ᑭᖑᓂᑦᑎᓐᓄᑦ ᐅᑎᕆᐊᕐᓗᑕ ᐃᓪᓗᓕᕆᓂᕐᒥᑦ ᐋᖅᑮᓇᓱᐊᕐᓗᑕ

ᑎᑎᕋᖅᑕᐅᓯᒪᔪᑦ: ᐊᔾᔨᐅᖏᑦᑐᓂᒃ ᑎᓴᒪᐅᓕᖅᑲᖓᔪᓂᒃ ᐅᓂᒃᑳᕐᓂᑦ ᕿᒥᕐᕈᔪᑦ ᓄᓇᕗᑦ ᐃᓪᓗᑭᔅᓴᕐᓂᖏᓐᓂ

ᐅᓇ ᓴᓇᔭᐅᕙᓪᓕᐊᔪᖅ ᓇᖕᒥᓂᖅᓴᕆᔭᐅᔪᖅ ᐃᒡᓗ ᕗᐊᑦ ᒍᑦ ᕼᐆᑉᒥ 1988-ᖑᑎᓪᓗᒍ. (ᐊᔾᔨᙳᐊᖅ ᐅᕙᙵᑦ ᑕᐃᕕᑦ ᕼᐊᓵᓐᓯᑭ)

By ᑯᐊᕆ ᓚᕌᒃ

ᐃᓪᓗᓕᕆᓂᖅ ᓱᕋᔅᓯᒪᓛᑦᑎᐊᖑᔮᖅᑐᖅ ᓄᓇᕗᒻᒥ ᐱᕙᓪᓕᐊᓂᐅᒐᓱᐊᖅᑐᒥ ᐃᓄᓕᕆᓂᕐᒥᓪᓗ.

ᐱᑕᖃᓐᖏᓗᐊᓪᓚᕆᑦᑐᖅ, ᓈᒻᒪᓐᖏᓗᐊᓪᓚᕆᑦᑐᖅ ᐊᑭᑐᓗᐊᖅᑐᕐᔪᐊᕌᓘᓪᓗᑎᓪᓗ.

ᐋᖅᑭᐅᒪᔾᔪᑎᔅᓴᓕᐊᖑᔪᒪᔪᑦ ᒐᕙᒪᑐᖃᒃᑯᓐᓂ ᓄᓇᕗᑦ ᒐᕙᒪᒃᑯᖏᓐᓄᓪᓗ, ᐃᓄᐃᑦ ᑕᐱᕇᑦ ᑲᓇᑕᒥ, ᓄᓇᕗᑦ ᑐᓐᖓᕕᒃᑯᑦ ᐃᓄᐃᑦ ᐊᒻᒪᓗ ᐱᖓᓱᓂᒃ ᐊᕕᑦᑐᖅᓯᒪᔪᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂ ᐅᐃᔾᔮᖅᑐᐊᓗᑐᐃᓐᓇᐅᔮᖅᑐᑦ ᐋᖅᑭᑕᕐᓂᐊᕋᑎᓪᓗ/.

ᒪᓕᒐᓕᐅᖅᑎᕐᔪᐊᖑᖃᑕᐅᓚᐅᖅᓯᒪᔪᖅ ᒧᒥᓛᖅ ᖃᖅᑲᖅ ᐃᓪᓗᓕᕆᓂᕐᒧᑦ ᑲᒪᓚᐅᖅᓯᒪᔪᖅ ᐊᕐᕌᒎᓐᓄᒃ ᒪᕐᕉᓐᓄᒃ ᐃᓕᓯᒪᑲᐃᓐᓇᑎᓪᓗᒍ. ᐳᓚᕋᖅᑐᓂ ᓄᓇᕗᒻᒧᑦ ᑕᑯᓚᐅᖅᓯᒪᔪᖅ ᑎᑎᕋᖅᑐᓂᒋᓪᓗ ᐃᓪᓗᐃᑦ ᖃᓄᐃᑦᑑᓂᖏᑦ, ᐅᓂᒃᑳᕆᑦᑕᓕᖅᑲᖏᑦ ᒪᓕᒐᓕᐅᕐᕕᔾᔪᐊᒧᑦ. NDP ᑕᒪᑐᖓᒥ ᐅᑭᐅᖅᑕᖅᑐᒥ ᐃᓪᓗᓕᕆᓂᕐᒥᑦ ᑲᒪᐃᓐᓇᕐᓂᐊᕐᓂᕋᓚᐅᖅᓯᒪᔪᖅ ᑭᒃᑯᑐᐃᓐᓇᕐᓄᑦ ᐱᓕᕆᐊᖑᔭᕆᐊᓕᓐᓂᒃ ᐊᒻᒪᓗ ᐋᖅᑭᐅᒪᔾᔪᑎᔅᓴᖅᑖᕋᓱᐃᓐᓇᕐᓗᓂ. ᐊᕐᕌᒎᓚᐅᖅᑐᖅ ᑕᒪᓐᓇ.

ᐅᑭᐅᑦ ᑕᓪᓕᒪᐅᓗᐊᓕᕐᒥᔪᑦ ᐃᑦᑐᐃᑦ ᓄᓇᖃᖅᑳᖅᑐᒥᓂᕐᓄᑦ ᑲᑎᒪᔨᕋᓛᖏᑦ ᖃᐅᔨᓴᓚᐅᖅᓯᒪᒻᒪᑕ ᐃᓪᓗᓕᕆᓂᕐᒥᑦ ᐅᑭᐅᖅᑕᖅᑐᒥ ᐅᓂᒃᑳᓕᐅᖅᑐᑎᓪᓗ ᐊᑎᖃᖅᑐᒥ, ᐱᐅᓂᖅᓴᒥᑦ ᐱᔪᓐᓇᕋᓗᐊᖅᑐᒍᑦ: ᐃᓪᓗᓕᕆᓂᖅ ᐃᓄᐃᑦ ᓄᓇᖓᓐᓂ.

ᓱᓕᓕ ᑕᒪᓐᓇ ᐊᑲᐅᓐᖏᓕᐅᕈᑎᐅᖏᓐᓇᑦᑎᐊᖅᑐᓂ.

ᑕᐃᒪᓕ, ᐃᓄᒃ ᓯᕗᓕᖅᑎ ᐊᑕᐅᓯᐊᕐᓗ ᒪᓕᒐᓕᐅᖅᑎᐅᓚᐅᖅᓯᔪᖅ ᔮᒃ ᐊᓄᒑᖅ ᑐᓴᖅᑎᑦᑎᓕᓚᐅᖅᓯᒪᒻᒥᒻᒪᑦ ᓄᓇᑦᓯᐊᖅ ᐱᕙᓪᓕᐊᔪᓕᕆᔨᖓᓂ ᑕᐃᕕᑦ ᕙᓐᒥᑦ ᐊᑯᓂᐊᓗᒃ ᐳᐃᒍᖅᑕᐅᓯᒪᓕᖅᑐᒥᑦ ᐃᓪᓗᓂᑦ ᓇᒻᒥᓂᖅᑖᖅᑐᕋᓱᐊᕐᓂᕐᒧᑦ ᐃᑲᔫᑏᑦ, ᑐᓴᕈᒪᒃᑲᓐᓂᓕᓚᐅᖅᓯᒪᔪᖅ ᑕᒪᑐᒥᖓ. ᐊᓄᒑᖅ ᐅᖃᖅᑐᓂ ᕙᓐᒧᑦ ᓇᒻᒥᓂᖅᑖᖅᑐᕋᓱᐊᕐᓂᕐᒧᑦ ᐃᓪᓗᓂᑦ ᐃᑲᔫᑎᓂᒃ, ᐊᐅᓚᑕᐅᓚᐅᖅᓯᒪᓪᓗᑎᒃ ᓄᓇᑦᓯᐊᖅ ᒐᕙᒪᒃᑯᖏᓐᓄᑦ ᐱᒋᐊᕐᖓᕐᓂᖏᓐᓂ 1980 ᐊᒻᒪᓗ 1992−ᒧᑦ − ᑕᐃᔅᓱᒪᓂᓕ ᓄᓇᑦᑎᐊᖑᑎᓪᓗᒍ.

ᕙᓐ ᐊᕐᕌᒍᓕᒫᖅ ᖃᐅᔨᓴᓚᐅᖅᓯᒪᔪᖅ ᑕᒪᑐᒥᖓ ᐃᑲᔫᑎᒥᑦ, ᓂᐅᕐᕈᒻᒪᕆᓚᐅᖅᓯᒪᔪᖅ ᓇᐅᔮᓄᑦ ᑲᖏᖅᖠᓂᕐᒧᓪᓗ ᑲᑎᒪᖃᑎᖃᕆᐊᖅᑐᖅᑐᓂ ᑕᐃᒪᐃᑦᑐᒥᑦ ᐃᑲᔫᓯᐊᖅᑖᓚᐅᖅᓯᔪᓂᒃ ᓇᒻᒥᓂᖅ ᐃᓪᓗᑖᕈᒪᔪᓂᒃ − ᓱᓇᒃᑯᑖᓪᓗ ᐊᑐᐃᓐᓇᕈᖅᑎᑕᐅᓪᓗᑎᑦ ᒐᕙᒪᒃᑯᓐᓄ ᐊᒻᒪᓗ ᓇᒻᒥᓂᖅ ᓴᓇᔭᐅᓪᓗᑎᑦ ᐃᓪᓗᐃᑦ.

ᓱᓪᓕ ᐃᓪᓗᐃᑦ ᒪᑭᑕᔪᑦ ᐱᐅᔪᐊᓘᓪᓗᑎᓪᓗ.

ᑕᐃᔅᓱᒪᓂ ᓄᓇᕗᒻᒥᐅᑦ ᑕᑯᓐᓇᑎᓪᓗᒋᑦ ᒐᕙᒪᒃᑯᓐᓂ ᑮᓇᐅᔮᓗᓐᓂᑦ ᒥᓕᐊᖏᓐᓃᑦᑐᓂᑦ ᐃᓪᓗᓕᕆᓂᕐᒧᑦ ᐃᑲᔫᑎᔅᓴᓂᒃ ᑲᔪᓯᑎᑦᑎᓯᓯᒪᓐᖏᑦᑐᑦ ᐱᓕᕆᐊᔅᓴᖏᓐᓂ, ᓱᒻᒪᓪᓕᑭᐊᖅ ᐊᓯᑦᑎᐊᒻᒪᕆᖏᓐᓂ ᑕᑯᓐᓇᖔᕐᓂᐊᖅᑲᑕ? ᑲᔪᓯᑦᑎᐊᖅᑐᒥᓂᕐᓂᑦ.

ᑕᐃᒪᐃᓐᓂᖓᓐᓄᑦ ᓄᓇᑦᓯᐊᖅ ᐱᕙᓪᓕᐊᔪᑦ ᑎᓴᒪᐅᓕᖅᑲᖓᔪᓂᒃ ᐅᓂᒃᑳᓕᐅᖅᓯᒪᓕᖅᑯᑦ − ᖃᓪᓗᓈᑎᑐᑦ ᐃᓄᑦᑎᑐᓪᓗ − ᐋᖅᑭᐅᒪᔾᔪᑕᐅᓇᓱᑦᑐᓂᒃ − ᑕᑯᓐᓇᖅᑐᑎᒍ ᑲᔪᓯᖃᑦᑕᖅᑐᒥᓃᑦ ᐊᒻᒪᓗ ᐃᓱᒪᒋᓪᓗᒋᓪᓗ, ᑲᔪᓯᒃᑲᓐᓂᕈᓐᓇᕋᔭᖅᑳᑦ ᑕᐃᒪᐃᑦᑐᑦ?

Share This Story

(0) Comments