‘ᑐᑭᓯᑎᑦᑐᒪᒐᒃᑯ ᖃᓄᖅ ᑕᒪᑐᒥᖓ ᐃᒃᐱᒋᔭᖃᕐᓂᑦᑎᓐᓂᒃ’: ᐃᓕᓐᓂᐊᕆᐊᖃᕐᓂᑯ ᕿᒥᕐᕈᕗᖅ ᐃᒃᓯᕋᕐᔪᐊᕌᓘᑉ ᐳᓛᕐᓂᕆᓛᖅᑕᖓᓂᒃ

ᐱᑦᑎᐊᖅᑕᐅᓯᒪᙱᓗᐊᖅᑐᑦ ᑐᒃᓯᐊᖅᑎᑦᑎᔨᓄᑦ ᐋᓐᓂᖅᓱᖅᑕᐅᓯᒪᓂᕐᒧ ᕿᒥᕐᕈᕗᑦ ᑐᒃᓯᐊᕐᕕᐅᑉ ᖃᓄᐃᓕᐅᕈᑎᖏᓐᓂᒃ ᓄᓇᕗᒥᑦ ᑖᔅᓱᒥᖓ ᐃᒃᓯᕋᕐᔪᐊᕌᓗᖕᒥ ᐱᒻᒪᕆᖕᒥ ᒪᒥᐊᖁᔨᕗᑦ ᑲᓇᑕᒦᓐᓂᖓᓂᒃ

ᓱᕈᓰᑦ, ᐲᑕ ᐃᕐᓂᖅ ᐃᓚᒋᔭᐅᓪᓗᓂ, ᐱᒐᓱᒋᔭᐅᔪᖅ ᓴᐅᒥᐊᓂᒃ ᓯᕗᓪᓕᖅᐹᓃᑦᑐᓂᒃ ᓇᐅᔮᓂ ᐊᔾᔨᓕᐅᖅᑕᐅᓂᐊᖅᖢᑎᒃ 1952-ᖑᑎᓪᓗᒍ ᐆᒧᖓ ᒌ ᒪᕆ ᕉᓯᓕᐅᒧᑦ, ᐃᒃᓯᕋᕐᔪᐊᓄᑦ ᐱᓕᕆᔨ. (ᐊᔾᔨᙳᐊᖅ ᐅᕙᙵᑦ ᐲᑕ ᐃᕐᓂᖅ)

By ᐃᐊᒪ ᑐᕌᓐᑐ

ᐅᓇ ᐅᓂᒃᑳᕆᔭᐅᔪᖅ ᐃᓚᖃᕐᒪᑦ ᓱᕈᓯᕐᓂ ᐋᓐᓂᖅᓱᐃᕆᕙᖕᓂᕐᒥᒃ ᐊᒻᒪ ᖁᓄᔪᕐᓂᐊᖃᑦᑕᕐᓂᕐᒥ ᐃᓚᖏᓐᓄᑦ ᐅᖃᓕᒫᖅᑐᓄ ᓈᒻᒪᙱᓗᐊᑐᐃᓐᓇᕆᐊᖃᖅᖢᑎᒃ

ᐅᓇ ᐅᓂᒃᑳᖅ ᐲᑕ ᐃᕐᓂᐅᑉ ᐅᖃᐅᓯᕆᖃᑦᑕᕐᓯᒪᔭᖓ.

ᓯᕗᓪᓕᖅᐹᖑᓚᐅᕐᓯᒪᔪᖅ 1989-ᒥ ᑲᑎᒪᔨᐅᖃᑕᐅᔪᖅ ᐅᖃᓪᓚᒃᑎᓪᓗᒍ ᓄᓇᑦᓯᐊᕐᒥ ᒪᓕᒐᓕᕆᕕᒡᔪᐊᒥ, ᑕᐃᔅᓱᒪᓂ 42-ᓂ ᐅᑭᐅᖃᖅᑐᖅ ᒪᓕᒐᓕᐅᖅᑎ ᐅᖃᓪᓚᓚᐅᕐᓯᒪᖕᒪᑦ ᐅᖃᐅᓯᕐᒥᓂᒃ ᐊᒻᒪ ᐃᓕᖅᑯᓯᕐᒥᓂᒃ ᐊᓯᐅᔨᓚᐅᕐᓯᒪᓂᖓᓂᒃ ᑲᓇᑕᒥ ᐃᓕᓐᓂᐊᕆᐊᕐᕕᓕᐊᖅᑎᑦᑎᖃᑦᑕᕐᓂᕐᒥᒃ ᑲᒪᒋᔭᖃᖅᑎᓪᓗᒋᑦ.

ᐃᕐᓂᖅ ᐅᖃᐅᓯᖃᓚᐅᕐᓯᒪᔪᖅ ᑖᓐᓇ ᑐᒃᓯᐊᕐᕕᓕᕆᔨ ᖁᓄᔪᕐᓂᐊᕐᓯᖃᑦᑕᓚᐅᕐᓯᒪᓂᖓᓂᒃ ᓄᑲᑉᐱᐊᓂᒃ ᐃᒡᓗᓕᒑᕐᔪᒃᒥ ᐃᓕᓐᓂᐊᕆᐊᖅᑎᑕᐅᕙᒃᑐᓂᒃ ᔫᓴᕝ ᐴᓂᐃ ᐃᓕᓐᓂᐊᖅᕕᒃ ᒪᑐᐃᖅᑕᐅᑎᓪᓗᒍ 1951-ᒥ. ᐃᕐᓂᖅ,  75-ᖑᓕᕐᑐᖅ ᒫᓐᓇ, ᐱᕈᓚᐅᕐᓯᒪᔪᖅ ᓇᐅᔮᓂ ᐊᒻᒪᓗ ᑕᕝᕗᖓ ᐃᓕᓐᓂᐊᕆᐊᖅᑎᑕᐅᕙᒃᖢᓂ.

ᑖᒃᑯᓂᖓᓗ ᑳᑐᓕᒃ ᑐᒃᓯᐊᕐᕕᒃᒥ ᑕᒪᑐᒥᖓ ᑲᒪᒋᔭᖃᕐᓗᑎᒃ ᐊᒻᒪ ᒪᒥᐊᓪᓗᑎᒃ ᐱᓕᕆᖃᑕᐅᓚᕐᓯᒪᓂᖏᓐᓂᒃ ᐃᓕᓐᓂᐊᕆᐊᖅᕕᓕᐊᕐᕕᖕᒥ ᓄᓇᕗᒥᑦ.

ᐃᒃᓯᕋᕐᔪᐊᕌᓗᒃ ᐴᑉ ᕗᕌᓐᓯᔅ ᑎᑭᕝᕕᒃᓴᖓ ᔪᓚᐃ 24 ᑐᖔᓂ, ᐃᕐᓂᖅ ᐊᒻᒪ ᐊᓯᖏᑦ ᐱᑦᑎᐊᖅᑕᐅᕙᙱᓗᐊᕐᓂᑯ ᑲᑐᓕᒃᑯᑦ ᑐᒃᓯᐊᕐᕕᓕᕆᔨᖏᓐᓄᑦ ᖃᓄᐃᑕᐅᕙᓚᐅᕐᓂᖏᓐᓂᒃ ᐅᖃᐅᓯᖃᑲᑕᓕᕐᒥᔪᑦ.

ᕗᕌᓐᓯᔅ ᐃᓱᒪᒋᔭᐅᔪᖅ ᒪᒥᐊᓐᓂᐊᕆᐊᒃᓴᖓᓂ ᑐᒃᓯᐊᕐᕕᒃ ᐱᓕᕆᖃᑕᐅᓚᕐᓯᒪᓂᖓᓂ ᑲᓇᑕᒥ ᐃᓕᓐᓂᐊᕆᐊᖅᕕᓕᕆᓂᕐᒥᒃ. ᐄᐳᕉᑎᓪᓗᒍ ᒪᒥᐊᕌᓂᓚᐅᕐᓯᒪᔪᖅ ᐃᒃᓯᕋᕐᔪᐊᕌᓘᑉ ᐅᐸᒃᓯᒪᕙᒃᑕᖓᓂ. ᑭᓯᐊᓂᓕ ᑐᒃᓯᐊᕐᕕᓕᕆᔩᑦ ᑲᓇᑕᒥ ᒪᒥᐊᖁᔭᐅᓯᒪᔪᑦ ᐃᓚᒋᔭᐅᓪᓗᓂ ᐅᑯᓇᙵ 94-ᓂ ᖃᓄᐃᓕᐅᕈᑎᐅᖁᔭᐅᔪᓂᒃ ᐅᕙᓂ 2015-ᒥ ᓱᓕᓂᖅ ᐊᒻᒪ ᐱᒋᐊᒃᑲᓐᓂᕈᒪᓂᕐᒧᑦ ᑲᒥᓴᓐᑯᑦ ᐅᓂᒃᑳᖏᓐᓂ.

ᕗᕌᓐᓯᔅ ᑲᓇᑕᒦᓐᓂᖓᓂ, ᐅᑭᐅᕐᑕᖅᑐᕐᒥᐅᑕᐃᑦ ᐅᓄᕐᑐᑦ ᑐᓴᕋᓱᖕᓂᐊᖅᑐᑦ ᐅᖃᐅᓯᖃᕐᓂᐊᕆᐊᒃᓴᖓᓂ ᐸᓯᔭᒃᓴᐅᔾᔪᑎᒋᔭᐅᔪᓂᒃ ᐆᒧᖓ ᐊᑖᑕ ᔪᐊᓇᔅ ᕆᕗᐊᒧ, ᐃᒃᓯᕋᕐᔪᐊᖅ ᐸᓯᔭᒃᓴᙳᖅᑎᑕᐅᓯᒪᔪᑦ ᐃᓄᖕᓂ ᓱᕈᓯᕐᓂ ᐱᑦᑎᐊᖃᑦᑕᓚᐅᕐᓯᒪᙱᓐᓂᐊᓗᖏᓐᓄᑦ ᐊᑐᖃᑦᑕᖅᑕᕕᓂᖏᓐᓂ ᐊᕐᕌᒍ 50 ᑭᖑᓂᑦᑎᓐᓂ.

ᐃᓱᒪᒋᔭᐅᔪᖅ ᒫᓂ 150,000-ᖏᓐᓃᑦᑐ ᓄᓇᖃᖅᑳᖅᑐᑦ ᐊᓪᓚᐃᑦ, ᐃᓄᐃᑦ ᐊᒻᒪ ᐊᓪᓚᖓᔪᐃᑦ ᓱᕈᓯᖏᑦ ᐃᓕᓐᓂᐊᕆᐊᖅᑎᑕᐅᖃᑦᑕᓚᐅᕐᓯᒪᖕᒪᑕ ᐅᑯᓄᖓ 139-ᓄᑦ ᐃᓕᓐᓂᐊᕆᐊᕐᕕᒃᓴᓂᒃ ᐊᐅᓚᑕᐅᔪᓂᒃ ᑲᓇᑕᒥ ᐊᕐᕌᒍᑲᓴᖕᓂ 100-ᓂ ᒫᙵᑦ ᐱᒋᐊᕐᓯᒪᓪᓗᑎᒃ 1880-ᖏᓐᓂ ᐃᓚᖏᓪᓗ ᒪᐅᖓ 1990-ᖏᓐᓄᑦ ᒪᑐᐃᖓᓪᓗᑎᒃ. ᐅᓇ ᒐᕙᒪᒃᑯᓐᓄᑦ ᐱᓕᕆᐊᖑᓚᐅᕐᓯᒪᔪᖅ ᓄᓇᖃᖅᑳᖅᑐᑦ ᐃᓅᓱᒃᑐᖏᓐᓂ ᐅᖃᐅᓯᖏᓐᓂ ᐊᑐᖃᑦᑕᖁᔨᙱᓐᓂᕐᒧ ᐊᒻᒪ ᐃᓕᖅᑯᓯᖏᓐᓂᒃ ᐃᓚᖏᓐᓂ ᕿᒪᐃᑎᑕᐅᓪᓗᑎᒃ ᓄᓇᖏᓐᓂᒡᓗ

“ᐅᖃᐅᓯᖃᕈᓘᔭᖃᑦᑕᓚᐅᕐᓯᒪᒐᑦᑕ ᐃᒡᓗᓕᒑᕐᔫᑉ ᒥᒃᓵᓂᒃ. ᐅᖃᓪᓚᒡᕕᐅᖃᑦᑕᖅᖢᑕᓗ ᐅᓄᕈᓘᔭᒻᒪᕆᒃᑐᓂᒃ ᐃᓄᖕᓂ, ᑐᒃᓯᐊᕆᐊᑲᑦᑕᖅᑐᓂᒃ, ᑐᒃᓯᐊᕐᕕᖕᒥᓪᓗ ᐱᓕᕆᔨᐅᖃᑕᐅᔪᓂᒃ,” ᐃᕐᓂᖅ ᐅᖃᕐᑐᖅ.

ᐲᑕ ᐃᕐᓂᖅ, ᐅᕙᓂ ᐊᔾᔨᓕᒃ ᐊᖏᕐᕋᖓᓂ ᐋᑐᕚᒥ ᑕᒪᑐᒪᓂ ᑕᖅᑭᒥᓐ ᐅᖃᓚᐅᕐᑐᖅ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᒪᒥᐊᓐᓂᖓ ᐱᒻᒪᕆᐅᔭᕆᐊᖃᒻᒪᕆᒃᑐᖅ. (ᐊᔾᔨᙳᐊᖅ ᐅᕙᙵᑦ ᐲᑕ ᐃᕐᓂᖅ)

ᑖᓐᓇ ᐱᖃᑎᖃᖅᖢᓂ ᔮᒃ ᐊᓇᕈᐊᕐᒥ ᐊᒻᒪ ᒪᕆᐅᓯ ᑐᖏᓕᒃᒥ, ᐃᑲᔪᒻᒪᕆᓚᐅᕐᓯᒪᖕᒪᑕ ᑲᑐᓕᒃᑯᑦ ᐃᒃᓯᕋᕐᔪᐊᕌᐱᒃ ᕆᓅ ᕈᓘ ᒪᒥᐊᑎᑕᐅᑎᓪᓗᒍ 1996-ᒥ ᐃᒡᓗᓕᒃᒥ ᑐᒃᓯᐊᕐᕕᒃ ᐱᓕᕆᐊᖃᖃᑕᐅᓂᑰᓂᖓᓂᒃ ᐃᓕᓐᓂᐊᕆᐊᕐᕕᓕᕆᓂᕐᒥᒃ.

ᖃᖓᑦᑎᐊᓵᖑᓚᐅᕐᑐᕐᓕ ᐃᕐᓂᖅ ᐊᑖᑕ ᕆᕗᐊ ᐸᓯᔭᒃᓴᐅᑎᑕᐅᓂᖓᓄ ᐱᓕᕆᐊᕆᔭᐅᑎᑦᑎᓇᓱᓚᐅᕐᓯᒪᔪᖅ ᖁᓄᔪᓐᓂᐊᖅᓯᕙᓚᐅᕐᓂᖓᓂᒃ ᓱᕈᓯᕐᓂ ᓄᓇᕗᒥᑦ.

ᐊᑖᑕ ᕆᕗᐊ ᐃᓕᓐᓂᐊᖅᑐᓕᕆᓂᕐᒥᒃ ᐱᓕᕆᐊᖃᙱᒃᑲᓗᐊᖅᖢᑎ ᐃᒃᓯᕋᕐᔪᐊᕆᔭᐅᓚᐅᕐᓯᒪᖕᒪᓐ ᐃᒡᓗᓕᒑᕐᔪᒃᒥ, ᐊᕐᕕᐊᓂᒃ, ᓇᐅᔮᓂᒃ, ᖃᒪᓂᑦᑐᐊᕐᒥ ᐊᒻᒪ ᑲᖏᖅᖠᓂᖅᒥ 1960-ᖏᓐᓂᒃ 1970-ᖏᓐᓄᑦ.

1998-ᒥ ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᓚᐅᕐᓯᒪᔪᑦ ᕆᕗᐊᒥ ᖁᓄᔪᕐᓂᐊᖅᓯᖃᑦᑕᓚᐅᕐᓯᒪᓂᖓᓂᒃ ᐃᓄᖕᓂ ᓱᕈᓯᕐᓂ ᓇᐅᔮᓂ ᐊᒻᒪ ᐊᕐᕕᐊᓂ 1968-ᓗ 1970-ᓗ ᐊᑯᓐᓂᖓᓂᒃ. ᑲᓇᑕᒦᑦᑐᓐᓃᓚᐅᕐᓯᒪᔪᖅ 1993-ᒥ ᑕᒪᒃᑯᐊ ᐸᓯᔭᒃᓴᐅᔾᔪᑎᖏᑦ ᐃᖅᑲᖅᑐᐃᕕᒃᑯᑦ ᐱᓕᕆᐊᖑᓚᐅᕐᓯᒪᙱᑎᓪᓗᒋᑦ.

ᐸᓯᔭᒃᓴᐅᔾᔪᑎᒋᔭᐅᔪᑦ ᓄᖃᖓᑎᑕᐅᓕᓚᐅᕐᓯᒪᔪᑦ 2017-ᒥ ᐅᑯᖓ ᑭᒃᑯᓕᒫᓂ ᐸᓯᔭᒃᓴᐅᓂᕐᒧᑦ ᐱᔨᑦᑎᕋᖅᑎᑦ ᑲᓇᑕᒥ ᐅᖃᖅᑎᓪᓗᒋ ᐱᓕᕆᐊᖑᔪᓐᓇᐃᓪᓕᓂᖓᓂᒃ. ᕆᕗᐊ 91-ᓂ ᐅᑭᐅᖃᓕᕐᑐᖅ ᕗᕌᓐᔅᒥ ᓄᓇᖃᕐᑐᖅ.

ᕕᕝᕗᐊᕆᒥ ᑕᒪᑐᒪᓂ ᐊᕐᕌᒍᒥ, ᐸᓖᓯᒃᑯᑦ ᐸᓯᔭᒃᓴᙳᖅᑎᑦᑎᒃᑲᓐᓂᓚᐅᕐᑐᑦ ᕆᕗᐊᒥ, ᐆᒧᖓ ᖁᓄᔪᕐᓂᐊᕐᓯᓚᐅᕐᓯᒪᓂᖓᓂᒃ ᐊᕐᓇᒥ ᐊᕐᕕᐊᓂ ᐊᒻᒪ ᑎᑭᕋᕐᔪᐊᕐᒥ 1974-ᓗ ᐊᒻᒪ 1979 ᐊᑯᓐᓂᖓᓂᒃ.

ᒫᔅᓯᒥ ᐃᒃᓯᕋᕐᔪᐊᕌᓗᒃ ᕗᕌᓐᓯᔅ ᑲᑎᖃᑎᖃᓚᐅᕐᓯᒪᔪᖅ ᐅᐸᒍᑎᑕᐅᔪᓂᒃ ᐃᓄᖕᓂᒃ, ᐊᓪᓚᖓᔪᓂᒃ ᐊᒻᒪ ᓄᓇᖃᖅᑳᖅᑐᓂᒃ ᐊᓪᓚᓂᒃ ᕉᒻᒥ, ᑕᕝᕙᓂ ᒪᒥᐊᓚᐅᕐᓯᒪᔪᖅ ᑳᑐᓕᒃ ᑐᒃᓯᐊᖅᑐᓕᕆᔨᒃᑯᑦ ᐋᓐᓂᕐᓱᐃᕙᓚᐅᕐᓂᖏᓐᓂᒃ ᐃᓕᓐᓂᐊᕆᐊᕐᕕᕕᓂᕐᓂᒃ.

ᐃᒃᓯᕋᕐᔪᐊᕌᓗᒃ ᐃᖃᓗᖕᓄᑦ ᐳᓛᕐᓂᐊᕐᒥᔪᖅ ᔪᓚᐃ 29-ᖑᓕᕐᐸᑦ.

ᐲᑕ ᐃᕐᓂᖅ, ᓇᖏᕐᑐᖅ ᑐᓄᐊᓃᓛᓂᒃ ᓴᐅᒥᐊᓂ, ᐅᕙᓂ ᓲ ᔫᓴᕝ ᐴᓂᐅ ᐃᓕᓐᓂᐊᖅᕕᒃᒥ ᐃᒡᓗᓕᒑᕐᔪᒃᒥ 1962ᒥ. (ᐊᔾᔨᙳᐊᖅ ᐅᕙᙵᑦ ᐲᑕ ᐃᕐᓂᖅ)

ᕆᕗᐊᒥ ᐸᓯᔭᒃᓴᐅᑎᑦᑎᖃᑕᐅᓂᑯ ᐅᖃᓚᐅᕐᑐᖅ ᐃᒃᓯᕋᕐᔪᐊᕌᓘᑉ ᒪᒥᐊᓐᓂᖓ, ᐃᓚᖃᕐᓗᓂ ᑐᒃᓯᐊᖅᕕᒃ ᖃᓄᐃᓕᐅᖃᑕᐅᕙᓚᐅᕐᓂᖓᓂᒃ ᐃᓕᓐᓂᐊᕆᐊᕐᕕᖕᓂ, ᐅᖃᕆᐊᖃᕆᔭᐅᔪᖅ ᖃᐅᔨᓕᕐᓂᕐᖓᓂᒃ ᐋᓐᓂᕈᑎᐅᕙᓚᐅᕐᓯᒪᔪᓂᒃ ᐊᒻᒪᓗ ᑭᖑᕚᕇᑎᒍᑦ ᖁᕕᐊᓇᙱᑦᑐᐊᓗᖕᓂ ᐊᑐᖅᑕᐅᓯᒪᓂᑯᓂᒃ ᑐᒃᓯᐊᕐᕕᒃ ᐱᑕᖃᕐᓂᖓᓂᒃ ᑕᒫᓂ.

“ᑐᑭᓯᑎᑦᑐᒪᒐᒃᑯ ᖃᓄᖅ ᐃᒃᐱᒍᓱᖕᓂᑦᑎᓐᓂᒃ, ᐃᓅᓪᓗᑕ, ᖃᓄᕐᓗ ᐱᓕᕆᐊᕆᔭᐅᕙᓚᐅᕐᓂᑦᑎᓐᓂᒃ ᓲᕐᓗ ᑭᓲᙱᑦᑐᑎᑐᑦ,” ᐅᖃᕐᑐᖅ.

“ᐃᑲᔪᓚᐅᕐᓯᒪᙱᒻᒪᑕ … ᖁᓄᔪᕐᓂᐊᖅᓯᖃᑕᐅᕙᒃᖢᑎᒃ. ᑕᒪᓐᓇ ᓈᒻᒪᙱᒻᒪᑦ.”

ᑖᔅᓱᒪ ᐅᓂᒃᑳᖏ ᖁᓄᔪᕐᓂᐊᖅᑕᐅᕙᓚᐅᕐᓂᖓᓂᒃ ᕆᕗᐊᒥ ᐱᒋᐊᓚᐅᕐᓯᒪᔪᖅ ᐊᕐᕌᒍᑦ 47 ᑭᖑᓂᑦᑎᓐᓂᒃ ᓱᕈᓯᐅᑎᓪᓗᒍ ᐊᒻᒪᓗ ᑐᒃᓯᐊᕆᐊᖅᐸᒃᖢᓂ ᐱᓕᕆᕝᕕᒋᔭᖓᓄᑦ.

“6-ᓂ ᐅᑭᐅᖃᓚᐅᕐᓯᒪᔪᖓ. ᐅᕙᓐᓂ ᐱᓕᕆᐊᖃᖃᑦᑕᓕᓚᐅᕐᓯᒪᔪᖅ 6-ᓂ ᐅᑭᐅᖃᖅᑎᓪᓗᖓ,” ᐊᕐᓇ ᐅᖃᖅᑐᖅ ᕿᐊᓪᓗᓂ.

“ᐅᓇ ᐱᐅᙱᓐᓂᖅᐹᖑᓚᐅᕐᓯᒪᔪᖅ ᐃᓅᓯᓐᓂ. ᐋᓐᓂᕐᓈᓗᒃ, ᑐᖅᖢᓛᖅᐸᒃᖢᖓ, ᐃᕆᐊᓛᖅᐸᒃᖢᖓ ᐊᒻᒪ ᕿᐊᓪᓗᖓ. ᐅᖃᐅᑎᕙᒃᖢᓂᖓ ᓂᐱᖃᖁᙱᖢᓂᖓ. ᓂᐱᖃᙱᑦᑐᓐᓇᓚᐅᙱᓐᓇᒪ.”

ᓄᓇᑦᓯᐊᕐᒥ ᐱᕙᓪᓕᐊᔪᑦ ᑭᓇᐅᓂᖓᓂᒃ ᑖᓐᓇ ᐅᖃᐅᓯᖃᕈᓐᓇᙱᑦᑐᑦ ᓴᐳᔾᔭᐅᓯᒪᓂᖓᓄᑦ ᐃᖅᑲᖅᑐᐃᕕᒃᑎᒍᑦ. ᓄᓇᕗᒥᑦ ᐸᓖᓯᒃᑯᑦ ᑲᓇᑕᓕᒫᒥ ᑎᒍᔭᐅᔾᔪᑎᖃᖅᑎᑦᑎᓚᐅᕐᓯᒪᔪᑦ ᕆᕗᐊᒥ ᕕᕝᕗᐊᕆᐅᑎᓪᓗᒍ ᐸᓯᔭᒃᓴᙳᖅᑎᑕᐅᑎᓪᓗᒍ ᖁᓄᔪᕐᓂᐊᖃᑦᑕᓚᐅᕐᓯᒪᓂᖓᓂᒃ ᑖᔅᓱᒥᖓ ᐊᕐᓇᒥ.

“ᐋᓐᓂᕐᓇᖅᑐᐊᓘᓚᐅᕐᓯᒪᔪᖅ. ᐋᓐᓂᕐᓇᓛᖑᓚᐅᕐᓯᒪᔪᖅ ᐃᓅᓯᓕᒫᓐᓂᒃ. ᐳᐃᒍᕈᓐᓇᙱᑕᕋ. ᐳᐃᒍᓚᐅᕐᓯᒪᙱᑕᕋ ᖃᓄᐃᓕᐅᖃᑦᑕᓚᐅᕐᓯᒪᓂᖓ ᐅᕙᓐᓂ,” ᐅᖃᕐᑐᖅ.

ᐃᕐᓂᖅᒧᓪᓕ, ᐃᒃᓯᕋᕐᔪᐊᕌᓘᑉ ᐳᓛᕐᓂᖓ ᑲᓇᑕᒧ ᒪᒥᐊᑦᑕᖅᑐᕐᓗᓂ ᐊᑐᓚᐅᖃᒻᒪᓪᓗᐊᙱᑦᑐᖅ.

“ᐊᓱᐃᓛᑕᐃᓐᓇᖅ,” ᐅᖃᕐᑐᖅ.

ᐅᖃᓚᐅᕐᑐᖅ ᒪᒥᐊᓐᓂᐊᕋᓱᒋᓪᓗᓂᐅᒃ ᐊᒻᒪᓗ ᐃᓱᒪᓪᓗᓂ ᐃᓕᓐᓂᐊᕆᐊᖅᐸᒃᑐᕕᓃᑦ ᐃᓚᐅᑎᑕᐅᑲᑕᒋᐊᖃᕐᓂᖏᓐᓂᒃ ᐅᕝᕙᓘᓐᓃᑦ ᐅᖃᓪᓚᒃᑎᑕᐅᓗᑎᒡᓘᓐᓃᑦ ᐃᒃᓯᕋᕐᔪᐊᕌᓗᒃ ᐃᖃᓗᖕᓃᓕᕐᐸᑦ ᔪᓚᐃ 29-ᒥ.

“ᑕᐃᒪᑐᖅ ᒪᒥᐊᓐᓂᐊᖅᐳᖅ ᐃᓕᖅᑯᓯᖃᕐᓂᕐᒧᑦ ᓈᒻᒪᙱᓕᐅᕈᑎᒋᔭᐅᓚᐅᕐᓯᒪᔪᓂ ᑐᒃᓯᐊᕐᕕᖓᓂ ᐅᕙᓂ ᓲ ᔫᓴᕝ ᐴᓂᐃ ᐃᓕᓐᓂᐊᕐᕕᒃᒥ … ᑕᐃᒪᑐᖅ ᐅᖃᐅᓯᖃᕐᓂᐊᖅᐳᖅ ᒪᒥᓴᖅᐸᓪᓕᐊᓂᕐᒥᒃ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒥᒃ ᐅᑯᐊ ᑳᑐᓕᒃ ᑐᒃᓯᐊᕐᕕᒃᑯᑦ,” ᐅᖃᕐᑐᖅ.

“ᒫᓐᓇᒧᓪᓕ ᐅᕙᒍᑦ ᐃᓕᓐᓂᐊᕆᐊᖅᐸᓚᐅᕐᓯᒪᔪᒍᑦ ᐅᖃᐅᓯᖃᑲᑕᒃᑯᑦᑕ ᒪᒥᓴᕐᓂᕐᒥᒃ ᐊᒻᒪ ᐋᖅᑭᒋᐊᒃᑲᓐᓂᕐᓂᕐᒥᒃ.”

ᒪᒥᐊᕝᕕᐅᓂᐅᓪᓕ ᐅᖓᑖᒍᑦ ᐃᕐᓂᖅ ᑕᑯᔪᒪᔪᖅ ᐃᓄᐃᑦ ᐃᓕᖅᑯᓯᖓ ᓴᖅᑭᔮᖅᑎᑕᐅᓗᓂ ᑖᓐᓇ ᐃᒃᓯᕋᕐᔪᐊᕌᓗᒃ ᑎᑭᑉᐸᑦ, ᐊᒻᒪᓗ ᕿᓚᐅᔾᔭᖅᑐᖃᕐᓗᓂ, ᑲᑕᔾᔭᖅᑐᖃᕐᓗᓂ ᐊᒻᒪᓗ ᐃᓄᐃᑦ ᐊᕐᓄᕌᖏᓐᓂᒃ ᓴᖅᑭᔮᖅᑎᑦᑎᓗᑎᒃ.

“ᑕᑯᔪᒪᔭᒃᑲ ᐋᖅᑭᒃᓱᐃᔨᒋᔭᐅᔪᑦ ᐃᓄᐃᑦ ᖃᓄᐃᑦᑑᓂᖏᓐᓂᒃ ᓴᖅᑭᔮᖅᑎᑕᐅᓗᑎᒃ ᐊᐅᓪᓚᖅᑎᑕᐅᕙᓚᐅᖅᑎᓐᓇᒋᑦ,” ᐅᖃᕐᑐᖅ.

“ᐊᐅᓪᓚᖅᑎᑕᐅᑎᓪᓗᖓ ᐊᓐᓄᕌᖅᑐᕐᓯᒪᓚᐅᕐᓯᒪᔪᖓ ᕿᓯᖕᓂ ᑲᒥᖃᖅᖢᖓ ᐊᒻᒪᓗ ᖁᓕᑦᑕᖃᖅᖢᖓ. ᑐᓂᔭᐅᓚᐅᕐᓯᒪᔪᒍᑦ ᖃᓪᓗᓈᓄᑦ ᐊᓐᓄᕌᓕᐊᕆᔭᐅᕙᒃᑐᓂᒃ ᐊᒻᒪ ᐊᓐᓄᕌᕗᑦ ᐱᔭᐅᑐᐃᓐᓇᖅᖢᑎᒃ. ᕿᓯᖕᓂᒃ ᐊᒻᒪ ᑐᒃᑐᐃᑦ ᐊᒥᖏᓐᓂᒃ ᐊᑐᖅᑐᓂᒃ ᑕᑯᔭᐅᖁᔨᒐᒪ.”

ᐃᕐᓂᕐᓕ ᐅᖃᓚᐅᕐᑐᖅ ᑖᒃᑯᐊ ᐃᓄᖕᓂ ᐊᑐᖅᑕᐅᔪᓐᓃᖅᑎᑦᑎᓚᐅᕐᓯᒪᓂᖏᓐᓂᒃ ᑕᑯᔪᒪᓪᓗᓂ ᐃᓄᖕᓄᑦ ᐅᑎᖅᑎᑦᑎᕕᐅᔪᓂᒃ ᓄᓇᕗᒥᑦ.

“ᑕᑯᔪᒪᒐᒪ ᑳᑐᓕᒃ ᑐᒃᓯᐊᕕᒃ ᑮᓇᐅᔭᖃᖅᑎᑦᑎᓕᕐᓗᑎᒃ ᐃᓄᒃᑎᑐᑦ ᐃᓕᓐᓂᐊᕈᑎᒃᓴᓂᒃ … ᒪᒥᐊᔾᔪᑎᐅᔪᖅ ᑮᓇᐅᔭᑎᒍᑦ ᐅᑎᖅᑎᑦᑎᔾᔪᑎᐅᔭᕆᐊᖃᕐᒥᔪᖅ ᐃᓕᖅᑯᓯᑦ ᐊᓯᐅᑎᑕᐅᓯᒪᓂᖓᓂᒃ, ᐅᖃᐅᓯᕐᒥ ᐊᓯᐅᔨᑎᑕᐅᓯᒪᓂᕐᒧᑦ ᐊᒻᒪᓗ ᓇᓗᓇᐃᕐᓗᑎᒃ ᖃᐅᔨᒪᓚᐅᕐᓂᖏᓐᓂᒃ ᖁᓄᔪᕐᓂᐊᖅᐸᒃᑐᓂᒃ ᑐᒃᓯᐊᕐᕕᓕᕆᔨᐅᔪᑦ,” ᐅᖃᕐᑐᖅ.

“ᐅᓇ ᐳᓛᖅᑕᐅᓂᖅ ᐊᑕᐅᓯᑐᐊᖑᓂᐊᖅᑐᒃᓴᐅᖕᒪᑦ ᑕᐃᒪᓐᓇᓗ ᐊᑐᖅᑎᑦᑐᒪᓪᓗᑎᒍᑦ ᐊᒻᒪ ᐅᖃᐅᑎᓗᒍ ᐃᒃᓯᕋᕐᔪᐊᕌᓗᒃ ᖃᓄᖅ ᐱᔪᒪᔭᑦᑎᓐᓂᒃ.”

ᐃᑲᔪᕈᑎᒃᓴᖅᑕᖃᐅᕐᑐᖅ ᐃᓄᖕᓄ ᐃᓱᒫᓘᑎᖃᕐᓂᕐᒧᑦ ᓈᒻᒪᙱᓕᐅᕈᑎᖃᕐᑐᓂᒃ ᐋᓐᓂᖅᓱᖅᑕᐅᕙᖕᓂᑰᓂᕐᒧᑦ ᐃᓕᓐᓂᐊᕆᐊᕐᕕᐅᕙᓚᐅᕐᓯᒪᔪᓂᒃ.
ᐃᓕᓐᓂᐊᕆᐊᖅᑎᑕᐅᕙᒃᑐᕕᓃᑦ ᐅᖄᓚᕝᕕᒋᔪᓐᓇᖅᑕᖓᑦ: 1-866-925-4419
ᐃᓄᐃᑦ ᐊᒻᒪ ᓄᓇᖃᖅᑳᖅᑐᑦ ᐊᓪᓚᐃ ᖃᓄᐃᑦᑕᐃᓕᓂᕐᒧ: 1-855-242-3310
ᓄᓇᕗᑦ ᑲᒪᑦᓯᐊᖅᑐᑦ ᐅᖄᓚᐅᑎᖓ: 1-800-265-3333
ᓱᕈᓯᕐᓄᑦ ᐃᑲᔪᖅᑕᐅᔪᒪᔪᓄᑦ ᐅᖄᓚᕝᕕᒃ: 1-800-668-6868  ᐅᕗᖓᓘᓐᓃᑦ ᑎᑎᕋᕐᓗᓯ 686868 ᐊᒻᒪ ᑎᑎᕋᕐᓗᑎᒃ “TALK” ᐃᓅᓯᓕᕆᔨᒥᒃ ᐅᖃᖃᑎᖃᕈᓐᓇᕐᓂᐊᕋᕕᑦ
ᓄᓇᕗᒥᑦ ᐱᑦᑕᐊᖅᑕᐅᕙᙱᑦᑐᓄᑦ ᐱᔨᑦᑎᕋᕐᕕᒃ: 1-866-456-5216
ᒪᒥᓴᕐᓂᖅ ᐅᖃᓪᓚᖕᓂᒃᑯᑦ: 1-867-975-5367 ᐅᕗᖓᓘᓐᓃᑦ healing@gov.nu.ca

ᐊᓪᓚᓄᑦ ᐃᓕᓐᓂᐊᕆᐊᕐᕕᕕᓂᕐᓄᑦ ᐃᓅᓯᓕᕆᓂᕐᒧᑦ ᐱᓕᕆᐊᒃᓴᐃᑦ ᐊᑐᐃᓐᓇᐅᔪᑦ ᐅᑯᑎᒎᓇᖅ:
ᐃᓕᓴᖅᓯᕕᒃ: 867-924-6565
ᐳᓛᕐᕕᒃ ᑲᑉᓗ ᐅᐸᒡᕕᒃ: 867-645-2600
ᑐᑭᓯᒋᐊᕐᕕᒃ ᖃᓄᐃᑦᑕᐃᓕᓂᕐᒧᑦ: 867-979-2400
ᐃᖃᓗᒃᑑᑦᑎᐊᓂᒃ ᖃᓄᐃᑦᑕᐃᓕᓂᕐᒧᑦ ᐅᐸᒡᕕᒃ: 867-983-4670

Share This Story

(0) Comments

Join the Conversation

Your email address will not be published. Required fields are marked *

*