ᓄᓇᕗᑦ ᓯᕗᓕᐅᖅᑎᖓ ᐅᖃᐅᓯᖃᖅᑐᖅ ᐃᒡᓗᓕᕆᓂᕐᒥ ᐋᑐᕚᒥ ᓯᕗᓕᐅᖅᑎᓄᑦ

ᐃᑲᔫᑎᒃᓴᖅᑕᖃᕆᐊᖃᕐᒪᑦ ᐃᒡᓗᓕᕆᓂᕐᒧᑦ ᐅᑭᐅᕐᑕᖅᑐᕐᒥ, ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐅᖃᓚᐅᕐᑐᖅ ᐅᖃᓚᐅᕐᓂᕋᖅᖢᓂ ᑮᓇᐅᔭᓕᕆᔨᒃᑯᑦ ᒥᓂᑕᖓᓄᑦ ᑯᕆᔅᑎᐊ ᕗᕇᓚᓐ ᐋᑐᕚᒥ ᓯᑎᐱᕆ 16-ᒥ ᑭᖑᓪᓕᖅᐹᒥ ᒐᕙᒪᑐᖃᒃᑯᓐᓂ ᑲᑎᖃᑎᖃᕐᑎᓪᓗᒍ.

“ᐅᓇ ᐅᖃᐅᓯᕆᓛᕆᓚᐅᕐᑕᕋ ᐅᖃᓪᓚᖃᑎᒋᓪᓗᒋᑦ. ᐅᓇ ᑐᓴᐅᒪᔭᐅᑎᑦᑎᐊᕋᓱᒃᑲᑦᑎᒍᑦ ᒐᕙᒪᑐᖃᒃᑯᓐᓄᑦ ᑕᐃᒪᖓ ᐱᒋᐊᓚᐅᖅᑎᓪᓗᑕ,” ᐊᕿᐊᕈᖅ ᐅᖃᕐᑐᖅ ᐊᐱᕐᓱᖅᑕᐅᑎᓪᓗᒍ.

ᓯᕗᓕᐅᕐᑎ ᑲᑎᖃᑎᖃᓚᐅᕐᑐᖅ ᕗᕇᓚᓐᒥ, ᐊᑦᑕᓇᖅᑐᒦᑦᑕᐃᓕᓂᕐᒧᑦ ᒥᓂᔅᑕ ᑖᒥᓂᒃ ᓚᐸᓛᖕᒃᒥ ᐊᒻᒪᓗ ᐅᑭᐅᕐᑕᖅᑐᓕᕆᔨᒃᑯᑦ ᒥᓂᔅᑕᖓᓂᒃ ᑖᓐ ᕚᓐᑐᓪ ᐋᑐᕚᒧᐊᓚᐅᑲᒃᑎᓪᓗᒍ.

“ᐅᓇ ᐅᖃᐅᓯᕆᑎᓪᓗᑎᒍᑦ ᓯᕗᓪᓕᖅᐹᒥ ᐊᕐᕌᒍᑦ ᐱᖓᓱᑦ ᓯᕗᓂᐊᓂ ᑲᑎᖃᑎᖃᖅᑎᓪᓗᖓ ᐳᕋᐃᒻ ᒥᓂᔅᑕᒥ, ᐅᖃᓚᐅᕐᓯᒪᒐᒪ ᐃᒡᓗᓕᕆᓂᐊᕐᓂᕋᖅᖢᖓ ᐊᔾᔨᒋᙱᑕᖓᓂ ᐊᒻᒪᓗ ᑕᐃᒪᐃᓕᐅᖅᓯᒪᕗᒍᑦ,” ᐊᕿᐊᕈᖅ ᐅᖃᕐᑐᖅ.

“ᑕᒪᑐᒧᖓ ᐊᑐᕈᒪᔭᕗᑦ ᐊᑐᕐᓯᒪᔭᕗᑦ, ᐊᖏᓂᖅᐹᒥᓪᓗ ᐃᑲᔫᑎᒥ ᐃᒡᓗᓕᕆᓂᕐᒧ ᐊᑐᕐᓯᒪᕗᒍᑦ, ᐱᓕᕆᖃᑎᒋᔭᑦᑎᓐᓂ ᑲᑎᒪᖃᑎᖃᖃᑦᑕᕐᓯᒪᔪᒍᑦ ᐃᓄᐃᑦ ᑲᑐᔾᔨᖃᑎᒌᖏᓪᓗ ᐊᒻᒪᓗ ᐊᑭᓕᐅᑎᐅᔭᕆᐊᓖᑦ ᓇᑉᐸᖓᓂᑐᐃᓐᓇ ᐊᑭᓕᕈᓐᓇᕐᓯᓯᒪᓪᓗᑎᒃ ᐊᒻᒪᓗ ᓴᓇᓂᕐᓴᐅᓕᖅᖢᑕ ᐱᖓᓱᐃᖅᖢᓂ ᓴᓇᓂᕆᕙᒃᑕᕗᑦ.

“ᑕᐃᒪᓕ ᐱᓕᕆᐊᕆᔭᕆᐊᖃᖅᑕᑦᑎᓐᓂ ᐱᓕᕆᓯᒪᓕᕐᐳᒍ ᐱᒋᐊᕐᕕᒋᓂᐊᖅᑕᖓᓂᒃ.”

ᐊᕿᐊᕈᖅ ᐅᖃᓚᐅᕐᑐᖅ ᓄᓇᕗᒥᑦ ᒐᕙᒪᒃᑯᑦ ᐊᓂᒍᐃᑦᑎᐊᓚᐅᕐᓂᖏᓐᓂᒃ ᐊᕐᕌᒎᖕᓄᑦ ᒪᕐᕉᖕᓄ ᖃᓄᐃᓕᐅᕈᑎᒃᓴᖏᓐᓂ ᐃᒡᓗᓕᕆᔨᕐᔪᐊᒃᑯᓪᓗ ᐊᒻᒪᓗ NCC ᐱᕙᓪᓕᐊᔪᓕᕆᔨᒃᑯᑦ ᓕᒥᑎᑦᑯᓐᓂ, ᑖᒃᑯᐊ ᐅᔾᔨᕈᓱᓕᖅᑎᑦᑎᓇᓱᒃᖢᑎᒃ ᓄᓇᕗᒥᑦ ᐃᒡᓗᑕᖃᙱᓗᐊᕐᓂᖓᓂᒃ ᐊᒻᒪᓗ ᒫᓐᓇ ᐃᒡᓗᐃᑦ ᐱᐅᔪᓐᓃᕐᓯᒪᓂᖏᓐᓂ.

“ᓯᕗᓪᓕᖅᐹᒥ ᓄᓇᕗᑦ ᐱᑕᖃᓕᓚᐅᕐᑎᓪᓗᒍ ᑕᑯᑲᑕᓕᕐᑐᒍᑦ ᐃᒡᓗᓕᐅᑲᑕᒃᑐᓂᒃ ᑕᒪᐃᓐᓂ ᓄᓇᓕᐅᔪᓂᒃ,” ᐅᖃᕐᑐᖅ.

“ᒐᕙᒪᑐᖃᒃᑯᑦ ᐱᓕᕆᖃᑎᒋᔭᕆᐊᖃᕐᒥᒐᑦᑎᒍᑦ, ᑕᒪᓐᓇ ᐱᓕᕆᕙᓪᓕᐊᔭᕗᑦ ᐊᑯᓂᕈᓗᒃ ᐱᓕᕆᐊᕆᔪᓐᓇᕐᓂᐊᕋᑦᑎᒍᑦ.”

ᒐᕙᒪᑐᖃᒃᑯᑦ ᐅᑭᐊᒃᓵᒧᑦ ᑮᓇᐅᔭᓕᕆᓂᕐᒧᑦ ᐅᓂᒃᑳᓕᐅᕐᓂᐊᖅᑎᓪᓗᒋ ᐊᒻᒪᓗ ᒐᕙᒪᑐᖃᒃᑯᑦ ᐊᐅᓚᑦᑎᔾᔪᑎᒃᓴᓕᕆᓂᐊᓂᖓ ᐊᒡᒋᖅᖢᓂ ᑕᐃᒪᓕ ᐋᑐᕚ ᐱᓕᕆᔭᕆᐊᖃᓕᕐᐳᖅ, ᐅᖃᕐᑐᖅ.

ᐊᕿᐊᕈᖅ ᐊᐅᓚᑦᑎᔾᔪᑎᒃᓴᓕᕆᓂᒃᑯᑦ ᐃᓱᒪᔪᖅ $250 ᒥᓕᐊᓐᓂ ᓄᓇᕗᒥᑦ ᐃᒡᓗᓕᕆᓂᕐᒨᖁᓇᔭᕐᑕᖓ, ᓇᓕᒧᒋᓗᓂᐅ ᓄᓇᕗᑦ ᐃᑲᔫᑎᒋᓯᒪᓕᕐᑕᖓ ᐊᕐᕌᒎᓕᖅᑑᖕᓂ ᒪᕐᕉᖕᓂ.

“ᖃᓄᐃᓕᐅᕈᑎᒃᓴᖃᕈᓐᓇᑦᑎᐊᕋᑦᑕ ᐃᑲᔫᑎᒃᓴᓂ ᑕᑯᔪᓐᓇᕈᑦᑕ ᑕᒪᐃᑕ ᓯᕗᓪᓕᐅᖁᔭᖏᓐᓄᑦ,” ᐅᖃᕐᑐᖅ. “ᖃᐅᔨᓂᐊᖅᐳᒍᑦ. ᑕᑯᔪᓐᓇᓚᐅᙱᓐᓇᑦᑕ ᖃᓄᐃᓕᖓᓂᐊᕐᒪᖔᑕ. ᓱᓕ ᒫᓐᓇ ᑕᒪᓐᓇ ᐅᖃᐅᓯᕆᑲᑕᒃᑕᕗᑦ.”

ᓯᕗᓕᐅᕐᑎ ᐅᖃᐅᓯᖃᓚᐅᕐᒥᔪᖅ ᐃᓐᓇᑐᖃᕐᓂ ᑲᒪᒋᔭᖃᕐᓂᕐᒥᒃ, ᓴᓇᔭᐅᔭᕆᐊᓕᖕᓂᓪᓗ ᓇᓗᓇᐃᔭᖅᖢᓂ ᒪᑯᑎᑐᓇᖅ ᐃᖃᓗᖕᓂ ᐃᒪᕐᒧᑦ ᐆᒻᒪᖅᑯᑎᓕᕆᓂᕐᒥ, ᐅᑭᐅᕐᑕᖅᑐᕐᒥ ᑲᒪᒋᔭᖃᕐᓂᕐᒧᑦ ᐃᓱᒪᒋᔭᕆᐊᓕᖕᓂ ᐊᒻᒪ ᓱᕈᓯᓕᕆᓂᕐᒥ, ᐅᖃᕐᑐᖅ.

“ᓴᖅᑭᑎᑦᑎᐊᓚᐅᕐᑕᒃᑲ ᓯᕗᓪᓕᐅᑎᔭᕆᐊᖃᖅᑐᑦ ᒐᕙᒪᑐᖃᒃᑰᖓᔪᑦ ᐱᓕᕆᐊᒃᓴᖏᑦᑎᒍᑦ,” ᐅᖃᕐᑐᖅ.

“ᐱᓕᕆᖃᑎᒌᖕᓂᖅ ᐱᒻᒪᕆᐅᒋᒐᒃᑯ ᐃᓱᒫᓘᑎᑐᐊᓅᙱᑦᑐᖅ ᐊᒻᒪ ᖃᓄᐃᓕᐅᕈᑎᐅᔭᕆᐊᓕᖕᓄᑦ, ᑭᓯᐊᓂᓕ ᖃᓄᖅ ᑕᒪᒃᑯᐊ ᐋᖅᑭᒍᑎᖃᕈᓐᓇᕋᔭᕐᓂᖏᓐᓂᒃ.”

ᐊᕿᐊᕈᖅ ᓄᓇᕗᒧᑦ ᐅᑎᓚᐅᕐᑐᖅ ᓯᑎᐱᕆ 17-ᒥ ᐊᒻᒪᓗ ᐅᐸᖕᓂᐊᕈᒪᓂᕋᖅᖢᓂ ᐱᓕᕆᐊᓄᑦ ᓴᖅᑭᔮᕐᓇᐅᓂᐊᖅᑐᑦ ᑕᒪᑐᒪᓂ ᑕᖅᑭᕐᒥ ᐃᖃᓗᖕᓂ ᐊᒻᒪ ᑲᖏᖅᖠᓂᖅᒥ.