ᐃᒡᓗᓕᒃ ᐃᓅᓱᑦᑐᐃᑦ ᓂᕈᐊᖅᑐᑦ ᐅᓪᓗᓄᑦ 12−ᓄᑦ ᐊᐅᓪᓚᖅᓯᒪᓂᐊᖅᑐᑎᑦ ᓯᕐᒥᓕᒻᒥ

For English version, see Igloolik teen chosen for 12-day glacial adventure

ᐃᓅᓱᑦᑐᑦ ᐃᒡᓗᓕᒻᒥᐅᑦ ᐅᓪᓗᓄᑦ 12−ᓄᑦ ᐊᐅᓪᓚᖅᓯᒪᓪᓗᑎᑦ ᐳᕆᑎᔅ ᑲᓚᒻᐱᐊᒥᑦ ᓯᕐᒥᓕᒻᒥ ᑲᓇᑕᒥ ᒥᕐᖑᐃᖅᓱᕐᕕᒻᒥ ᓂᕈᐊᖅᑕᐅᓚᐅᖅᓯᒪᔪᑦ 100−ᓗᐊᖅᑐᓂᒃ ᐃᓅᓱᑦᑐᓂᑦ ᐊᕐᓇᓂᑦ ᐱᔪᒪᓯᒪᔪᓂᒃ ᐊᕐᓇᓂᑦ Ice ᑲᓇᑕᒥ.

“ᐃᓕᑦᑐᖅᐹᓘᓚᐅᖅᑐᒍᑦ,” ᐅᖃᖅᑐᓂ 17−ᓂᑦ ᐅᑭᐅᓕᒃ ᑭᐅᕈ ᐃᑉᑲᖓ ᐊᐱᖅᓱᖅᑕᐅᑎᓪᓗᒍ, ᐳᕆᑎᔅ ᑲᓚᒻᐱᐅᒥ ᐊᐅᓪᓚᕐᖓᑦ ᐅᐱᒍᓱᑦᑎᐊᓚᐅᖅᑐᖅ.”

ᐊᐅᓪᓚᖅᓯᒪᓚᐅᖅᓯᒪᔪᑦ ᔪᓚᐃ 21−ᒥ ᐋᒡᒌᔅᓯ 1−ᑦ. ᖁᓕᑦ ᐊᕐᓇᐃᑦ ᐱᖃᑕᐅᓪᓗᑎᑦ.

ᐱᖃᑕᐅᓪᓗᑎᑦ ᐃᓕᓯᓕᐅᐃᑦ (Illecillewaet) ᐊᐅᓪᓚᖅᓯᒪᓪᓗᑎᑦ, ᐱᒋᐊᖅᑐᓂ ᑭᐅᒍᕆᒥ ᐃᖏᕐᕋᓪᓗᑎᑦ ᕌᔾᔪ ᐊᖅᑯᑎᖓᒍᑦ ᐳᕆᑎᔅ ᑲᓚᒻᐱᐅᒥ, ᑐᐱᖅᓯᒪᑲᐃᓐᓇᖅᑐᑎᑦ ᐃᓕᓯᓕᐅᐃᑦ (Illecillewaet) ᑐᐱᕐᕕᖓᓐᓂ. ᑕᐃᑲᓐᖓᑦ, ᐱᓱᓕᖅᑐᑎᑦ ᐃᓕᓯᓕᐅᐃᑦ (Illecillewaet) ᓇᖅᓴᖓᓂ ᐊᓱᒃᑲᓐ ᓯᕐᒥᓕᖓᓐᓄᑦ ᐊᒻᒪᓗ ᐊᓱᒃᑲᓐ ᐃᓪᓗᕋᓛᖓᓐᓄᑦ.

ᐱᓱᒋᐊᓯᓪᓗᑎᑦ ᐃᓕᓯᓕᐅᐃᑦ (Illecillewaet) ᑐᐱᕐᕕᖓᓐᓂ ᑕᐃᑯᖓ ᐊᓱᑲᓐ ᐃᓪᓗᕋᓛᖃᕐᕕᖓᓐᓄᑦ ᐃᑲᕐᕋᓄᑦ 7−ᓄᑦ ᑭᓯᐊᓂᓕ ᖁᕕᐊᓇᓚᐅᖅᑐᖅ, ᐃᑉᑲᓇᖅ ᐅᖃᖅᑐᓂ.

“ᖁᕕᐊᓇᓐᓂᖅᐹᖑᓚᐅᖅᑐᖅ ᐃᖅᑲᐅᒪᐃᓐᓇᕐᓂᐊᖅᑕᕗᑦ. ᑕᖃᓪᓚᕆᑦᑐᖓ. ᑎᒥᒐ ᐱᒍᓐᓇᐃᓕᔫᔮᖅᑐᖅ,” ᐅᖃᖅᑐᓂ ᐱᓱᓐᓂᒥᓂᖓᓐᓂ.

ᐊᕐᓇᐃᑦ Ice−ᒥ ᑮᓇᐅᔭᓕᐅᖅᑎᐅᓐᖏᑦᑐᑦ ᐊᐃᓪᐸᐃᓐ ᐱᓕᕆᔨᖏᑦ ᑲᓇᑕᒥ. ᐃᓅᓱᑦᑐᓂᑦ ᐊᕐᓇᓂᑦ ᓯᕗᓂᔅᓴᖓᓐᓂ ᓯᕗᒃᑲᖅᑕᐃᔪᓐᓇᓕᖁᓪᓗᒋᑦ ᐊᓯᖏᓐᓂ ᐱᖃᑕᐅᖃᑦᑕᖁᓪᓗᒋᑦ ᑲᓇᑕᒥ ᓄᓇᖏᓐᓂ. ᐱᖓᓱᓂᑦ ᑕᐃᒪᐃᑦᑐᑕᖃᕐᖓᑦ ᐊᕐᓇᐃᑦ ᑐᔅᓯᕋᕐᕕᒋᔪᓐᓇᖅᑕᖏᓐᓂ: ᐃᓕᓯᓕᐅᐃᑦ (Illecillewaet) ᐊᐅᓪᓚᖅᓯᒪᓂᖅ, ᐃᒃᐸᓇᖅ ᐱᖃᑕᐅᕕᖓᓐᓂ; ᔫᑳᓐ ᐊᐅᓪᓚᖅᓯᒪᕕᒻᒥ; ᐊᒻᒪᓗ ᑰᑕᓂᔅ ᐊᐅᓪᓚᖅᓯᒪᕕᖓᓐᓂ.

ᐸᐃᑉᐹᓕᓐᓄᑦ ᐊᐅᓪᓚᕈᔾᔨᔨᖃᖅᑐᑎᑦ, ᖃᔨᐅᓴᖅᑎᒻᒪᕇᑦ ᓴᓇᓐᖑᐊᖅᑎᓪᓗ ᐱᖃᑕᐅᓪᓗᑎᑦ.

“ᐅᖃᐅᓯᖃᖅᑐᑕ ᖃᐅᔨᓴᖅᑐᓕᕆᓂᕐᒥᑦ, ᐅᖃᐅᓯᖃᖅᑐᑕ ᓯᕐᒥᓕᐅᑉ ᒥᔅᓵᓄᑦ,” ᐃᒃᑲᓐᓇᖅ ᐅᖃᖅᑐᓂ. ᓴᓇᓐᖑᐊᖅᑐᑎᓪᓗ ᐱᓱᑉᐸᑦᑐᑎᓪᓗ ᐊᑦᑕᓇᐃᖅᑕᐃᓕᒪᔪᒦᑦᑐᓂᒃ ᐱᓱᑦᑐᑎᑦ.

ᐃᓕᓐᓂᐊᕈᑎᑦ ᐃᑲᔫᑎᓕᒃ ᐃᓅᓱᑦᑐᓂ ᑲᓱᖅᑎᑦᑎᓇᓱᐊᖅᑐᑎᑦ ᖃᐅᔨᓴᖅᑐᓕᕆᓂᕐᒥᑦ, ᓴᓇᓐᖑᐊᓂᕐᒥᑦ ᖃᓄᐃᓘᕈᓘᔭᕐᓂᕐᒥᑦ, ᐅᖃᖅᑐᓂ ᓯᒥᕋ ᐋᓐᑐᕆᔅ, ᐸᐃᑉᐹᓕᒃ ᓄᓇᓕᕆᓂᕐᒥᑦ ᖃᐅᔨᓴᖅᑐᓕᕆᓂᕐᒥᓪᓗ ᐃᑲᔪᖅᑎᐅᓚᐅᖅᑐᓂᓗ ᐃᑲᔫᑎᓕᕆᔪᓂᒃ 2021−ᒥ.

“ᐃᓕᓐᓂᐊᕕᔾᔪᐊᒦᑎᓪᓗᖓ ᑕᐃᒪᐃᑦᑐᒦᒍᒪᔪᒥᓂᐅᔪᖓ,” ᐅᖃᖅᑐᓂ.

“ᓯᓚᒥ ᐃᓕᓐᓂᐊᖅᑐᑕ,” ᐋᓐᑐᕆ ᐅᖃᖅᑐᓂ. “ᑕᒫᓂ ᓵᖓᓃᑦᑐᑕ ᓯᕐᒥᓕᐅᑉ ᐃᓕᓐᓂᐊᖅᑐᑕᓗ ᑕᒪᔅᓱᒪ ᒥᔅᓵᓄᑦ; ᓵᖓᓃᑦᑐᑕ ᑎᒻᐳᐱᐅᕆ ᓇᐹᖅᑐᕋᓛᑕᓕᓐᓂᑦ ᑎᑎᖅᑐᒐᖅᑐᑕ ᑭᓱᑯᑦᑎᖏᓐᓂ ᐸᐅᓐᖓᖁᑎᑕᓕᓐᓂᑦ.”

ᐊᐅᓚᑦᑎᔪᑦ ᐃᓕᓐᓂᐊᖅᑐᓂᒃ ᑲᒪᖃᑦᑕᖅᑐᑦ ᖁᕝᕙᓯᓐᓂᓕᓐᓂᑦ 10−ᒥᑦ ᐊᒻᒪᓗ 12−ᓂᑦ ᖃᓄᐃᓘᕈᒪᓂᖏᓐᓂ ᐃᓅᓯᕐᒥᓂᒃ ᐃᓱᒪᖅᓴᖅᓯᐅᖃᑦᑕᓕᖅᑎᓪᓗᒋᑦ, ᐋᓐᑐᕆ ᐅᖃᖅᑐᓂ.

ᓴᓇᓐᖑᐊᖅᑐᑎᑦ, ᖃᐅᔨᓴᖅᑐᓕᕆᓂᕐᒥᑦ, ᓄᓇᒥᑦ, ᐱᓱᑦᑐᑎᑦ ᐃᓐᓈᕈᖅᓯᐅᖅᑐᑎᓪᓗ ᐱᐅᔅᓴᓕᒃᑲᓐᓂᖁᓪᓗᒋᑦ ᑕᒪᑐᒥᖓ.

“ᖃᓄᐃᑦᑐᑐᐃᓐᓇᕐᓂᑦ ᐃᓱᒪᖃᖅᑐᑕ ᐊᔾᔨᒌᓐᖏᑦᑐᓂᒃ ᐊᒻᒪᓗ ᑲᓇᑕᐅᑉ ᒥᕐᖑᐃᖅᓯᕐᕕᖏᓐᓂ ᐊᔾᔨᒌᓐᖏᑦᑐᓂᒃ,” ᐋᓐᑐᕆ ᐅᖃᖅᑐᓂ.

“ᑲᑎᒪᓂᐊᖅᑐᒍᑦ ᐅᓪᓗᓄᑦ 12-ᓄᑦ ᐊᒻᒪᓗ ᐃᓚᑖᕇᓪᓗᑕ. ᐱᓕᕆᖃᑎᒌᖃᑦᑕᕐᓗᑕᓗ ᐃᓕᓐᓂᐊᕐᓂᑎᓐᓂ. ᐃᓕᓴᐃᒍᓐᓇᖅᑐᑕ ᐊᓯᑎᓐᓂ − ᐱᖃᑕᐅᓪᓗᑕ ᐱᖃᓐᓇᕇᑦᑖᖅᑐᑕᓗ ᐊᑯᓂᐊᓗᓪᓗ ᑕᐃᒪᐃᓐᓂᐊᖅᑐᓂ.”