ᖃᓄᖅ ᑲᖑᕐᒥ ᒥᖅᑯᐃᔭᐃᔭᕆᐊᒃᓴᖅ, ᓄᓇᕗᒥᑦ ᒥᕐᖑᐃᕐᓯᕕᒃᑯᑦ

For an English version of this story, please see: How to pluck a goose, with Nunavut Parks.

ᓯᕗᓪᓕᕐᒥ, ᓇᑲᓪᓗᒋᑦ ᐸᒥᐅᖓ ᐊᒻᒪ ᓱᓗᖏᑦ. ᑭᖑᓂᐊᒍᑦ ᖃᓛᖅᑐᒦᑎᓪᓗᒍ ᐊᒥᖓ ᐊᕿᒡᓕᓂᐊᕐᒪᑦ ᐊᒻᒪ ᒥᖅᑯᐃᔭᓕᕐᓗᒍ ᐊᒧᓯᑲᑕᒡᓗᑎᑦ.

ᒫᓂ 12-ᖏᓐᓂ ᐃᓄᐃᑦ ᐃᖃᓗᖕᓂ ᑕᐃᒪᐃᓕᐅᓚᐅᕐᑐᑦ ᒥᖅᑯᐃᔭᐃᓪᓗᑎᒃ 14-ᓂ ᑲᖑᕐᓂ ᐅᕙᓂ ᐊᔪᕈᓐᓃᕐᓂᐊᕐᓗᑎᒃ…ᖃᓄᐃᓕᐅᕈᓯᖅ ᐱᓕᕆᐊᖑᔪᖅ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᒃᑯᓐᓂ ᓯᐊᕕᐊ ᒍᕆᓄᓪ ᒥᕐᖑᐃᕐᓯᕕᒃᒥ ᔫᓂ 18-ᖑᑎᓪᓗᒍ.

ᑲᖑᕐᒥ ᒥᖅᑯᐃᔭᐃᓂᕐᒥ ᐃᓕᓐᓂᐊᖅᑎᑦᑎᓚᐅᕐᑐᖅ ᑭᐅᔅᑕᓐ ᕗᐃᓕᐊᒻᔅ, ᑖᓐᓇᓕ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᓂ ᐃᓚᐅᓕᓚᐅᕐᓯᒪᔪᖅ 2023-ᒥ ᐊᐅᔭᒃᑯ ᐃᓕᓐᓂᐊᖅᑎᐅᓪᓗᓂ ᐅᕙᓂ ᐋᑐᕚᒥ ᐋᒐᓐᑯᐃᓐ ᓯᓚᑦᑐᖅᓴᕐᕕᒃᒥ ᐱᐅᓴᐃᓂᕐᒥ.

ᐊᖏᕐᕋᓚᐅᕐᓯᒪᔪᖅ ᐃᖃᓗᖕᓄᑦ ᑎᓯᐱᕆᒥ ᐊᒻᒪᓗ ᐃᖅᑲᓇᐃᔮᖅᑖᖅᖢᓂ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᓂ ᕕᕝᕗᐊᕆᐅᓕᖅᑎᓪᓗᒍ.

“ᖃᓪᓗᐃᔭᐃᙱᙶᖅᖢᑎᒃ, ᒥᖅᑯᐃᔭᐃᖃᑦᑕᖔᓕᖅᖢᑎᑦ ᑲᖑᕐᓂ,” ᐅᖃᕐᑐᖅ ᐋᔅᓕ ᑰᐳ, ᐊᐅᓚᑦᑎᔨᐅᑲᐃᓐᓇᖅᑐᖅ ᐃᑦᑕᕐᓂᓴᓕᕆᓂᕐᒥ ᖁᕕᐊᓲᑎᖃᕐᓂᕐᒥ ᓄᓇᕗᒥᑦ ᒥᕐᖑᐃᕐᓯᕕᖕᓂ, ᐅᓇ ᕗᐃᓕᐊᒻᔅ ᐊᓯᐊᓂ ᑲᖑᕐᒥ ᐸᕐᓇᐃᓕᖅᑎᓪᓗᒍ ᐱᓕᕆᐊᕆᓂᐊᖅᑕᖓᓂ ᐅᓗᒥᓄᑦ.

ᑰᐳ ᐊᒻᒪ ᕗᐃᓕᐊᒻᔅ ᐃᓚᒋᔭᐅᓚᐅᕐᑑᒃ ᑎᓴᒪᒥ ᐋᖅᑭᒃᓱᐃᔪᓂᒃ ᑕᒪᑐᒪᓂ ᐊᕐᕌᒍᒥ ᐊᔪᕈᓐᓃᕐᓴᕐᓇᒥ…ᖃᓄᐃᓕᐅᕈᑎᓂ ᐃᓚᖃᖅᖢᑎ ᐊᐅᔭᒃᑯᑦ ᐃᓕᓐᓂᐊᖅᑎᒥ ᐃᖅᑲᓇᐃᔭᖅᑎᒋᔭᐅᔪᓂᒃ ᐄᑕᓐ ᐊᒡᓘᒃᑲᖅ ᐊᒻᒪ ᔮᔅᒥᓐ ᐃᕕᒃ-ᓚᒻ.

ᑲᖑᕐᒥ ᒥᖅᑯᐃᔭᐃᓂᖅ ᓯᕗᓪᓕᖅᐹᖓᓚᐅᕐᑐᖅ 20-ᓂ ᖃᓄᐃᓕᐅᕈᑎᐅᓂᐊᖅᑐᓂ ᐊᐅᔭᖅ. ᐊᓯᖏ ᐅᑯᓂᖓ ᐊᔪᕈᓐᓃᕐᓴᕐᓇᕐᓂᐊᖅᑐᑦ ᖃᓄᖅ ᕿᓯᖕᒥ ᓴᓗᒻᒪᖅᓴᐃᓂᕐᒥ, ᑲᑕᔾᔭᕈᓐᓇᕐᓯᓂᕐᒥᒃ, ᕿᓚᐅᔾᔭᕈᓐᓇᕐᓯᓂᕐᒥᒃ ᐊᒻᒪ ᐊᓯᕈᓘᔭᖏᓐᓂ.

ᐅᑯᐊ ᑲᑐᔾᔨᖃᑎᒌ ᐋᖅᑭᒃᓱᐃᓚᐅᕐᑐᑦ ᖃᓄᐃᓕᐅᕈᑎᐅᓂᐊᖅᑐᓂᒃ ᓄᓇᕗᒥᑦ ᒥᕐᖑᐃᕐᓯᕕᖕᓂ. ᓴᐅᒥᐊᓂ ᑕᓕᕐᐱᐊᓄᑦ: ᐄᑕᓐ ᐊᒡᓘᒃᑲᖅ, ᐋᔅᓕ ᑰᐳ, ᔮᔅᒥᓐ ᐃᕕᒃ-ᓚᒻ, ᑭᐅᔅᑕᓐ ᕗᐃᓕᐊᒻᔅ. (ᐊᔾᔨᓕᐅᕆᔨ ᐋᑎ ᓵᑭᓯᐊᓐ)

ᐃᖃᓗᖕᓂ ᐊᖑᓇᓱᒃᑎ ᑲᖑᑲᑕᓚᐅᕐᒪᑦ ᐱᓇᓱᐊᕈᓯᕐᒥ ᓯᕗᓂᐊᓂ ᔫᓂ 18 ᖃᓄᐃᓕᐅᕐᓇᐅᓂᐊᓵᕐᓂᖓᓂ ᐊᒻᒪᓗ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᑐᓂᓯᓂᐊᖅᖢᑎᒃ ᒥᖅᑯᐃᔭᕐᓯᒪᔪᓂᒃ ᐃᓐᓇᑐᖃᐃᑦ ᖃᒻᒪᖓᓄᑦ ᐊᒻᒪᓗ ᖃᔪᖅᑐᕐᕕᒃᒧᑦ, ᑕᐃᒪᓕ “ᐊᓯᐅᔪᖃᔾᔮᙱᑦᑐᖅ,” ᑰᐳ ᐅᖃᕐᑐᖅ

“ᑲᖑᑲᑕᖕᓇᕐᓯᖕᒥᖕᒪᑦ ᑕᒫᓂ ᐊᒻᒪᓗ ᓈᒻᒪᓈᖅᖢᓂ ᓯᓚᕗᑦ ᐊᒻᒪ ᐃᓕᖅᑯᓯᑦᑎᓐᓄᑦ,” ᐅᖃᕐᑐᖅ.

ᓄᓇᖃᖅᑐᑦ ᐃᑲᔪᕈᒪᑦᑎᐊᓚᐅᕐᑐᑦ. ᓴᐃᒃ ᓯᓯ ᑲᒪᒋᔭᖃᓚᐅᕐᑐᖅ ᐃᒐᒥ ᐊᒻᒪ ᐃᑲᔪᖅᖢᓂ ᑲᖑᕐᓂ ᐆᑦᑎᑲᑕᒃᑎᓪᓗᒋ ᒥᖅᑯᐃᔭᖅᑕᐅᓚᐅᖅᑎᓐᓇᒋᑦ.

“ᐃᓚᐅᖃᑦᑕᐃᓐᓇᐅᔭᕋᒪ,” ᓯᓯ ᐅᖃᕐᑐᖅ. “ᐊᔪᙱᑦᑕᕌᖓᒪ, ᐅᐸᒍᑎᕙᒃᖢᖓ ᐊᒻᒪ ᓄᑖᓂ ᖃᐅᔨᖃᑦᑕᖅᖢᖓ ᐊᒻᒪᓗ ᐅᓇ ᑕᐃᒪᐃᓕᐅᕐᓇᑦᑎᐊᕐᒪᑦ.”

ᐅᐸᒍᑎᔪᓂ ᒪᕐᕉ ᐊᑲᐅᓯᓴᕐᕕ ᐃᓱᒪᓕᕆᔨᒃᑯᓐᓄ ᑲᒪᒋᔭᐅᔫᒃ ᑐᙵᓱᒃᑎᑕᐅᓚᐅᕐᒥᔪᑦ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᒃᑯᓐᓂ ᐊᒻᒪ ᐱᖃᑎᒋᔭᐅᓪᓗᑎᒃ ᐃᓅᓯᓕᕆᔨᖓᓂ ᔭᓯ ᓅᔅ.

ᐅᓇ ᑖᒃᑯᓄᖓ “ᖃᐅᑕᒫ ᐊᑐᖅᑕᖏᓐᓂ ᐊᑐᙱᔾᔪᑎᒋᓚᐅᕐᑕᖓ ᐊᒻᒪ ᓄᓇᐃᓐᓇᒦᖃᑕᐅᓪᓗᓂ ᐊᒻᒪ ᐃᓄᖕᓃᑲᑕᒃᖢᑎᒃ,” ᓅᔅ ᐅᖃᕐᑐᖅ.

ᐃᒪᐃᑦᑐᓂᒃ ᐊᔪᕈᓐᓃᕐᓂᐊᕐᓗᑎ…ᖃᓗᐃᓕᐅᕈᑎᒃᓴᓂ ᐋᖅᑭᒃᓯᓯᒪᔪᑦ ᑲᖏᖅᖠᓂᖅᒥ ᐊᒻᒪ ᖁᒡᓗᖅᑑᖅᒥ, ᖃᓄᐃᓕᐅᖅᑎᑦᑎᑲᑕᒡᓗᑎᒃ ᒪᑯᑎᑐᓇᖅ ᓄᕗᖅᖠᓕᕆᓗᑎᒃ ᐊᒻᒪ ᑕᕐᓴᖅᓱᐃᓗᑎᒃ ᑲᒥᕋᓛᓂ.

ᖃᓄᐃᓕᐅᕐᓇᐅᓂᐊᖅᑐᓂᒃ ᐅᓪᓗᖅᓯᐅᑎᓂ ᐊᑐᐃᓐᓇᖅᑕᖃᖅᑐᖅ ᓄᓇᕗᒥᑦ ᒥᕐᖑᐃᕐᓯᕐᕕᓕᕆᔨᒃᑯᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ, ᐃᓚᖃᖅᖢᓂ ᖃᓄᖅ ᐃᓚᐅᔾᔪᑎᓂ ᐊᑎᓕᐅᕐᕕᐅᔪᓐᓇᖅᑐᓂᒃ.

ᐃᓚᖏ ᐊᔪᕈᓐᓃᕐᓴᕐᕕᐅᓂᐊᖅᑐᑦ ᒪᑯᓂᖓ ᕿᒧᒃᓯᓂ ᐃᖏᕐᕋᔪᓐᓇᖅᓯᓂᕐᒥ ᐅᕝᕙᓘᓐᓃᑦ ᕿᓯᓕᕆᓂᕐᒥ ᓈᒻᒪᒋᔭᐅᔪᑦ ᐃᓚᐅᓂᐊᖅᑐᓄᑦ ᐊᕐᕌᒍᓕᖕᓄ 16-ᓂ ᐅᖓᑖᓄ ᐊᒻᒪᓗ ᐃᓂᒃᓴᓕᐅᕆᐊᖃᕐᓇᖅᖢᑎᒃ.

ᑕᒪᕐᒥ ᖃᓄᐃᓕᐅᕐᓇᐃᑦ ᐊᑭᖃᙱᑦᑐᑦ.