ᐃᓪᓚᐅᑦ ᐃᓱᒪᔪᖅ ᐅᖃᖃᑎᒌᖕᓂᖅ ᓄᓇᖃᖅᑳᖅᑐᑦ ᑐᖁᖃᑦᑕᕐᓯᒪᓂᖏᓐᓂᒃ ᐸᓖᓯᓄ ᐱᓕᕆᐊᖑᑎᓪᓗᒋᑦ ᖃᓄᐃᓕᐅᕈᑎᐅᓕᖁᓪᓗᓂᐅᒃ

ᐃᓅᔪᓐᓃᖅᑐᕕᓃᑦ 6 ᓄᓇᖃᖅᑳᖅᑐᑦ ᐊᓪᓚᐃᑦ ᐅᓪᓗᕐᓂ 11 ᐃᓗᐊᓂ — ᑕᒪᕐᒥᒡᓗ ᐸᓖᓯᓄᑦ ᐱᓕᕆᐊᖑᑎᓪᓗᒋᑦ — ᑐᐊᕕᕐᓇᖅᑐᒥ ᐅᖃᖃᑎᒌᒍᑎᐅᓕᓚᐅᕐᑐᖅ ᒪᓕᒐᓕᕆᕝᕕᒡᔪᐊᕐᒥ ᓯᑎᐱᕆ 16-ᒥ.

ᐅᖃᖃᑎᒌᖕᓂᖅ, ᐃᑲᕐᕋᓂ ᑕᓪᓕᒪᓂ ᐅᖃᖃᑎᒌᖕᓂᐅᓪᓗᓂ, ᐱᒋᐊᓕᓚᐅᕐᑐᖅ ᓄᓇᕗᑦ ᐊᓐᑏᐲ ᒪᓕᒐᓕᕆᔨᕐᔪᐊᖅ ᓘᕆ ᐃᓪᓚᐅᑦ ᐅᖃᖃᑎᖃᖁᔨᑎᓪᓗᒍ ᑎᑎᕋᖅᖢᓂ ᐅᖃᖅᑎᒧᑦ ᒍᕆᒡ ᕘᒐᔅ.

ᐃᓪᓚᐅᑦ ᐅᖃᕐᓯᒪᓚᐅᕐᑐᖅ “ᓱᖅᑯᐃᓇᖅᖢᓂ ᐃᓱᒪᒋᔭᐅᔭᕆᐊᓕᒃ ᒪᓕᒐᓕᕆᕝᕕᒡᔪᐊᕐᒥ ᐅᓇ ᐃᓱᒫᓗᖕᓇᖅᑐᖅ ᐊᑐᖅᑕᐅᑲᑕᒃᑐᖅ ᒪᓕᒐᓕᕆᔨᕐᔪᐊᓄᑦ ᐅᖃᐅᓯᐅᔭᕆᐊᓕᒃ ᓄᓇᖃᖅᑳᖅᑐᑦ ᐃᓅᓯᖏ ᖃᓄᐃᖁᓇᒋᑦ, ᐅᓪᓗᒥ.”

ᑐᓴᒐᒃᓴᑎᒍᑦ ᐅᖃᐅᓯᐅᙱᓗᐊᕐᓂᖓ ᐅᓇ “ᐊᑐᖅᑕᐅᔭᐃᓐᓇᖅᑐᖅ ᐋᓐᓂᕐᓯᕆᓂᐊᓗᒃ ᐊᒻᒪ ᑐᖁᔪᖃᖃᑦᑕᕐᓂᖓ” ᓄᓇᖃᖅᑳᖅᑐᓂ ᓲᕐᓗ ᓴᖅᑭᑎᑦᑎᓯᒪᔪᖅ ᑕᒪᓐᓇ “ᐃᓕᖅᑯᓯᑐᐃᓐᓇᐅᖕᒪᑦ ᐊᒻᒪ ᓂᕆᐅᒋᔭᐅᑐᐃᓐᓇᖅᖢᓂ” ᑭᒃᑯᑐᐃᓐᓇᕐᓄᑦ, ᐅᖃᕐᑐᖅ.

ᑭᖑᓂᐊᒍᑦ ᐊᐱᕐᓱᖅᑕᐅᑎᓪᓗᒍ, ᐃᓪᓚᐅᑦ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ “ᑲᒪᓂᕋᖅᖢᓂ” ᐱᓕᕆᐊᖑᖁᔭᖓ ᐊᖏᖅᑕᐅᓚᐅᕐᓂᖓᓂᒃ ᐊᒻᒪᓗ ᑕᒪᑐᒧᖓ ᐱᓕᕆᐊᖃᓪᓚᕆᒡᓗᑎ. ᒪᓕᒐᓕᕆᔨᕐᔪᐊᑦ ᑐᒃᓯᕋᕈᑎᖏ ᑐᐊᕕᕐᓇᖅᑐᒃᑯᑦ ᐊᖏᖅᑕᐅᙱᓐᓇᖅᐸᙱᒻᒪᑕ.

“ᐅᓂᒃᑳᑕᖃᖃᑦᑕᕐᒪ, ᐃᓱᒪᓕᐅᕆᓂᕐᑕᖃᖅᐸᒃᖢᓂᓗ ᐊᒻᒪᓗ ᑖᒃᑯᐊ ᐅᓂᒃᑳᓕᐊᑦ ᐊᑐᓕᖅᑎᑕᐅᓯᒪᙱᑦᑐᑦ,” ᐅᖃᕐᑐᖅ.

ᐃᓪᓚᐅᑦ ᐅᖃᓚᐅᕐᑐᖅ ᒐᕙᒪᒃᑯᑦ ᐃᓱᒪᓕᐊᕆᔭᐅᔪᓂᒃ ᐱᓕᕆᐊᖃᕆᐊᖃᕐᓂᕋᖅᖢᓂᒋᑦ, ᒪᑯᑎᑐᓇᖅ ᖃᓄᐃᓕᐅᖁᔨᔾᔪᑎᒋᔭᐅᔪᓂ ᐅᓂᒃᑳᓃᑐᓂᒃ ᓱᓕᓂᕐᒧᑦ ᐊᒻᒪ ᐋᖅᑭᒋᐊᕐᓂᕐᒧᑦ ᑲᒥᓴᓐᑯᓐᓂ, ᓴᐳᔾᔨᓯᒪᓂᕐᒥ ᓄᓇᖃᖅᑳᖅᑐᓂ.

ᐋᒐᓯ 29 ᐊᒻᒪ ᓯᑎᐱᕆ 8 ᐊᑯᓐᓂᖓᓂ, 6-ᓂ ᐃᓅᔪᓐᓃᖅᑐᖃᓚᐅᕐᑐᖅ ᑕᓪᓕᒪᓂ ᐳᕌᕕᓐᓯᓂ ᐸᓖᓯᓄᑦ ᐱᓕᕆᐊᖑᑎᓪᓗᒋᑦ. ᐅᑯᐊᖑᓚᐅᕐᑐᖅ:

• ᔮᒃ ᐱᓰ ᑭᓕᐅᕗᐊᑐ ᓄᓇᖃᖅᑳᖅᑐᓂ ᐊᓪᓚᓂ ᓴᔅᑳᑦᓱᐊᓐᒥ ᐃᓅᔪᓐᓃᓚᐅᕐᑐᖅ ᐋᒐᓯ 29-ᒥ ᑐᓗᖅᑕᐅᓚᐅᕐᑎᓪᓗᒍ ᐸᓖᓯᒃᑯᑦ ᓄᓇᓯᐅᑎᖓᓄᑦ;
• ᕼᐋᔅ ᓚᐃᑦᓂᖕ, 15, ᓵᒻᓴᓐ ᑯᕇ ᓇᐃᓴᓐ ᐋᐴᑕᒥ, ᖁᑭᖅᑕᐅᓪᓗᓂ ᐸᓖᓯᓄ ᐋᒐᓯ 30-ᒥ ᐃᑲᔪᖅᑕᐅᔪᒪᓚᐅᖅᖢᓂ;
• ᑖᒥ ᐲᑦᒪᓐ ᕈᓲ ᕆᕗ ᐊᓂᓯᓇᐱ ᓄᓇᖃᖅᑳᖅᑐᑦ ᐊᓪᓚᓂ ᒫᓂᑑᐸᒥ ᐃᓅᔪᓐᓃᓚᐅᕐᑐᖅ ᑐᓗᖅᑕᐅᓚᐅᖅᖢᓂ ᕗᐃᓂᐱᒡᒥ ᐸᓖᓯᑦ ᓄᓇᓯᐅᑎᖓᓄᑦ ᓯᑎᐱᕆ 2-ᒥ;
• ᔭᐃᓴᓐ ᕗᐃᐊᔅᑦ, ᖁᑭᖅᑕᐅᔪᖅ ᕗᐃᓐᓱ, ᐋᓐᑎᐅᕆᐅᒥ ᐸᓖᓯᓄᑦ ᓯᑎᐱᕆ 6-ᒥ;
• ᓯᑏᕙᓐ ᑎᑕᒻ, ᖁᑭᖅᑕᐅᓪᓗᓂ ᐸᓖᓯᓄᑦ ᐃᓯᐳᒡᑐᒡ ᓄᓇᖃᖅᑳᖅᑐᑦ ᐊᓪᓚᓂ ᓂᐅ ᐳᕋᓐᔅᓯᕗᐃᒃᒥ ᓯᑎᐱᕆ 8-ᒥ;
• ᑖᓂᐅᓪ ᓇᐃᕝ, ᖁᑭᖅᑕᐅᓪᓗᓂ ᐸᓖᓯᓄᑦ ᐊᑕᑲᑰᑉ ᑯᕇ ᓇᐃᓴᓐ ᓵᔅᑳᑦᓱᐊᓐᒥ ᐸᓖᓯ ᐅᖄᓚᕝᕕᐅᓚᐅᖅᑎᓪᓗᒋᑦ ᓯᑎᐱᕆ 8-ᒥ.

ᐅᖃᖃᑎᒌᒃᑎᓪᓗᒋᑦ, ᓕᐳᕈ ᒪᓕᒐᓕᕆᔨᕐᔪᐊᖅ ᔭᓂᕗ ᐅ’ᑳᓄᓪ ᐅᖃᓚᐅᕐᑐᖅ ᒐᕙᒪᒃᑯᑦ “ᐱᔭᒃᓴᖃᕐᓂᖏᓐᓂ” ᐱᓕᕆᖃᑎᖃᕐᓂᕐᒥᒃ ᓄᓇᖃᖅᑳᖅᑐᓂᒃ, ᐳᕌᕕᓐᓯᓂ ᐊᒻᒪ ᑎᐅᕆᑑᕆᓂ ᐃᑲᔪᕐᓗᑎᒃ ᓄᓇᖃᖅᑳᖅᑐᓂ ᐸᓖᓯᓕᕆᓂᕐᒧᑦ ᐱᔨᑦᑎᕋᖅᑎᓂ ᐃᑲᔫᑎᖃᖅᑎᑦᑎᓂᒃᑯᑦ.

ᐸᓛᒃ ᑯᐸᑯᐊ ᒪᓕᒐᓕᕆᔨᕐᔪᐊᖅ ᓯᐊᕕᒃ ᐸᕉᐱ, ᑭᒡᒐᖅᑐᐃᔪᖅ ᓄᓇᕕᒃᒥ ᐊᒻᒪ ᑯᐸᐃᑦ ᐅᐊᖕᓇᖓᓃᑦᑐᓂᒃ, ᐊᐱᕆᓚᐅᕐᑐᖅ ᖃᓄᐃᒻᒪ ᒐᕙᒪᒃᑯᑦ ᐊᑐᓕᖅᑎᑦᑎᓯᒪᙱᑦᑕᕆᐊᒃᓴᖏᓐᓂ ᐊᑐᖁᔭᐅᔪᓂᒃ ᒪᓕᒐᓕᕆᓂᒃᑯᑦ ᐊᒻᒪ ᑕᒪᓐᓇ ᐱᓕᕆᐊᖑᓂᕐᓴᐅᖁᓪᓗᓂᐅᒃ.

ᐃᓪᓚᐅᑦ ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᐅᖃᖃᑎᒌᖕᓂᖅ ᒪᓕᒐᓕᕆᔨᕐᔪᐊᒃᑯᑦ ᒐᕙᒪᒃᑯᓐᓂ ᖃᓄᐃᓕᐅᕈᑎᐅᑎᑕᐅᓂᐊᖁᓪᓗᓂᐅᒃ ᒪᐅᓇ ᐊᓯᙳᖅᑎᑦᑎᓂᕐᒥ ᒪᓕᒐᓕᕆᓂᕐᒥ ᓄᓇᖃᖅᑳᖅᑐᓄᑦ.