ᐃᒡᓗᓕᕆᔨᕐᒧᐊᒃᑯᑦ ᐃᒡᓗᓕᐅᕐᕕᒃᓴᓂ ᕿᓂᕐᓂᖏᓐᓄᑦ ᓄᓇᕗᒥᑦ ᐳᓚᕋᖅᑐᑦ

For the English version of this story, please see Housing corporation busy identifying possible lots for development.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᓇᓗᓇᐃᕐᓯᓚᐅᕐᑐᑦ ᐅᓄᕈᓘᔭᕐᑐᓂ ᓄᓇᓂ ᑲᖏᖅᖠᓂᖅᒥ ᐊᒻᒪ ᐊᕐᕕᐊᓂ ᐃᒡᓗᓄᑦ ᐃᓂᒃᓴᐅᓛᕋᓱᒋᔭᖏᓐᓂ.

ᐅᑯᐊ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᑎᑦᑎᓚᐅᕐᒪᑕ ᐸᕐᓇᐃᔨᓂ ᐊᒻᒪ ᖃᐅᔨᓇᓱᒃᑎᓂ ᐳᕋᐃᑐ ᓄᓇᓕᖕᓂ ᐸᕐᓇᐃᔨᓂ ᐊᒻᒪ ᖃᐅᔨᓇᓱᒃᑐᓂ ᖁᓕᓂ ᕼᐋᒻᒪᓚᐅᔪᓂ ᕿᒥᕐᕈᐊᕐᓂᐊᕐᓗᑎ ᓄᓇᕗᒥ ᐱᒋᐊᕐᓗᑎᒃ ᔪᓚᐃ 2-ᒥ. ᐅᑯᐊ ᐃᓚᖃᓚᐅᕐᒥᔪᑦ ᓄᓇᕗᒥᑦ ᐱᔨᓗᓕᕆᔨᕐᔪᐊᒃᑯᓐᓂ, ᓄᓇᓕᖕᓂ ᐊᒻᒪ ᒐᕙᒪᒃᑯᓐᓂ ᐱᔨᑦᑎᕋᖅᑎᓂ, NCC ᐱᕙᓪᓕᐊᔪᓕᕆᔨᒃᑯᓐᓂ ᐊᒻᒪᓗ ᓄᓇᓕᕆᔨᑦ ᐃᒡᓗᓕᐅᕐᕕᒃᓴᓄᑦ ᐱᓇᓱᐊᖅᑎᑦ.

ᐅᑯᐊ ᐱᓕᕆᖃᑎᒌᒃᑐᑦ ᖃᒪᓂᑦᑐᐊᕐᒧᐊᓚᐅᖅᑐᑦ ᑲᖏᖅᖠᓂᖅᒦᓚᐅᕐᖢᑎᒃ ᐊᒻᒪ ᐊᕐᕕᐊᓂ.

ᓄᓇᓕᖕᓂᓪᓕ ᑕᑯᔭᖅᑐᑲᑕᒃᑐᑦ ᓇᓗᓇᐃᕐᓯᓇᓱᒃᖢᑎᒃ ᐊᒻᒪ ᐃᓂᒋᔭᐅᓇᔭᖅᑐᓂ ᐱᕙᕇᕋᓱᒃᖢᑎᒃ ᓄᓇᓕᖕᓂ 2025-ᒥ ᐃᒡᓗᓕᐅᓛᕐᓂᖏᓐᓄᑦ. ᐅᓇ ᐃᑲᔪᕈᑎᐅᓂᐊᕐᒥᔪᖅ ᐃᒡᓗᓕᕆᔨᕐᔪᐊᒃᑯᓐᓄᑦ ᓄᓇᕗᑦ 3000 ᑎᑭᑕᐅᓇᓱᒃᑎᓪᓗᒍ.

“ᓄᓇᓂ ᐃᓂᒋᔭᐅᔭᕆᐊᓕᖕᓂ ᐱᓕᕆᐊᖃᓚᐅᕋᑦᑕ 2025ᒡᒧᑦ,” ᑯᕆᔅᑐᓪ ᕗᓗᕐ ᐅᖃᒪᐅᕐᑐᖅ ᐅᖃᐅᓯᖃᖅᖢᓂ ᒪᕐᕉᒃ ᐅᐸᖄᖅᑕᖏ ᖃᓄᐃᓚᐅᕆᐊᒃᓴᖏᓐᓂ ᐊᐱᕐᓱᖅᑕᐅᑎᓪᓗᒍ ᐅᖄᓚᐅᑎᒃᑯᑦ ᖃᒪᓂᑦᑐᐊᕐᒥ ᔪᓚᐃ 8-ᒥ. ᕗᓗᕐ ᓇᖕᒥᓂᖃᖅᑎᐅᔪᖅ ᐊᖓᔪᖅᑳᖑᓪᓗᓂᓗ ᐳᕋᐃᑐ ᓄᓇᓕᓕᕆᔨᓂ.

ᓄᓇᕗᒥᑦ ᒐᕙᒪᒃᑯ ᐊᒻᒪ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᓚᐅᕐᓯᒪᖕᒪᑕ ᓄᓇᕗᑦ 3000-ᒥ 2022-ᖑᑎᓪᓗᒍ ᐱᔾᔪᑎᒋᓪᓗᒍ ᐃᒡᓗᖃᙱᓗᐊᕐᓂᖓ ᓄᓇᕗᓕᒫᒥ.

ᓇᓗᓇᐃᒃᑯᑎᒋᓪᓗᒍ ᐃᒡᓗᑖᒃᑲᓐᓂᕆᐊᖃᕐᓂᖅ, 35 ᐳᓴᓐᑎᒋᔭᐅᔪᑦ ᓄᓇᕗᒥᑦ ᐊᖏᕐᕋᕆᔭᐅᔪᓂ ᐃᒡᓗᕈᓯᖃᐅᙱᓗᐊᕐᒪᑕ ᐃᓄᖏᓐᓄᑦ, ᑕᐅᑐᒃᖢᒋᓪᓗ 5 ᐳᓴᓐᑎᒋᔭᐅᔪᑦ ᑲᓇᑕᓕᒫᒥ, ᑕᐃᒪᓐᓇ ᐅᓂᒃᑳᕐᓯᒪᓚᐅᕐᑐᑦ 2020-ᒥ ᐅᑯᐊ ᓄᓇᕗᑦ ᑐᙵᕕᒃᑯᑦ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐊᒻᒪ NCC ᐱᕙᓪᓕᐊᔪᓕᕆᔨᑦ ᓕᒥᑎᑦᑯᑦ ᑲᒪᒋᔭᖃᕐᓂᐊᖅᑐᑦ ᐃᒡᓗᓕᐅᕐᓂᒥ ᓇᑉᐸᓪᓗᐊᖏᓐᓂ ᐸᕐᓇᒃᑕᐅᓯᒪᔪᓂᒃ ᐊᒻᒪ ᒫᓂ 1,400-ᖏᓐᓃᑦᑐᑦ ᐃᒡᓗᓕᕆᔨᒃᑯᑦ ᐃᒡᓗᖁᑎᒃᓴᖏᓐᓂ ᓄᓇᕗᒥᑦ.

ᐅᓇ ᐱᓕᕆᐊᖑᓂᐊᕐᑐᖅ ᐊᑭᖃᕐᓂᐊᕋᓱᒋᔭᐅᔪᖅ $2.6 ᐱᓕᐊᓐᓂ, ᐊᒻᒪ $900 ᒥᓕᐊᓐ ᐃᒻᒥᒃᑯᑦ ᐱᓕᕆᐊᓕᖕᓂᙶᕐᓗᓂ ᐊᒻᒪ ᐃᓚᖓ ᒐᕙᒪᓄᑦ ᐊᒻᒪ ᐃᓄᐃᑦ ᑲᑐᔾᔨᖃᑎᒌᓄᑦ ᐊᑭᓕᖅᑕᐅᓂᐊᖅᖢᓂ.

ᓄᓇᓕᖕᓂ ᑕᑯᔭᖅᑐᑲᑕᒡᓗᑎᒃ ᐅᑯᐊ ᐃᒡᓗᓕᕆᔨᕐᔪᐊᒃᑯᑦ “ᖁᐊᕐᓵᕐᓇᖅᑐᒦᖁᔨᙱᓐᓂᕐᒧ” ᐱᓕᕆᐊᒥ, ᕗᓗᕐ ᐅᖃᕐᑐᖅ.

ᐅᑯᐊ ᐱᓕᕆᖃᑎᒌᒃᑐᑦ ᓇᓗᓇᐃᕐᓯᔪᓐᓇᓚᐅᕐᑐᑦ 8-ᓂ 10-ᓄ ᐃᓂᒃᓴᐅᓂᐊᖅᑐᓂ ᑲᖏᖅᖠᓂᖅᒥ ᐊᒻᒪ 12-ᓂ   14-ᓄ ᐃᓂᒃᓴᓂ ᐊᕐᕕᐊᓂ ᑖᒃᑯᓄᖓ ᓄᓇᓕᖕᓄᐊᖅᑎᓪᓗᒋᑦ.

ᓄᓇᓂ ᐊᑐᕈᑎᒃᓴᓂ ᐱᓕᕆᐊᖃᕐᓂᐊᖅᑐᑦ ᐊᒻᒪᓗ ᐅᑭᐊᒃᓵᖑᓕᕐᐸᑦ ᕼᐋᒻᒪᓚᒃᑯᓐᓄᑦ ᑲᑎᒪᔩᑦ ᓴᓇᔪᓐᓇᐅᑎᓂ ᐱᔪᓐᓇᐅᑎᑖᖅᑎᑦᑎᓂᐊᖅᖢᑎᒃ ᐃᓂᒃᓴᐅᓂᐊᖅᑐᓄᑦ.

ᓱᓕ ᐃᓱᒪᓕᐅᕆᐊᖃᖅᑐᑦ ᖃᓄᐃᑦᑐᓂᒃ ᐃᒡᓗᓂ ᐊᒻᒪ ᖃᔅᓯᐅᖃᑦᑕᕐᓂᐊᕐᒪᖔᑕ ᓄᓇᒥ ᐊᑕᐅᓯᕐᒦᑦᑐᑦ.

ᓄᓇᓕᖕᓄᐊᑲᑕᓚᐅᖅᑎᓐᓇᒋᑦ ᐅᑯᐊ ᕗᓗᕐ ᐱᓕᕆᖃᑎᖏᑦ ᓇᓗᓇᐃᕐᓯᕙᒌᓚᐅᕐᓯᒪᔪ ᐃᓂᒃᓴᐅᓇᔭᖅᑐᓂ ᕿᒥᕐᕈᐊᕐᓂᐊᖅᑕᖏᓐᓂᒃ.

“ᐊᒻᒪᓗ ᕿᒥᕐᕈᐊᓕᖅᖢᑎᒍᑦ ᐊᒻᒪ ᐱᓕᕆᔾᔪᑎᓕᕆᔨᖃᖅᖢᑕ ᐊᒻᒪ ᐃᒡᓗᓕᐅᕐᓂᕐᒥ ᐊᔪᙱᓪᓚᕆᒃᑐᓂ ᕿᒥᕐᕈᐊᖃᑕᐅᓂᐊᖅᑐᓂ ᐃᓂᒃᓴᓂ ᐊᔾᔨᒌᙱᑦᑐᒃᑯᑦ ᕿᒥᕐᕈᐊᕐᓗᑎᒃ,” ᐅᖃᕐᑐᖅ.

“ᐊᖏᓂᖓ ᓈᒻᒪᒃᐹ? ᐅᐸᒐᒃᓴᐅᕚ? ᐊᖅᑯᑏᑦ ᓴᓇᓯᒪᕚ? ᖃᐅᒻᒪᖅᑯᑎᓄᑦ ᓇᐹᖅᑐᑦ ᐋᖅᑭᒃᓯᒪᓕᕐᐹ? ᖃᓄᑎᒋ ᑐᐊᐸᒃᑕᕆᐊᖃᕋᔭᕐᒪᑕ?”

ᓇᓗᓇᐃᖅᑕᐅᓯᒪᕙᒌᖅᑐᑦ ᐊᑐᖅᑕᐅᔪᒪᔪᓐᓃᓚᐅᕐᒥᔪᑦ ᖃᐅᔨᓴᖅᑕᐅᑲᑖᓪᓚᓚᐅᖅᖢᑎᒃ, ᕗᓗᕐ ᐅᖃᕐᑐᖅ.

“ᐃᒪᐃᖁᔨᓇᔭᙱᓐᓇᑦᑕ ᐃᒡᓗᓕᐅᕐᓂᐊᖅᑐᑦ ᑕᐃᑯᙵᖅᐸᑕ ᐊᒻᒪᓗ ᖃᐅᔨᓗᑎᒃ ᓯᕐᓗᐊᓕᐅᖅᓯᒪᔪᖃᙱᓐᓂᖓᓂ ᐅᕝᕙᓘᓐᓃᑦ ᓄᓇᓕᖕᓄ ᐊᑐᖅᑕᐅᖃᑦᑕᕐᓂᕐᓗᓂ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᑕᒪᒃᑯᐊ ᐊᑭᓕᐅᑎᐅᒃᑲᓐᓂᕋᔭᕐᒪᑕ ᐊᒻᒪ ᑭᖑᕙᕆᐊᕈᑎᐅᓗᑎᒃ.

“ᐱᒻᒪᕆᐊᓘᖕᒪᓐ ᑭᖑᕙᕈᑎᐅᓇᔭᖅᑐᓂᒃ ᐊᑐᖅᑕᐃᓕᒪᓗᓂ ᐃᒡᓗᓕᐅᕋᓱᓕᖅᐸᑕ,” ᕘᓗᕐ ᐅᖃᕐᑐᖅ. “ᐃᒡᓗᓕᐅᕐᓇᖅ ᓄᓇᕗᒥᑦ ᓇᐃᑦᑐᕈᓘᖃᑦᑕᕐᒪᑦ.”

ᓄᓇᓕᖕᓂ ᕿᒥᕐᕈᐊᖅᑐᑦ ᐅᑯᓄᖓ ᐅᐸᒍᑎᓂᐊᕐᒥᔪᑦ ᖁᒡᓗᖅᑑ, ᐃᖃᓗᒃᑑᑦᑎᐊᖅ, ᐅᕐᓱᖅᑑᖅ, ᑕᓗᕐᔪᐊᖅ, ᐃᒃᐱᐊᕐᔪᒃ ᐸᓐᓂᕐᑑ ᐊᒻᒪ ᑭᙵᐃᑦ.