11 ᐃᓄᐃᑦ ᓇᓗᓀᕐᑕᐅᓯᒪᔪᑦ ᐊᖏᖃᑎᒌᒐᓱᐊᕐᓂᕋᕐᑕᕕᓂᐅᑦᓱᑎᑦ ᑲᓇᑕᒥ ᓯᕗᓪᓕᐸᐅᑎᓪᓗᒍ ᐅᓪᓗᒥᐅᓕᕐᑐᖅ ᐊᖏᖃᑎᒌᒍᑎᓂᒃ

ᓅᕕᒻᐱᕆ 11, 1975-ᖑᑎᓪᓗᒍ, ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓ ᓭᓂᕐᑕᕕᓂᖅ ᑲᕙᒪᖏᓐᓄᑦ ᑲᓇᑕᐅᑉ ᑯᐯᒃᓗ, ᑯᐯᒃᑯ ᓯᒥᑦᑐᐃᔨᖏᑦ ᐊᒻᒪᓗ ᒪᕐᕉᒃ ᑎᒥᖁᑎᒋᔭᐅᔫᒃ, ᑲᑎᒪᔨᒻᒪᕆᖏᑦ ᐊᓪᓓᑦ ᑯᐯᒃᒥ ᐊᒻᒪᓗ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᖏᑦ. ᓇᓗᓀᕐᑕᐅᓯᒪᔪᑦ ᐊᒥᓱᓄᑦ ᑲᓇᑕᒥ ᓯᕗᓪᓕᐸᐅᑎᓪᓗᒍ ᐅᓪᓗᒥᐅᓕᕐᑐᖅ ᐊᖏᖃᑎᒌᒍᑎᓕᐊᕕᓂᐅᑦᓱᓂ.’’

ᑲᑎᑦᓱᒋᑦ 11 ᐃᓄᐃᑦ ᓄᓇᕕᒻᒥᐅᑦ, ᑭᒡᒐᑐᕐᓱᑎᑦ NQIA-ᑯᓂᑦ, ᐊᔪᐃᓐᓇᑐᕕᓃᑦ ᒥᑦᓴᐅᓵᕐᓱᒋᑦ ᓯᑕᒪᓂᑦ ᐅᑭᐅᓂᒃ

ᑖᓐᓇ ᐊᓪᓚᓯᒪᔪᖅ ᐅᐱᒍᓱᓐᓂᖃᕐᑐᖅ ᐃᓄᓐᓂᒃ ᓭᓂᖃᑕᐅᔪᕕᓂᕐᓂᒃ ᐊᖏᖃᑎᒌᒍᑎᒥᒃ ᖃᓄᐃᓘᕐᑎᐅᓂᕐᒥᓗ.

ᓵᓕ ᒍᐊᑦ

ᓵᓕ ᒍᐊᑦ

ᓵᓕ ᒍᐊᑦ, ᐃᓅᓕᕐᑐᕕᓂᑦ (Fort Chimo) ᑰᑦᔪᐊᒥ 1944-ᖑᑎᓪᓗᒍ, ᐊᖓᔪᕐᖄᕆᔭᐅᓯᒪᔪᖅ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᖏᓐᓂᒃ ᐊᒻᒪᓗ ᓯᕗᓕᕐᑎᒋᔭᐅᑦᓱᓂ ᐅᕕᒐᕐᑑᖏᓐᓇᑐᓄᑦ ᓭᓂᕐᑎᒋᔭᐅᓛᕐᓱᑎᑦ ᓄᐃᑕᐅᓂᖓᓄᑦ ᐊᖏᖃᑎᒌᓐᓂᖅ (JBNQA). ᑖᒃᑯᐊᖑᒌᕐᓯᒪᓕᕐᑎᓗᒋᑦ, ᐱᓂᐊᕐᓂᓕᕆᓂᕐᒥᒃ ᐱᒐᓱᐊᓯᓚᐅᔪᖅ ᐱᓇᓱᒐᕆᓯᑦᓱᒍ, ᐊᖓᔪᕐᖄᕆᔭᐅᓯᒪᑦᓱᓂ ᒪᑭᕝᕕᑯᓐᓄᑦ 11-ᓂᒃ ᐊᕐᕌᒍᕐᓂᑦ, ᐱᒋᐊᕐᓱᒍ 1978 ᐊᕐᕌᒍᖓᓂ ᑎᑭᑦᓱᒍ 1989 ᐊᕐᕌᒍᖓᓄᑦ. ᑎᓕᔭᐅᓯᔪᕕᓂᐅᒻᒥᔪᖅ ᑲᓇᑕᒥ ᓯᐊᓇᑐᖕᖑᖁᔭᐅᑦᓱᓂ, ᖃᓄᐃᓘᕐᑎᐅᕕᒋᓚᐅᕐᑕᖓ ᐱᒋᐊᕐᓱᒍ 1984 ᐊᕐᕌᒍᖓᓂᒃ ᑎᑭᑦᓱᒍ 2018 ᐊᕐᕌᒍᖓᓄᑦ, ᑖᒃᑯᓇᓂ ᐊᕐᕌᒍᕐᓂ ᐱᓇᓱᑦᑐᕕᓂᖅ ᐱᒍᑦᔨᓱᓂ ᐱᖁᔭᓂ ᕿᒥᕐᕈᔩᑦ ᑲᑎᒪᔨᖏᓐᓂᒃ ᐃᖃᓪᓕᐊᑐᓕᕆᓂᕐᒥᒃ ᐃᒪᕐᐱᓕᕆᓂᕐᒥᓗ ᐊᒻᒪᓗ ᑲᑎᒪᔨᖏᓐᓂᒃ ᓄᓇᖃᕐᖄᓯᒪᔪᑦ ᐃᓄᖏᓐᓂᒃ.

ᔮᔨ ᖁᖏᐊᖅ

ᔮᔨ ᖁᖏᐊᖅ

ᐃᓅᓕᕐᑐᕕᓂᖅ ᖁᐊᕐᑕᐅᑉ ᓴᓂᐊᓂ ᐊᕐᕌᒍᖓ 1931-ᖑᑎᓪᓗᒍ, ᔮᔨ ᖁᖏᐊᖅ NQIA-ᑯᓄᑦ ᑐᖓᓕᕆᔭᐅᓯᒪᒻᒥᔪᖅ ᐊᖓᔪᕐᖄᖓᓄᑦ. ᑲᑐᑦᔨᖃᑎᒌᓐᓂᑯᑦ ᐱᒋᐊᕐᖃᒥᐅᑎᓪᓗᒋᑦ, ᐱᓇᓱᓐᓂᖃᓚᐅᕐᓯᒪᔪᖅ ᐊᕐᕕᑕᕐᑎᒋᔭᐅᑦᓱᓂ ᐅᖓᕙᒻᒥᑐᓄᑦ ᓄᓇᓕᖏᓐᓄᑦ, ᓄᓇᖕᖑᐊᓕᕆᖃᑦᑕᓱᓂ ᐃᓘᓐᓇᖏᓐᓂᒃ ᓄᓇᓕᓕᒫᖏᓐᓂᒃ ᐊᑐᕐᑕᐅᖃᑦᑕᓛᕐᓂᐊᑐᓂᒃ ᒪᙯᓐᓂᒧᑦ ᒥᑭᒋᐊᕐᓂᐊᓂᕐᓄᓗ ᐃᓄᓐᓄᑦ. ᒪᑭᕝᕕᑯᓐᓄᑦ ᓯᕗᓪᓕᐹᖑᑦᓱᓂ ᑐᖓᓕᕆᔭᐅᔪᕕᓂᖅ ᐊᖓᔪᕐᖄᖓᓄᑦ ᐊᕐᕌᒍᖓᓂᒃ 1975. ᑲᒥᓯᓇᐅᓯᓐᓂᒥᔪᖅ ᐅᖃᐅᓯᕐᒥᒃ ᑲᑎᒪᔨᖏᓐᓂᒃ ᑯᐯᒃ ᑕᕐᕋᖓᓂ 1980 ᐅᑭᐅᖏᓐᓂᑦ, ᓄᓇᕕᒻᒥ ᑲᕙᓄᕆᔭᐅᓚᐅᔪᒻᒥᓱᓂ 1994-ᒥ 2000-ᓄᑦ ᑎᑭᑦᓱᒍ. ᓵᓕ ᒍᐊᑦ  ᑌᒎᓯᐊᕐᑕᕕᓂᖓ ‘’ᓄᓇᕕᐅᑉ ᐊᕿᒡᒋᖓ.’’

ᐃᕐᖃᐅᒪᒋᔭᐅᔪᖅ, 1931-2012

ᔮᓂ ᒍᐃᓕᐊᒻᔅ

ᔮᓂ ᒍᐃᓕᐊᒻᔅ

ᔮᓂ ᒍᐃᓕᐊᒻᔅ ᐱᓇᓱᑦᑎᒋᔭᐅᓚᐅᕐᓯᒪᔪᖅ ᐊᕐᕕᑕᕐᑎᒋᔭᐅᒻᒥᓱᓂ NQIA-ᑯᓄᑦ, ᐊᑦᔨᒐᓛᖓᓂᒃ ᐱᓇᓱᐊᕐᓯᒪᔭᖓᑕ ᔮᔨ ᖁᖏᐊᖅ ᑭᓯᐊᓂ ᑲᒪᓂᕐᓴᐅᓱᓂ ᑕᓯᐅᔭᕐᔪᐊᑉ ᓄᓇᓕᖏᓐᓂᒃ. ᒪᑭᕝᕕᑯᓐᓄᑦ ᑐᖓᓕᕆᔭᐅᓯᒪᔪᖅ ᐊᖓᔪᕐᖄᖓᓄᑦ 1977-ᖑᑎᓪᓗᒍ, ᑕᒐ ᓄᓇᓕᓕᒫᑦ ᑲᑎᒪᔨᒋᔭᐅᓯᒻᒥᓱᓂ ᑭᒡᒐᑐᕐᑎᒋᔭᐅᑦᓱᓂ ᐃᓄᒃᔪᐊᒥᐅᓄᑦ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ. ᐊᕐᕌᒍᖏᓐᓂᒃ 1990, ᑖᒃᓯᖃᕐᓂᒥᒃ ᓄᐃᑦᓯᓯᓐᓂᒥᔪᖅ ᓄᓇᓕᒻᒥᓂᒃ, ᓯᕗᓪᓕᐸᐅᓯᒪᔪᑦ ᑌᒣᑦᑐᓂᒃ. ᐊᑯᓂᒋᐊᖑᓕᕐᒥᒪᑦ ᐃᓄᒃᔪᐊᒥ ᑲᕙᒫᐱᖓᓄᑦ ᑲᒪᔨᒻᒪᕆᒋᔭᐅᓯᒪᒻᒥᓱᓂ.

ᐃᕐᖃᐅᒪᒋᔭᐅᔪᖅ, 1943-2015

ᔭᐃᐱᑎ ᓄᖕᖓᖅ

ᔭᐃᐱᑎ ᓄᖕᖓᖅ

ᐃᓅᓕᕐᑐᕕᓂᖅ ᐳᕕᕐᓂᑐᒥ 1951-ᖑᑎᓪᓗᒍ, ᔭᐃᐱᑎ ᓄᖕᖓᖅ ᐱᒋᐊᕐᓚᐅᕐᓯᒪᔪᖅ ᑮᓇᐅᔭᓕᕆᔨᒋᔭᐅᑦᓱᓂ, ᑕᒐ ᐊᓪᓚᑎᒻᒪᕆᕈᕐᓱᓂ NQIA-ᑯᓄᑦ. ᐱᒋᐊᕐᓱᒍ 1984 ᑎᑭᑦᓱᒍ 1987, ᐃᑦᓯᕙᐅᑕᕆᔭᐅᖃᑕᐅᓐᓂᒥᔪᖅ ᐃᓄᐃᑦ ᑲᑎᒪᔨᖏᓐᓄᑦ ᑲᓇᑕᒥ ᑲᒪᒋᔭᐅᔪᕐᓅᓕᖓᔪᓂᒃ, ᓯᕗᓪᓕᐸᐅᓯᒪᑦᓱᓂᓗ ᑐᖓᓕᕆᔭᐅᑦᓱᓂ ᐊᖓᔪᕐᖄᖓᑕ ᒪᑭᕝᕕᑯᑦ. ᐊᓪᓚᑎᐅᓱᓂ. ᖃᐅᔨᒪᔭᐅᔪᖅ ᐃᓄᐃᑦ ᐃᓕᕐᖁᓯᖓᓂᒃ ᐱᓇᓱᐊᕐᓂᒥᒃ ᐊᒻᒪᓗ ᕿᒥᕐᕈᐊᓕᐊᕕᓂᖓ ᑌᔭᐅᔪᖅ ᐃᒫᒃ (Wrestling with Colonialism on Steroids).

ᒫᓐᓇ ᐊᕙᑕᖅ ᐱᐅᓯᑐᖃᓕᕆᔩᓄᑦ ᐃᓄᒃᑎᑐᑦ ᐅᖃᐅᓯᕐᒥᒃ ᐱᓪᓗᑯᑦᑐᓕᕆᔨᐅᓕᕐᑐᖅ, ᐊᔪᐃᓐᓇᓂᖃᕐᓱᓂ ᐱᓇᓱᐊᕐᓂᒥᓂᒃ ᐆᒪᑦᓯᖏᓐᓇᕋᓱᐊᕐᓂᒥᒃ ᐅᖃᐅᓯᕐᒥᒃ. ᐁᑦᑐᑕᐅᓂᖃᓚᐅᔪᔪᖅ ᑲᓇᑕᒥ ᐃᓕᑕᕆᔭᐅᒍᑎᒥᒃ ᑯᐯᒃᒥ 2017-ᖑᑎᓪᓗᒍ.

ᐳᑐᓕᒃ ᐸᐱᑲᑦᑐᖅ

ᐳᑐᓕᒃ ᐸᐱᑲᑦᑐᖅ

ᐃᓅᓕᕐᑐᕕᓂᖅ ᓴᓪᓗᐃᑦ ᓴᓂᐊᓂ 1952-ᖑᑎᓪᓗᒍ, ᐳᑐᓕᒃ ᐸᐱᑲᑦᑐᖅ ᑲᒪᔨᒻᒪᕆᐅᓯᒪᔪᖅ, ᑮᓇᐅᔭᓕᕆᔨᐅᓯᒪᑦᓱᓂᓪᓗ NQIA-ᑯᓄᑦ ᐊᖏᖃᑎᒌᒐᓱᐊᕐᑎᓗᒋᑦ (JBNQA). ᐱᓇᓱᑦᓯᒪᓂᕐᒥᓂᒃ ᐊᖏᖃᑎᒌᒐᓱᐊᕐᓂᒥᒃ ᐊᑐᕐᓂᖃᓯᓚᐅᔪᒻᒥᔪᖅ 2007-ᖑᑎᓪᓗᒍ ᓄᓇᕕᒻᒥ ᐃᓄᐃᑦ ᓄᓇᑖᕐᓯᒪᓂᕋᕐᓂᖏᑦᑕ ᐊᖏᖃᑎᒌᒍᑕᐅᓂᖓ ᐱᒋᐊᖕᖓᑎᑕᐅᓯᒪᓕᕐᑎᓗᒍ. ᐱᓇᓱᓐᓂᒥᓂᒃ, ᓴᓪᓗᓂ ᓯᕗᓕᕐᑎᒋᔭᐅᓯᒪᒻᒥᔪᖅ ᑲᕙᒫᐱᖓᓂ ᑲᒪᔨᒻᒪᕆᒋᔭᐅᑦᓱᓂᓪᓗ. ᐊᖓᔪᕐᖄᕆᔭᐅᓯᒪᒻᒥᔪᖅ ᑲᑎᕕᒃ ᐃᓕᓴᕐᓂᓕᕆᓂᕐᒧᑦ 1990 ᒦᑦᑎᓗᑕ.

ᐃᕐᖃᐅᒪᒋᔭᐅᔪᖅ, 1952-2021

ᑖᒥ ᑮᓐ

ᑖᒥ ᑮᓐ

ᐃᓅᓕᕐᑐᕕᓂᖅ 1937-ᖑᑎᓪᓗᒍ, ᑖᒥ ᑮᓐ ᐊᖏᔪᒥᑦ ᐱᓇᓱᐊᕐᓯᒪᔪᖅ ᖃᓄᐃᓘᕐᑎᐅᓂᕐᒥᒃ ᓄᓇᕕᒻᒥ NQIA ᓄᐃᑕᐅᓚᐅᕐᑎᓇᒍ – ᐊᑐᕐᓂᖃᓪᓚᕆᑦᓯᒪᔪᖅ ᓄᐃᑕᐅᓂᖓᓂᒃ ᑕᓯᐅᔭᖅ ᐊᓂᕐᕋᕆᑦᓱᓂᐅᒃ ᐊᕐᕌᒍᖓᓂᒃ 1963. ᓯᕗᓕᕐᑎᒋᔭᐅᓯᒪᒻᒥᔪᖅ ᑕᓯᐅᔭᒥ, ᑭᒡᒐᑐᕐᑎᐅᓯᒪᑦᓱᓂ ᓄᓇᓕᒻᒥᓂᒃ ᒪᑭᕝᕕᑯᑦ ᑲᑎᒪᔨᖏᓐᓄᑦ ᐊᒻᒪᓗ ᑎᒃᑯᐊᑕᐅᓯᒪᒻᒥᓱᓂ ᑲᕗᓅᓂᕐᒧᑦ ᓄᓇᕕᒻᒥ. ᑮᓐ ᖃᐅᔨᒪᔭᐅᓚᐅᕐᒥᔪᖅ ᒪᙯᑦᓯᑎᐅᒋᐊᖓ ᒥᑭᒋᐊᕐᓂᐊᓯᑎᐅᒋᐊᖓᓗ, ᑲᑭᕙᓐᓂᒋᐊᕐᓯᑎᐅᑦᓱᓂᓗ. ᐱᓯᓚᕐᓂᒥᔪᖅ Finger Lake-ᒥ ᐃᑲᓗᑉᐱᓂᐊᕕᒃ ᑐᒃᑐᓯᐅᕆᐊᕐᕕᐅᓱᓂᓪᓗ ᒪᙯᕝᕕᒃ ᐊᒻᒪᓗ ᓱᕐᕃᓯᒪᑦᓱᓂ ᐳᓛᕆᐊᕐᑐᓕᕆᓂᕐᒥᒃ ᐱᕈᕐᑎᓚᕿᑦᓱᒍ ᓄᓇᕕᒻᒥ, ᓯᕗᓪᓕᐸᐅᓯᒪᑦᓱᓂᓗ ᐊᖓᔪᕐᖄᕆᔭᐅᓂᕐᒧᑦ ᓄᓇᕕᒻᒥ ᐳᓛᕆᐊᕐᑐᓕᕆᓂᕐᒥᒃ ᑲᑐᑦᔨᖃᑎᒌᖏᓐᓂᒃ 1992-ᖑᑎᓪᓗᒍ.

ᐃᕐᖃᐅᒪᒋᔭᐅᔪᖅ, 1937-2020

ᐅᔮᐱ ᑐᑲᓗᒃ

ᐅᔮᐱ ᑐᑲᓗᒃ

ᐃᓅᓕᕐᑐᕕᓂᖅ 1944-ᖑᑎᓪᓗᒍ, ᐅᔮᐱ ᑐᑲᓗᒃ ᐊᑯᓃᕐᑐᒥᒃ ᐱᓂᐊᕐᓂᓕᕆᔨᐅᓯᒪᔪᖅ ᑭᒡᒐᑐᕐᑎᒋᔭᐅᑦᓱᓂ ᑕᒪᒋᓐᓄᑦ ᑰᑦᔪᐊᕌᐱᒻᒧᑦ ᐅᒥᐅᔭᕐᒧᓗ. ᐃᓚᒋᔭᐅᓯᒪᔪᖅ ᒪᑭᕝᕕᑯᑦ ᑲᑎᒪᔨᖏᓐᓄᑦ 21-ᓂᒃ ᐊᕐᕌᒍᕐᓂᒃ, ᐃᓄᐃᑦ ᖃᖓᑦᑕᔫᖏᓐᓂᒃ 18-ᓂᒃ ᐊᕌᒍᕐᓂᒃ, ᓯᕗᓕᕐᑎᐅᓯᒪᑦᓱᓂ ᑰᑦᔪᐊᕌᐱᒻᒥᒃ ᐱᖓᓲᔪᕐᑐᐃᑦ ᕿᑎᕐᖃᓕᒫᖓᓂᓪᓗ ᐊᕐᕌᒍᕐᓂᒃ ᐅᒥᐅᔭᕐᒥᓗ ᓯᕗᓕᕐᑎᐅᓯᒪᑦᓱᓂ ᖁᓕᐅᖕᖏᒐᕐᑐᓂᒃ ᐊᕐᕌᒍᕐᓂᒃ. ᑫᓪᓗᑐᐃᓂᖃᓪᓚᕆᓚᐅᕐᒥᔪᖅ ᐃᓚᒋᔭᐅᓂᒃᑯᑦ ᐊᕙᑎᓕᕆᓂᕐᒥᒃ ᑲᑎᒪᔨᐅᕕᓚᑳᖁᑎᖏᓐᓂᒃ ᑰᓐᓂᒃ ᓯᒥᑦᑐᐃᓂᓕᕆᓂᕐᓄᐊᖓᔪᓂᒃ 1980 ᐱᒋᐊᕐᓂᖏᓐᓂᒃ, ᖃᓄᐃᓘᕐᑎᐅᓯᒪᒻᒥᓱᓂ ᓄᐃᑕᐅᓂᕕᓂᖓᓄᑦ ᐅᒥᐅᔭᖅ 1986 ᐊᕐᕌᒍᖓᓂᒃ.

ᐃᕐᖃᐅᒪᒋᔭᐅᔪᖅ, 1944-2017

ᐲᑕ ᐃᓄᒃᐸᒃ

ᐲᑕ ᐃᓄᒃᐸᒃ

ᐃᓅᓕᕐᑐᕕᓂᖅ 1951-ᖑᑎᓪᓗᒍ, ᐲᑕ ᐃᓄᒃᐸᒃ NQIA-ᑯᓄᑦ ᑲᒪᔨᒻᒪᕆᐅᓯᒪᔪᖅ ᑮᓇᐅᔭᓕᕆᔨᒋᔭᐅᑦᓱᓂᓗ. ᐊᖏᖃᑎᒌᓐᓂᖅ (JBNQA) ᓭᓂᕐᑕᕕᓂᐅᑎᓪᓗᒍ, ᓯᕗᓪᓕᐸᐅᑦᓱᓂ ᐃᑦᓯᕙᐅᑕᕆᔭᐅᓯᒪᔪᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ. ᐱᓂᐊᕐᓂᓕᕆᓂᕐᒥᒃ ᐊᑯᓂ ᐱᓇᓱᑦᓯᒪᔪᖅ ᑲᑎᒪᔨᒋᔭᐅᑦᓱᓂ ᒪᑭᕝᕕᑯᓐᓄᑦ, ᓯᕗᓪᓕᐅᓯᒪᑦᓱᓂ ᐃᓄᒃᔪᐊᒥ, ᑲᒪᔨᒻᒪᕆᐅᓯᒪᑦᓱᓂᓗ ᐱᑐᕝᕕᒃ ᓄᓇᒥ ᑎᒍᒥᐊᕐᑎᑯᓐᓄᑦ, ᖃᒻᒥᑯᑦ KRG-ᑯᓄᑦ ᓄᓇᓕᓕᒫᑦ ᑲᑎᒪᔨᐅᓯᒪᒻᒥᓱᓂ.

ᒫ ᐋᓇᓈᒃ

ᐃᓅᓕᕐᑐᕕᓂᖅ ᑲᖏᕐᓱᐊᓗᑦᔪᐊᒥ, ᒫ ᐋᓇᓈᒃ ᐱᓂᐊᕐᓂᓕᕆᓂᕐᒥᒃ ᐱᒋᐊᕐᑐᕕᓂᖅ ᑯᐊᐸᑖᕙᓪᓕᐊᑎᓪᓗᒋᑦ ᐊᒻᒪᓗ ᐱᓇᓱᐊᖃᑕᐅᓯᒪᑦᓱᓂ ᑯᐊᐸᑦᑖᕆᐊᖕᖓᑎᓪᓗᒋᑦ ᓄᓇᓕᒻᒥᓂᒃ 1959-ᖑᑎᓪᓗᒍ. ᑲᒪᔨᒻᒪᕆᒋᔭᐅᕇᑐᐊᕋᒥ ᐊᖏᖃᑎᒌᓐᓂᒥᒃ, ᐱᓇᓱᓯᓐᓂᒥᔪᖅ ᑲᑎᕕᒃ ᐃᓕᓴᕐᓂᓕᕆᓂᒃᑯᓄᑦ 1980 ᐅᑭᐅᖏᓐᓂᒃ. ᒪᑭᕝᕕᑯᓐᓄᑦ ᑲᑎᒪᔨᐅᓯᒪᒻᒥᓱᓂ ᑭᒡᒐᑐᕐᑎᒋᔭᐅᑦᓱᓂ ᑲᖏᕐᓱᐊᓗᑦᔪᐊᒧᑦ, ᓯᕗᓕᕐᑎᐅᓯᓐᓂᒥᓱᓂ ᓄᓇᓕᒻᒥᓄᑦ 1990 ᐅᑭᐅᖏᓐᓂᒃ.

ᐃᕐᖃᐅᒪᒋᔭᐅᔪᖅ, 1941-1999

ᓵᔪᐃᓕ ᒍᐃᑖᓗᒃᑐᒃ

ᓵᔪᐃᓕ ᒍᐃᑖᓗᒃᑐᒃ

ᓵᔪᐃᓕ ᒍᐃᑖᓗᒃᑐᒃ ᐱᓇᓱᑦᑎᒋᔭᐅᓯᒪᔪᖅ ᑕᓯᐅᔭᕐᓱᐊᒥ ᓄᐃᑕᖕᓐᓇᑎᓪᓗᒋᑦ NQIA-ᑯᑦ. ᐊᑦᔨᒌᖕᖏᑐᓂᒃ ᐱᓇᓱᑦᑎᐅᕕᖃᕐᓯᒪᔪᖅ ᓄᓇᕕᒃ ᐱᓂᐊᕐᓂᓕᕆᔭᐅᒍᑎᖏᓐᓂᒃ, ᐃᓚᒋᔭᐅᑎᓪᓗᒍ ᓯᕗᓕᕐᑎᐅᓯᒪᓂᖓ ᐃᓄᒃᔪᐊᒥ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᐳᕐᑐᓂᕐᓴᖁᑎᖏᓐᓄᑦ ᑲᑎᒪᔨᒋᔭᐅᖃᑦᑕᓯᒪᒻᒥᓱᓂ, ᑲᑎᕕᒃ ᐃᓕᓴᕐᓂᓕᕆᓂᕐᒧᑦ ᐊᖓᔪᕐᖄᕆᔭᐅᓯᒪᒻᒥᓱᓂ 1980 ᐅᑭᐅᖏᓐᓂ ᑐᖓᓕᕆᔭᐅᓯᒪᒻᒥᓱᓂᓗ ᐊᖓᔪᕐᖄᕆᔭᐅᓂᕐᒧᑦ ᐃᓚᒌᓴᒃᑯᓄᑦ. ᖃᒻᒥᐅᓂᕐᓴᑯᑦ ᐊᐅᓚᑦᓯᔨᐅᖃᑕᐅᓚᐅᔪᒻᒥᓱᓂ ᐊᕙᑕᒃᑯᑦ ᐱᐅᓯᑐᖃᓕᕆᔨᒃᑯᖏᓐᓄᑦ ᑭᒡᒐᑐᕐᑎᐅᓯᒪᒻᒥᓱᓂ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᖏᓐᓄᑦ. ᒫᓐᓇ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᑭᒡᒐᑐᕐᑎᒋᔭᐅᔪᖅ ᐃᓄᒃᔪᐊᒧᑦ.

ᓵᓕ ᐋᕐᖓᒃ

ᓵᓕ ᐋᕐᖓᒃ

ᐃᓅᓕᕐᑐᕕᓂᖅ 1952-ᖑᑎᓪᓗᒍ, ᓵᓕ ᐋᕐᖓᒃ ᑲᒪᔨᒻᒪᕆᐅᒋᐊᖕᖓᓯᒪᔪᖅ NQIA-ᑯᓄᑦ, ᑭᓯᐊᓂ ᓱᑲᑦᑐᒥᒃ ᓱᕐᕃᓚᕆᓐᓂᖃᕐᓯᒪᔪᖅ ᑲᖏᒃᓱᔪᐊᑉ ᐱᓂᐊᓂᓕᕆᔭᐅᒍᑎᖏᓐᓂᒃ ᓯᕗᓕᕐᑎᒋᔭᐅᓯᒪᑦᓱᓂ 1979 ᐱᒋᐊᕐᓱᒍ 1999 ᑎᑭᑦᓱᒍ. ᑌᑲᓂ, ᐱᒋᐊᕐᑎᓯᔪᕕᓂᖅ ᐅᖃᓕᒪᖃᑎᒌᓐᓂᒥᒃ ᐅᔭᕋᓐᓂᐊᓂᓕᕆᔩᑦ ᑲᒻᐸᓂᖏᓐᓂᒃ (Falconbridge), ᓄᐃᓚᕿᓯᒪᔪᖅ ᐅᔮᒃᓚᓐ ᐊᖏᖃᑎᒌᒍᑎᖓ 1995-ᖑᑎᓪᓗᒍ. ᑲᓇᑕᒥᐅᑦ ᐅᓇᑕᕐᑎᖏᓐᓄᑦ ᐃᓚᐅᓯᒪᒻᒥᔪᖅ 48-ᓂᒃ ᐅᑭᐅᓂᒃ, ᐃᓕᑕᕐᓯᔭᐅᒪᒍᑎᒥᒃ ᐱᓚᕿᑦᓱᓂ 2020-ᖑᑎᓪᓗᒍ ᐱᒍᑦᔨᓯᒪᓂᕐᒥᓄᑦ. ᐊᕙᑕᖅ ᐱᐅᓯᑐᖃᓕᕆᓂᕐᒧᑦ ᐊᖓᔪᕐᖄᕆᔭᐅᓯᒪᒻᒥᔪᖅ ᑕᒐ ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ ᑐᖓᓕᕆᔭᐅᓯᒪᒻᒥᓱᓂ ᐃᑦᓯᕙᐅᑕᖓᓄᑦ, ᐳᕐᑐᓂᕐᓴᖏᓐᓄᑦ ᑲᑎᒪᔨᒋᔭᐅᓯᒪᑦᓱᓂ.

This project has been made possible in part by the Government of Canada.