ᐃᖅᑲᖅᑐᐃᕕᒃ ᐱᒋᐊᖁᔨᓕᕐᑐᖅ ᓱᕈᓯᓕᕆᓂᕐᒧᑦ ᐃᖅᑲᖅᑐᐃᕕᒃᑰᖅᑎᑦᑎᔪᒪᓂᕐᒥ

For English version, see Quebec court gives green light to Indigenous child-welfare class action suit

ᑯᐸᐃᒃ ᐃᖅᑲᖅᑐᐃᔨᕐᔪᐊᖏᑦ ᐃᖅᑲᖅᑐᐃᕕᒃᑰᖅᑎᑦᑎᔪᒪᔾᔪᑎᓂ ᐃᑲᔫᑎᒃᓴᖃᖅᑎᑦᑎᙱᓗᐊᕐᓂᖏᓐᓂ ᓄᓇᖃᖅᑳᖅᑐᓂ ᓱᕈᓯᓕᕆᕝᕕᖕᓂ ᑯᐸᐃᒃᒥ ᑲᔪᓯᖁᓕᓚᐅᕐᑐᑦ.

ᐸᓯᔭᒃᓴᐅᑎᑦᑎᔨᐅᔪᑦ ᐅᖃᕐᑐᑦ ᑲᓇᑕᐅᑉ ᐊᒻᒪ ᑯᐸᐃᒃ ᒐᕙᒪᖏᑦ ᐊᑐᕆᐊᖃᖅᑕᖏᓐᓂᒃ ᒪᓕᒐᕐᓂ ᒪᓕᙱᓐᓂᕋᖅᑕᐅᓪᓗᑎᒃ ᐅᑯᓄᖔᕐᑐᓂᒃ ᓄᓇᖃᖅᑳᖅᑐᑦ ᓱᕈᓯᖏᓐᓄᑦ ᐃᓚᖏᓐᓄᓪᓗ ᓄᓇᓕᕐᔪᐊᓂ ᓄᓇᖃᖅᑐᓂᒃ. ᐅᖃᓚᐅᕐᒥᔪᑦ ᑲᓇᑕ ᒪᓕᒐᓂ ᒪᓕᒃᑎᑦᑎᙱᓗᐊᕐᓂᖏᓐᓂ ᐊᒻᒪ ᐃᑲᔫᑎᖃᖅᑎᑦᑎᙱᓗᐊᕐᓂᖏᓐᓂ ᐳᕌᕕᓐᓯᐅᔪᑦ ᓱᕈᓯᕆᔭᐅᔪᓂᒃ ᑲᒪᒋᔭᖃᕈᑎᒃᓴᓂᒃ.

ᓲᑐᔅ ᐃᖅᑲᖅᑐᐃᕕᒃᑰᖅᑎᑦᑎᓂᖅ ᐱᒋᐊᖅᑕᐅᓚᐅᕐᑐᖅ ᒪᕐᕉᖕᓂ ᐃᖅᑲᖅᑐᐃᔨᒋᔭᐅᔪᓂᒃ, ᑰᒡᓗ ᑳᓐᑎᔅᑎᓐ LLP (Kugler Kandestin LLP) ᐊᒻᒪ ᑰᐸᓪ ᓱᕕᓚ s.a. (Coupal Chauvelot s.a.) ᒪᓐᑐᕆᐊᒥ. ᓲᑐᔅ ᑐᓴᖅᑎᑦᑎᓚᐅᕐᑐᑦ ᐊᐃᕆᓕ 30-ᒥ ᑐᓴᒐᒃᓴᑎᒍ ᑖᓐᓇ ᑲᔪᓯᔪᓐᓇᖅᓯᓂᖓᓂ ᐃᖅᑲᖅᑐᐃᕕᒃᑯᑦ.

ᐃᖅᑲᖅᑐᐃᕕᒃᑰᖅᑎᑦᑎᓂ ᐱᒋᐊᖅᑕᐅᓚᐅᕐᓯᒪᔪᖅ ᒪᕐᕉᖕᓄ ᐱᓇᓱᒋᐊᕐᓯᒪᔫᖕᓄᑦ ᑕᒪᕐᒥᓪᓗ ᓱᕈᓯᓕᕆᔨᒃᑯᓐᓄᑦ ᑲᒪᒋᔭᐅᓯᒪᓂᑰᓪᓗᑎᒃ ᓄᓇᕕᒃᒥ.

ᑐᓴᒐᒃᓴᖅ ᐅᖃᕐᓯᒪᓚᐅᕐᑐᖅ ᓄᓇᖃᖅᑳᖅᑐᑦ ᐃᓅᓱᒃᑐᖏᑦ ᐊᒻᒪ ᐃᓚᖏᑦ “ᐃᑲᔫᑎᒃᓴᖃᖅᑎᑦᑎᙱᓗᐊᖅᑐᓂ ᐳᕌᕕᓐᓯᒧᑦ ᐃᓄᓕᕆᓂᕐᒨᖓᔪᓄᑦ ᑲᒪᒋᔭᐅᑎᓪᓗᒋ ᑖᒃᑯᐊ ᐃᓚᒌᓂ ᑲᑎᕐᖓᑎᑦᑎᓇᓱᒃᑎᐅᑎᓪᓗᒋ ᖃᓄᐃᑎᑦᑎᑦᑕᐃᓕᓂᒃᑯᑦ.”

“ᑖᒃᑯᐊ ᐊᔾᔨᐅᙱᑎᑦᑎᓂᕐᒥ ᐊᑐᕐᑎᑦᑎᓂᐅᖕᒪᑕ ᐊᒻᒪ ᐃᓱᒪᒧᑦ ᓱᕋᐃᒍᑎᐅᓪᓗᓂ ᐃᓚᖃᕆᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᕐᓯᒪᓂᕐᒥᒃ ᐊᒻᒪᓗ 60 ᓯᑰᑉᒥ.”

ᐅᓇ 60 ᓯᑰᑉ ᐱᔾᔪᑎᓕᒃ ᒐᕙᒪᑐᖃᒃᑯᑦ ᐱᓕᕆᐊᕆᓚᐅᕐᓯᒪᔭᖓᓂ ᓱᕈᓯᓕᕆᔨᒃᑯᑦ ᓄᓇᖃᖅᑳᖅᑐᑦ ᓱᕈᓯᖏᓐᓂᒃ ᐱᑐᐃᓐᓇᖅᖢᑎᒃ ᓄᓇᖏᓐᓂ ᐊᐅᓪᓚᖅᑎᑦᑎᖃᑦᑕᕐᓂᕐᒥ ᐃᓚᖏᓐᓂᓪᓗ ᕿᒪᐃᑎᑦᑎᖃᑦᑕᕐᓂᕐᒥ.

ᐅᓇ ᐃᖅᑲᖅᑐᐃᕕᒃᑯᑦ ᐋᖅᑭᒃᑕᐅᓂᑯ ᐱᔪᓐᓇᖅᓯᑎᑕᐅᓚᐅᕐᑐᖅ ᐅᓂᒃᑳᑎᒍᑦ ᑎᑎᕋᖅᑕᐅᓯᒪᔪᓄᑦ ᐊᒻᒪ ᖃᐅᔨᓴᖅᑕᐅᓯᒪᓪᓗᓂ ᐊᕐᕌᒍᒐᓴᐅᓕᕐᑐᓂᒃ ᐅᓇ ᑯᐸᐃᒃᒥ ᓱᕈᓯᓕᕆᔾᔪᓯᐅᕙᒃᑐᖅ. ᑕᒪᕐᒥ ᑎᑎᕋᖅᑕᐅᓯᒪᔪᖅ “ᐅᖃᐅᓯᖃᕐᑐᑦ ᐃᑲᔫᑎᒃᓴᖅᑕᖃᙱᓗᐊᕐᓂᖓᓂᒃ ᐊᒻᒪ ᐊᔪᕈᓐᓃᖅᓴᕈᑎᑕᖃᙱᓗᐊᕐᓂᖓᓂ ᑕᒪᒃᑯᐊ ᐊᓯᐊᓄᐊᖅᑕᐅᔪᕕᓃᑦ ᓄᖅᑲᖅᑎᑕᐅᓯᒪᔪᓐᓇᓚᐅᙱᓐᓂᖏᓐᓄᑦ.

ᐅᓂᒃᑳᑦ, ᑎᑎᕋᐅᓯᐅᓂᑯ ᑯᐸᐃᒃᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑲᒥᓴᓐᑯᓐᓄᑦ, ᐅᖃᕐᓯᒪᓚᐅᕐᑐᖅ ᓱᕈᓯᕐᓄᑦ ᐊᒻᒪ ᐃᓅᓱᒃᑐᓄᑦ ᐃᓄᖕᓄᑦ ᐅᖃᐅᓯᐅᖃᑕᐅᓯᒪᔪᑦ ᑯᐸᐃᒃ ᒪᓕᒐᕐᔪᐊᖏᓐᓂ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐊᒻᒪ ᐃᓱᒪᕐᓱᕈᓐᓇᕐᓂᕐᒧᑦ ᓱᕋᒃᑕᐅᓚᐅᕐᓂᖓᓂᒃ.

“ᐱᔾᔪᑎᒋᓗᐊᓚᐅᕐᑕᕋᓕ ᑖᓐᓇ ᐱᓕᕆᐊᖑᓕᖁᓪᓗᒍ ᖃᓄᖅ ᓱᕈᓯᓕᕆᓂᖅ ᓱᕈᓯᐅᑎᓪᓗᖓ ᓈᒻᒪᙱᓕᐅᕈᑎᒋᓚᐅᖅᑕᒃᑲ ᒫᓐᓇᒧᑦ ᓴᕿᑎᑦᑐᒪᓕᖅᖢᒋᑦ,” ᐅᖃᕐᑐᖅ ᑖᓂᐊ ᔫᓐᔅ, ᐃᖅᑲᖅᑐᐃᕕᒃᑰᖅᑎᑦᑎᔨᐅᖃᑕᐅᔪᖅ, ᑐᓴᒐᒃᑎᒍᑦ.

“ᖁᕕᐊᓱᒃᑐᖓ ᐅᓇ ᐱᓇᓱᒃᑕᑦᑎᓐᓂ ᓯᕗᒧᑦ ᐱᓕᕆᐊᕆᔭᐅᔪᓐᓇᕐᓯᓂᐊᕐᓂᖓᓂ ᐊᒻᒪᓗ ᐅᓂᒃᑳᕗᑦ ᑐᓴᖅᑕᐅᔪᓐᓇᕐᓂᐊᓕᖅᖢᑎᒃ.”

2023-ᒥ, ᒐᕙᒪᑐᖃᒃᑯᑦ ᐊᖏᓚᐅᕐᓯᒪᔪᑦ ᐊᑭᓖᓂᐊᕐᓂᖏᓐᓂᒃ $23.34 ᐱᓕᐊᓐ ᑖᓚᓂ ᓄᓇᖃᖅᑳᖅᑐᓄᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᓈᒻᒪᙱᓕᐅᕈᑎᖃᖅᑎᑕᐅᓂᑯᑦ ᓄᓇᖏᓐᓂᑦ ᓄᓇᖃᖅᑳᖅᑐᓄᑦ ᓱᕈᓯᓕᕆᔨᓄᑦ ᐊᒻᒪ ᐃᓄᓕᕆᓂᕐᒧᑦ ᐱᓕᕆᐊᒃᓴᑎᒍᑦ ᐊᒻᒪ ᐱᔨᑦᑎᕋᐅᑎᓄᑦ ᑭᒃᑯᓕᒫᓅᖓᔪᓄᑦ.

ᐅᓇ ᐃᖅᑲᖅᑐᐃᕕᒃᑰᖅᑎᑦᑎᓂᖅ ᐊᖏᖅᑕᐅᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥᑦ ᐅᖃᕐᓯᒪᓪᓗᑎᒃ ᐃᓄᐃᑦ, ᐊᓪᓚᖓᔪᐃᑦ ᐊᒻᒪ ᓄᓇᖃᖅᑳᖅᑐᑦ ᐊᓪᓚᐃᑦ ᓄᓇᓕᕐᔪᐊᓃᓕᕐᑐᑦ ᐃᓄᒃᓱᒃᑐᑦ ᐃᓚᐅᑎᑕᐅᓯᒪᙱᓐᓂᖏᓐᓂ ᑖᔅᓱᒧᖓ, “ᑕᐃᒪᓐᓇᑦᑕᐃᓐᓇᖅ ᓈᒻᒪᙱᓕᐅᕈᑎᖃᖅᐸᒃᖢᑎᒃ ᐃᓅᓱᒃᑐᑦ ᐃᓚᖏᓪᓗ ᓄᓇᑐᖃᖏᓐᓃᑦᑐᑎᑐᑦ ᐃᑲᔫᑎᑖᖅᑎᑕᐅᓂᑯᑎᑐᑦ ᒐᕙᒪᑐᖃᒃᑯᓐᓄᑦ.”