ᐃᒡᓗᓕᖕᒥ ᒪᓕᒐᓕᐅᖅᑎ ᐊᔭᐅᕆᕗᖅ ᒥᓂᔅᑕᒥ ᓴᓇᓂᕐᒥ ᓄᑖᒥᒃ ᐃᓕᓐᓂᐊᕐᕕᖕᒥ

For English version, see Igloolik MLA pushes minister to build new school

ᐃᒡᓗᓕᐅᑉ ᒪᓕᒐᓕᐅᖅᑎᖓ ᐊᔭᐅᕆᕗᖅ ᓄᓇᕗᒻᒥ ᐃᓕᓐᓂᐊᖅᑐᓕᕆᔨᒃᑯᓐᓂ ᐱᓕᕆᕝᕕᖓᓂ ᐃᓇᖏᖅᓯᓂᕐᒥ ᓄᓇᓕᖕᓂ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᖓᓂ.

ᐊᑕᒍᑦᑖᓗᒃ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᖓ, ᓴᓇᔭᐅᓚᐅᖅᓯᒪᔪᒥ 1968−ᒥ, ᐊᑕᐅᓯᐅᓪᓗᓂ ᓄᑕᐅᙱᓛᖑᖃᑕᐅᕗᖅ ᓄᓇᕗᒻᒥ.

ᒪᓕᒐᓕᐅᕐᕕᖕᒥ ᒪᐃ 23, ᐊᒡᒍᒧᑦ ᒪᓕᒐᓕᐅᖅᑎᖓ ᔪᐊᓇ ᖁᐊᓴ ᐅᖃᓪᓚᓚᐅᖅᐳᖅ ᒫᓐᓇᓕᓴᐅᔪᒥ ᐃᒡᓗᕐᔪᐊᕐᒥ ᖃᐅᔨᓴᖅᑕᐅᓂᖓᓂ ᐅᓂᒃᑳᓕᐊᖑᔪᒥ ᐃᓕᓐᓂᐊᕐᕕᖕᒧᑦ, ᓇᓗᓇᐃᖅᓯᓚᐅᖅᑐᒥ 127−ᓂ ᐊᑲᐅᙱᓕᐅᕈᑕᐅᔪᓂ ᐃᓚᖃᖅᑐᒥ ᑯᕕᕕᖏᓐᓄᑦ ᐊᑲᐅᙱᓕᐅᕈᑕᐅᔪᓂ, ᓯᓚᑖᓂ ᓱᕋᑦᑎᓯᒪᓂᐅᔪᓂ ᐊᒻᒪ ᐅᐊᔭᓄᑦ ᓈᒻᒪᙱᓐᓂᐅᔪᓄᑦ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᑎᑎᕋᓚᐅᖅᐳᑦ ᐅᓂᒃᑳᓕᐊᒥ ᖃᐅᔨᓴᐃᓂᐅᔫᑉ ᓇᓂᓂᑯᖏᓐᓂ ᐊᐃᑉᕆᓕᒥ.

“ᐅᒃᐱᕈᓱᒃᐳᖓ ᓈᒻᒪᒃᓯᓂᖓᓂ ᒐᕙᒪᑦᑎᓐᓂ ᐃᓱᒪᒃᓴᖅᓯᐅᕆᓂᕐᒥ ᓴᓇᓂᕐᒥ ᓄᑖᖑᔪᒥ ᐃᓕᓐᓂᐊᕐᕕᐅᔪᒥ ᓄᓇᓕᖕᓄᑦ ᐃᒡᓗᓕᖕᒧᑦ,” ᖁᐊᓴ ᐅᖃᓚᐅᖅᐳᖅ ᐃᓚᒋᔭᐅᔪᓂ ᐅᖃᐅᓯᒃᓴᓕᐊᖏᓐᓂ.

“ᐊᔭᐅᕆᓲᖑᕗᒍᑦ ᒪᒃᑯᒃᑐᖁᑎᑦᑎᓐᓂ ᐃᓕᓐᓂᐊᕆᐊᖃᑦᑕᕐᓂᕐᒧᑦ ᐊᒻᒪ ᑲᔪᓰᓐᓇᕐᓗᑎᒃ ᐃᓕᓐᓂᐊᕐᓂᖏᓐᓂ. ᐱᒻᒪᕆᐅᕗᖅ ᐊᑦᑕᓇᙱᑦᑐᒥ ᐊᒻᒪ ᐃᓗᐊᖅᑐᒥ ᐊᕙᑎᖃᕐᓂᖏᓐᓂ ᐃᓕᑦᑎᓂᕐᒧᑦ ᓈᒻᒪᑦᑎᐊᖅᑐᒥ ᖃᖓᐅᓂᖓᓂ.”

ᖁᐊᓴ ᐅᑲᐅᙱᓕᐅᕈᑕᐅᔪᒥ ᐅᖃᐅᓯᖃᐃᓐᓇᓚᐅᖅᐳᖅ ᐊᐱᖅᓱᖅᑕᐅᓂᕐᒥ ᐱᓕᕆᓂᐅᔪᒥ, ᐊᐱᕆᓪᓗᓂ ᐃᓕᓐᓂᐊᖅᑐᓕᕆᔨᒃᑯᑦ ᒥᓂᔅᑕᖓᓂ ᐹᒥᓚ ᒍᕉᔅᒥ ᐃᓕᓐᓂᐊᕐᕕᐅᑉ ᐊᑲᐅᙱᓕᐅᕈᑎᖏᓐᓂ.

ᒍᕉᔅ ᐅᖃᕆᐊᓪᓚᓚᐅᖅᐳᖅ ᐱᓪᓚᕆᐅᔪᓂ ᐋᖅᑭᒃᑕᐅᔭᕆᐊᓕᖕᓂ ᓇᓗᓇᐃᖅᑕᐅᓯᒪᔪᓂ ᐅᓂᒃᑳᓕᐊᒥ ᐱᓕᕆᐊᖑᕙᓪᓕᐊᓂᖏᓐᓂ.

ᓴᓇᓂᕐᒥ ᓄᑖᖑᔪᒥ ᐃᓕᓐᓂᐊᕐᕕᖕᒥ ᐃᒡᓗᓕᖕᒥ, ᐱᔪᓐᓇᑐᐃᓐᓇᕆᐊᖃᕐᓂᖓᓂ ᓄᓇᕗᒻᒥ ᒐᕙᒪᒃᑯᑦ ᖃᐅᔨᓴᖅᓯᒪᕙᖓᑦ, ᒍᕉᔅ ᐅᖃᓚᐅᖅᐳᖅ.

“ᐱᓕᕆᕙᓪᓕᐊᕗᒍᑦ ᐃᓕᓐᓂᐊᕐᕕᖕᒥ ᓯᕗᒻᒧᐊᕆᔭᐅᓂᖓᓂ ᓯᕗᓂᐊᓂ−ᐸᕐᓇᒃᑕᐅᓂᖓᓂ ᐱᓕᕆᓂᐅᔪᒥ; ᐃᓂᐅᕗᖅ ᐊᓯᖏᓐᓂ ᐃᓕᓐᓂᐊᕐᕕᓂ ᓯᕗᒻᒧᐊᕆᔭᐅᕙᓪᓕᐊᔪᓂ,” ᐅᖃᓚᐅᖅᐳᖅ.

“ᑕᐃᒪᐃᖏᓐᓇᐅᔪᖅᑐᒥ, ᐱᓇᓱᐊᓲᖑᕗᒍᑦ ᐊᒻᒪ ᐅᖓᕙᕆᐊᖅᓯᓂᕐᒥ ᐃᓕᓐᓂᐊᕐᕕᑦᑎᓐᓂ ᐊᒻᒪ ᑭᒡᓕᓕᖕᓂ ᐅᓄᕐᓂᖃᓲᖑᕗᖅ ᐊᕐᕌᒍᑕᒫᒥ, ᑭᓯᐊᓂ ᕿᓃᓪᓇᐅᔭᖅᐳᒍᑦ ᓯᓚᑖᓂ ᑮᓇᐅᔭᖃᖅᑎᑕᐅᓂᐅᔪᓂ ᐃᑲᔪᖅᓱᐃᓂᕐᒥ ᐃᓕᓐᓂᐊᕐᕕᑦᑎᓐᓂ ᐊᒻᒪ ᓄᓇᓖᑦ ᐊᑐᖅᐸᒃᑕᖏᓐᓂ ᐊᐅᓚᔪᓐᓇᖁᓪᓗᒋᑦ ᓄᓇᖁᑎᑦᑎᓐᓂ.”