ᐃᒡᓗᓕᒃ ᑐᙵᓱᒃᑎᑦᑎᕗᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐱᙳᐊᖅᑎᐅᔪᓂ ᐊᖏᕐᕋᒧᑦ

For English version, see Igloolik welcomes Arctic Winter Games athletes home

ᐃᒡᓗᓕᒃ ᑐᙵᓱᒃᑎᑦᑎᓚᐅᖅᐳᑦ ᐱᙳᐊᖅᑎᓂᑦ ᐊᖏᕐᕋᒧᑦ ᒫᔾᔨ 18−ᒥ 2024−ᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ, ᐱᔭᕇᓚᐅᖅᑐᓂ ᒫᔾᔨ 16−ᒥ.

ᐅᑭᐅᒃᑯᑦ ᐱᙳᐊᕐᓂᐅᔪᑦ ᑎᑭᑎᑦᑎᓚᐅᖅᐳᑦ ᐃᓚᐅᖃᑕᐅᔪᓂ 7−ᓂ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᓂᐅᔪᓂ ᐊᓛᔅᑲᐅᑉ ᒪᑦ-ᓲ ᕚᓕᒧᑦ ᐊᕕᒃᑐᖅᓯᒪᓂᐅᔪᒥ ᐱᓇᓱᐊᕈᓯᐅᔪᒥ ᓵᓚᖃᕋᓱᐊᕐᓂᐅᔪᓂ ᐊᔾᔨᒌᙱᕈᓘᔭᖅᑐᓂ ᐱᙳᐊᕐᓂᐅᔪᓂ.

ᐋᓂ−ᕉᔅ ᕼᐊᓂᓕᐊᖅ ᐊᒻᒪ ᔪᐃᓕ ᓴᑐᖅᓯ ᐱᓚᐅᖅᐳᑦ ᓇᒡᓕᒍᓱᒃᑐᓂ ᐊᒻᒪ ᓂᐱᖅᑯᖅᑐᔪᒥ ᑐᙵᓱᒃᑎᑕᐅᓂᐅᔪᒥ ᐃᒡᓗᓕᖕᒥ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᐃᓕᓐᓂᐊᖃᑎᖏᑦ, ᐊᒻᒪᓗᑦᑕᐅᖅ ᐃᓕᓐᓂᐊᖅᑎᓂ ᐱᒋᐊᓕᓵᖅᑐᓂ ᐊᒻᒪ ᕿᑎᖅᐸᓯᐊᓂ ᐱᓕᓐᓂᐊᕐᕕᐅᔪᓂ ᑲᑎᓚᐅᕐᓂᖏᓐᓂ.

“ᐊᓕᐊᓇᒋᓚᐅᖅᑕᕋ,” ᐅᖃᓚᐅᖅᐳᖅ ᓴᑐᖅᓯ, ᐊᖏᕐᕋᐅᔾᔨᓚᐅᖅᑐᒥ ᖃᑯᓪᓕᖅ ᐅᔭᒥᖕᒥ ᓰᖅᑯᖓᓪᓗᓂ ᑭᒡᒐᕐᓂᐅᔪᒥ ᓵᓚᖃᕋᓱᐊᕐᓂᐅᔪᒥ.

“ᐊᓯᖏᑦ ᓵᓚᖃᕋᓱᐊᖅᑎᐅᔪᑦ ᐊᔪᕐᓇᕐᔪᐊᓚᐅᖅᐳᑦ,” ᐃᓚᒋᐊᖅᓯᓚᐅᖅᐳᖅ.

ᐅᑯᐊ ᐱᙳᐊᕐᓂᐅᔪᑦ ᓯᕗᓪᓕᐅᓚᐅᖅᐳᖅ ᒪᕐᕉᔪᓄᑦ, ᑭᓯᐊᓂ ᑕᒪᒃᑭᑦ ᐅᖃᓚᐅᖅᐳᑦ ᑭᖑᓪᓕᖅᐹᕆᔾᔮᙱᑕᖓᑦ.

“ᐅᑎᕈᒪᓪᓚᕆᒃᐳᖓ 2026−ᒥ,” ᕼᐊᓂᓕᐊᖅ ᐅᖃᓚᐅᖅᐳᖅ.

2026−ᒥ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᑦ ᐱᓕᕆᐊᖑᓂᐊᖅᐳᑦ ᐅᐊᑦᕼᐅᐊᔅᒥ. ᕼᐊᓂᓕᐊᖅ ᐃᖅᑲᐃᓚᐅᖅᐳᖅ ᐅᖃᐅᓯᕐᓂ ᐅᖃᐅᔾᔨᓂᐅᔪᓂ ᐃᓄᑐᖃᕐᒥ ᐹᓚᐅᖅᑕᖓᓂ ᐱᙳᐊᕐᓂᐅᔪᓂ ᐅᖃᖅᑕᖓᓂ ᐃᒻᒥᓂᒃ ᐃᑲᔪᕐᓂᐊᖅᑐᒥ ᐸᕐᓇᖕᓂᕐᒧᑦ ᒪᓕᒃᑐᒧᑦ ᓵᓚᖃᕋᓱᐊᕐᓂᐅᔪᓂ.

ᐃᓕᓐᓂᐊᖅᑏᑦ ᑕᒪᒃᑭᓂ ᐱᖓᓱᓂ ᐃᓕᓐᓂᐊᕐᕕᐅᔪᓂ ᐃᔨᓗᓕᖕᒥ ᐅᑕᖅᑭᕗᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐱᙳᐊᖅᑎᓂᑦ ᔪᐃᓕ ᓴᑐᖅᓯᒥ ᐊᒻᒪ ᐋᓂ−ᕉᔅ ᕼᐊᓂᓕᐊᕐᒥ ᐃᓯᕐᓂᐊᕐᓂᖏᓐᓂ ᐃᒡᓗᓕᖕᒥ ᖁᑦᑎᒃᑐᒥ ᐃᓕᓐᓂᐊᕐᕕᖓᓂ ᐃᖃᐃᓕᓴᕐᕕᖓᓄᑦ. ᖁᑦᑎᒃᑐᒥ ᐃᓕᓐᓂᐊᕐᕕᖓ ᐃᓂᒋᔭᐅᓚᐅᖅᐳᖅ ᐊᖏᕐᕋᒧᑦ ᐅᑎᖅᑐᓂ ᖁᕕᐊᓱᒍᑕᐅᔪᒥ ᒪᕐᕉᔪᓄᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᐱᙳᐊᖅᑎᓂᑦ ᒫᔾᔨ 18−ᒥ. (ᕋᓂᐊ ᒍᐊᑕᓐ ᐊᔾᔨᓕᐅᖅᑕᖏᑦ, ᐊᓯᐊᒎᖅᑐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ)

“ᐅᕙᑦᑎᓐᓂ ᐅᖃᐅᔾᔨᓚᐅᖅᐳᖅ ᐊᔾᔨᖅᓱᓪᓗᐊᕋᑦᑕ ᐆᒪᔪᓂ ᐊᒻᒪ ᐃᓕᑦᑎᓗᑕ ᖃᓄᐃᓕᐅᖅᐸᖕᓂᖏᓐᓂ. ᐱᙳᐊᖅᑎᓪᓚᕆᐅᕗᑦ,” ᕼᐊᓂᓕᐊᖅ ᐅᖃᓚᐅᖅᐳᖅ.

“ᖁᔭᓐᓇᒦᒃ ᐃᑲᔪᖅᓱᐃᓂᔅᓯᓐᓂ ᓱᕈᓯᑦᑎᐊᕚᓗᖕᓂ,” ᐅᖃᓚᐅᖅᐳᖅ ᐃᒪᓕ ᐳᕈᑎᓐ, ᐱᙳᐊᕐᓂᕐᒧᑦ ᐃᖅᑲᓇᐃᔭᖅᑎᐅᖃᑕᐅᔪᖅ ᓄᓇᕗᒻᒥ ᐱᙳᐊᖅᑎᐅᔪᓄᑦ. “ᑕᐃᒪᑐᖅ ᑎᑭᑉᐸᓪᓕᐊᔪᓂ ᖃᔅᓯᐊᕐᔪᖕᓂ ᐊᕐᕌᒍᓂ ᐅᓄᕐᓂᖅᓴᐅᔪᓂ ᐃᒡᓗᓕᖕᒥᐅᑕᓂ ᐃᓚᐅᖃᑕᐅᓂᖏᓐᓂ ᑭᒡᒐᖅᑐᐃᓂᕐᒧᑦ ᑲᒪᓇᖅᑐᒥ ᓄᓇᓕᑦᑎᓐᓂ.”

ᐅᓇ ᑎᑎᕋᖅᑕᐅᓂᐅᔪᑦ ᐊᒻᒪ ᐊᔾᔨᓕᐊᖏᑦ ᐱᑎᑕᐅᓂᐅᕗᖅ ᐱᓕᕆᖃᑎᖃᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᐊᒻᒪ ᓯᕗᓃᑦ ᕿᑎᐊᓂ ᐃᓕᓐᓂᐊᕐᕕᖓᑕ ᑐᓴᒐᒃᓴᓕᐅᕐᓂᕐᒧᑦ ᑲᑎᙵᓂᐅᔪᒥ ᐃᒡᓗᓕᖕᒥ. ᑲᑎᙵᓂᐅᔪᖅ ᐃᑲᔪᓲᖑᕗᖅ ᐃᓕᓐᓂᐊᖅᑎᓂ ᐃᓕᑦᑎᓂᖏᓐᓂ ᑐᓴᒐᒃᓴᓂ ᑎᑎᕋᕐᓂᕐᒧᑦ ᐊᒻᒪ ᐊᔾᔨᓕᐅᕆᓂᕐᒥ. ᐃᓕᓐᓂᐊᖅᑎᑦ ᕋᓂᐊ ᒍᐊᑕᓐ ᐊᒻᒪ ᐋᓐᑐᓂ ᖁᓐᓄᑦ ᑲᒪᒋᔭᖃᓚᐅᖅᐳᑦ ᐊᖏᕐᕋᒧᑦ ᐅᑎᕐᓂᕐᒥ ᒪᕐᕉᔪᓂ ᐃᒡᓗᓕᖕᒥ ᐱᙳᐊᖅᑎᐅᔪᓂᑦ ᐅᑭᐅᖅᑕᖅᑐᒥ ᐅᑭᐅᒃᑯᑦ ᐱᙳᐊᕐᓂᐅᔪᓂ ᒫᔾᔨ 18−ᒥ.