ᒪᓕᒐᓕᐅᕐᑎ ᒪᒥᐊᑦᑐᖅ ᓇᓗᓇᐃᕐᓯᙱᒃᑲᓗᐊᖅᖢᓂ ‘ᓈᒻᒪᙱᑦᑐᓂᒃ ᖃᓄᐃᓕᐅᕈᑎᒋᓚᐅᖅᑕᖏᓐᓄᑦ’

For the English version of this story, please see Hudson Bay MLA apologizes for unspecified ‘inappropriate actions’ as legislature resumes.

ᑕᓯᐅᔭᕐᔪᐊᕐᒧᑦ ᒪᓕᒐᓕᐅᕐᑎ ᑖᓂᐅᓪ ᖃᕝᕕᒃ ᒪᒥᐊᓚᐅᕐᑐᖅ ᒪᓕᒐᓕᕆᕝᕕᒃᒥ ᒪᐃ 22-ᒥ “ᓈᒻᒪᙱᑦᑐᓂ ᖃᓄᐃᓕᐅᕈᑎᒋᓚᐅᖅᑕᖏᓐᓄᑦ” ᐅᑎᕐᑎᓪᓗᒍ ᒪᓕᒐᓕᕆᔨᒃᑯᓐᓄᑦ ᐅᑭᐅᖅ ᐃᓚᐅᙱᐊᓪᓚᓚᐅᖅᖢᓂ ᑲᑎᒪᑎᓪᓗᒋᑦ.

ᐅᖃᐅᓯᖃᓚᐅᙱᑦᑐᖅ ᖃᓄᐃᓕᐅᕈᑎᒋᓚᐅᖅᑕᖏᓐᓂᒃ.

“ᐅᖃᖅᑏ, ᐱᕕᖃᕐᓂᓐᓂ ᒪᒥᐊᑦᑐᒪᓪᓗᖓ ᐃᓕᖕᓄᑦ ᐊᒻᒪ ᒪᓕᒐᓕᕆᔨᓄᑦ ᐊᒻᒪ ᑭᒡᒐᖅᑐᖅᑕᓐᓄᑦ ᐊᒻᒪ ᓄᓇᕗᒻᒥᐅᓄᑦ ᓈᒻᒪᙱᑦᑐᓂᒃ ᖃᓄᐃᓕᐅᕈᑎᒋᓚᐅᖅᑕᓐᓄᑦ ᐅᑭᐅᒃᓵᖅ,” ᖃᕝᕕᒃ ᐅᖃᕐᑐᖅ.

“ᒪᒥᐊᑦᑐᒪᓗᐊᖅᖢᖓ ᑕᒪᐃᓐᓄᑦ ᐃᓚᓐᓄᑦ.”

ᖃᕝᕕᒃ ᑭᖑᓪᓕᖅᐹᒥ ᑕᑯᔭᐅᓚᐅᕐᑐᖅ ᐅᑭᐊᒃᓵᖅ ᓄᕕᐱᕆ 7-ᒥ ᑲᑎᒪᑎᓪᓗᒋᑦ. ᑕᐃᔅᓱᒪᓂ ᐊᕙᑎᓕᕆᔨᒃᑯᓐᓄᑦ ᒥᓂᔅᑕᐅᓚᐅᕐᑐᖅ ᐊᒻᒪᓗ ᐊᓯᐊᓂ ᑲᒪᒋᔭᖃᖅᑎᑕᐅᓪᓗᓂ.

ᓄᕕᐱᕆ 13-ᒥ ᒥᓂᔅᑕᐅᓂᖓᓂ ᓄᖅᑲᓚᐅᕐᓯᒪᔪᖅ ᐱᔾᔪᑎᖃᖅᖢᓂ ᐃᒻᒥᓅᖓᔪᓂᒃ.

ᐊᒻᒪᓗ ᓄᕕᐱᕆ 13-ᒥ, ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᖅ ᓴᓂᑭᓗᐊᕐᒥᐅᑕᕐᒥ ᑖᓂᐅᓪ ᖃᕝᕕᒃᒥ ᒪᕐᕉᖕᓄᑦ ᐋᓐᓂᕐᓱᐃᓂᕐᒧᑦ ᑕᕝᕙᓂᑦᑕᐃᓐᓇᖅ ᐅᓪᓗᕐᒥ ᐊᑐᖅᑕᕕᓂᐊᓄᑦ, ᐅᖃᕐᓯᒪᓚᐅᕐᑐᑦ ᐃᖅᑲᖅᑐᐃᕕᒃᒥ ᑎᑎᕋᖅᑕᐅᓯᒪᔪᑦ, ᐃᓚᖃᖅᖢᓂ ᐊᑕᐅᓯᖅ ᐋᓐᓂᕐᓱᐃᓂᖅ ᕿᒥᑦᑎᓇᓱᖕᓂᐅᓚᐅᕐᓂᖓᓂᒃ.

ᑕᐃᔅᓱᒪᓂᓕ ᒪᓕᒐᓕᐅᕐᑎ ᐅᖃᕐᕕᐅᓇᓱᒃᑲᓗᐊᖅᖢᓂ ᐅᖃᕐᕕᐅᔪᓐᓇᓚᐅᙱᒻᒪᑦ ᑖᓐᓇᐅᓚᐅᕆᐊᒃᓴᖓᓂ ᐸᓯᔭᒃᓴᙳᖅᑎᑕᐅᔪᖅ. ᐸᓖᓯᒃᑯᑦ ᐊᒻᒪᓗ ᓯᕗᓕᐅᕐᑎᐅᑉ ᑎᑎᕋᕐᕕᖓ ᑕᒪᑐᒧᖓ ᐅᖃᕈᒪᓚᐅᙱᑦᑐᑦ ᐅᓇ ᒪᓕᒐᓕᐅᕐᑎ ᖃᕝᕕᒃ ᐸᓯᔭᒃᓴᙳᖅᑎᑕᐅᓚᐅᕐᓯᒪᔭᕆᐊᒃᓴᖓᓂᒃ.

ᓇᓪᓕᐅᑎᕝᕕᒋᔭᐅᔪᖅ ᐆᒧᖓ ᑖᓂᐅᓪ ᑲᕝᕕᒧᒃ ᐃᖅᑲᖅᑐᐃᕕᒃᑰᕐᓂᕋᖅᑕᐅᓯᒪᔫᑉ ᐊᔾᔨᒋᓚᐅᕐᓯᒪᔭᖓ ᓇᓪᓕᐅᑎᑎᓪᓗᒍ ᑎᑎᕋᖅᑕᐅᔪᕕᓂᕐᒥᒃ ᕙᐃᔅᐳᒃᑯᑦ ᒪᓕᒐᓕᐅᖅᑎᐅᑉ ᓴᖅᑭᔮᒐᖓᒍᑦ.

ᓄᓇᕗᒥᑦ ᐃᖅᑲᖅᑐᐃᕕᒃᑯᑦ ᐸᓯᔭᒃᓴᓕᕆᓂᕐᒧᑦ ᓇᓗᓇᐃᕐᓯᒪᓚᐅᕐᑐᑦ ᐊᑕᐅᓯᕐᒥ ᐋᓐᓂᕐᓱᐃᕆᓂᕐᒧᑦ ᐸᔨᓴᒃᓴᙳᖅᑎᑕᐅᓯᒪᓂᖓᓂ ᒪᐃ 8-ᒥ ᓴᓂᑭᓗᐊᕐᒥ, ᑭᖑᓂᐊᒍᓪᓗ ᑕᖅᑭᓂᒃ 12-ᓂ ᖃᓄᐃᑦᑕᐃᓕᔭᕆᐊᖃᖅᓯᒪᓪᓗᓂ ᐊᒻᒪ ᐊᓂᑎᑕᐅᔪᓐᓇᓚᐅᕐᓂᖓᓂᒃ ᐊᑐᕆᐊᖃᙱᑦᑐᓂᒃ ᒪᓕᒡᓗᓂ. ᕿᒥᑦᑎᓇᓱᓚᐅᕐᓂᖓ ᐲᖅᑕᐅᓚᐅᕐᑐᖅ ᐸᓯᔭᒃᓴᐅᔾᔪᑎᖏᑦᑎᒍᑦ.

ᒪᓕᒐᓕᐅᕐᑎ ᖃᕝᕕᒃ ᐊᐱᕆᔭᐅᓚᐅᕐᓯᒪᔪᖅ ᒪᐃ 22-ᒥ ᑐᓴᖅᑎᑦᑎᔪᓐᓇᕆᐊᒃᓴᖓᓂ ᐸᓯᔭᒃᓴᐅᓂᕐᒧᑦ ᖃᓄᐃᑕᐅᓯᒪᓕᕆᐊᒃᓴᖓᓂᒃ.

“ᐋᒃᑲ,” ᑭᐅᓪᓗᓂ, ᒪᓕᒐᓕᐅᖅᑎᑦ ᑎᑎᕋᕐᕕᖏᓐᓄᙵᐅᓕᖅᖢᓂ.

ᐅᖃᐅᓯᖏᑦᑎᒍᓪᓕ ᒪᓕᒐᓕᕆᕝᕕᒃᒥ ᐅᓪᓗᖓᓂ, ᖃᕝᕕᒃ ᐅᖃᓚᐅᕐᑐᖅ ᒪᓕᒐᓕᐅᕐᑎᐅᓂᕐᒥ ᓄᖅᑲᕈᒪᕈᔪᖕᓂᖓᓂ ᑭᓯᐊᓂᓕ ᓄᖅᑲᕈᒪᔪᓐᓃᓚᐅᕐᑐᖅ ᐃᓐᓇᑐᖃᕐᓄᑦ ᓴᓂᑭᓗᐊᕐᒥ ᓄᖅᑲᖁᔭᐅᙱᓐᓇᒥ.

ᐅᖃᖅᖢᓂ, “ᐄᓛᒃ ᓈᒻᒪᙱᑦᑐᓂ ᐊᑐᕐᓯᒪᔪᖓ ᐊᒻᒪᓗ ᑖᒃᑯᓄᖓ ᖃᐅᔨᕚᓕᕐᓯᒪᓪᓗᖓ ᑕᒻᒪᖅᑕᕕᓂᕐᓂᒃ ᐊᒻᒪ ᓯᕗᒧᑦ ᐱᓇᓱᑐᐃᓐᓇᕐᓂᐊᖅᖢᓂ. ᐅᖄᓂᒍᓐᓇᙱᑦᑐᖓ ᒪᒥᐊᓪᓚᕆᓐᓂᓐᓂ, ᑭᓯᐊᓂᓕ ᐱᒋᐊᕈᑎᒋᓂᐊᖅᑕᕋ.”

ᖃᕝᕕᒃ ᐅᖃᓪᓚᓚᐅᖅᖢᓂ ᒪᓕᒐᓕᐅᕐᑎᑦ ᑭᐳᖏᓐᓂ ᐸᑦᑕᒃᑐᓚᐅᕐᑐᑦ. ᑐᙵᓱᒃᑎᑕᐅᓪᓗᓂ ᐅᑎᕐᓂᖓᓂᒃ ᐱᓕᕆᖃᑎᒋᔭᖏᓐᓄᑦ ᐊᒻᒪ ᐃᓄᖕᓄᑦ ᐅᐸᒍᑎᓯᒪᔪᓄᑦ.