ᓄᓇᕗᒥᑦ ᐱᙳᐊᖅᑐᓕᕆᔨᒃᑯᑦ ᐃᓕᓴᖅᓯᓂᕐᒧᑦ ᖁᕕᐊᓲᑎᖃᕐᑐᑦ ᓯᐅᕗᓕᐅᕐᑎᐅᕙᒃᑐᓂᒃ, ᐃᑲᔪᖅᑎᐅᕙᒃᑐᓂ
ᐱᓇᓱᐊᕈᓯᐅᑉ ᓄᙳᐊᓂ ᐊᔪᕈᓐᓃᕐᓴᖅᑎᑦᑎᓚᐅᕐᑐᑦ ᐱᙳᐊᖅᑎᓄᑦ ᐃᑲᔪᖅᑎᓂᒃ ᓄᓇᕗᒥᑦ
ᑭᙵᓂᑦ ᐱᙳᐊᕐᑎ ᓄᕗᐊᓕᐊ ᑭᐅᕆᐅ, ᕿᑎᐊᓂ, ᑐᓂᔭᐅᔪᖅ ᓘᕆ ᐃᓪᓚᐅᕐᒧᑦ, ᓄᓇᕗᒧᑦ ᒪᓕᒐᓕᐅᕐᑎ, ᓴᐅᒥᐊᓂᒃ ᐊᒻᒪ ᑭᒻᐳᓕ ᔭᖕᒧᑦ, ᐊᖓᔪᖅᑳᖅ ᐱᙳᐊᖅᕕᓕᕆᔨᓄᑦ ᐊᒻᒪ ᒥᕐᖑᐃᕐᓯᕐᕕᓕᕆᔨᓄᑦ ᓄᓇᕗᒥᑦ, ᑳᒻ ᐃᐅ ᐃᓅᓱᒃᑐᓂ ᓯᕗᓕᐅᕐᑎᒥ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᒥᑦ ᐅᕙᓂ ᐃᖃᓗᖕᓂ ᐊᕐᓴᕐᓃᑦ ᑐᔪᕐᒥᕕᒃᒥᑦ ᐅᒃᑑᐱᕆ 3-ᖑᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᐃᐅᕋᓐ ᕌᐱᓐᓴᓐ/ᐱᙳᐊᖅᑐᓕᕆᔨᒃᑯᑦ ᐊᒻᒪ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᓄᓇᕗᒥᑦ)
For the English version of this story, please see Nunavut Sport and Recreation awards gala honours leaders, volunteers.
ᓯᕗᓕᐅᕐᑎᐅᓂᖅ ᐊᒻᒪ ᐃᑲᔪᖅᑎᐅᕙᖕᓂᖅ ᐃᓕᓴᕆᔭᐅᓯᒪᓚᐅᕐᑐᑦ ᐅᕙᓂ ᓄᓇᕗᒥᑦ ᐱᙳᐊᖅᑐᓕᕆᔨᒃᑯᑦ ᐃᓕᓴᕆᔭᐅᔾᔪᑎᓕᕆᑎᓪᓗᒋᑦ ᐃᖃᓗᖕᓂ ᐅᕙᓂ ᐊᕐᓴᕐᓃᑦ ᑐᔪᕐᒥᕕᒃᒥ ᐅᒃᑑᐱᕆ 3-ᖑᑎᓪᓗᒍ.
ᐱᙳᐊᖅᑕᓕᕆᔨᒃᑯᑦ ᐊᒻᒪ ᒥᕐᖑᐃᕐᓯᕐᕕᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕗᒥᑦ ᑐᙵᓱᒃᑎᑦᑎᔨᐅᖃᑕᐅᓚᐅᕐᑐᑦ ᐅᑯᓂᖓ ᓄᓇᕗᒥᑦ ᐱᙳᐊᖅᑐᓕᕆᔨᒃᑯᓐᓂ ᐊᒻᒪ ᓄᓇᕗᑦ ᒐᕙᒪᒃᑯᑦ ᐱᙳᐊᖅᑐᓕᕆᔨᖏᓐᓂ.
ᓄᕗᐊᓕᐊ ᑭᐅᕆᐅ ᑭᙵᕐᓂ ᓄᓇᖃᕐᑐᖅ ᐃᓕᓴᕆᔭᐅᔾᔪᑎᑖᖅᑎᑕᐅᓚᐅᕐᑐᖅ ᐆᒥᖓ ᑳᒻ ᐃᐅ ᐃᓅᓱᒃᑐᓂ ᓯᕗᓕᐅᕐᑎᐅᓂᕐᒧᑦ ᓵᓚᖃᖅᖢᓂ ᐱᓕᕆᐊᕆᕙᒃᑕᖏᓐᓄᑦ ᐊᐅᔭᒃᑯᑦ ᑲᒪᔨᐅᓪᓗᓂ ᐊᒻᒪᓗ ᐊᖓᔪᖅᑳᕆᔭᐅᓕᖅᖢᖢᓂ ᕼᐋᒻᒪᓚᒃᑯᑦ ᐃᓕᓐᓂᐊᕌᓂᒃᑳᖓᑕ ᖃᓄᐃᓕᐅᕈᑎᖏᓐᓄᑦ.
“ᐱᙳᐊᖅᑐᓕᕆᓂᖅ ᐱᒻᒪᕆᐊᓘᒻᒪ ᐃᓅᓱᒃᑐᓄᑦ ᓲᖃᐃᒻᒪ ᖃᓄᐃᑦᑕᐃᓕᓂᒃᑯᑦ ᐱᕈᖅᐸᓪᓕᐊᓂᕐᒨᖓᓂᖓᓄᑦ, ᐃᓱᒪᒃᑯᓪᓗ ᐋᖅᑭᒃᓯᒪᓂᕐᓴᐅᔾᔪᑎᐅᓪᓗᓂ ᐊᒻᒪᓗ ᐊᔪᕈᓐᓃᕐᓴᕈᑎᐅᓪᓗᓂ ᐃᓅᓯᕐᒧᑦ ᐊᑐᕈᓐᓇᖅᑐᓂ ᐊᒻᒪ ᐃᓅᖃᑎᒌᖕᓂᕐᒧᑦ,” ᐅᖃᕐᑐᖅ ᑭᐅᕆᐅ ᕙᐃᔅᐳᒃᑯ ᐅᒃᑑᐱᕆ 8-ᖑᑎᓪᓗᒍ.
ᐅᓇ ᐊᕐᕌᒍᓕᒃ 18-ᓂ ᐱᙳᐊᖅᑎ ᑲᒪᒋᔭᖃᖃᑦᑕᖅᑐᖅ 40-ᖏᓐᓃᑦᑐᓂ ᓱᕈᓯᕐᓂ ᐊᕐᕌᒍᓕᖕᓂ 5-ᓂ 12-ᓄ 4:00 ᐅᓪᓗᒃᑯᑦ 6:00 ᑎᑭᓐᓇᓱᖕᓂᖓᓂ ᐱᓇᓱᐊᕈᓯᐅᑉ ᐃᓗᐊᒍᑦ ᐃᓅᓱᒃᑐᒃᑯᕕᒃᒥᑦ.
ᑐᓴᕐᓈᖅᑕᐅᔪᑦ ᐅᑯᐊ ᐃᙱᖅᖢᑎ Black Eyed Peas ᐊᒻᒪ ᐊᓯᖏᑦ ᐃᙱᕐᑏᑦ ᑐᓴᕐᓈᕈᑎᒃᑯᑦ ᓂᐱᑭᓵᓯᒪᓪᓗᓂ, ᑭᐅᕆᐅ ᑖᒃᑯᓂᖓ ᐃᓕᓐᓂᐊᕐᕕᐅᓪᓗ ᐊᖏᕐᕋᖏᑦᑕᓕ ᐊᓯᐊᒎᖓᓂᒃᑯᑦ ᐱᓕᕆᐊᖃᕋᓱᒃᖢᓂ.
ᐃᒡᓘ ᐃᓗᐊᓂ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐱᓕᕆᐊᖃᕋᓱᒃᖢᓂ ᐃᓱᒫᓘᑎᖃᕋᓂ “ᐃᓐᓇᕐᓄᑦ ᐱᒡᒍᓴᐅᑎᐅᓇᔭᙳᐊᖅᑐᓂᒃ.”
“ᖃᓄᐃᓕᐅᕈᑎᐅᔪᑦ ᓲᕐᓗ ᐃᓕᓐᓂᐊᕐᕕᖕᒦᖅᑰᔨᓐᓇᕈᓐᓃᖅᑎᓪᓗᒍ ᓱᕈᓰᑦ ᐱᓕᕆᐊᓂ ᑲᒪᒋᔭᖃᕐᓂᕐᓴᐅᓕᖃᑦᑕᕐᒪᑕ,” ᐅᖃᕐᑐᖅ.
ᐅᑯᐊ ᑮᓇᐅᔭᓕᐅᕋᓱᒐᑎᒃ ᑲᑐᔾᔨᖃᑎᒌᖑᔪᑦ ᖁᕕᐊᓲᑎᖃᓚᐅᕐᒥᔪᑦ ᑭᙵᐃᑦ ᐃᓅᓱᒃᑐᓂ ᐃᑲᔪᖅᑎᐅᖃᑦᑕᖅᑐᓂ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᓕᕆᓪᓗᑎᒃ.
“ᐃᑲᔪᖅᑐᐃᔨᐅᕙᒃᑐᑦ ᐆᒻᒪᑎᒋᔭᐅᒻᒪᕆᒃᑐᑦ ᓄᓇᓕᖏᓐᓂᒃ,” ᐅᖃᕐᑐᖅ ᑲᑐᔾᔨᖃᑎᒌᑦ ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᐃᐅᕋᓐ ᕌᐱᓐᓴᓐ ᐅᖄᓚᐅᑎᒃᑯᑦ ᐊᐱᕐᓱᖅᑕᐅᑎᓪᓗᒍ ᐅᒃᑑᐱᕆ 8-ᖑᑎᓪᓗᒍ.
ᖁᓕᐅᓪᓗᑎᒃ (10) ᐃᓅᓱᒃᑐᑦ ᐊᕐᕌᒍᓖᑦ 13-ᓂ 19-ᒧ ᑖᒃᑯᐊ ᑲᑐᔾᔨᖃᑎᒌᑦ ᒪᓂᒻᒪᐃᓯᒪᔪᑦ ᐅᓗᕆᐊᓇᙱᑦᑐᒥ ᐃᓅᓱᒃᑐᓄᑦ ᐅᐸᒃᑕᐅᕙᒃᑐᓂ ᐅᖃᕐᑐᖅ.
ᕕᕝᕗᐊᕆᐅᑎᓪᓗᒍ ᑖᒃᑯᐊ ᐃᓅᓱᒃᑐᑦ 200 ᐅᖓᑖᓃᑦᑐᓂᒃ ᕚᓚᓐᑕᐃᓐᔅ ᑕᐃᒥ (ᓇᒡᓕᒍᓱᖕᓇᒥ) ᐅᓪᓛᕈᒻᒥᑕᖅᑎᑦᑎᓚᐅᕐᓯᒪᔪᑦ, ᕌᐱᓐᓴᓐ ᐅᖃᕐᑐᖅ.
“ᐅᑯᐊ ᐃᓅᓱᒃᑐᑦ ᐃᓱᒪᒋᔭᖃᑦᑎᐊᖅᖢᑎᒃ, ᐱᓕᕆᖃᑎᒌᑦᑎᐊᖅᖢᑎᒃ ᐊᒻᒪ ᐱᒃᑯᒋᔭᖃᖅᖢᑎᒃ ᐱᓕᕆᖃᑲᑦᑕᖅᑐᑦ,” ᐅᖃᕐᑐᖅ. “ᐊᓯᖏᓐᓄᑦ ᐃᓱᒪᒋᔭᐅᑦᑎᐊᓕᖃᑦᑕᖅᑐᑦ, ᓄᓇᓕᖕᓂ ᐱᕈᖅᑎᑦᑎᕙᓪᓕᐊᓪᓗᑎᒃ ᐊᒻᒪ ᓴᖅᑭᑎᑦᑎᓯᒪᓪᓗᑎᒃ ᐃᑲᔪᖅᑐᐃᕙᖕᓂ ᐊᒻᒪ ᓯᕗᓕᐅᖅᑎᐅᕙᖕᓂᖅ ᖃᓄᐃᓕᖓᓂᖓᓂᒃ.”
ᐃᖃᓗᐃᑦ ᓄᓇᓕᐸᐅᔭᖓᓂ ᐱᙳᐊᖅᑐᓕᕆᓂᕐᒧᑦ ᑐᑭᒧᐊᖅᑎᑦᑎᔨ ᐳᕆᑕᓐ ᒪᒃᓂᐅᓪ ᑐᓂᔭᐅᓚᐅᕐᑐᖅ ᐱᙳᐊᖅᑐᓕᕆᓂᕐᒥᒃ ᓯᕗᓕᐅᖅᑎᐅᓂᖓᓄᑦ ᐊᕐᕌᒍᒧᑦ ᐃᓕᓴᕆᔭᐅᔾᔪᑎᒥ.
ᐃᓕᓴᕆᔭᐅᔾᔪᑎᓕᕆᑎᓪᓗᒋᑦ, ᓄᓇᕗᒥᑦ ᐱᙳᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᕼᐋᑭᖅᑎᐅᓂᑯᕕᓂᕐᒥ ᔪᐊᑎᓐ ᑐᑐᒥ ᐊᒻᒪ ᐃᓅᔪᓐᓃᕐᓯᒪᓕᕐᑐᒥ ᐅᑭᐅᕐᑕᖅᑐᕐᒥ ᐱᙳᐊᖅᑎᒥ ᐊᒻᒪ ᐋᖅᑭᒃᓱᐃᔨᐅᖃᑦᑕᕐᓂᑯᒥ ᐊᑏᒪ ᕼᐊᓪᓚᕆᒥ ᐃᓕᓴᕆᔭᐅᔾᔪᑎᑖᖅᑎᑦᑎᓚᐅᕐᑐᑦ ᐱᙳᐊᖅᑐᓕᕆᓂᕐᒧᑦ ᐃᓕᓴᕆᔭᐅᔾᔪᑎᓕᕆᓂᕐᒧᑦ (Hall of Fame) ᑖᓐᓇᓗ ᐋᖅᑭᒃᑕᐅᓵᕐᓂᑰᓪᓗᓂ.
ᑲᑐᔾᔨᖃᑎᒌᑦ ᐊᒻᒪᓗ ᓄᓇᕗᑦ ᒐᕙᒪᒃᑯᑦ ᑐᓂᓯᓚᐅᕐᒥᔪᑦ ᐃᓕᓴᕆᔭᐅᔾᔪᑎᓂ ᐱᙳᐊᖅᑎᓄᑦ, ᐊᐅᓚᑦᑎᔨᖏᓐᓄᑦ, ᐊᒻᒪ ᐃᑲᔪᖅᑎᐅᕙᒃᑐᓄᑦ ᓄᓇᕗᒥᑦ.
ᖁᙱᐊᖅᑐᑦ ᐃᓚᖃᓚᐅᕐᑐᑦ 100 ᐅᖓᑖᓂ ᐱᙳᐊᖅᑐᓕᕆᔨᒻᒪᕆᖕᓂ ᐅᐸᒍᑎᓯᒪᓪᓗᑎᒡᓗ ᑲᑐᔾᔨᖃᑎᒌᑦ ᐱᓇᓱᐊᕈᓯᐅᑉ ᓄᙳᐊᓂ ᐱᓕᕆᐊᕆᔭᐅᔪᒥ.
ᑲᑐᔾᔨᖃᑎᒌᑦ ᐃᓚᖃᖅᖢᑎᒃ ᐅᑯᓂᖓ ᓄᓇᕗᒥᑦ ᐹᔅᑭᑦᐹᓪ ᑲᑐᔾᔨᖃᑎᒌᙱᓐᓂᒃ, ᕚᓕᐹᓪ ᓄᓇᕗᑯᓐᓂ, ᓄᓇᕗᑦ ᓵᑯᑯᓐᓂᑦ, ᓄᓇᕗᒥ ᐱᖕᐹᖃᑦᑕᖅᑐᑦ ᑲᑐᔾᔨᖃᑎᒌᖏᓐᓂ, ᐃᖃᓗᒃᑑᑦᑎᐊᕐᒥ ᐅᓇᑕᖃᑦᑕᖅᑐᑦ ᑲᑐᔾᔨᖃᑎᒌᙱᓐᓂ ᐊᒻᒪ ᓄᓇᕗᒥᑦ ᐹᑦᒥᓐᑕᓐᑯᓐᓂ ᑐᙵᓱᒃᑎᑦᑎᔨᐅᓪᓗᑎᒃ ᐃᖃᓗᖕᓂ ᐃᓕᓐᓂᐊᕐᕕᖕᒥ ᐃᖃᐃᓕᓴᕐᕕᖏᓐᓂᒃ ᐅᒃᑑᐱᕆ 3-ᒥ ᐊᒻᒪ ᐅᒃᑑᐱᕆ 4-ᒥ.
(0) Comments