ᐃᓪᓚᐅᑦ ᐋᑐᕚᒥ ᐊᑎᓕᐅᖁᔨᔪᖅ ᓄᓇᕗᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂ

For the English version of this story, please see Idlout calls on Ottawa to sign Nunavut Land Use Plan.

ᓄᓇᕗᒥᑦ ᒪᓕᒐᓕᐅᕐᑎ ᓘᕆ ᐃᓪᓚᐅᑦ ᒐᕙᒪᑐᖃᒃᑯᓐᓂ ᐊᖏᖁᔨᔪᖅ ᓄᓇᕗᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎᓂᒃ, ᐅᖃᖅᖢᓂ ᑭᖑᕙᖅᑎᑕᐅᓪᓗᐊᙱᓐᓂᖏᓐᓂ ᐊᕐᕌᒎᖕᓂ ᒪᕐᕉᖕᓂ.

“ᓇᖕᒥᓂᕐᓕ ᐃᓱᒪᔪᖓ ᐊᑯᓂᓗᐊᖅ ᐅᔭᕋᒃᓯᐅᕐᕖᑦ ᓂᐱᖃᙱᑎᑕᐅᓂᖏᓐᓂᒃ ᐊᒻᒪᓗ ᐊᐱᕆᑲᑕᒃᖢᑎᒃ ᑕᒪᑐᒧᖓ ᐊᒻᒪᓗ ᐊᐱᕆᑲᑕᒃᖢᑎᒃ ᐊᖏᕐᑕᐅᓂᐊᕐᓂᖓ ᑭᖑᕙᕆᐊᖅᑕᐅᖁᓪᓗᓂᔾᔪᒃ,” ᐃᓪᓚᐅᑦ ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ ᐋᒐᓯ 13-ᒥ ᐊᐱᕐᓱᖅᑕᐅᑎᓪᓗᒍ.

ᑖᓐᓇ ᐸᕐᓇᐅᑎ ᐊᑎᓕᐅᕐᑕᐅᓚᐅᙱᓐᓂᖓᓂ ᐊᒻᒪ ᐊᖏᕐᑕᐅᓚᐅᙱᓐᓂᖓᓂᓗ, ᐅᖃᕐᑐᖅ, ᐃᓄᐃᑦ ᑮᓇᐅᔭᓕᐅᕋᓱᖕᓂᖏᑦ ᐊᒻᒪ ᐊᕙᑎᖏᑦ ᓇᓗᓈᕿᓂᐊᕐᑐᑦ. ᐸᕐᓇᐅᑎᑦ ᐱᐊᓂᒃᑕᐅᒃᐸᑕ ᐃᓄᐃᑦ “ᐋᖅᑭᒃᓱᐃᔪᓐᓇᖅᑐᑦ ᓯᕗᓪᓕᐅᑎᑕᐅᖁᔭᖏᓐᓂᒃ ᑮᓇᐅᔭᓕᐅᕋᓱᖕᓂᒃᑯᑦ.”

ᓄᓇᕗᒥ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐊᕗᖓᑲᓪᓚᕈᓗᒃ ᐱᓕᕆᓐᓇᕐᒪᑦ, ᐊᖏᕐᑕᐅᒍᓂᓗ ᓴᐳᔾᔨᓯᒪᔾᔪᑎᐅᓇᔭᕐᖢᓂ ᐆᒪᔪᐃ ᐃᓂᒋᕙᒃᑕᖏᓐᓂ ᒪᑯᐊ ᑐᒃᑐᐃᑦ ᐊᒻᒪ ᓇᓄᐃᑦ, ᓴᓂᐊᒍᓪᓗ ᓄᓇᒥ ᐋᖅᑭᒃᓯᓯᒪᓗᑎᒃ ᐱᕙᓪᓕᐊᔾᔪᑎᐅᓂᐊᕐᑐᒥᒃ.

ᐅᔭᕋᒃᓯᐅᕐᕕᖕᓄᑦ ᐊᖓᔪᖅᑳᕆᔭᐅᔪᑦ ᑕᒪᑐᒥᖓ ᐸᕐᓇᐅᑎᒥ ᓈᒻᒪᒃᓴᖅᓯᒪᙱᑦᑐᑦ, ᐅᖃᖅᖢᑎ ᐊᖏᒡᓕᒋᐊᖅᑕᐅᓇᓱᖕᓂᖓ ᐃᓱᖃᕋᔭᕐᓂᖓᓂ ᒫᓐᓇ ᐅᔭᕋᒃᓯᐅᕐᕕᒃᒦᑦᑐᓄᑦ ᐱᖁᑎᓄᑦ ᐊᒻᒪᓗ ᓯᕗᓂᒃᓴᒥ ᐊᖏᒡᓕᒋᐊᕋᔭᕋᓗᐊᕆᐊᒃᓴᖏᓐᓄᑦ ᐊᒻᒪ ᐅᔭᕋᒃᓯᐅᕐᕕᖕᓂ ᐱᓕᕆᐊᓄᑦ.

ᐊᖏᕐᑕᐅᓂᐊᕐᓗᓂ ᐸᕐᓇᐅᑎ ᐊᑎᓕᐅᖅᑕᐅᔭᕆᐊᖃᕐᑐᖅ ᓄᓇᕗᑦ ᑐᙵᕕᒃᑯᓐᓄᑦ, ᓄᓇᕗᒥᑦ ᒐᕙᒪᒃᑯᓐᓄᑦ ᐊᒻᒪᓗ ᒐᕙᒪᑐᖃᒃᑯᓐᓄᑦ. ᑭᓯᐊᓂᓕ ᒫᓐᓇᒧᑦ ᐊᑎᓕᐅᕐᑐᖃᓚᐅᙱᑦᑐᖅ.

ᐃᓪᓚᐅᑦ ᐅᖃᓚᐅᕐᑐ ᐅᔭᕋᒃᓯᐅᕐᕖᑦ ᐃᓱᒪᒋᔭᖃᕐᓂᕐᓴᐅᓂᖏᓐᓂᒃ ᐅᔭᕋᒃᓯᐅᕈᓐᓇᕐᓂᖏᓐᓂᒃ, ᐅᑯᓂᖓᐅᙱᑦᑐᖅ ᐃᓄᐃᑦ ᐊᖑᓇᓱᒍᓐᓇᕐᓂᖏᓐᓂᒃ.

ᑎᑎᖃᓂ ᐊᐅᓪᓚᖅᑎᓐᓂᑯᖏᓐᓂᒃ ᐋᒐᓯ 11-ᒥ, ᒐᕙᒪᑐᖃᒃᑯᓐᓄᑦ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᒥ ᐅᓖᐱᑲ ᓵᑐᕌᓐᒧᑦ ᐊᑎᓕᐅᖁᔨᓚᐅᕐᓯᒪᔪᖅ ᐸᕐᓇᐅᑎᓂᒃ, ᑖᒃᑯᐊᓗ ᒐᕙᒪᑐᖃᒃᑯᓐᓃᖢᓂ ᑕᐃᒪᙵᑦ ᔫᓂ 2023-ᖑᓚᐅᕐᓯᒪᔪᒥ.

ᑎᑎᕋᖅᑕᖏᑦᑎᒍᑦ ᑎᑎᕋᖅᖢᓂ ᑕᒪᑐᒥᖓ ᐅᔾᔨᕈᓱᓕᖅᑎᑦᑎᓂᐊᕈᒪᓪᓗᓂ.

“ᓵᑐᕌᓐ ᐱᓕᕆᖃᑎᖃᕆᐊᖃᕐᑐᖅ ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᓄᓇᕗᒥᑦ ᒐᕙᒪᒃᑯᓐᓂ ᒫᓐᓇᑲᐅᑎᒋ” ᑕᒪᓐᓇ ᐊᖏᕐᑕᐅᓂᐊᕐᒪᑦ ᐸᕐᓇᐅᑎ, ᐅᖃᕐᑐᖅ ᐃᓪᓚᐅᑦ, ᐅᖃᒃᑲᓐᓂᖅᖢᓂ ᓄᓇᕗᒥᑦ ᓂᕈᐊᕐᓇᐅᓛᕐᓂᕋᖅᖢᓂᐅᒃ ᐅᒃᑑᐱᕆ 27-ᒥ.

“ᐱᐊᓂᒃᓵᓕᓂᕐᓴᐅᒍᓂᐅᒃ ᐱᐅᓂᕐᓴᐅᓂᐊᕐᑐᖅ,” ᐃᓪᓚᐅᑦ ᐅᖃᕐᑐᖅ.

ᑭᖑᕙᕆᐊᖅᑕᐅᓯᒪᓂᖓ ᐸᕐᓇᐅᑎᑦ ᐊᖏᕐᑕᐅᓇᖕᓂᖓ ᓱᖁᓯᕈᑎᐅᓗᐊᙱᑦᑐᖅ, ᑖᒃᑯᓄᖓᓕ ᐅᔭᕋᒃᓯᐅᕐᕕᖕᓄᑦ ᐋᒃᑲᐅᒐᓗᐊᖅ, ᐅᖃᒃᑲᓐᓂᖅᑐᖅ.

ᑖᓐᓇ ᐸᕐᓇᐅᑎ ᐊᑎᓕᐅᖅᑕᐅᓯᒪᙱᑎᓪᓗᒍ ᑕᒪᓐᓇ ᓇᓗᓈᕿᔾᔪᑎᐅᔪᖅ ᐅᓗᕆᐊᓇᕋᔭᖅᑐᓄᑦ ᓯᕗᓂᒃᓴᒥ ᑮᓇᐅᔭᓕᐅᕋᓱᖕᓂᕐᒧᑦ, ᐅᖃᕐᑐᖅ ᑭᐅᕋᓐ ᑲᔅᑕᓗ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᓄᓇᑦᓯᐊᕐᒥ ᐊᒻᒪ ᓄᓇᕗᒥᑦ ᐅᔭᕋᒃᓯᐅᕐᕕᓕᕆᔨᓄᑦ.

“ᐃᓱᒪᓕᐊᕆᔭᐅᓯᒪᔪᖅ ᓄᓇᕗᒥᑦ ᓄᓇᒥ ᐊᑐᕐᓂᕐᒧᑦ ᐸᕐᓇᐅᑎ ᐃᓱᒪᓕᐅᕆᔾᔪᑎᐅᓯᒪᔪᖅ ᑕᒪᐃᓐᓄᑦ ᐱᖓᓱᓄᑦ ᐊᑎᓕᐅᖅᑎᒋᔭᐅᔪᓄᑦ,” ᐅᖃᕐᑐᖅ, ᐅᖃᒃᑲᓐᓂᖅᖢᓂ ᐊᑐᓂ ᐃᒻᒥᖕᓄᑦ ᖃᐅᔨᓴᕐᓂᖃᕆᐊᖃᕐᓂᖏᓐᓂᒃ.

“ᐃᓱᒪᔪᖓ ᐅᓇ ᒥᓂᔅᑕ ᐅᑭᐅᕐᑕᖅᑐᓕᕆᓂᕐᒧᑦ ᐃᓱᒪᒃᓴᖅᓯᐅᕈᑎᖃᕐᓂᐊᕐᓂᖓᓂᒃ ᖃᓄᐃᓕᐅᕈᑎᒃᓴᓂᑦ ᐊᒻᒪ ᐃᓱᒪᒃᓴᖅᓯᐅᖁᔨᓗᓂ ᐊᓯᖏᓐᓂᒃ ᐊᑎᓕᐅᕈᓐᓇᖅᑐᓂᒃ.”

ᑲᔅᑕᓗ ᐅᖃᓚᐅᕐᑐᖅ, “ᐅᔭᕋᒃᓴᖅᓯᐅᕐᕕᓕᕆᓂᖅ ᐃᓱᒫᓘᑎᖃᒻᒪᕆᖕᒪᑕ ᐅᓇ ᐃᓱᒪᓕᐊᕆᔭᐅᓯᒪᔪᖅ ᐱᔪᓐᓇᐅᑎᒋᔭᐅᔪᓄᑦ ᓈᒻᒪᙱᓂᖃᓗᐊᕐᓂᖓᓂᒃ,” ᐅᖃᖅᖢᓂ ᐱᓗᐊᕐᓂᕋᖅᖢᓂᒋ ᓄᓇᒥ ᐊᑐᕈᓐᓇᕐᓂᖏᓐᓂᒃ, ᐊᒻᒪᓗ “ᓄᖃᖅᑎᑦᑎᑐᐃᓐᓇᕆᐊᖃᖅᖢᑎᒃ” ᒫᓐᓇ ᐱᓕᕆᐊᖑᔪᓂ ᐱᐊᓂᒃᑕᐅᙱᒃᑲᓗᐊᕐᓗᑎᒃ.

ᐅᖃᖅᖢᓂ ᓄᓇᕗᑦ “ᓄᓇᖓ ᖃᐅᔨᓴᖅᑕᐅᓯᒪᙱᓗᐊᕐᒪ” ᐅᔭᕋᒃᓯᐅᕐᕕᓕᕆᓂᒃᑯᑦ, ᐊᒻᒪᓗ ᓴᐳᔾᔭᐅᓯᒪᔪᑦ ᓄᓇᐃᑦ ᑐᑭᓯᓯᒫᓂᙱᓗᐊᕐᓂᕐᒧᑦ ᓄᓇᕗᒥᑦ ᑮᓇᐅᔭᓕᐅᕈᑎᐅᔪᓐᓇᖅᑐᓂ ᑭᐱᓯᓯᒪᔾᔪᑎᐅᑐᐃᓐᓇᕆᐊᖃᕐᒥ ᓯᕗᓂᒃᓴᒥ ᐱᕙᓪᓕᐊᔾᔪᑎᒃᓴᓂᒃ.

ᐅᔭᕋᒃᓴᕐᓯᐅᕐᕕᐅᔪᑦ ᐊᑎᓕᐅᕈᓐᓇᖅᑐᓂᒃ ᐃᓱᒪᒃᓴᖅᓯᐅᒃᑲᓐᓂᖁᔨᔪᑦ ᑕᒪᑐᒥᖓ ᐊᒻᒪ ᒥᒃᖠᕚᓪᓕᖅᑎᑦᑎᓗᑎᒃ ᓴᐳᔾᔭᐅᓯᒪᔪᓂᒃ, ᑲᔅᑕᓗ ᐅᖃᕐᑐᖅ.

ᐅᑯᓄᖓᓕ ᓄᓇᕗᒥᑦ ᐸᕐᓇᐅᔨᒃᑯᑦ ᑎᑎᖃᖁᑎᖏ ᑐᓂᔭᐅᓯᒪᔪᓂᒃ ᓄᓇᑦᓯᐊᕐᒥ ᐱᕙᓪᓕᐊᔪᓄᑦ ᐅᕙᙵᑦ ᓯᐅᕋᓐ ᐃᕼᐊᓗᐊᒃ, ᓄᓇᒥ ᐊᑐᕈᓐᓇᕐᓂᕐᒧᑦ ᐸᕐᓇᐅᑎᑦ ᓄᖅᑲᖅᑎᑦᑎᓯᒪᙱᓐᓂᖏᓐᓂᒃ ᐋᖅᑭᒋᐊᖅᑕᐅᒃᑲᓐᓂᕈᓐᓇᕐᓂᖏᑦ ᖃᑯᒍᒃᑲᓐᓂᖅ ᐱᕙᓪᓕᐊᕝᕕᐅᔪᓐᓇᖁᓪᓗᒋᑦ.

ᓇᓕᐊᒃ ᓄᓇᕗᑦ ᑐᙵᕕᒃᑯᑦ ᐅᕝᕙᓘᓐᓃᑦ ᐅᑭᐅᕐᑕᖅᑐᕐᒥᐅᑕᓕᕆᔩᑦ ᑕᒪᑐᒧᖓ ᑭᐅᓚᐅᙱᑦᑐᑦ.