ᓄᓇᖃᖅᑐᑐᖃᐃᑦ ᐱᔭᕆᐊᖃᖅᑕᖏᑦ ‘ᓄᖃᖓᒍᑎᐅᓇᔭᙱᒻᒪᑕ’: ᐃᓕᓐᓂᐊᖅᑎ ᐱᓕᕆᔨᐅᔪᖅ

For English version, see Indigenous needs aren’t ‘static,’ says student school board trustee 

ᐋᑐᕚᒥ ᐃᓕᓐᓂᐊᖅᑐᓕᕆᔨᑦ ᑲᑎᒪᔨᖏᓐᓄᑦ ᓄᑖᖅ ᓄᓇᖃᖅᑐᑐᖃᖅ ᐃᓕᓐᓂᐊᖅᑎ ᐱᓕᕆᔨᒋᓕᖅᑕᖓ ᐅᖃᕐᑐᖅ ᐸᕐᓇᒃᓯᒪᓕᕐᓂᕋᖅᖢᓂ ᐃᑲᔪᖅᑎᐅᓂᐊᕐᓂᕐᒥᓂ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑎᓂᒃ.

ᐃᔨᐅ ᑎ ᓯᑕᕙᓄ, 16, ᒍᕇᑦ 11-ᒥ ᐃᓕᓐᓂᐊᖅᑐᖅ ᔮᓐ ᒪᒃᑯᕇ ᐃᓕᓐᓂᐊᖅᕕᒃᒥ ᐹᕐᕼᐊᐃᕙᓐᒥ ᐋᑐᕚᒥ.

ᓯᑎᐱᕆᐅᓕᖅᐸᑦ, ᓄᑖᒥ ᐱᓕᕆᐊᒃᓴᖑᓵᖅᑐᒥ ᐱᓕᕆᐊᖃᕐᓂᐊᖅᑐᖅ ᐅᑯᓄᖓ ᐋᑐᕚ-ᑳᕐᑕᓐ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ. ᐅᓇ ᐱᓕᕆᐊᒃᓴᖅ ᓄᑖᑦᑎᐊᖅ ᑕᐃᒪᐃᑦᑐᓂᒃ ᐋᑐᕚᒥ, ᐅᖃᓚᐅᕐᑐᖅ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔩᑦ ᐅᖃᖅᑎᖓ ᑖᕐᓯ ᓅᓪ.

“ᐊᒃᓱᐊᓗ ᑲᒪᓚᐅᖅᑐᖓ ᑭᓯᐊᓂᓗ ᖁᕕᐊᓱᒻᒪᕆᒃᖢᖓ,” ᑎ ᓯᑕᕚᓄ ᐅᖃᓚᐅᕐᑐᖅ ᓄᓇᑦᓯᐊᕐᒥ ᐱᕙᓪᓕᐊᔪᑦ ᑕᑯᔪᓐᓇᖅᓯᑎᓪᓗᒋ ᐃᓕᓐᓂᐊᖅᑎᓪᓗᒍ ᒫᔅᓯ 27-ᒥ.

“ᐅᓇ ᐱᓕᕆᐊᒃᓴᒻᒪᕆᒐ. ᖁᕕᐊᓱᑦᑎᐊᒻᒪᕆᒃᑐᖓ ᐱᓕᕆᐊᒃᓴᒥ ᐱᓕᕆᐊᖃᓕᕋᒪ ᐊᒻᒪᓗ ᐃᓱᒪᓪᓗᖓ ᐃᑲᔪᕈᓐᓇᕈᒪᓪᓗᖓ ᐊᓯᓐᓂ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑎᓂ ᐃᓕᓐᓂᐊᑦᑎᐊᕈᓐᓇᖁᓪᓗᒋᑦ.”

ᐱᓕᕆᔨᒃᓴᖅ ᓄᓇᖃᖅᑐᑐᖃᕐᒧᑦ ᐃᓕᓐᓂᐊᖅᑎᒧᑦ ᐱᒋᐊᖅᑎᑕᐅᓚᐅᕐᓯᒪᔪᖅ ᓄᓇᖃᖅᑐᑐᖃᐃᑦ ᓂᐱᖏᓐᓂ ᑐᓴᖅᑕᐅᑎᑦᑎᔨᐅᓂᐊᕐᓗᓂ ᐃᓕᓐᓂᐊᖅᑐᓕᕆᓂᕐᒧᑦ ᐃᓱᒪᓕᐅᕆᓂᒃᑯᑦ, ᓅᓪ ᐅᖃᓚᐅᕐᓯᒪᔪᖅ ᕕᕝᕗᐊᕆᐅᑎᓪᓗᒍ.

ᒫᓂ 1,500 ᐃᓕᓐᓂᐊᖅᑏᑦ ᐅᕝᕙᓘᓐᓃᑦ 2 ᐳᓴᓐᑎᖏ ᐃᓕᓐᓂᐊᖅᑐᑦ ᐋᑐᕚ-ᑳᕐᑕᓐ ᐃᓕᓐᓂᐊᖅᕕᖕᓂ ᓇᓗᓇᐃᖅᓯᒪᔪᑦ ᓄᓇᖃᖅᑳᖅᑑᓂᖏᓐᓂᒃ, ᐊᓪᓚᖓᔫᓂᖏᓐᓂᒃ ᐅᕝᕙᓘᓐᓃᑦ ᐃᓅᓂᖏᓐᓂᒃ.

ᑎ ᓯᑕᕚᓄ ᐃᒻᒥᓂ ᐅᖃᐅᓯᖃᖅᑐᖅ ᓄᓇᓕᕐᔪᐊᓂ ᐃᓅᓂᕋᖅᖢᓂ. ᖃᓪᓗᓈᓂ ᓄᓇᖃᐃᓐᓇᐅᔭᖅᑐᖅ ᑭᓯᐊᓂᓕ  ᕿᑭᖅᑖᓗᖕᒥᐅᑕᓂ ᓯᕗᕚᖃᖅᖢᓂ.

2019-ᒥ ᓄᒃᑎᓚᐅᖅᓯᒪᔪᖅ ᐋᑐᕚᒧᑦ ᐊᑦᒪᓐᑕᓐᒥ, ᒍᕇᑦᒥ ᖄᖏᖅᓯᓪᓗᓂ. ᐅᓇ ᓄᒃᑎᖅᓯᒪᓕᕐᓂᖓ ᐱᓕᕆᐊᒃᓴᒧᑦ ᐱᓇᓱᒍᒪᔾᔪᑎᒋᓚᐅᖅᓯᒪᔭᖓ.

“ᑕᒪᐅᖓ ᓄᒃᑎᓕᖅᖢᓂ ᐋᐴᑕᒥ ᐱᑐᐃᓐᓇᐅᓚᐅᖅᓯᒪᙱᑦᑐᖅ. ᐊᕐᕌᒍᓐᓄᑦ ᐊᓪᓗᖅᓯᖁᔭᐅᓕᓚᐅᕐᓯᒪᔪᖓ ᒍᕇᑦᒥ,” ᐅᖃᕐᑐᖅ.

“ᐅᓇ ᐊᓯᐊᓄᐊᕐᓂᕋ ᐊᔪᕐᓇᕈᓘᔭᓚᐅᕐᑐᖅ, ᑕᒪᐃᑎᒍᑦ ᐃᓕᓐᓂᐊᕐᓂᒃᑯᑦ ᐊᒻᒪ ᐃᓅᖃᑎᖃᓕᕐᓂᒃᑯᑦ, ᐊᒻᒪ ᑕᒪᑐᒧᖓ ᐃᑲᔪᖅᑕᐅᒻᒪᕆᓚᐅᖅᓯᒪᙱᖢᖓ, ᐱᓗᐊᖅᑐᒥ ᓄᓇᖃᖅᑐᑐᖃᐅᓂᓐᓄᑦ ᐃᓕᓐᓂᐊᖅᑎᐅᓪᓗᖓ.

ᑐᓴᕐᑎᓪᓗᒍ ᐱᓕᕆᔨᒃᓴᒧᑦ ᐃᓂᒃᓴᒥ ᐋᖅᑭᒃᑕᐅᔪᖃᓂᖓᓂ ᓄᓇᖃᖅᑐᑐᖃᕐᒧᑦ ᐃᓕᓐᓂᐊᖅᑎᒧᑦ, ᑎ ᓯᑕᕚᓄ ᐱᓇᓱᓕᑲᐅᑎᒋᓚᐅᕐᓯᒪᔪᖅ ᑭᒡᒐᖅᑐᐃᔨᐅᓂᐊᕐᓂᕐᒥᒃ ᓄᓇᖃᖅᑐᑐᖃᐅᖃᑎᖏᓐᓂᒃ ᓄᓇᓕᕐᔪᐊᕐᒥ.

“ᓯᕗᓪᓕᖅᐹᖅ ᐃᓱᒪᒋᓚᐅᕐᓯᒪᔭᕋ, ᐅᓇ ᐃᖅᑲᓇᐃᔮᒃᓴᓪᓚᕆᒐ,” ᐅᖃᕐᑐᖅ.

“ᖃᓄᐃᓕᐅᕐᓯᒪᒐᒪ ᐃᑲᔪᕈᑎᒋᔪᓐᓇᖅᑕᓐᓂᒃ ᐊᒻᒪᓗ ᑕᐃᒪᓐᓇ ᐊᑐᕐᓗᒍ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑐᓂᒃ ᑕᒪᐅᖓ ᐃᓕᓐᓂᐊᖅᑎᑦᑎᑲᓐᓂᕋᓱᒡᓗᖓ ᐅᐸᒃᓯᒪᔭᑦᑎᑐᑦ.”

ᐅᖃᓚᐅᕐᑐᖅ ᐅᒃᐱᕈᓱᖕᓂᕋᖅᖢᓂ ᖃᓄᐃᓕᐅᕐᓯᒪᓂᖓ ᐊᓯᒥᓂ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑎᓂᒃ ᐃᒃᐱᒍᓱᖕᓂᖅᓴᐅᓯᒪᓕᕐᓂᖓᓂ, ᐊᒻᒪᓗ ᐱᔪᓐᓇᕐᓂᖃᕐᓂᖅᓴᐅᓗᓂ ᐊᐱᖅᑯᑎᐅᔭᕆᐊᓕᖕᓂ ᒪᑯᓂᖓ ᓄᓇᖃᖅᑐᑐᖃᐃᑦ ᒥᒃᓵᓅᖓᔪᓂᒃ ᐃᓕᓐᓂᐊᖅᕕᓕᕆᓂᖅᑎᒍᑦ.

ᑎ ᓯᑕᕚᓄ ᑐᓂᓯᓚᐅᕐᑐᖅ ᑕᕐᕆᔭᒐᓕᐊᒥᒃ ᐊᒻᒪᓗ ᑎᑎᕋᖅᓯᒪᔪᓂᒃ ᐱᓇᓱᒍᑎᖏᓐᓂᒃ ᐃᓚᒋᔭᐅᔪᒃᓴᓂᒃ. ᓵᓚᖃᓚᐅᖅᑐᖅ ᒪᕐᕉᖕᓂ ᓂᕈᐊᒐᒃᓴᐅᖃᑎᖏᓐᓂ ᓂᕈᐊᖅᑎᓪᓗᒋᑦ ᕕᕝᕗᐊᕆ 28-ᖑᑎᓪᓗᒍ.

ᐱᓕᕆᐊᒃᓴᖏᓐᓄᑦ ᐃᓚᒋᔭᐅᓗᓂ, ᑎ ᓯᑕᕚᓄ ᑲᑎᒪᖃᑕᐅᓂᐊᖅᑐᖅ ᑲᑎᒪᓕᖅᐸᑕ ᐋᓐᑎᐅᕆᐅᒥ ᐃᓕᓐᓂᐊᖅᑎᑦ ᐱᓕᕆᔨᖏᓐᓄᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᐃᓚᐅᓗᓂ ᐃᓕᓐᓂᐊᖅᑎᑦ ᐊᐅᓚᑦᑎᔨᖏᓐᓄᑦ ᑲᑎᒪᔪᓂᒃ ᐃᓚᐅᖃᑎᖃᕐᓗᓂ ᒪᕐᕈᒃᑲᓐᓃᖕᓂ ᐃᓕᓐᓂᐊᖅᑎᓂᒃ ᐱᓕᕆᔨᐅᖃᑕᐅᔪᓂᒃ ᐋᑐᕚ-ᑳᕐᑕᓐ ᐃᓕᓐᓂᐊᖅᑐᓕᕆᔨᓄᑦ.

ᓂᕈᐊᖃᑕᐅᔪᓐᓇᔾᔮᙱᒃᑲᓗᐊᖅᖢᓂ ᑲᑎᒪᔨᓂ, ᑭᓯᐊᓂᓕ ᐅᖃᓪᓚᖃᑎᖃᕈᓐᓇᖃᑦᑕᕐᓂᐊᖅᑐᖅ ᐱᓕᕆᔨᐅᖃᑕᐅᔪᓂᒃ ᐊᒻᒪ ᐃᓱᒪᒋᔭᖏᓐᓄᑦ ᐅᓪᓚᒍᓐᓇᕐᓗᓂ ᐊᒻᒪ ᐃᑲᔪᖅᑎᐅᓗᓂ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑎᓂᒃ.

“ᐊᒃᓱᐊᓗᒃ ᑲᒪᒋᔭᒃᓴᖃᓇᖅᑐᖅ ᐱᓕᕆᐊᑎᒍᑦ. ᐊᖑᒻᒪᑎᒋᐊᒃᓴᖅ ᐊᔪᕐᓇᕈᔪᖕᓂᐊᖅᑐᖅ ᑭᓯᐊᓂᓕ ᐱᓕᕆᐊᕆᓇᓱᖕᓂᐊᖅᑕᕋ ᐱᓕᕆᐊᒃᓴᖅ,” ᐅᖃᕐᑐᖅ.

ᓄᓇᖃᖅᑐᑐᖃᕐᒧᑦ ᐃᓱᒪᒋᔭᖃᕈᓐᓇᖅᑐᒥ ᑲᑎᒪᔨᓂ ᐱᒻᒪᕆᐊᓗᒃ ᐅᖃᐅᓯᖃᑲᑕᖕᓂᐊᖅᑎᓪᓗᒋᑦ ᓄᓇᖃᖅᑐᑐᖃᐃᑦ ᒥᒃᓵᓅᖓᔪᓂᒃ, ᐅᖃᕐᑐᖅ ᑎ ᓯᑕᕚᓄ, ᐊᒻᒪᓗ ᐃᑲᔪᕈᑎᐅᔪᓐᓇᖅᖢᓂ ᓄᓇᖃᖅᑐᑐᖃᕐᓂ ᐃᓕᓐᓂᐊᖅᑎᓂᒃ ᐃᑲᔫᑎᒃᓴᓂ ᐊᑐᖃᑕᐅᔪᓐᓇᕐᓗᑎᒃ, ᐃᓱᒪᒃᑯᓪᓗ ᐋᓐᓂᐊᖃᖅᑕᐃᓕᓂᕐᒧᑦ ᐃᑲᔪᖅᑕᐅᓂᕐᓴᐅᓗᑎ ᐊᓯᖏᑦᑎᒍᓪᓗ.

“ᐱᔭᕆᐊᖃᖅᑕᕗᑦ ᓄᖃᖓᒍᑎᐅᓇᔭᙱᒻᒪᑕ,” ᐅᖃᕐᑐᖅ.

ᐃᓕᓐᓂᐊᖅᑕᖏᓐᓂ ᖁᕕᐊᒋᓛᖏᑦ ᖃᓪᓗᓈᑐᑦ ᐃᓕᓐᓂᐊᕐᓂᖅ ᐊᒻᒪ ᐊᑐᖅᑕᐅᓂᑯᕕᓂᓕᕆᓂᖅ. ᐃᓕᓐᓂᐊᙱᑦᑕᕌᖓ ᖃᕋᓴᐅᔭᓂ, ᐊᒻᒪᓗ ᐃᓕᓐᓂᐊᖃᑎᖏᓐᓂᒃ ᐊᔪᕈᓐᓃᕐᓴᖃᑎᖃᙱᒃᑯᓂ ᐊᒻᒪ ᖃᓄᐃᑉᐸᓪᓕᐊᔪᓂ ᖃᐅᔨᒪᓇᓱᖃᑦᑕᙱᑎᓪᓗᒍ, ᑎ ᓯᑕᕚᓄ ᐅᖃᐅᓯᕐᓂᖅ ᐊᔪᕈᓐᓃᖅᓴᖅᖢᓂ ᖁᕕᐊᒋᕙᒃᑕᖓ, ᐃᓗᐊᖅᑐᒥ ᐅᐃᕖᑐᑦ ᐊᒻᒪ ᓯᐹᓂᔅᑎᑐᑦ.

ᑐᙵᓱᒃᑎᑦᑎᔪᖅ ᓄᓇᖃᑐᑐᖃᕐᓂ ᐃᓕᓐᓂᐊᖅᑎᓂ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐅᖃᖃᑎᖃᕈᒪᔪᓂ ᐃᓱᒪᒋᔭᖃᕐᓂᕈᑎ ᖃᓄᑐᐃᓐᓇᖅ.

“ᒪᑐᐃᖓᔪᖅᑎᑐᑦ ᐅᖃᓕᒫᒐᖅᑎᑑᖓᔪᖓ,” ᐅᖃᕐᑐᖅ.

“ᐅᕙᓐᓄ ᑎᑎᕋᕈᓐᓇᑦᑎᐊᖅᑐᓯ ᖃᕋᓴᐅᔭᒃᑯᑦ, ᐅᖃᖃᑎᖃᕐᓗᓯᓘᓐᓃᑦ ᐊᒻᒪᓗ ᐃᑲᔪᖅᑎᐅᓗᑎᒃ ᓄᓇᒋᔭᕐᓄᑦ. ᐱᓕᕆᐊᕆᓇᓱᒃᑕᑎᑦ ᓄᓇᒋᔭᐃᑦ ᐱᐅᓯᕚᓪᓕᕋᓱᒃᑎᓪᓗᒍ ᐊᒻᒪᓗ ᐃᓕᓐᓂᐊᕐᕕᐅᑉ ᖃᓄᐃᓕᐅᕈᓯᖓ ᐱᐅᓯᕚᓪᓕᖅᑎᓐᓇᓱᖕᓂᕐᒧᑦ ᑲᙳᓲᑎᒋᔭᕆᐊᖃᙱᑕᐃᑦ,”