ᒪᓕᒐᓕᐅᖅᑏᑦ ᓴᖅᑭᑎᑦᑎᓚᐅᖅᐳᑦ ᐃᓱᒫᓘᑕᐅᔪᓂ ᐋᓐᓂᐊᕕᖏᓐᓂ ᓄᓇᓕᖏᓐᓂ

For English version, see Sanirajak, Kugluktuk MLAs raise concerns over health centres in their communities

ᐅᓄᕐᓂᖅᓴᓂ ᒪᓕᒐᓕᐅᖅᑎᓂ ᓯᕗᒻᒧᐊᕆᓯᒪᕗᑦ ᐃᓱᒫᓘᑕᐅᔪᓂ ᐋᓐᓂᐊᕕᖏᓐᓄᑦ ᓄᓇᓕᖕᓂ.

ᐊᒥᑦᑐᕐᒥ ᒪᓕᒐᓕᐅᖅᑎ ᔪᐃᓕ ᖃᐃᕐᓂᖅ, ᓂᕈᐊᖅᑕᐅᓯᒪᓂᕆᔭᖓᓂ ᐃᓚᖃᖅᐳᖅ ᓴᓂᕋᔭᒃ, ᐊᒻᒪ ᖁᕐᓗᖅᑐᕐᒥ ᒪᓕᒐᓕᐅᖅᑎ ᐹᐱ ᐊᓇᕕᓗᒃ, ᐅᖃᐅᓯᒃᓴᓕᐅᓚᐅᖅᐳᑦ ᐊᒻᒪ ᓴᖅᑭᑎᑦᑎᓪᓗᑎᒃ ᐊᐱᖅᑯᑕᐅᔪᓂ ᖃᓄᐃᓕᖓᓕᕐᓂᖓᓂ ᐋᓐᓂᐊᕕᖕᓂ ᓄᓇᓕᖏᓐᓂ ᒪᓕᒐᓕᐅᕐᕕᖕᒥ ᒫᔾᔨ 6−ᒥ.

ᐅᓇ ᒪᓕᖕᓂᖃᖅᐳᖅ ᐃᓱᒫᓘᑕᐅᔪᓂ ᓴᖅᑭᑕᐅᔪᒥ ᐅᖅᑯᕐᒥᐅᑦ ᒪᓕᒐᓕᐅᖅᑎᖓ ᒥᐊᕆ ᕿᓕᖅᑎ, ᐊᐱᖅᓱᓚᐅᖅᑐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᒥᓂᔅᑕᖓᓂ ᔮᓐ ᒪᐃᓐᒥ ᕕᕗᐊᕆ 23−ᒥ ᐃᓚᖏᖅᑕᐅᓂᖓᓂ ᐋᓐᓂᐊᕕᖕᒥ ᕿᑭᖅᑕᕐᒧᐊᒥ.

ᖃᐃᕐᓂᖅ ᐅᖃᓚᐅᖅᐳᖅ ᓴᓂᕋᔭᒃ ᐊᒃᓱᕈᖅᐳᖅ ᖃᓄᐃᓕᖓᓂᖓᓂ ᐋᓐᓂᐊᕕᖓᓂ, ᐅᖃᓚᐅᖅᐳᖅ ᐊᑐᐃᓐᓇᖃᖅᑎᑦᑎᑐᐃᓐᓇᖅᓯᒪᔪᒥ ᑐᐊᕕᕐᓇᖅᑐᓂ ᐱᔨᑦᑎᕋᕐᓂᐅᔪᓂ ᑕᐃᒪᙵᓂ ᐊᐅᔭᐅᓚᐅᖅᑐᒥ.

ᐅᖃᓚᐅᖅᐳᖅ ᐅᓇ ᐱᔾᔪᑎᖃᖅᐳᖅ ᐋᓐᓂᐊᕕᖓ ᐃᖅᑲᓇᐃᔭᖅᑎᑭᓗᐊᕐᓂᖓᓂ ᓄᓇᓕᖕᒥᐅᑕᓂ “ᐅᖃᐅᔾᔭᐅᕙᒃᖢᑎᒃ ᕿᓄᐃᓵᕐᓂᕐᒥ ᐋᓐᓂᐊᕕᓕᐊᕆᐊᖃᕈᑎᒃ ᐃᖅᑲᓇᐃᔭᕐᓂᐅᑉ ᐃᑲᕐᕋᖏᑕ ᐅᖓᑖᓂ.”

ᖃᐃᕐᓂᖅ ᐊᐱᕆᓚᐅᖅᐳᖅ ᒪᐃᓐᒥ ᖃᔅᓯᒃᑲᓐᓂᕐᓂ ᐊᓯᖏᓐᓂ ᓄᓇᓕᐅᔪᓂ ᓄᓇᕗᒻᒥ ᒫᓐᓇᐅᔪᒥ ᐊᐅᓚᑦᑎᓂᖃᕐᓂᖏᓐᓂ ᑐᐊᕕᕐᓇᖅᑐᓄᑐᐊᖅ ᑐᙵᕕᖃᖅᑐᒥ.

ᒪᐃᓐ ᐅᖃᓚᐅᖅᐳᖅ ᒫᓐᓇᐅᔪᒥ ᓄᓇᓕᖕᓂ ᐋᓐᓂᐊᕕᖕᓂ ᓵᙵᓂᖃᖅᑐᖃᙱᓚᖅ ᒪᑐᔭᐅᓂᖓᓂ. ᐅᖃᓚᐅᖅᐳᖅ ᖃᐅᔨᒪᓪᓚᕆᙱᓚᖅ ᐅᓄᓪᓚᕆᖕᓂᖏᓐᓂ ᐋᓐᓂᐊᕕᖕᓂ ᒫᓐᓇᐅᔪᒥ ᐊᑐᐃᓐᓇᖃᖅᑐᒥ ᒥᒃᖠᒋᐊᖅᑕᐅᔪᓂ ᐱᔨᑦᑎᕋᕐᓂᐅᔪᓂ ᐅᕝᕙᓘᓐᓃᑦ ᑐᐊᕕᕐᓇᖅᑐᓂ ᐱᔨᑦᑎᕋᕐᓂᐅᔪᓂ.

ᒪᐃᓐ ᐅᖃᓚᐅᖅᐳᖅ ᐱᔾᔪᑎᓪᓗᐊᑕᖓ ᓄᓇᓕᖕᓂ ᐋᓐᓂᐊᕕᖕᓂ ᐊᐅᓚᑕᐅᓂᖏᓐᓄᑦ ᐊᑲᐅᙱᓕᐅᕈᑕᐅᔪᓄᑦ ᐱᔾᔪᑎᖃᖅᐳᖅ ᐃᖅᑲᓇᐃᔭᖅᑎᖃᕐᓂᕐᒥ.

“ᐃᖅᑲᓇᐃᔭᖅᑎᖃᕆᐊᖃᖅᐳᒍᑦ ᐋᓐᓂᐊᕕᖕᓂ ᑕᒪᒃᑭᐅᒪᔪᒥ ᐱᔨᑦᑎᕋᕐᓂᐅᔪᒥ ᑐᓂᓯᔪᓐᓇᕐᓂᐊᕋᑦᑕ ᑕᒪᒃᑭᐅᒪᔪᒥ ᐱᓕᕆᐊᖑᓂᐅᔪᓂ ᓄᓇᓖᑦ ᐱᔭᕆᐊᓕᖏᓐᓂ, ᐊᒻᒪ ᑕᒪᓐᓇ ᐱᓕᕆᕝᕕᒐ ᑐᑭᓯᐅᒪᓂᖃᖅᐳᖅ,” ᒪᐃᓐ ᐅᖃᓚᐅᖅᐳᖅ ᑭᐅᓂᖓᓂ.

“ᐊᑕᐅᓯᕐᒥ ᑲᑎᙵᓂᐅᔪᒥ ᓇᒃᓴᖅᓯᒪᕗᒍᑦ ᐱᐅᓯᒋᐊᖅᑎᑦᑎᓂᕐᒥ ᐃᖅᑲᓇᐃᔭᖅᑎᖃᕐᓂᕐᓄᑦ ᓄᓇᓕᖕᓂ ᑭᒡᓕᐅᔪᒥ, ᐃᓚᖃᖅᑐᒥ ᖃᔅᓯᒐᓚᖕᓂ ᐱᓕᕆᓂᐅᔪᓂ ᑕᐅᑐᒃᑐᒥ ᐊᓯᔾᔨᖅᓯᓂᖓᓂ ᐃᑲᕐᕋᐅᔪᓂ ᐊᐅᓚᑕᐅᓂᐅᔪᓂ ᐋᓐᓂᐊᕕᖕᓄᑦ.”

ᒪᐃᓐ ᐅᖃᓚᐅᖅᐳᖅ ᐱᓕᕆᕝᕕᖓ ᐱᓕᕆᖃᑎᖃᖅᐳᑦ ᐃᖅᑲᓇᐃᔭᖅᑐᓕᕆᔨᒃᑯᓐᓂ ᐊᒻᒪ ᓄᓇᕗᒻᒥ ᔫᓂᐊᓐᒥ ᓴᙱᒃᑎᒋᐊᖅᓯᓂᕐᒥ ᐃᖅᑲᓇᐃᔭᖅᑎᖃᕐᓂᕐᒧᑦ ᐊᒻᒪ ᐃᑲᔪᕐᓂᕐᒧᑦ ᐸᐸᑦᑏᓐᓇᕈᓐᓇᕐᓂᕐᒧᑦ.

ᖃᐃᕐᓂᖅ ᐅᖃᓚᐅᖅᐳᖅ ᓄᓇᓕᖓ ᓴᓂᕋᔭᖕᒥ “ᐊᒃᓱᕈᕐᔪᐊᖅᐳᑦ ᐃᒃᐱᒍᓱᑦᑎᐊᕐᓂᕐᒥ” ᒫᓐᓇᐅᔪᒥ ᐊᐅᓚᑕᐅᓂᐅᔪᓄᑦ ᑭᒡᓕᖃᖅᑎᑕᐅᓂᐅᔪᓂ ᐋᓐᓂᐊᕕᖕᒥ.

ᐊᑕᐅᑦᑎᒃᑯᑦ, ᐃᓚᒋᐊᖅᓯᓚᐅᖅᐳᖅ, “ᐃᓄᐃᑦ ᐅᒃᐱᕈᓱᖕᓂᖃᕆᐊᖃᖅᐳᑦ ᑐᐊᕕᕐᓇᕐᓂᖏᑦ ᑭᐅᔭᐅᓂᐊᕐᓂᖏᓐᓂ ᕿᓚᒻᒥᐅᔪᒥ.”

ᐊᓇᕕᓗᒃ ᓴᖅᑭᑎᑦᑎᓚᐅᕆᕗᖅ ᐃᓱᒫᓘᑕᐅᔪᓂ ᐋᓐᓂᐊᕕᖕᒥ ᓄᓇᓕᖓᓂ, ᖃᐃᖁᔨᓂᖃᖅᖢᓂ ᓄᑖᖑᔪᒥ, ᐊᖏᓂᖅᓴᐅᔪᒥ ᐊᒻᒪ ᐱᖁᑎᖃᕐᓂᖅᓴᐅᓂᖓᓂ ᐋᓐᓂᐊᕕᖕᒥ ᒪᑐᐃᖅᑕᐅᓂᖓᓂ ᖁᕐᓗᖅᑐᕐᒥ.

ᐅᖃᓚᐅᖅᐳᖅ ᒫᓐᓇᐅᔪᒥ ᐃᒡᓗᕐᔪᐊᖅ ᐱᔨᑦᑎᕋᖅᐳᖅ ᐃᓄᒋᐊᖕᓂᐅᔪᒥ ᐅᓄᕐᓂᖅᓴᐅᔪᒥ 1,600−ᓂ ᑭᓯᐊᓂ ᑎᓴᒪᑐᐃᓐᓇᓂ ᖃᐅᔨᓴᕐᕕᖕᓂ ᐃᒡᓗᕈᓯᖃᖅᐳᖅ. ᐅᖃᓚᐅᖅᐳᖅ ᐱᑕᖃᙱᓗᐊᕐᓂᖓᓂ ᐃᓂᒃᓴᐅᔪᒥ ᐃᒃᐱᒋᔭᐅᓗᐊᖅᐳᖅ ᐊᓯᐊᒎᖅᑐᓂ ᐅᐸᒡᕕᒃᓴᖃᖅᑎᓪᓗᒍ ᐊᒻᒪ ᓘᒃᑖᒃᑲᓐᓂᕐᓂ, ᐃᓗᐊᖅᓴᐃᔨᓂ ᐊᒻᒪ ᐃᖅᑲᓇᐃᔭᖅᑎᓂ ᓄᓇᓕᖕᓃᑎᓪᓗᒋᑦ.

ᓄᑖᒥ ᐋᓐᓂᐊᕕᖕᒥ ᐃᑲᔪᕋᔭᖅᐳᖅ “ᑐᓂᓯᓂᕐᒥ ᐱᐅᓂᖓᓂ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐸᖅᑭᓂᐅᔪᒥ ᖁᕐᓗᖅᑐᕐᒥᐅᑕᓂ ᐱᓪᓗᐊᖅᑕᖏᓐᓂ,” ᐊᓇᕕᓗᒃ ᐅᖃᓚᐅᖅᐳᖅ ᑐᓴᒐᒃᓴᓕᐊᖓᓂ.

ᐊᐱᖅᓱᓚᐅᖅᐳᖅ ᒪᐃᓐᒥ ᑮᓇᐅᔭᐃᑦ ᐊᑐᖅᑕᐅᔪᒃᓴᓂ ᓄᑖᖑᔪᒧᑦ ᓄᓇᓕᖕᓂ ᐋᓐᓂᐊᕕᖓᓂ ᖁᕐᓗᖅᑐᕐᒥ ᐃᓚᒋᔭᐅᔪᒥ ᒐᕙᒪᒃᑯᑦ ᐊᑭᑐᔫᑎᓄᑦ ᑮᓇᐅᔭᑦ ᐊᑐᖅᑕᐅᔪᒃᓴᓂ ᐸᕐᓇᐅᑎᖓᓂ.

ᒪᐃᓐ ᐅᖃᓚᐅᖅᐳᖅ ᐳᓚᕋᓛᕈᒪᕗᖅ ᖁᕐᓗᖅᑐᒧᑦ ᐊᒻᒪ ᑲᑎᒪᖃᑎᖃᕐᓗᓂ ᕼᐋᒻᓚᒃᑯᑦ ᓄᓇᖃᖅᑐᓂ ᑐᑭᓯᓇᓱᐊᕐᓂᕐᒧᑦ ᐱᔭᕆᐊᖃᕐᓂᐅᔪᓂ ᓄᓇᓕᖕᓂ.

ᓇᓗᓇᐃᖅᓯᓚᐅᙱᓚᖅ ᐅᓪᓘᔪᒥ ᓄᓇᓕᖕᓂ ᐋᓐᓂᐊᕕᒃᓴᒥ ᖁᕐᓗᖅᑐᕐᒧᑦ ᓴᖅᑭᑎᑕᐅᓛᕐᓂᖓᓂ ᓄᓇᕗᒻᒥ ᒐᕙᒪᒃᑯᑦ ᐊᑭᑐᔫᑎᓂ ᑮᓇᐅᔭᑦ ᐊᑐᖅᑕᐅᔪᒃᓴᓂ ᐸᕐᓇᐅᑎᒥ, ᑭᓯᐊᓂ ᐅᖃᓚᐅᖅᐳᖅ ᓂᕆᐅᒃᐳᖅ ᐱᓕᕆᕝᕕᖓ ᐱᓕᕆᖃᑎᖃᕈᓐᓇᓛᕐᓂᖓᓂ “ᒐᕙᒪᑐᖃᒃᑯᑦ ᐱᓕᕆᖃᑎᒋᔭᖏᓐᓂ” ᑭᐅᓂᕐᒥ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᐃᓚᑰᓂᐅᔪᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᑎᕋᕐᓂᐅᔪᓄᑦ.

“ᐋᓐᓂᐊᕕᑐᐃᓐᓇᐃᙱᑦᑐᑦ, ᑭᓯᐊᓂᑦᑕᐅᖅ ᐊᑯᓂᐅᔪᒥ ᐸᖅᑭᔭᐅᓂᐅᔪᒥ ᐊᒻᒪ ᐊᓯᖏᓐᓂ ᖃᓄᐃᑦᑑᓂᖏᓐᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ-ᐱᔾᔪᑎᓕᖕᓂ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ, ᐊᒻᒪ ᖁᕕᐊᑉᐳᖓ ᑲᑐᔾᔨᖃᑎᒌᖕᓂᕐᒥ ᒐᕙᒪᑐᖃᒃᑯᓐᓂ ᐱᓕᕆᖃᑎᒋᔭᑦᑎᓐᓄᑦ,” ᒪᐃᓐ ᐅᖃᓚᐅᖅᐳᖅ.

ᑕᑦᑭᐅᓚᐅᖅᑐᒥ ᒪᓕᒐᓕᐅᕐᕕᖕᒥ, ᕿᓕᖅᑎ ᖃᐃᖁᔨᓂᖃᓚᐅᕆᕗᖅ ᓄᑖᒥ ᐋᓐᓂᐊᕕᖕᒥ ᓴᓇᔭᐅᓂᖓᓂ ᓄᓇᓕᖓᓂ ᕿᑭᖅᑕᕐᔪᐊᒥ. ᐅᖃᓚᐅᖅᐳᖅ ᓄᑕᐅᙱᓛᖑᓪᓗᓂ ᐋᓐᓂᐊᕕᐅᕗᖅ ᓄᓇᕗᒻᒥ, ᐊᒻᒪ ᓴᓇᔭᐅᓚᐅᖅᓯᒪᕗᖅ 1972−ᒥ.

ᒪᐃᓐ ᑭᐅᓚᐅᖅᐳᖅ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐸᕐᓇᐅᑎᖃᖅᐳᑦ ᐃᓇᖏᖅᓯᓂᕐᒥ ᑕᐃᔅᓱᒥᖓ ᐋᓐᓂᐊᕕᐅᔪᒥ, ᑭᓯᐊᓂ ᐊᒃᓱᕈᖅᓯᒪᕗᑦ ᐱᓂᕐᒥ ᑮᓇᐅᔭᖃᖅᑎᑕᐅᓂᐅᔪᒥ ᐱᓕᕆᐊᒃᓴᐅᔪᒧᑦ.