐᓇᑐᖃᒃᑯᕕᒃᒥ ᐋᑐᕚᒥ, ᑖᓐᓇᓗ ᒫᓐᓇ 2.7 ᐳᓴᓐᑎᓂ ᓄᓇᕗᒻᒥᐅᓂ ᐊᕐᕌᒍᖃᖅᑐᓂᒃ 65-ᓂ ᐅᖓᑖᓄ ᑲᒪᒋᔭᖃᕐᕕᐅᓪᓗᓂ.

ᐅᑯᐊ ᐊᑯᓂᕈᓗᒃ ᑲᒪᒋᔭᖃᕐᕖᑦ ᐊᐅᓚᑕᐅᓗᐊᕐᑐᑦ ᑐᕌᖓᓪᓗᑎᒃ ᐃᓐᓇᑐᖃᕐᓂ ᐊᔪᕈᑎᖃᒻᒪᕆᒃᑐᓂᒃ ᐊᒻᒪᓗ ᑲᒪᒋᔭᐅᖏᓐᓇᕆᐊᖃᖅᐸᒃᖢᑎᒃ, ᑕᐃᒪᓐᓇᓗ “ᓱᖁᑎᒋᔭᖃᙱᖢᑎᒃ” ᐃᓐᓇᑐᖃᕐᓂ ᓇᖕᒥᓂᖅ ᑲᒪᒋᔪᓐᓇᖅᑐᓂᒃ, ᑯᕌᕗᑦ ᐅᖃᕐᑐᖅ.

“ᐊᒻᒪᓗ ᐊᑭᑐᐊᓗᒃᖢᑎᒃ, ᓲᕐᓗ ᒥᓕᐊᓐ ᑖᓚᙱᓐᓃᖢᑎᒃ” ᐊᐅᓚᓐᓂᐊᕐᓗᒋᑦ ᓲᖃᐃᒻᒪ ᑲᒪᒋᔭᖃᑦᑎᐊᕐᓂᐊᕐᓂᕐᒧᑦ, ᐅᖃᕐᑐᖅ ᐅᖃᐅᓯᖃᖅᖢᑎᒃ ᑲᒪᒋᔭᖃᕐᕕᖕᓂ.

ᒪᑐᐃᕐᑕᐅᓵᕐᓂᑯ $59.4 ᒥᓕᐊᓐᑐᕐᑐᖅ, 24-ᓂ ᐃᒡᓕᖃᖅᖢᓂ ᐊᑯᓂᕈᓗᒃ ᑲᒪᒋᔭᖃᕐᕕᒃ ᑲᖏᖅᖠᓂᕐᒥ ᐊᕐᕌᒍᒥ ᐊᐅᓚᔾᔪᑎᖃᕐᑐᖅ ᒫᓂ $15 ᒥᓕᐊᓐᓂ, ᒫᓂᓘᓐᓂᑦ ᖃᓂᒋᔭᖓᓂ $625,000 ᐊᑕᐅᓯᕐᒧᑦ ᐃᓄᖕᒧᑦ. ᐱᓕᕆᕝᕕᒃ ᐃᓚᒋᔭᐅᔪᖅ ᓄᓇᕗᒥᑦ ᒐᕙᒪᒃᑯᑦ ᐸᕐᓇᐅᑎᖏᓐᓂᒃ ᑐᓴᐅᒪᔭᐅᑎᑕᐅᓕᕐᓂᑯᒥ 2019-ᒥ ᐅᖃᕐᓯᒪᓪᓗᑎᒃ 156-ᓂ ᐃᒡᓕᖃᕐᑐᒥ ᐃᓐᓇᑐᖃᕐᓄᑦ ᓄᓇᕗᒥᑦ ᓴᓇᓯᒪᔪᒪᓪᓗᓂ 2030 ᑐᑭᓚᐅᕐᑎᓐᓇᒍ — 24-ᓂ ᐃᒡᓕᖃᕐᓗᑎᒃ ᑭᕙᓪᓕᕐᒥ ᐊᒻᒪ ᕿᑎᕐᒥᐅᓃᑦᑐᑦ ᐊᒻᒪ 108-ᓂ ᐃᒡᓕᖃᕐᓗᓂ ᐃᖃᓗᖕᓃᑦᑐᖅ.

ᐃᓐᓇᑐᖃᐃᑦ ᑲᑐᔾᔨᖃᑎᒌᖏᑦ ᐃᓱᒪᖕᒪᑕ ᐱᓯᒪᔪᒪᓪᓗᑎᒃ ᒫᓐᓇ ᐃᑲᔫᑎᐅᔪᑦ ᑲᖏᖅᖠᓂᖅᒧᑦ ᐱᓕᕆᕝᕕᖕᒥ ᒻᒪ ᐊᒻᒪᓯ ᕗᐃᐊᔅᑦ ᑭᓯᐊᓂᓕ ᒫᓂ $330 ᒥᓕᐊᓐ ᑮᓇᐅᔭᖅᑐᔪᓄᑦ ᐃᑲᔫᑎᒃᓴᑦ ᐊᒻᒪ $82.5 ᒥᓕᐊᓐ ᐊᐅᓚᑦᑎᔾᔪᑎᓄᑦ ᐅᕗᖓ ᓅᑕᐅᓗᓂ ᐱᓕᕆᕝᕕᒃᓴᓄᑦ ᐃᖃᓗᒃᑑᑦᑎᐊᕐᒥ ᐊᒻᒪ ᐃᖃᓗᖕᓂ ᐃᒡᓗᓕᐅᙱᖔᕐᓗᑎᒃ ᐃᒡᓗᒃᓴᓂ ᐃᓐᓇᑐᖃᕐᓄ ᑕᒪᐃᓐᓂ ᓄᓇᕗᒥᑦ 25-ᓂ ᓄᓇᓕᖕᓂ.

ᑕᐃᒪᓐᓇ ᐸᕐᓇᐅᑎ 584-ᓂ ᐃᒡᓗᒃᓴᓂ ᓴᓇᓇᔭᕐᑐᑦ ᓄᓇᕗᓕᒫᒥᑦ, ᐃᒪᓐᓇᐅᙱᖔᕐᑐᖅ 132-ᓕ ᐃᓕᓕᖕᓂ ᑲᒪᒋᔭᖃᕐᕕᒃᓴᒥ ᒫᓐᓇ ᐋᖅᑭᒃᑕᐅᓯᒪᔪᓂ ᐃᖃᓗᖕᓂ ᐊᒻᒪ ᐃᖃᓗᒃᑑᑦᑎᐊᕐᒥ ᒪᑐᐃᕐᑕᐅᓂᐊᖅᑐᓂᒃ, ᐅᓂᒃᑳᑦ ᐅᖃᕐᓯᒪᔪᑦ.

ᐃᑲᔪᕋᔭᕐᒥᔪᖅ ᐃᓄᖕᓄᑦ ᐃᒡᓗᒃᓴᐃᑦ ᐊᑐᐃᓐᓇᐅᓂᕐᓴᐅᓗᑎᒃ ᓄᓇᕗᒥᑦ ᐅᓄᕐᓂᕐᓴᓂᒃ ᐃᓅᓱᖕᓂᕐᓴᓄᑦ ᐃᓚᖏᓐᓄᓪᓗ ᐃᒡᓗᒃᓴᓂᒃ.

ᑯᕌᕗᑦ ᐅᖃᓚᐅᕐᑐᖅ ᐃᓐᓇᑐᖃᕐᓄᑦ ᑲᑐᔾᔨᖃᑎᒌᑦ ᐃᓱᒪᓂᕋᖅᖢᓂᒋᑦ, ᖃᖓᙳᕋᓗᐊᕐᐸᑦ, ᐃᓐᓇᑐᖃᐃᑦ ᐊᖏᕐᕋᖏᓐᓄ ᖃᓂᒃᓴᕐᓂᕐᓴᐅᔪᓐᓇᕐᓗᑎᒃ ᖃᓪᓗᓈᓄᑦ ᐊᐅᓪᓚᖅᑎᑕᐅᙱᓐᓂᕐᓴᐅᓗᑎᒃ ᐊᕕᒃᑐᖅᓯᒪᓂᒃᑯᓪᓘᓐᓃᑦ ᑲᒪᒋᔭᖃᕐᕕᖕᓄᑦ.

“ᓄᓇᓕᖕᓃᑉᐸᑕ ᐃᓅᑦᑎᐊᕐᓂᕐᓴᐅᓇᔭᕐᑐᑦ,” ᐅᖃᕐᑐᖅ. “ᐊᒻᒪᓗ ᐃᓐᓇᑐᖃᐃᑦ ᐊᓯᐊᓅᖅᑕᐅᕙᖕᓂᖏᑦ ᑲᒪᒋᔭᐅᑯᑖᖕᓂᐊᕐᓗᑎᒃ ᓄᓇᓕᖕᓂ ᑎᒡᓕᑲᑕᖕᓂᖏᓐᓂᑦ” ᐃᓐᓇᑐᖃᐃᑦ ᖃᐅᔨᒪᔭᖏᓐᓂᒃ.”