ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᓕᕆᐊᖑᔪᖅ ᐃᓕᓯᒪᐃᓐᓇᖅᑎᑕᐅᓂ-
ᐊᖅᐳᖅ: ᒥᓂᔅᑕ

For English version, see ICFI to be retooled and made permanent, says Indigenous Services minister

ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᒋᐊᕈᑎ ᐃᓱᓕᓐᓂᐊᖅᐳᖅ ᐅᐱᕐᙶᙳᒃᑲᓐᓂᕈᓂ ᒐᕙᒪᑐᖃᒃᑯᑦ ᑮᓇᐅᔭᖁᑎᖓᑦ ᓄᖑᒃᑯᓂ — ᑭᓯᐊᓂ ᑐᑭᖃᙱᓚᖅ ᐃᓱᓕᓐᓂᖓᓂ ᒐᕙᒪᑐᒃᑯᑦ ᑮᓇᐅᔭᖃᖅᑎᑕᐅᓂᖓᓂ ‘ᐃᓄᖕᓄᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ, ᐅᖃᖅᐳᖅ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕐᓂᕐᒥ ᒥᓂᔅᑕᖓ ᒫᓐᑎ ᒑᓪ−ᒫᔅᑎ.

ᓯᕗᓂᐊᓂ ᑕᒪᑐᒪᓂ ᐊᕐᕌᒎᔪᒥ, ᑲᑉᐱᐊᓱᖕᓂᖃᓚᐅᖅᐳᖅ ᐱᓕᕆᐊᖑᔪᖅ ᐃᓱᓕᓐᓂᐊᕐᓂᖓᓂ, ᑭᓯᐊᓂ ᐅᖓᕙᕆᐊᖅᑕᐅᓚᐅᖅᐳᖅ ᐊᑕᐅᓯᒃᑲᓐᓂᕐᒥ ᐊᕐᕌᒍᒧᑦ ᑎᑭᐅᑎᓇᓱᖕᓂᖓᓂ ᒫᔾᔨ 31, 2026−ᒧᑦ. ᓄᑖᖑᔪᒥ ᑮᓇᐅᔭᖃᖅᑎᑕᐅᓂᐅᔪᒥ ᐅᖃᐅᓯᐅᓚᐅᖅᐳᖅ ᒐᕙᒪᑐᖃᒃᑯᑦ ᑮᓇᐅᔭᓂ ᐊᑐᖅᑕᐅᔪᒃᓴᓂ ᑐᓂᔭᐅᓚᐅᖅᑐᒥ ᓄᕕᐱᕆ 4−ᒥ.

“ᑕᐃᑲᓂ ᐱᓕᕆᓂᐅᔪᒥ ᐅᖓᕙᕆᐊᖅᑕᐅᓂᖓᓂ ᐃᓕᓯᒪᓂᖓᓂ, ᐱᓕᕆᖃᑎᖃᕐᓂᐊᖅᐳᖑᑦ ᓄᓇᓕᖕᒥ ᑐᑭᓕᐅᕆᒃᑲᓐᓂᕐᓂᕐᒧᑦ ᑐᓂᓯᓂᐅᔪᒥ ᑕᐃᔅᓱᒥᖓ ᐱᓕᕆᐊᖑᔪᒥ,” ᒑᓪ−ᒫᔅᑎ ᐅᖃᓚᐅᖅᐳᖅ ᓄᕕᐱᕆ 7−ᒥ ᐊᐱᖅᓱᖅᑕᐅᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.

ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᒋᐊᕈᑎᖓ ᑐᓂᓯᕗᖅ ᑮᓇᐅᔾᔭᒃᓴᓂᕐᒥ, ᐃᓅᖃᑎᒌᖕᓂᕐᒥ, ᐃᓕᓐᓂᐊᖅᑐᓕᕆᓂᕐᒧᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᑲᔪᖅᓱᐃᓂᐅᔪᒥ ᐃᓄᖕᓄᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ. ᑐᑭᓕᐊᕐᓂᖃᖅᐳᖅ ᔪᐊᑕᓐ ᑐᙵᕕᒋᔭᖓᓂ, ᑐᓂᓯᓚᐅᖅᑐᒥ ᐊᔾᔨᐸᓗᐊᓂ ᑮᓇᐅᔭᑎᒍᑦ ᐃᑲᔪᖅᓱᐃᓂᐅᔪᒥ ᐊᓪᓚᓄᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ.

ᓕᐳᕈᒃᑯᑦ ᒐᕙᒪᖓᑕ ᑮᓇᐅᔭᓂᒃ ᐊᑐᖅᑕᐅᔪᒃᓴᓂᑦ 2025-26 ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ ᐃᓚᖃᖅᐳᖅ $122 ᒥᓕᐊᓐᓂ ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᒋᐊᕈᑎᖓᓄᑦ ᐊᒻᒪ ᐊᖏᓂᖅᓴᐅᒐᓚᒃᑐᒥ $1 ᐱᓕᐊᓐᓂ ᔪᐊᑕᓐ ᑐᙵᕕᒋᔭᖓᓄᑦ. ᑭᓯᐊᓂ ᑮᓇᐅᔭᖃᖅᑎᑕᐅᓂᐅᔪᒥ ᓇᓕᐊᖕᓄᑦ ᐱᓕᕆᐊᖑᔪᒥ ᑎᑎᕋᖅᓯᒪᓂᖃᓚᐅᙱᐳᑦ ᐅᖓᑖᓂ ᒫᓐᓇᐅᔪᒥ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓄᑦ ᐃᓱᓕᑦᑐᒥ ᒫᔾᔨ 31, 2026−ᒥ.

“[ᐱᒋᐊᕈᑕᐅᔪᖅ] ᑭᐅᓚᐅᖅᐳᖅ ᑐᕌᒐᒃᓴᐅᔪᒥ, ᑭᐅᓚᐅᖅᐳᖅ ᐱᔭᕆᐊᖃᕐᓂᐅᔪᒥ,” ᒑᓪ−ᒫᔅᑎ ᐅᖃᓚᐅᖅᐳᖅ.

ᐅᖃᓚᐅᖅᐳᖅ ᑭᓱᓂᒃ ᓄᑖᖑᔪᖅ ᐱᓕᕆᐊᖑᔪᖅ ᑕᐅᑦᑐᖃᕐᓂᐊᕐᓂᖓᓂ ᑐᑭᓕᐊᖑᔭᕆᐊᖃᖅᐳᖅ ᓯᕗᓂᐊᓂ ᑮᓇᐅᔭᓂ ᑮᓇᐅᔭᓄᑦ ᐊᑐᖅᑕᐅᔪᒃᓴᓕᐊᖑᓚᐅᙱᓐᓂᖏᓐᓂ.

“ᐃᓱᒫᓗᕐᔪᐊᖅᐳᖓ ᐱᔭᕆᐊᖃᕐᓂᐅᔪᒥ ᐆᒧᖓ ᐱᓕᕆᐊᖑᔪᒥ−ᐋᖅᑭᐅᒪᑎᑦᑎᓂᖓᓐᓂ, ᓴᐳᔾᔭᐅᓯᒪᓂᖓᓂ, ᓇᓗᓇᐃᖅᓯᓂᕐᒥ ᐊᑯᓂᐅᔪᒃᑯᑦ ᐋᖅᑭᒍᑎᒃᓴᖃᕐᓂᖓᓂ,” ᐅᖃᓚᐅᖅᐳᖅ.

ᒑᓪ−ᒫᔅᑎ ᑐᓂᓯᔪᒪᓚᐅᙱᓚᖅ ᐊᑯᓂᐅᓂᐊᕐᓂᖓᓂ ᐱᕙᓪᓕᐊᑎᑕᐅᓂᖓᓂ ᓄᑖᖑᔪᒥ ᐱᓕᕆᐊᖑᔪᒥ ᐃᓚᖏᖅᓯᓂᕐᒥ ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᒋᐊᕈᑎᖓᓄᑦ.

“ᐃᓇᖏᖅᓯᔾᔮᙱᑦᑐᖓ ᐱᓕᕆᖃᑎᒋᔭᓐᓂᑦ” ᐃᓚᖃᖅᑐᒥ ᐃᓄᖕᓄᑦ ᑲᑐᔾᔨᖃᑎᒌᖑᔪᓄᑦ ᐊᒻᒪ ᓯᕗᓕᐅᖅᑎᐅᔪᓄᑦ, ᐅᖃᓚᐅᖅᐳᖅ. “ᐃᓚᐅᖃᑕᐅᖁᕙᒃᑲ ᐃᓱᒪᓕᐅᕆᓂᕐᒥ [ᐱᓕᕆᐊᖑᔪᒥ] ᑕᐅᑦᑐᖃᕐᓂᐊᕐᓂᖓᓂ.”

ᒑᓪ−ᒫᔅᑎᐅᑉ ᐅᖃᐅᓯᒃᓴᓕᐊᖏᑦ ᓈᒻᒪᒋᓚᐅᙱᑉᐸᖏᑦ ᓄᓇᕗᒻᒥ NDP ᑲᓇᑕᐅᑉ ᒪᓕᒐᓕᐅᖅᑎᖏᓐᓂ ᐃᓚᒋᔭᐅᔪᒥ ᓗᐊᕆ ᐃᓪᓚᐅᑦᒥ.

“ᓕᐳᕈᒃᑯᑦ ᐅᕙᑦᑎᓐᓂ ᐊᐱᕆᓯᒪᕗᑦ ᐅᒃᐱᕆᔭᐅᓂᖏᓐᓂ ᖄᖏᖅᓯᒪᔪᓂ ᐊᕐᕌᒍᓄᑦ 10−ᓄᑦ,” ᐃᓪᓚᐅᑦ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

“ᑕᑯᑎᑦᑎᓯᒪᕗᑦ ᐊᕐᕌᒍᑕᒫᒥ ᖃᓄᖅ ᒥᑭᓐᓂᖅᓴᒻᒪᕆᖕᒥ ᐊᖏᖅᓯᒪᓂᖏᓐᓂ ᑭᐅᓂᕐᒥ ᐱᒻᒪᕆᐅᔪᓂ ᐃᓅᖃᑎᒌᖑᔪᓂ ᐊᑲᐅᙱᓕᐅᕈᑕᐅᔪᓂ ᓄᓇᕗᒻᒥ.”

ᐅᖃᓚᐅᖅᐳᖅ ᒐᕙᒪᒃᑯᑦ ᐱᕙᓪᓕᐊᑎᑦᑎᓂᐊᕈᑎᒃ ᓄᑖᖑᔪᓂ ᐱᓕᕆᐊᖑᔪᓂ ᐃᓄᖕᓄᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ, “ᖃᓄᐃᒻᒪᑦ ᐃᓚᓕᐅᔾᔭᐅᙱᓚᖅ ᑮᓇᐅᔭᓄᑦ ᐊᑐᖅᑕᐅᔪᒃᓴᓂ?”

ᐃᓪᓚᐅᑦ ᐅᒃᐱᕈᓱᓚᐅᙱᓚᖅ ᒑᓪ−ᒫᔅᑎᐅᑉ ᐅᓂᒃᑳᕆᓂᖓᓂ 0−ᖑᔪᓂ ᒐᕙᒪᒃᑯᑦ ᓇᓚᐅᑦᑖᕆᔭᖏᓐᓂ ᓯᕗᓂᒃᓴᒧᑦ ᐊᑐᖅᑕᐅᔪᒃᓴᓂ ᐃᓄᐃᑦ ᓱᕈᓯᖅ ᓯᕗᓪᓕᐅᓗᓂ ᐱᒋᐊᕈᑎᖓᓄᑦ.

ᐃᓪᓚᐅᑦ ᐱᑎᑦᑎᓚᐅᖅᐳᖅ ᐅᒃᐱᕈᓱᙱᓐᓂᐅᔪᒥ ᒑᓪ−ᒫᔅᑎᐅᑉ ᐅᖃᐅᓯᒃᓴᓕᐊᖓᓐᓂ ᓄᑖᖑᔪᓂ ᐱᓕᕆᐊᖑᔪᓂ ᐃᓄᖕᓄᑦ ᓱᕈᓯᕐᓄᑦ ᐊᒻᒪ ᒪᒃᑯᒃᑐᓄᑦ ᓴᖅᑭᑎᑕᐅᓂᐊᕐᓂᖓᓂ.

“ᐃᓱᒪᕗᖓ ᐃᔨᖅᓯᒪᓂᐅᓂᖓᓂ ᓱᕋᒃᓯᒪᒃᑲᓐᓂᖅᑐᓂ ᐱᓕᕆᓂᐊᕐᓂᕋᖅᑕᐅᔪᓂ,” ᐅᖃᓚᐅᖅᐳᖅ.

“ᐅᕙᑦᑎᓐᓂ ᐊᐱᕆᕗᑦ ᐅᒃᐱᕈᓱᖕᓂᕐᒥ ᖃᓄᐃᒻᒪᑦ ᑕᑯᒃᓴᐅᓂᖃᙱᓚᑦ ᑭᓇᒧᑦ ᐅᖃᖃᑎᖃᕐᓂᖏᓐᓂ? ᑭᒃᑰᕙᑦ ᐅᑯᐊ ᐃᓄᖕᓄᑦ ᐱᓕᕆᖃᑎᒋᔭᐅᔪᑦ ᐱᓕᕆᖃᑎᒋᔭᐅᔪᓂ? ᑭᓇᑐᐃᓐᓇᖅ ᖃᐅᔨᒪᔪᖃᖅᑑᔮᙱᓚᖅ.”

ᐃᓪᓚᐅᑦ ᐅᖃᓚᐅᖅᐳᖅ, “ᐃᓄᐃᑦ ᓱᕈᓰᑦ ᑳᕐᔪᐊᓗᐊᒧᑦ ᑎᒡᓕᒐᖃᑦᑕᖅᐳᑦ ᓂᕿᓂᑦ ᓂᕿᑖᕐᕕᓂ ᓂᐅᕕᕐᕕᓂᑦ.”

ᒐᕙᒪᒃᑯᑦ ᐊᔾᔨᒌᙱᑦᑐᓂ ᐃᓱᒪᒋᔭᖃᖅᐳᑦ, ᐅᖃᓚᐅᖅᐳᖅ.

“ᑐᑭᓯᐅᒪᒐᓗᐊᖅᑎᓪᓗᒋᑦ, ᓇᒡᓕᒍᓱᖕᓂᖃᓗᐊᙱᓚᑦ ᕿᓚᒻᒥᐅᓂᖅᓴᓂ ᐱᓕᕆᓂᕐᒧᑦ.”