‘ᓈᒻᒪᙱᕕᒡᔪᐊᕋᔭᖅᑐᖅ’ ᐅᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐱᓇᓱᐊᒐᖅ ᐃᓱᓕᑉᐸᑦ: ᐃᑲᔪᖅᑐᐃᔨ

For English version, see ‘Humanitarian crisis’ if Inuit Child First Initiative expires, advocate says

ᐅᓇ ᒪᑐᒃᐸᑦ ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐱᓇᓱᐊᒐᖅ ᒫᔅᓯ 31-ᒥ ᐊᒃᓱᐊᓗᒃ ᐊᒃᑐᐃᓂᖃᑲᐅᑎᒋᓂᐊᕐᒪᑦ ᐅᓄᒻᒪᕆᒃᑐᓂᒃ ᓄᓇᕗᒥᑦ ᓱᕈᓯᕐᓂ, ᐊᑕᐅᓯᖅ ᐃᑲᔪᖅᑐᐃᔨ ᐅᖃᕐᑐᖅ.

ᑕᔭ ᑐᑐ, ᐱᓕᕆᐊᖃᖅᑐᖅ ᐅᑭᐅᕐᑕᖅᑐᕐᒥ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᑐᙵᕕᒃᒥᑦ, ᐱᖃᑎᖃᖅᖢᓂ ᓄᓇᕗᒧᑦ ᒪᓕᒐᓕᐅᖅᑎᒥᒃ ᓘᕆ ᐃᓪᓚᐅᑦ ᐊᒻᒪ ᕿᑭᖅᑕᓂ ᐋᓐᓂᐊᕕᐊᓗᒃᒧᑦ ᓱᕈᓯᕐᓄᑦ ᓘᒃᑖᖅ ᕼᐆᑕᓐ ᓴᕕᐅᒥ ᕕᕝᕗᐊᕆ 28-ᖑᑎᓪᓗᒍ ᒐᕙᒪᑐᖃᒃᑯᓐᓂ ᐅᖓᕙᕆᐊᖅᑎᑦᑎᖁᔨᓚᐅᕐᑐᑦ ᐱᓕᕆᐊᒃᓴᕐᒧᑦ ᐃᑲᔫᑎᒃᓴᐅᕙᒃᑐᑦ ᒫᔅᓯ 31 ᐅᖓᑖᓄᑦ ᐊᑯᓂᕈᓗᒃ ᐊᑐᕐᓂᐊᖅᑐᓂ ᐋᖅᑭᒃᓱᐃᓇᓱᖕᓂᖏᓐᓂᒃ.

ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐱᓇᓱᐊᒐᖅ ᐃᓄᐃᑦ ᓱᕈᓯᖏᓐᓂ ᐋᓐᓂᐊᖃᖅᑕᐃᓕᓂᕐᒧᑦ ᐊᒻᒪ ᐃᓕᓐᓂᐊᕐᓂᕐᒧᑦ ᐃᑲᔫᑎᒃᓴᖃᖃᑦᑕᖅᑐᖅ. ᐊᐅᓚᑕᐅᔪᖅ ᔪᐊᑕᓐ ᐱᒻᒪᕆᒋᓐᓄᑦ ᓴᓂᐊᒍᑦ, ᑖᓐᓇᓕ ᒐᕙᒪᑐᖃᒃᑯᑦ ᐱᓇᓱᐊᒐᖓ ᓄᓇᖃᖅᑳᖅᑐᑦ ᓱᕈᓯᖏᓐᓄᑦ ᐃᑲᔫᑎᓕᕆᓂᕐᒥᒃ.

ᔪᐊᑕᓐ ᐱᒻᒪᕆᒋᔭᖏᑦ ᐱᒋᐊᖅᑕᐅᓚᐅᕐᓯᒪᔪᖅ 2007-ᒥ ᐅᑯᐊ ᑲᓇᑕᒥ ᑭᒃᑯᑐᐃᓐᓇᕐᓄᑦ ᐱᔪᓐᓇᐅᑎᓕᕆᔨᑦ ᑭᒡᓕᓯᓂᐊᖅᑎᒃᑯᑦ ᕿᐱᓘᑎᖃᕐᕕᐅᓚᐅᖅᓯᒪᑎᓪᓗᒋ ᒐᕙᒪᑐᖃᒃᑯᑦ ᐃᑲᔫᑎᖃᙱᓐᓂᖏᓐᓂ ᓱᕈᓯᕐᓄᑦ ᐊᒻᒪ ᐃᓚᒌᓄᑦ ᐱᔨᑦᑎᕋᐅᑎᑎᒍᑦ.

“ᐃᑲᔫᑎᑖᖅᑎᑦᑎᕙᖕᓂᐅᑉ ᐊᓯᐊᒍ ᐅᓇ ᐃᓅᓂᕐᒧᑦ ᓈᒻᒪᙱᓕᐅᕈᑎᒻᒪᕆᐊᓗᒃ,” ᑐᑐ ᐅᖃᕐᑐᖅ ᐅᖃᐅᓯᖃᖅᖢᓂ ᐊᑯᑦᑐᓂᖓᓂ ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐃᑲᔫᑎᒃᓴᐃᑦ.

“ᒐᕙᒪᑐᖃᒃᑯᑦ ᐱᔪᓐᓇᕐᓂᖃᕐᒪᑕ ᐅᖓᕙᕆᐊᖅᑎᑦᑎᔪᓐᓇᕐᓂᕐᒥᒃ ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐱᓇᓱᐊᒐᕐᒥ (ICFI) ᑕᒪᒃᑯᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᖏᓪᓗ ᐱᓕᕆᐊᖃᖅᑎᓪᓗᒋᑦ ᐊᑯᓂᕈᓗᒃ ᐊᑐᖅᑕᐅᓇᔭᖅᑐᓂ ᑕᒪᑐᒧᖓ.”

ᓱᕈᓰᑦ ᓄᓇᕗᒦᑦᑐᑦ ᐃᑲᔪᖅᑕᐅᓯᒪᖕᒪᑕ ᓂᕿᑖᕈᑎᒃᓴᑐᐃᓐᓇᐅᙱᑦᑐᓄᑦ ᑖᒃᑯᐊ ᐱᓕᕆᐊᖓᒍᑦ, ᑐᑐᖁᖃᕐᑐᖅ, ᑭᓯᐊᓂᓕ ᐊᒥᓱᒻᒪᕇᑦ ᓱᕈᓰᑦ ᐱᔨᑦᑎᕋᐅᑎᑎᒍᑦ ᑲᒪᒋᔭᐅᓯᒪᓕᕐᑐᖅ ᒪᑯᑎᑐᓇᖅ ᖃᓪᓗᓈᓄᑦ ᐊᐅᓪᓚᖅᑎᑕᐅᓪᓗᑎ ᐅᖃᓪᓚᒍᓐᓇᙱᓗᐊᒧᑦ ᖃᐅᔨᓴᖅᑕᐅᔭᖅᑐᖅᖢᑎᒃ.

ᐅᕘᓇᓕ ᐃᓄᐃᑦ ᓱᕈᓰᑦ ᓯᕗᓪᓕᐅᑎᓪᓗᒋᑦ ᐱᓇᓱᐊᒐᕐᒥ ᐃᑲᔫᑎᓄᑦ, ᓄᓇᕗᒥᑦ ᐋᓐᓂᐊᖃᕐᓇᙱᑦᑐᓕᕆᔨᑦ ᑕᑯᓯᒪᓕᕐᑐᑦ ᐊᔾᔨᒋᙱᑕᖓᓂ ᓲᕐᓗ “ᐅᓐᓄᒃᑯᑦ ᐊᒻᒪ ᐅᓪᓗᒃᑯᑦ”, ᓴᕕᐅᑦ ᐅᖃᕐᑐᖅ. ᐅᖃᐅᓯᖃᖅᖢᓂ ᐅᓄᙱᓐᓂᕐᓴᐅᓂᕋᖅᖢᓂᒋᑦ ᓱᕈᓰᑦ ᐋᓐᓂᐊᕕᓕᐊᕐᑐᑦ “ᓂᕆᑦᑎᐊᖃᑦᑕᙱᓗᐊᕐᓂᕐᒧᑦ” ᐋᓐᓂᐊᖃᖅᑐᓂᒃ.

“ᐅᓇ ᐱᕕᖃᕈᑎᒋᒐᑦᑎᒍᑦ ᐱᓕᕆᐊᖃᒃᑲᓐᓂᕈᓐᓇᖅᖢᑕ ᐋᓐᓂᐊᖃᖅᑕᐃᓕᑎᑦᑎᓂᕐᒧᑦ ᓈᒻᒪᙱᓕᐅᕈᑎᐅᔭᒃᑐᓂᒃ ᐊᒻᒪᓗ ᐱᓕᕆᐊᖃᕐᓂᕐᓴᐅᓕᖅᖢᑕ ᐱᐅᓂᕐᓴᒃᑯᑦ ᓱᕈᓯᕐᓂ ᑲᒪᒋᔭᖃᕈᓐᓇᕐᓂᕐᒥᒃ ᐅᑭᐅᕐᑕᖅᑐᕐᒥ,” ᐅᖃᕐᑐᖅ. “ᓴᐳᑎᓯᒪᒋᐊᖃᕋᑦᑎᒍᑦ ᐱᓕᕆᐊᒧᑦ ᖃᓄᐃᑉᐸᓪᓕᐊᔾᔪᑎᒋᔭᕗᑦ ᐊᒻᒪᓗ ᓄᓇᕗᒥᑦ ᓱᕈᓰᑦ ᐃᑲᔪᖅᑕᖏᓐᓇᕈᓐᓇᕐᓗᑎᒃ ᐱᔭᕆᐊᖃᖅᑕᖏᑦᑎᒍᑦ.”

ᐃᓪᓚᐅᑦ ᐅᖃᓚᐅᕐᑐᖅ ᒐᕙᒪᑐᖃᒃᑯᓐᓄᑦ ᐅᖃᖃᑦᑕᐃᓐᓇᕐᓂᖓᓂ ᐅᖓᕙᕆᐊᖅᑎᑦᑎᖁᔨᓪᓗᓂ ᐆᒥᖓ ᐃᓄᐃᑦ ᓱᕈᓰᑦ ᓯᕗᓪᓕᐊᑎᓪᓗᒋᑦ ᐱᓇᓱᐊᒐᖅ. ᐃᑲᔪᖅᑐᖅᑕᐅᓯᒪᓕᕐᑐᖅ ᐊᓯᖏᓐᓄᑦ ᐅᑭᐅᕐᑕᖅᑐᕐᒥ ᐱᓕᕆᔨᓄᑦ, ᐃᓚᖃᖅᖢᑎᒃ ᒪᓕᒐᓕᐅᖅᑎᓂᒃ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᒧᑦ ᓇᐃᑕᓐ ᐅᐱᐊᑦᒧᑦ.

ᐃᓪᓚᐅᑦ ᐅᖃᓚᐅᕐᑐᖅ ᑐᓴᑲᑕᙱᓐᓂᖓᓂ ᓄᓇᖃᖅᑳᖅᑐᓄᑦ ᐱᔨᑦᑎᕋᐅᑎᓄᑦ ᒥᓂᔅᑕᒥ ᐹᑎ ᕼᐊᐃᑐ, ᑖᔅᓱᒪ ᐱᓕᕆᕝᕕᖓ ᑲᒪᒋᔭᖃᖅᑎᓪᓗᒍ ᑖᔅᓱᒥᖓ ᐱᓕᕆᐊᒥᒃ.

“ᐱᔪᒪᐃᓐᓇᕆᐊᖃᕋᑦᑕ ᑐᓴᕐᕕᒋᓇᓱᐅᓐᓇᕐᓗᒍ ᑖᓐᓇ ᐊᒃᓱᓪᓘᓐᓃᑦ ᖃᐅᔨᑎᓪᓗᓂᑎᒍᑦ ᐅᖓᕙᕆᐊᕐᓯᓂᐊᕆᐊᒃᓴᖓᓂ ᐱᓕᕆᐊᒥ ᐅᕝᕙᓘᓐᓃᑦ ᓄᑖᓂ ᐱᓕᕆᐊᒃᓴᓂ ᓴᖅᑭᑦᑎᓂᐊᕐᒪᖔᑦ,” ᐃᓪᓚᐅᑦ ᐅᖃᕐᑐᖅ.

“ᐅᖃᖃᑎᒋᕙᒃᑕᓐᓂ ᕼᐋᒻᒪᓚᓂ ᓄᓇᕗᒥᑦ, ᖃᐅᔨᓚᐅᕋᑦᑕ, ᓲᕐᓗ, ᐱᓕᕆᐊᖑᔪᖅ ᐃᑲᔪᖅᓯᒪᓕᕐᓂᖓᓂᒃ 15,000 ᐅᖓᑖᓂ ᐃᓄᐃᑦ ᓱᕈᓯᖏᓐᓂᒃ.”

ᕼᐊᐃᑐ ᐱᓕᕆᖃᑎᖃᖅᑐᖅ ᐃᓄᖕᓂ ᐱᓕᕆᖃᑎᒌᓂᒃ ᐊᑯᓂᕈᓗᒃ ᐊᑐᕋᔭᖅᑐᒥ, ᐅᖃᕐᑐᖅ ᔭᓂᕗ ᑯᔭᓕ, ᒥᓂᔅᑕᐅᑉ ᑎᑎᕋᖅᑎᖓ ᖃᕋᓴᐅᔭᒃᑯᑦ ᑎᑎᕋᖅᖢᓂ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ.

ᑭᓯᐊᓂᓕ, ᐃᑲᔫᑎᒃᓴᖅᑕᖃᒃᑲᓐᓂᕆᐊᖃᕐᒪᑦ ᐊᖏᖅᑕᐅᔭᕆᐊᓕᖕᓂ ᒪᓕᒐᓕᕆᔨᕐᔪᐊᓄᑦ ᐋᑐᕚᒥ ᑖᒃᑯᐊᓗ ᐱᒋᐊᕐᓂᐊᖅᖢᓂ ᒫᔅᓯ 24-ᖑᓕᖅᐸᑦ.

“ᐊᑕᐅᓯᑦᑕᐃᓐᓇᕐᒥ ᐃᓱᒫᓘᑎᖃᕋᑦᑕ ᐃᓄᐃᑦ ᓯᕈᓰᑦ ᓯᕗᓪᓕᐅᑎᓪᓗᒋᑦ ᐱᓕᕆᐊᒃᓴᖅ ᐊᒻᒪ ᐊᓯᖏᑦ ᖃᓄᐃᓕᐅᕈᑎᑦ ᐃᓱᓕᓐᓂᐊᕆᐊᒃᓴᖏᓐᓂᑦ ᐅᑯᐊ ᑲᓐᓲᕕᑎᕝᑯᑦ ᐊᒻᒪ ᐊᓐᑏᐲᑯᑦ ᓄᖅᑲᖅᑎᑦᑎᒃᐸᑕ ᐃᑲᔫᑎᐅᔪᓐᓇᖅᑐᓂ ᒪᓕᒐᓕᕆᕕᒡᔪᐊᒃᑯᑦ,” ᑯᔭᓕ ᐅᖃᕐᑐᖅ.