ᐃᒡᓗᓕᕆᔨᕐᔪᐊᒃᑯ ᐱᒋᐊᖅᑎᑦᑎᕗᑦ ᓄᑖᒥ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᒥ

For an English version of this story, please see Housing corporation launches new homebuilding program.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᐱᒋᐊᖅᑎᑦᑎᓚᐅᕐᑐᑦ ᓄᑖᒥ ᓄᓇᕗᒥᑦ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᒥ, ᓄᓇᕗᒥᐅᓂᒃ ᓇᖕᒥᓂᖅ ᐃᒡᓗᖃᓕᖅᑎᑦᑎᓇᓱᒍ ᐱᓇᓱᒍᒪᔪᓄᑦ.

“ᓄᓇᖃᖅᑐᓂ ᓇᖕᒥᓂᖅ ᐃᒡᓗᓕᐅᖅᑎᑦᑎᓇᓱᒃᑎᑦᑎᓂᕐᒧᑦ ᐊᒻᒪ ᑲᒪᒋᔭᖃᖅᑎᑦᑎᓇᓱᖕᓂᕐᒧᑦ ᐅᓇ ᐱᓕᕆᐊᒃᓴᖅ ᑐᕌᒐᖃᖅᑐᖅ ᐊᔪᕈᓐᓃᖅᓴᖅᑎᑦᑎᒃᑲᓐᓂᕋᓱᖕᓂᕐᒥ ᓄᑖᓂᒡᓗ ᐃᒡᓗᑖᖅᑎᑦᑎᒐᓱᖕᓂᕐᒥ ᓄᓇᕗᒻᒥᐅᓂᑦ ᓇᖕᒥᓂᕆᔭᐅᔪᓂᒃ,” ᐅᖃᓚᐅᕐᑐᖅ ᖁᐊᓴ ᑯᓱᒐᖅ, ᒥᓂᔅᑕ ᑲᒪᒋᔭᓕᒃ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓂ, ᑐᓴᒐᒃᓴᓕᐅᖅᑎᓪᓗᒋᑦ ᐋᒐᓯ 21-ᒥ.

ᐅᓇ ᐱᓕᕆᐊᒃᓴᖅ, ᐊᑎᖃᖅᑎᑕᐅᔪᖅ ᓄᓇᕗᒥᑦ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᒥ (NHAP) ᐃᑲᔫᑎᒃᓴᐅᓪᓗᓂ ᐊᔪᙱᑎᑕᐅᔪᓄᑦ ᓄᑖᒥ ᓇᖕᒥᓂᖅ ᐃᒡᓗᓕᐅᕐᓂᕐᒥ ᑐᓂᓪᓗᓂ ᐊᕐᕌᒍᓂ ᖁᓕᓄᑦ ᐊᑐᖅᑐᐊᒐᒃᓴᓂ $250,000-ᓂ ᐃᒡᓗᒃᓴᓂ ᓂᐅᕕᕈᑎᒃᓴᓂ ᐃᒡᓗᓕᕆᔨᕐᔪᐊᒃᑯᓐᓄᑦ ᐊᖏᖅᑕᐅᓯᒪᔪᓂᒃ.

ᐊᖏᖅᑕᐅᓯᒪᔪᑦ ᑐᓂᔭᐅᓇᔭᕐᑐᑦ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ “ᒫᓐᓇᓕᓴᕐᓂ ᖃᓄᐃᓕᖓᓂᖏᓐᓂᒃ ᐃᒡᓗᒃᓴᐃᑦ,” ᓇᓗᓇᐃᖅᑕᐃᓯᒪᓪᓗᓂ ᐱᓕᕆᐊᒧᑦ ᑐᑭᒧᐊᕈᑎᓂᒃ, ᐃᓚᖃᖅᖢᓂ ᐸᕐᓇᐅᑎᑦ ᐱᓕᕆᐊᒧᑦ ᐊᐅᓚᑦᑎᔨᒃᓴᓂᒃ ᐊᒻᒪ ᑲᒪᔨᒃᓴᓂᒃ ᐃᒡᓗᓕᐅᓕᖅᐸᑕ.

ᐃᒡᓗᓕᕆᔨᕐᔪᐊᒃᑯᑦ ᒪᓂᒻᒪᐃᓯᒪᓂᐊᕐᑐᖅ ᓇᖕᒥᓂᖅ ᐃᒡᓗᖃᕐᓂᕐᒧᑦ ᐃᓕᓐᓂᐊᕈᑎᒃᓴᓂ ᐃᑲᔪᕈᑎᐅᓗᓂ ᐱᓇᓱᒃᑐᓂᒃ ᑐᑭᓯᑎᑦᑎᓯᒪᓇᓱᒡᓗᑎᒃ “ᑲᒪᒋᔭᒃᓴᓂᒃ ᐊᒻᒪ ᑮᓇᐅᔭᑎᒍᑦ ᑲᒪᒋᖃᑦᑕᕆᐊᖃᕐᓂᐊᖅᑐᓂᒃ ᓇᖕᒥᓂᖃᕐᓂᕐᒧᑦ ᐅᕘᓇ ᐱᓕᕆᐊᑎᒍᑦ.”

ᐅᑯᐊᓕ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑖᔅᓱᒥᖓ ᐅᖃᐅᓯᖃᕋᓗᐊᖅᑎᓪᓗᒋᑦ “ᒫᓐᓇᓕᓴᖅ” ᓄᓇᕗᒥᑦ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᒥ ᓄᑖᖑᓂᕋᐃᓪᓗᑎᒃ ᓇᖕᒥᓂᖅ ᐃᒡᓗᖃᖅᑐᓂ ᐃᑲᔫᑎᒃᓴᓕᕆᓂᕐᒥ ᐅᑯᐊᓗ ᓄᓇᑦᓯᐊᕐᒥ ᒐᕙᒪᒃᑯᑦ ᑕᐃᒪᓐᓇ ᐱᓕᕆᐊᖃᓚᐅᕐᓯᒪᔪᑦ 1983-ᒥᑦ ᐊᒻᒪ 1992-ᒥ. ᑕᐃᔅᓱᒪᓂ ᐃᓄᖕᓂ ᓇᖕᒥᓂᖅ ᐃᒡᓗᖃᓕᖅᑎᑦᑎᒍᑎᐅᓚᐅᕐᓯᒪᔪᖅ ᐃᒡᓗᒃᓴᓂ ᑐᓂᔭᐅᓪᓗᑎᒃ ᒐᕙᒪᒃᑯᓐᓂ ᐊᒻᒪ ᓇᖕᒥᓂᖅ ᓴᓇᓪᓗᓂᔾᔪᒃ.

ᐅᑯᐊ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᑎᓪᓗᒋ ᓄᑖᒥ ᐱᓕᕆᐊᒃᓴᒥ ᐊᐃᕆᓕᐅᑎᓪᓗᒍ, ᐅᖃᐅᓯᖃᓚᐅᕐᓯᒪᔪᑦ ᑖᔅᓱᒥᖓ ᐃᒪᓐᓇ HAP 2.0 — ᐱᓕᕆᐊᖑᓚᐅᕐᓯᒪᔪᒧᑦ ᐃᒡᓗᓕᐅᕈᑎᐅᓂᑯ 1,000 ᐅᖓᑖᓂ ᐃᒡᓗᓂ ᖁᓕᑦ ᐅᑭᐅᑦ ᐊᓂᒍᓚᐅᖅᑎᓐᓇᒋᑦ.

ᓄᓇᕗᒥᑦ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᖅ ᐋᖅᑭᒃᑕᐅᓯᒪᔪᖅ ᐃᑲᔪᕈᑎᐅᓗᓂ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᓐᓂ ᐃᒡᓗᓕᐅᕋᓱᒃᑎᓪᓗᒍ 900-ᓂ ᐃᒡᓗᒃᓴᓂ ᐅᕝᕙᓘᓐᓃᑦ ᓇᖕᒥᓂᖅ ᐃᒡᓗᓕᐅᖅᑕᐅᔪᒃᓴᓂ 2030 ᑎᑭᓚᐅᖅᑎᓐᓇᒍ ᐃᓚᒋᔭᐅᓪᓗᓂ ᐆᒧᖓ ᓄᓇᕗᑦ 3000, ᐅᖃᕐᓯᒪᔪᖅ ᐱᓕᕆᐊᒃᓴᒧᑦ ᑐᑭᒧᐊᕈᑎᑦ.

ᓄᓇᕗᒥᑦ ᒐᕙᒪᒃᑯᑦ ᐊᒻᒪᓗ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᑐᓴᖅᑎᑦᑎᓚᐅᕐᓯᒪᖕᒪᑕ ᐆᒥᖓ $2.6 ᐱᓕᐊᓐ ᓄᓇᕗᑦ 3000 ᐱᓕᕆᐊᒃᓴᒥ 2022-ᖑᑎᓪᓗᒍ ᑐᕌᒐᖃᖅᖢᑎᒃ ᐃᒡᓗᓕᐅᕈᒪᓪᓗᑎᒃ 3,000-ᓂ 2030 ᑎᑭᓚᐅᕐᑎᓐᓇᒍ, ᐱᔾᔪᑎᒋᓪᓗᒍ ᓄᓇᕗᒥᑦ ᐃᒡᓗᓂ ᐊᒥᒐᖅᓯᓗᐊᕐᓂᖏᓐᓄᑦ.

ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯ ᐊᒻᒪᓗ NCC ᐱᕙᓪᓕᐊᔪᓕᕆᔨᒃᑯᑦ ᓕᒥᑎᑦ ᑲᒪᒋᔭᖃᖅᑐᑦ ᐃᒡᓗᓕᐅᕐᓂᕐᒥ ᓇᑉᐸᓪᓗᐊᖏᓐᓂ ᐃᒡᓗᒃᓴᓕᐅᖅᑕᐅᔪᒪᔪᓂᒃ, ᐃᓚᖃᖅᖢᓂ ᒫᓂ 1,400-ᓂ ᐃᒡᓗᓕᕆᔨᒃᑯᓐᓄᑦ ᐃᒡᓗᖁᑎᒃᓴᓂ ᓄᓇᕗᒥᑦ.

ᐆᒧᖓᓕ ᓄᓇᕗᒥᑦ ᓇᖕᒥᓂᖅ ᐃᒡᓗᓕᐅᕐᓂᕐᒧᑦ ᐱᓕᕆᐊᒃᓴᒥ ᐱᓇᓱᒍᓐᓇᕆᐊᓖᑦ ᐊᕐᕌᒍᖃᑐᐊᕈᑎᒃ 19-ᓂ ᐅᖓᑖᓄ ᐊᒻᒪᓗ ᓄᓇᕗᒥᑦ ᓄᓇᖃᕐᓯᒪᓗᑎᒃ ᐊᕐᕌᒍᒥ ᓇᖕᒥᓂᕐᓗ ᐃᒡᓗᖃᙱᓪᓗᑎᒃ.

ᐊᒻᒪᓗ ᐱᓕᕆᔪᒪᔭᕆᐊᖃᖅᖢᑎᒃ “ᓴᓇᖃᑕᐅᓗᑎᒃ ᐅᕝᕙᓘᓐᓃᑦ ᐊᓯᖏᓐᓂ ᓴᓇᑎᑦᑎᓗᑎᒃ ᐱᐊᓂᒃᑕᐅᓇᓱᖕᓂᖓᓂ,” ᑐᑭᒧᐊᕈᑎᑦ ᐅᖃᕐᓯᒪᔪᑦ, ᐊᒻᒪᓗ ᖃᐅᔨᓴᖅᑕᐅᔾᔪᑎᒃᓴᓂᒃ ᐊᒻᒪ ᐱᔪᓐᓇᐅᑎᓂ ᐱᑎᑕᐅᔪᓐᓇᕐᓗᑎᒃ.

ᐊᒻᒪᓗ ᐃᒡᓗᓕᐅᕈᒪᔪᖅ ᓯᕗᓂᐊᒍᑦ ᐃᒡᓗᓕᕆᔨᕐᔪᐊᒃᑯᓐᓂ ᐃᑲᔪᖅᑕᐅᓯᒪᙱᓪᓗᓂ ᓂᐅᕕᕈᑎᒃᓴᒥ ᐅᕝᕙᓘᓐᓃᑦ ᓇᖕᒥᓂᖅ ᐃᒡᓗᓕᐅᕐᓂᑰᙱᓪᓗᓂ ᐊᕐᕌᒍᓂ ᖁᓕᓂ ᐊᒻᒪᓗ ᑮᓇᐅᔭᒃᑯᕕᖕᒥ ᐃᑲᔪᖅᑕᐅᔪᓐᓇᕐᓗᓂ, ᐅᖃᕐᓯᒪᔪᖅ ᐱᓕᕆᐊᒧᑦ ᑐᑭᒧᐊᕈᑎ.

ᐱᓇᓱᒍᑎᐅᔪᑦ ᐱᔭᐅᖃᑦᑕᕐᓂᐊᕐᑐᑦ ᐅᒃᑑᐱᕆ 18 ᑎᑭᒐᓱᖕᓂᖓᓂ ᐊᒻᒪᓗ ᓄᓇᕗᒥᑦ ᐃᒡᓗᓕᕆᔨᕐᔪᐊᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ ᑕᑕᑎᕆᔭᕆᐊᖃᖅᖢᑎᒃ ᑕᕝᕙᓂᓗ ᓇᓗᓇᐃᔭᕐᓯᒪᓪᓗᓂ ᖃᓄᖅ ᐊᔪᙱᑎᑕᐅᓇᔭᕆᐊᒃᓴᖅ.

ᓯᕗᓪᓕᖅ ᓇᖕᒥᓂᖅ ᐃᒡᓗᒃᓴᒥ ᐃᑲᔫᑎᐅᓂᑯ (HAP) 1980-ᖏᓐᓂ ᐊᒻᒪ 1990-ᖏᓐᓂ ᐱᓕᕆᐊᖑᓚᐅᕐᓯᒪᔪᖅ. ᓄᓇᖃᖅᑐᑦ ᓇᖕᒥᓂᖅ ᐃᒡᓗᓕᐅᕈᓐᓇᖅᑎᑕᐅᓪᓗᑎ ᐊᑭᖃᙱᑦᑐᒥ ᐃᒡᓗᒃᓴᖃᖅᑎᑕᐅᓪᓗᓂ ᓄᓇᑦᓯᐊᑉ ᒐᕙᒪᒃᑯᓐᓂ, ᑖᒃᑯᐊᓗ ᒐᕙᒪᒋᔭᐅᓚᐅᖅᖢᑎᒃ ᓄᓇᕗᑦ ᐱᒋᐊᓚᐅᖅᑎᓐᓇᒍ.

1,000 ᐅᖓᑖᓂ ᓇᖕᒥᓂᕆᔭᐅᔪᒃᓴᓂ ᐃᒡᓗᓕᐅᓚᐅᕐᓯᒪᔪᑦ ᐊᕐᕌᒍ ᖁᓕᑦ ᐃᓗᐊᓂ, ᐊᒥᓱᓪᓗ ᒫᓐᓇ ᐃᒡᓗᒋᔭᐅᓪᓗᑎ. ᐊᑐᓂ ᐃᒡᓗ ᓄᓇᑦᓯᐊᕐᒥ ᐃᒡᓗᓕᕆᔨᕐᔪᐊᓄ ᐊᑭᖃᓚᐅᕐᓯᒪᔪᑦ $130,000, ᐋᖅᑭᒃᑕᐅᓯᒪᓪᓗᓂ ᐅᓄᕐᓯᕚᓪᓕᕈᑎᐅᓛᖅᑐᓂ 2022-ᒥ.

2022-ᒥᓪᓕ ᐊᑕᐅᓯᖅ ᐃᒡᓗ ᐊᑭᖃᓚᐅᕐᓯᒪᔪᖅ $923,477.