ᓄᓇᕗᒻᒥ ᒐᕙᒪᒃᑯᑦ ᐱᔭᕇᖅᐳᑦ ᖃᐅᔨᓴᐃᓂᐅᔪᒥ ᐃᒡᓗᓕᖕᒥ ᐃᓕᓐᓂᐊᕐᕕᖓᓂ, ᑭᓯᐊᓂ ᖃᓄᐃᓕᖓᓂᐅᔪᑦ ᐃᓄᓕᒫᓄᑦ ᑐᓴᖅᑎᑕᐅᔾᔮᙱᓚᑦ

For English version, see GN wraps up assessment of Igloolik school but results won’t be made public

ᓄᓇᕗᒻᒥ ᒐᕙᒪᒃᑯᑦ ᐱᔭᕇᖅᓯᓚᐅᖅᐳᑦ ᖃᐅᔨᓴᐃᓂᖓᓂ ᖃᓄᐃᓕᖓᓂᖓᓂ ᐃᒡᓗᓕᐅᑉ ᐊᑕᒍᑦᑖᓗᒃ ᐱᒋᐊᓕᓵᖅᑐᓄᑦ ᐃᓕᓐᓂᐊᕐᕕᖓᓂ ᑭᓯᐊᓂ ᐅᖃᖅᐳᑦ ᓇᓂᔭᐅᓂᐅᔪᑦ ᐃᓄᓕᒫᓄᑦ ᑐᓴᖅᑎᑕᐅᔾᔮᙱᓚᑦ.

ᖃᐅᔨᓴᐃᓂᐅᔪᖅ ᐱᔭᕇᖅᑕᐅᓚᐅᖅᐳᑦ ᑎᓯᐱᕆ 11−ᒥ ᐊᒻᒪ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᒫᓐᓇ ᕿᒥᕐᕈᕗᑦ ᓇᓂᔭᐅᓂᐅᔪᓂ ᐅᖃᓚᐅᖅᐳᖅ ᐅᖃᖅᑎᐅᔪᖅ ᕼᐊᓚ ᑐᐊᐅᓪ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

ᓴᓇᔭᐅᓚᐅᖅᖢᓂ 1968−ᒥ, ᐊᑕᒍᑦᑖᓗᒃ ᐃᓕᓐᓂᐊᕐᕕᖓ ᐊᑕᐅᓯᐅᓪᓗᓂ ᓄᑕᐅᙱᓛᖑᖃᑕᐅᔪᒥ ᐃᓕᓐᓂᐊᕐᕕᓂ ᐃᒡᓗᖁᑕᐅᔪᓂ ᓄᓇᕗᒻᒥ.

ᑭᖑᓪᓕᖅᐹᒥ ᓄᑖᙳᕆᐊᖅᑎᑕᐅᓯᒪᓪᓗᓂ ᐱᓕᕆᐊᖑᓚᐅᖅᐳᖅ 1999−ᒥ, ᑭᓯᐊᓂ ᑕᐃᒪᙵᓂ ᑕᑭᔪᒥ ᑎᑎᕋᖅᓯᒪᓂᐅᔪᒥ ᐋᖅᑭᐅᒪᑎᑦᑎᓂᐅᔪᒥ ᐊᑲᐅᙱᓕᐅᕈᑕᐅᔪᓂ ᓴᖅᑭᓯᒪᕗᑦ, ᑐᕌᖅᑎᑦᑎᔪᒥ ᖃᔅᓯᒐᓚᖕᓂ ᐃᓕᓐᓂᐊᕐᕕᖕᒥ ᒪᑐᔭᐅᓂᐅᔪᓂ ᐊᒻᒪ ᐊᑦᑕᓇᕐᓂᕐᒧᑦ ᐃᓱᒫᓘᑕᐅᔪᓄᑦ ᐃᓚᖃᖅᑐᒥ ᐃᒪᕐᓂ ᑯᕕᓂᕐᔪᐊᖑᔪᓂ, ᓱᕋᒃᓯᒪᔪᓂ ᐹᓂᑦ, ᐅᖁᖕᒥ ᐊᑲᐅᙱᓕᐅᕈᑕᐅᔪᓂ ᐊᒻᒪ ᐃᒪᕐᒧᑦ ᖃᑦᑕᖓᓂ ᖁᐱᓂᖃᖅᑐᒥ ᑯᑐᒃᓯᒪᓂᖃᖅᑐᒥ ᐊᕐᕌᒍᓪᓗᐊᒥ.

ᐃᓕᓐᓂᐊᖅᑐᔨᕆᔨᒃᑯᑦ ᒥᓂᔅᑕᖓ ᐹᒥᓚ ᒍᕉᔅ ᐅᖃᐅᓯᖃᓚᐅᖅᐳᖅ ᐅᒃᑐᐱᕆᒥ ᐃᒡᓗᕐᔪᐊᑉ ᖃᓄᐃᓐᓂᖓᓂ ᖃᐅᔨᓴᖅᑕᐅᓂᖓᓂ ᐱᒋᐊᖅᑕᓚᐅᖅᐳᖅ ᔫᓂ 29−ᒥ ᐃᓱᒪᓕᐅᕆᓂᕐᒥ ᑕᒪᒃᑭᖅᑐᒥ ᐊᖏᓂᐅᔪᒥ ᐱᓕᕆᔭᕆᐊᖃᕐᓂᐅᔪᒥ ᐱᔭᕆᐊᓕᖕᓂ ᐊᒻᒪ ᑭᒡᓕᐅᔪᒥ ᑮᓇᐅᔭᖃᖅᑎᑕᐅᓂᐅᔪᒥ ᐱᔭᕆᐊᖃᕐᓂᖏᓐᓂ ᐱᔭᕇᖅᓯᓂᕐᒥ ᐱᓕᕆᐊᒃᓴᐅᔪᓄᑦ.

ᓄᕕᐱᕆᒥ, ᐃᓕᓐᓂᐊᖅᑐᓕᕆᔨᒃᑯᓐᓂ ᐅᖃᖅᑎᐅᔪᖅ ᑯᕆᔅᑕ ᐊᐃᒥ ᐅᖃᐅᔾᔨᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐃᒡᓗᕐᔪᐊᒥ ᖃᓄᐃᓕᖓᓂᖓᓂ ᖃᐅᔨᓴᐃᓂᐅᔪᖅ ᐃᓄᓕᒫᓄᑦ ᐊᑐᐃᓐᓇᐅᙱᓐᓂᖏᓐᓂ “ᐃᓗᓕᖃᕐᒪᑕ ᐱᔭᕆᑐᕐᔪᐊᖅᑐᓂ ᑐᓴᒐᒃᓴᓂ ᐊᒻᒪᓗᑦᑕᐅᖅ ᐃᓗᓕᖃᖅᖢᓂ ᑐᓴᒐᒃᓴᓂ, ᐃᓄᓕᒫᓄᑦ ᓴᖅᑭᑎᑕᐅᒍᓂ, ᐱᐅᙱᑎᑦᑎᒃᑲᓐᓂᕋᔭᕐᓂᖓᓂ ᐅᔾᔨᖅᓱᕐᓂᕐᒥ ᐱᖁᑕᐅᔪᒥ.”