ᖃᐅᔨᓴᕈᑏᑦ ᓴᖅᑭᑎᑦᑎᕗᑦ ᖃᓄᖅ ᓴᖅᑭᔮᙱᑎᒋᓂᖓᓂᒃ ᐊᖏᕐᕋᖃᙱᓐᓂᖅ ᓄᓇᕗᒥᑦ

“ᑕᒪᓐᓇ ᐃᒃᐱᒍᓱᒍᑎᒋᒻᒪᕆᒃᑕᕗᑦ ᑕᒪᑐᒥᖓ ᐊᑐᖅᑐᐃᓯᒪᓂᖓᓂᒃ ᑖᒃᑯᓂᖓ”

ᓄᑖᖅ ᐅᓂᒃᑳᖅ ᑕᑯᔭᐅᕙᙱᑦᑐᓂᒃ ᐊᖏᕐᕋᖃᕐᓂᕐᒥᒃ ᓄᓇᕗᒥᑦ ᓴᖅᑭᑎᑦᑎᕗᖅ ᐱᑕᖃᕆᐊᖃᓪᓚᕆᖕᓂᖓᓂᒃ ᓴᐃᓕᓚᐅᑲᒡᕕᒃᓴᒥᓐ: ᐃᓂᒃᓴᒥᑦ ᐃᓄᖕᓄᑦ ᐅᐸᒃᑕᐅᓯᒪᓚᐅᒐᒍᓐᓇᖅᑐᓂᒃ ᐃᓄᒋᐊᓗᐊᖅᑐᒥᓐ ᐊᒻᒪ ᐊᖏᕐᕋᖃᙱᑦᑐᓄᑦ. (ᐊᔾᔨᙳᐊᖁᑎᒋᔭᐅᔪᑦ)

By ᓴᐃᕋ ᕌᔾᔪᔅ

For an English version of this story, see Survey reveals just how hidden homelessness can be in Nunavut

ᓴᖅᑭᑕᐅᓵᓚᐅᕐᑐᖅ ᐅᓂᒃᑳᓕᐊᖑᓂᑯ ᖃᔅᓯᐅᓂᖏᓐᓂᒃ ᓇᓗᓇᐃᕐᓯᓇᓱᒃᑐᖅ ᓄᓇᕗᒻᒥᐅᓂᒃ ᐊᖏᕐᕋᖃᙱᓐᓂᕐᒥᒃ ᐊᒃᓱᕉᑎᖃᖅᑐᓂᒃ ᐊᒻᒪᓗ ᑕᒪᐅᓇᑦᑕᐃᓐᓇᕐᓗ ᐊᔪᕐᓇᖃᑦᑕᕐᓂᖓᓂᒃ ᐊᖏᕐᕋᖅᑖᕋᓱᒃᖢᓂ ᓄᓇᕗᒥᑦ ᓄᓇᖃᖅᖢᓂ.ᓄᓇᕗᒥᑦ ᓴᖅᑭᔮᙱᑦᑐᓂᒃ ᐊᖏᕐᕋᖃᙱᑦᑐᓂᒃ ᖃᐅᔨᓴᕐᓂᖅ ᐱᓕᕆᐊᖑᓚᐅᕐᓯᒪᔪᖅ ᓄᓇᕗᒥᑦ ᒐᕙᒪᒃᑯᑦ ᐃᓄᓕᕆᔨᒃᑯᖏᓐᓄᑦ 2018-ᖑᑎᓪᓗᒍ. ᖃᐅᔨᒍᑎᐅᓂᑯᑦ ᓴᖅᑭᑕᐅᓚᐅᕐᓯᒪᔪᑦ ᒪᓕᒐᓕᕆᔨᓄᑦ ᓯᑎᐱᕆᐅᑎᓪᓗᒍ.ᖃᐅᔨᓴᓚᐅᕐᑐᑦ ᐊᖏᕐᕋᖃᙱᓐᓂᕐᒥᒃ ᑎᓴᒪᓂᒃ ᓄᓇᓕᖕᓂᑦ—ᒥᑦᑎᒪᑕᓕᒃ, ᑲᖏᖅᑐᒑᐱᒃ, ᐊᕐᕕᐊᑦ ᐊᒻᒪ ᐅᖅᓱᖅᑑᖅᒥᑦ—ᐃᓱᒪᓪᓗᑎᒃ 400 ᐅᖓᑖᓃᑦᑐᑦ ᐃᓄᐃᑦ ᑖᒃᑯᓇᓂ ᓄᓇᓕᖕᓂ ᐊᖏᕐᕋᖃᙱᑦᑐᑦ ᐅᕝᕙᓘᓐᓃᑦ ᐊᔾᔨᒌᙱᑦᑐᓄᑦ ᓯᓂᒋᐊᖅᑐᖅᐸᒃᑐᑦ, ᐃᓛᓐᓂᒃᑯᑦ ᑐᕐᓲᖕᓂ ᐅᕝᕙᓘᓐᓃᑦ ᓯᕐᓗᐊᕐᒥᒃ.

ᖃᐅᔨᓴᕈᑎᓄᑦ ᐅᓂᒃᑳᑦ ᖃᐅᔨᓚᐅᕐᑐᑦ 5 ᐳᓴᓐᑎᐅᓪᓗ 11 ᐳᓴᓐᑎᐅᓪᓗ ᐊᑯᓐᓂᖓᓂ ᓱᕈᓯᐅᓚᐅᕐᑐᑦ ᓇᓗᓇᐃᕐᑕᐅᓪᓗᑎᒃ ᐃᒡᓗᖃᙱᖃᑕᐅᔪᓂᒃ.

ᐃᓄᓕᕆᔨᒃᑯᑦᑕᐅᖅ ᐃᒪᐃᓕᐅᓚᐅᕐᒥᔪᑦ “ᒫᓐᓇ ᐊᑐᖅᑐᒥ” ᖃᐅᔨᓴᖅᖢᑎᒃ ᐊᖏᕐᕋᖃᙱᑦᑐᒃᑯᕕᖕᓂᒃ ᐊᑐᖃᑦᑕᖅᑐᓂᒃ ᓄᓇᕗᑦ ᓄᓇᓕᖏᓐᓂᒃ ᑕᒪᒃᑯᓂᖓ ᐃᒡᓗᖃᖅᑐᓂᒃ: ᐃᖃᓗᒃᑑᑦᑎᐊᖅ, ᖁᒡᓗᖅᑑᖅ, ᑰᒑᕈᒃ, ᐃᖃᓗᐃᑦ ᐊᒻᒪ ᑲᖏᖅᖠᓂᖅ.

2018/19-ᒥᑦ, ᐅᓂᒃᑳᖑᔪᑦ ᖃᐅᔨᒍᑎᐅᓚᐅᕐᑐᑦ 252-ᖑᔪᑦ ᐊᑐᓚᐅᕐᓯᒪᓂᖏᓐᓂᒃ ᓄᓇᕗᒥᑦ ᐱᖓᓱᑦ ᐊᖏᕐᕋᖃᙱᑦᑐᒃᑯᕕᖕᓂ. ᑕᕝᕙᓂᑦᑕᐃᓐᓇᕐᓗ ᐊᕐᕌᒍᒥ, 290 ᐊᕐᓇᐃᑦ ᐊᒻᒪ 279 ᓱᕈᓰᑦ ᐅᑯᓄᙵᐅᓚᐅᕐᓯᒪᔪᑦ ᓄᓇᕗᒥᑦ ᑕᓪᓕᒪᓄᑦ ᕿᒫᕝᕕᒋᔭᐅᔪᓄᑦ.

“ᖃᔅᓯᐅᓂᕋᖅᑕᐅᓂᖏ ᐅᕙᑦᑎᓐᓄ ᑲᒪᓇᙱᑦᑐᑦ,” ᐅᖃᖅᑐᖅ ᓕᓐᓯ ᑑᓄ, ᑐᑭᒧᐊᖅᑎᑦᑎᔨ ᓄᓇᕗᒥᑦ ᐃᓄᓕᕆᔨᒃᑯᑦ ᑳᓗᐊᖅᑕᐃᓕᒪᑎᑦᑎᓂᕐᒧᑦ ᐱᓕᕆᕝᕕᖕᒥᑦ.

“ᐃᓱᒪᔪᖓᓕ ᖃᐅᔨᕚᓪᓕᓚᐅᕐᓂᑦᑎᓐᓂᒃ ᖃᔅᓯᐅᓂᖏᓐᓂᒃ ᒪᑯᓄᖓ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᑐᕌᖓᔪᓂᒃ. ᑕᒪᒃᑯᐊ ᓇᓗᓇᐃᕐᓯᒍᑎᐅᓚᐅᕐᒪᑕ ᖃᓄᐃᒍᑎᓄᑦ ᐃᓚᖏᑦ ᐃᓚᒌᑦ ᐃᒡᓗᒥ ᓈᒻᒪᙱᓕᐅᖁᑎᖃᕐᓯᒪᓂᖏᓐᓂᒃ.”

ᑑᓄ ᐅᖃᓚᐅᕐᑐᖅ ᑖᒃᑯᐊ ᐅᓂᒃᑳᑦ ᓇᐃᓴᐅᑎᖏᑦ ᐅᖃᐅᓯᐅᔪᑦ ᓄᓇᕗᒦᑦᑐᓕᒫᓅᖏᑐᐃᓐᓇᕆᐊᖃᕐᓂᖏᓐᓂᒃ, ᐅᖃᖅᖢᓂ ᐊᑐᓂ ᓄᓇᕗᒥ ᓄᓇᓕᒃ ᓇᖕᒥᓂᖅ ᖃᓄᐃᕐᓂᕐᒨᕈᑎᖃᕐᓂᖏᓐᓂᒃ.

ᓄᓇᕗᓪᓕ ᓇᓗᓇᙱᓚᖅ ᐃᒡᓗᑭᒃᓴᓗᐊᕐᓂᖓᓂᒃ, ᐊᒻᒪᓗ ᑖᓐᓇ ᓇᓗᓇᙱᓗᐊᖅᖢᓂ ᓇᐃᓴᐅᑎᑎᒍᑦ: ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐃᓱᒪᔪᑦ ᐱᑖᕆᐊᖃᕐᓂᖏᓐᓂᒃ 3,500-ᓂ ᓄᑖᓂ ᐃᒡᓗᓂ ᓄᓇᕗᓕᒫᒥᑦ.

ᑭᓯᐊᓂᓕ ᖃᐅᔨᓴᕐᓂᕐᒧᑦ ᑭᐅᔨᐅᓯᒪᔪᑦ ᐅᖃᐅᓯᖃᓚᐅᕐᒥᔪᑦ ᐊᔾᔨᒌᙱᑦᑐᓂᒃ ᐱᔾᔪᑎᖏᓐᓂᒃ ᐃᒡᓗᖃᑦᑎᐊᙱᓐᓂᕐᒧᑦ, ᐋᓐᓂᐊᖃᕐᓂᕐᒧᑦ, ᓯᓚᒥ ᓈᒻᒪᒃᓴᙱᓗᐊᕐᓂᕐᒧᑦ, ᐃᖅᑲᓇᐃᔮᖃᕈᓐᓃᕐᓂᕐᒧᑦ ᐅᕝᕙᓘᓐᓃᑦ ᐃᓛᒌᑦ ᓈᒻᒪᙱᓕᐅᕈᑎᖃᕐᓂᖏᓐᓄᑦ.

“ᐊᖏᕐᕋᖃᙱᓐᓂᖅ ᐱᑐᐃᓐᓇᐅᙱᒻᒪ ᐱᓕᕆᐊᒃᓴᑎᒍᑦ ᐊᒻᒪᓗ ᐊᖏᕐᕋᖃᙱᓐᓂᕐᒧᑐᐃᓐᓇᐅᓇᓂ,” ᑑᓄ ᐅᖃᖅᑐᖅ.

ᒪᓕᒐᓕᐅᕐᑎᐅᔪᑦ ᐅᓂᒃᑳᓄ ᖃᓄᐃᓕᕈᓘᔭᓚᐅᕐᑐᑦ ᒪᓕᒐᓕᕆᕝᕕᖕᒥ ᐱᓇᓱᐊᕈᓯᐅᓚᐅᕐᑐᒥ, ᒐᕙᒪᒃᑯᓐᓂ ᐱᔨᑦᑎᕋᐅᑎᖃᖁᔭᐅᓪᓗᑎᒃ ᐃᑲᔪᕈᑎᒃᓴᓂᒃ ᓄᓇᕗᒻᒥᐅᓂᒃ ᐊᖏᕐᕋᖃᙱᓐᓂᕐᒧᑦ ᓈᒻᒪᙱᓕᐅᕈᑎᖃᖅᑐᓂᒃ.

ᐊᕐᕕᐊᕐ ᐅᐊᖕᓇᖓᓄᑦ-ᑎᑭᕋᕐᔪᐊᖅᒧᑦ ᒪᓕᒐᓕᐅᕐᑎ ᔮᓐ ᒪᐃᓐ ᐅᖃᓚᐅᕐᑐᖅ ᐅᓇ ᐅᓂᒃᑳ ᓴᖅᑭᔮᖅᑎᑦᑎᓂᖓᓂ ᓴᐱᓕᕐᓯᒪᒍᑎᓂ ᐅᓄᕐᑐᓄᑦ ᐊᖏᕐᕋᖃᑦᑎᐊᙱᓐᓂᕐᒧᑦ ᓄᓇᕗᒥᑦ ᐊᒻᒪᓗ ᓇᓗᓇᐃᕐᓯᓯᒪᓪᓗᓂ ᖃᓄᖅ ᐊᖏᕐᕋᖃᙱᓐᓂᖅ ᐊᒃᑐᐊᓂᖃᕐᓂᖓᓂᒃ ᐃᓄᒋᐊᓗᐊᖅᑐᐊᓗᖕᒥᓐᓂᕐᒧᑦ, ᐊᔪᕐᓴᓗᐊᕐᓂᕐᒧᑦ, ᓂᕿᖃᕈᓐᓇᙱᓐᓂᕐᒧᑦ, ᐊᑐᓗᐊᔭᓐᓂᕐᒧᑦ ᐋᖓᔮᕐᓇᖅᑐᓂᒃ ᐊᒻᒪᓗ ᐱᑦᑎᐊᖃᑦᑕᙱᓐᓂᐊᓗᖕᒧᑦ.

ᐅᖅᓱᖅᑑᖅᒧᑦ ᒪᓕᒐᓕᐅᕐᑎ ᑑᓂ ᐊᑯᐊᒃ ᐅᖃᓚᐅᕐᑐᖅ ᐊᖏᕐᕋᖓᓂ ᓄᓇᓖᑦ ᖁᑦᑎᖕᓂᖅᐹᖑᓂᖏᓐᓂᒃ ᓈᒻᒪᙱᓕᐅᕈᑎᖃᖅᑐᓂᒃ ᐊᖏᕐᕋᖃᙱᓐᓂᕐᒥᒃ, ᑖᒃᑯᓇᙵᓪᓗ ᐅᓄᕐᓂᕐᓴᐃᑦ “ᐃᒃᓯᕙᐅᑖᓗᒋᔭᐅᔪᓂᒃ ᓯᓂᒃᐸᒃᖢᑎᒃ” ᐅᕝᕙᓘᓐᓃᑦ ᐊᔾᔨᒌᙱᑦᑐᓄᑦ ᓯᓂᒋᐊᖅᑐᖅᐸᒃᖢᑎᒃ.

“ᐅᓂᒃᑳᑦ ᐅᖃᐅᓯᖃᖅᑐᑦ ᐱᑕᖃᕆᐊᖃᓪᓚᕆᖕᓂᖓᓂᒃ ᐅᐸᒡᕕᐅᔪᓐᓇᖅᑐᓂᒃ ᕿᓚᒥᐅᒐᓗᐊᖅ ᒪᑯᓂᖓ ᓈᒻᒪᙱᓕᐅᕈᑎᓂᒃ ᐃᓄᒋᐊᓗᐊᖅᑐᒦᓐᓂᕐᒧᑦ ᐊᒻᒪᓗ ᐊᖏᕐᕋᖃᙱᓐᓂᕐᒥ ᕿᒪᐃᕝᕕᐅᓚᐅᑲᒍᓐᓇᖅᑐᓂᒃ,” ᐊᑯᐊᒃ ᐅᖃᖅᑐᖅ ᒪᓕᒐᓕᕆᔨᓄᑦ ᐊᐃᑉᐹᓂᒃ, ᐅᒃᑑᐱᕆ 27, ᐊᐱᕐᓱᕐᓇᐅᑎᓪᓗᒍ.

“ᐃᓂᒃᓴᐅᓚᐅᑲᒍᓐᓇᖅᑐᑦ ᐅᐸᒡᕕᐅᔪᓐᓇᕐᑐᖃᕐᓗᑎᒃ ᐅᓪᓗᒃᑯᑦ, ᐅᓐᓄᒃᑯᑦ ᐅᕝᕙᓘᓐᓃᑦ ᐅᓐᓄᐊᒃᑯᑦ; ᒪᒥᓴᕐᕕᐅᔪᓐᓇᕐᑐᓂ ᐊᓯᐊᓃᑦᑐᓂᒃ; ᑕᖃᐃᕐᓯᕐᕕᒃᓴᓂᒃ; ᐅᕝᕙᓘᓐᓃᑦ ᖃᐅᑕᒫᓐ ᐱᓕᕆᐊᖑᕙᒃᑐᓂᒃ ᐱᓕᕆᕝᕕᒃᓴᓂᒃ ᓲᕐᓗ ᓂᕿᓕᐅᕐᕕᒋᔪᓐᓇᖅᑐᒥᓐ, ᐊᓐᓄᕌᓂ ᐅᐊᓴᕆᐊᕐᕕᐅᔪᓐᓇᖅᑐᓂᒃ, ᐅᖄᓚᐅᑎᒥ ᐊᑐᕐᕕᐅᔪᓐᓇᖅᑐᓂᒃ ᒪᑯᓂᖓᓘᓐᓃᑦ ᖃᕋᓴᐅᔭᓕᕆᓂᕐᒧᑦ ᐅᕝᕙᓘᓐᓃᑦ ᐅᐸᖃᑎᒌᒃᕕᒃᓴᒥᑦ. ᐅᖅᓱᖅᑑᖅ ᑕᐃᒪᐃᑦᑐᒥᑦ ᐅᐸᒡᕕᒃᓴᖃᙱᑦᑎᐊᕐᒪᓐ.”

ᑑᓄ ᐅᖃᓚᐅᕐᑐᖅ ᐃᓱᒪᒋᔭᐅᓯᒪᓂᖓᓂᒃ ᐅᐸᒡᕕᒃᓴᖃᕐᓂᖅ ᐅᓄᕐᑐᓂᒃ ᓄᓇᓕᖕᓂ—ᑕᕝᕙᓂ ᐅᓂᒃᑳᒥᓐ ᐊᒻᒪᓗ ᐊᓯᖏᓐᓂᒃ ᐅᖃᓪᓚᖃᑎᖃᖅᖢᑎᒃ. ᐱᓕᕆᕝᕕᖓᓕ ᒫᓐᓇ ᐱᓕᕆᖃᑎᖃᓕᕐᑐᖅ ᐊᑕᐅᓯᕐᒥ ᕼᐋᒻᒪᓚᑯᓐᓂᒃ ᓄᓇᓕᖕᓂ ᐱᓕᕆᐊᖃᕈᒪᔪᓂ ᐊᐅᓪᓚᖃᑦᑕᕐᓂᒃᑯᑦ ᐱᓕᕆᐊᖑᓂᐊᕈᒪᔪᒧᑦ.

“ᖃᐅᔨᓴᕈᒪᓚᐅᕐᓯᒪᒐᑦᑕ ᑕᒪᑐᒥᖓ ᖃᐅᔨᒪᔭᐅᓕᖁᓪᓗᒋᑦ ᖃᓄᖅ ᓄᓇᓕᖕᓂ ᖃᓄᐃᓕᐅᕈᓯᖃᕐᓂᕐᒥᒃ—ᑕᒪᓐᓇᓕ ᖃᐅᔨᒍᑎᒋᒻᒪᕆᓚᐅᕐᐸᕗᑦ ᐊᒃᑐᐃᒍᑎᐅᕙᒃᑐᓂᒃ ᑖᒃᑯᓄᖓ ᐃᓅᖃᑎᒋᔭᐅᔪᓂᒃ,” ᑑᓄ ᐅᖃᖅᑐᖅ.

“ᐃᓛᓐᓂ ᐅᐸᒃᓯᒪᔭᒥᒃ ᕿᒪᐃᓯᒪᓚᐅᑲᖕᓂᖅ ᐃᑲᔪᕈᑎᐅᔪᓐᓇᕐᒪᓐ ᐊᖏᕐᕋᖃᙱᓐᓂᕐᒧᑦ ᓈᒻᒪᙱᓕᐅᕈᑎᐅᕙᒃᑐᓂᒃ.”

ᑑᓄ ᐅᖃᓚᐅᕐᑐᖅ ᐱᓕᕆᕝᕕᖓ ᓄᓇᓕᖕᓂ ᑐᙵᓱᒃᑎᑦᑎᓯᒪᓕᕐᑐᑦ ᐃᓱᒪᒋᔭᖏᓐᓂᒃ ᑐᓴᕈᒪᓪᓗᑎᒃ ᖃᓄᖅ ᐊᖏᕐᕋᖃᙱᓐᓂᖅ ᐱᓕᕆᐊᖑᔪᓐᓇᕐᒪᖔᑦ, ᐊᒻᒪᓗ ᑖᒃᑯᐊ ᕼᐋᒻᒪᓚᒃᑯᓐᓂ ᐃᑲᔪᕈᓐᓇᖅᖢᑎᒃ ᐃᑲᔫᑎᒃᓴᖅᑖᕈᑎᒋᔪᓐᓇᖅᑕᖏᓐᓂᒃ ᖃᐅᔨᑎᑦᑎᓗᑎᒃ.

ᓄᓇᕗᒥᑦ ᒐᕙᒪᒃᑯᑦ ᐱᓕᕆᐊᖃᖅᐸᓪᓕᐊᖕᒥᔪᑦ ᐃᖅᑲᓇᐃᔭᖅᑎᑖᕋᓱᖕᓂᕐᒥᒃ ᐊᖏᕐᕋᖃᙱᑦᑐᓕᕆᔨᒃᓴᓂᒃ ᐱᓕᕆᖃᑎᖃᕋᔭᖅᑐᓂᒃ ᐱᖓᓱᓂ ᓄᓇᓕᖕᓂᒃ ᐱᓕᕆᔨᒻᒪᕆᒋᔭᐅᔪᓂᒃ: ᐃᖃᓗᒃᑑᑦᑎᐊᖅ, ᑲᖏᖅᖠᓂᖅ ᐊᒻᒪ ᒥᑦᑎᒪᑕᓕᒃᒥᑦ.

Share This Story

(0) Comments

Join the Conversation

Your email address will not be published. Required fields are marked *

*