ᓱᓕᔪᓂᒃ ᖃᐅᔨᓇᓱᐊᕐᓂᖓᓂ ᓈᓚᒃᑏᑦ ᐃᓱᒪᓕᐅᕆᕗᑦ ᑭᒻᒥᕈᒻᒥ ᐊᖑᑎ ᐃᒻᒥᓃᓚᐅᕐᓂᖓᓂ

For the English version of this story, please see Inquest jurors determine Kimmirut man took his own life.

ᓈᓚᒃᑏᑦ ᑐᖁᖓᔪᓕᕆᔨᐅᑉ ᓱᓕᔪᓂᒃ ᖃᐅᔨᓇᓱᐊᕐᓂᖓᓂ ᖃᐅᔨᓴᖅᑕᐅᔪᒥ 2019−ᒥ ᑐᖁᓂᖓᓂ ᑭᒻᒥᕈᒻᒥ ᐊᖑᒻᒥ ᔪᐊᔾ ᐋᕐᓗᖅᑐᒥ ᐃᓱᓕᓚᐅᖅᐳᖅ ᑐᖁᓚᐅᕐᓂᖓᓂ ᐃᒻᒥᓃᕐᓂᕐᒧᑦ ᐊᒻᒪ ᓴᓇᓚᐅᖅᐳᑦ ᐅᓄᕐᓂᖅᓴᐅᔪᓂ 30−ᓂ ᐊᑐᓕᖁᔭᐅᔪᓂ ᑐᕌᖓᔪᒥ ᓄᖅᑲᖅᑎᑦᑎᓂᕐᒥ ᐊᔾᔨᐸᓗᐊᓂ ᑐᖁᓂᐅᔪᒥ.

ᐊᑐᓕᖁᔭᐅᓚᐅᕆᕗᑦ ᓄᓇᕗᒻᒥ ᒐᕙᒪᒃᑯᑦ ᑕᐃᓯᓂᖏᓐᓂ “ᐃᒻᒥᓃᕐᓂᕐᒥ ᑐᐊᕕᕐᓇᖅᓯᓂᖓᓂ.”

“ᓂᕆᐅᒃᑐᐃᓐᓇᐅᕗᒍᑦ ᐊᓯᐊᓂ ᑐᖁᓂᐅᔪᒥ ᓄᖅᑲᖅᑎᑕᐅᓂᐊᖅᐳᖅ ᐱᑎᑕᐅᓂᖓᓂ ᐊᑐᓕᖁᔭᐅᔪᓂ ᐅᕙᓂ ᓴᓇᔭᐅᔪᓂ,” ᓄᓇᕘᑉ ᑐᖁᖓᔪᓕᕆᔨᓄᑦ ᐊᖓᔪᖅᑳᖓ ᓘᒃᑖᖅ ᒪᐃᑯᓪ ᕗᑦ ᐅᖃᓚᐅᖅᐳᖅ ᐊᐃᑉᕆᓕ 4−ᒥ ᐃᓱᐊᓂ ᐅᓪᓗᓂ-ᑕᓪᓕᒪᓂ ᑐᓵᑎᑦᑎᓂᐅᔪᒥ.

ᑕᐃᑲᓂ ᓱᓕᔪᓂᒃ ᖃᐅᔨᓇᓱᐊᕐᓂᖓᓂ, 6−ᖑᔪᓂ ᓈᓚᒃᑎᓂᑦ ᑐᓴᓚᐅᖅᐳᑦ ᐅᓂᒃᑲᐅᓯᖓᓂ 14−ᖑᔪᓂ ᐅᓂᒃᑳᖅᑎᓂ ᑕᐅᑐᒃᑐᕕᓂᕐᓂ, ᐃᓚᖃᖅᑐᒥ ᐋᕐᓗᖅᑑᑉ ᐊᑦᑕᖓ ᓖᕕ ᐋᕐᓗᖅᑐ, ᓇᓂᓯᓚᐅᖅᑐᒥ ᕿᓄᕐᔪᐊᖅᑐᒥ 28-ᓂ-ᐅᑭᐅᓕᖕᓂ ᐅᔪᕈᖓᓂ ᒪᕐᕉᖕᓂ ᖁᑭᐅᑎᓂ ᐊᒻᒪ ᐃᒻᒥᓂᒃ ᐋᓐᓂᕐᓂᐊᕐᓂᕋᖅᖢᓂ ᐅᓪᓛᖓᓂ ᑲᐱᓯᓚᐅᖅᑎᓪᓗᒍ ᐊᐃᑉᐸᖓᓂ.

ᐅᓂᒃᑳᓚᐅᖅᐳᖅ ᐋᕐᓗᖅᑐ ᐅᖃᓚᐅᖅᐳᖅ “ᑲᑉᐱᐊᓱᕐᔪᐊᕐᓂᖓᓂ” ᐅᑎᕆᐊᖃᕐᓂᐊᕐᓂᖓᓂ ᐊᓄᓪᓚᒃᓰᕕᖕᒧᑦ ᐊᒻᒪ ᐱᐅᙱᑦᑐᒥ ᖃᓄᐃᓐᓂᖃᓚᐅᕐᓂᖓᓂ ᐊᓄᓪᓚᒃᓯᖅᑎᓪᓗᒍ ᓯᕗᓂᐊᓂ.

ᒪᕐᕉᖕᓂ ᑲᓇᑕᒥ ᐸᓖᓯᒃᑯᑦ ᐸᓖᓯᐅᔪᓂ — Sgt. ᑕᔅᑎᓐ ᒍᕌᓐᑦ ᐊᒻᒪ Cpl. ᐸᐃᑎᓐ ᐊᐅᔅᑐᕆᖕ — ᑭᐅᓚᐅᖅᑐᓂ ᐋᕐᓗᖅᑑᑉ ᐊᖏᕐᕋᖓᓄᑦ ᐱᓇᓱᐊᖅᑎᑦᑎᓇᓱᐊᖅᖢᑎᒃ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᑲᔪᖅᓱᐃᓂᕐᒥ ᐅᓂᒃᑳᓚᐅᖅᐳᖅ. ᑕᑯᒐᒥᒃ ᐃᒻᒥᓂᒃ ᐋᓐᓂᕋᓱᐊᕐᓂᖓᓂ, ᐊᑐᕆᐊᓚᐅᖅᐳᑦ ᓄᑲᖅᑎᑦᑎᓂᕐᒧᑦ ᖁᑭᐅᒻᒥ — ᖁᑭᐅᑎ ᐱᑎᑦᑎᓲᖑᔪᒥ ᐆᒻᒪᖅᑯᑎᒥᒃ ᓄᑭᖃᕈᓐᓃᖅᑎᑦᑎᓂᕐᒧᑦ ᑭᓇᑐᐃᓐᓇᒥᒃ — ᑭᓯᐊᓂ ᐱᓕᕆᑦᑎᐊᕈᓐᓇᓚᐅᙱᓚᖅ ᐃᔾᔪᓂᖓᓂ ᔭᐃᑲᖓᓂ ᐊᑐᓚᐅᖅᑕᖓᓂ.

ᑐᖁᖓᔪᓕᕆᔨ ᓘᒃᑖᖅ ᐋᓪᕗᕋᑐ ᐅᐊᑯᕐ ᐅᖃᓚᐅᖅᐳᖅ ᐋᕐᓗᖅᑐ ᐆᒪᔪᓐᓇᕋᔭᓚᐅᙱᓚᖅ ᐃᒻᒥᓂᒃ-ᐱᑎᑦᑐᒥᒃ ᑲᐱᓂᐅᔪᓂ ᐸᓖᓯᒃᑯᑦ ᐃᓯᓚᐅᖅᑎᓪᓗᒋᑦ ᐊᖏᕐᕋᖓᓄᑦ.

ᓄᓇᕘᑉ ᒥᓂᔅᑕᐅᑉ ᑐᖏᓕᖓᑕ ᐃᑲᔪᖅᑎᖓ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᕕᒃᑐᐊᕆᐊ ᒫᑦᓴᓐ ᐅᓂᒃᑳᕆᓚᐅᖅᐳᖅ ᐊᓯᔾᔨᕐᓂᐅᔪᓂ ᓄᑖᖑᔪᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᒪᓕᒐᕐᒥ ᑐᕌᖓᔪᒥ ᑐᓂᓯᓂᕐᒥ ᐱᔪᓐᓇᕐᓂᖃᕐᓂᐅᔪᓂ ᐱᔪᓐᓇᕐᓂᐅᔪᒥ ᓄᖅᑲᖅᑎᑦᑎᓂᕐᒥ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᑐᐊᕕᕐᓇᕐᓂᐅᔪᓄᑦ ᕿᓚᒻᒥᐅᓂᖅᓴᒥ.

ᐋᑐᕚᒥ ᐸᓖᓯᒃᑯᑦ ᐱᔨᑦᑎᕋᖅᑎᖏᓐᓄᑦ Det.-Sgt. ᑲᕙᓐ ᔭᐃᑯᑉᔅ, ᐱᖓᔪᖓᓐᓂ-ᐱᓕᕆᓂᕐᒧᑦ ᖃᐅᔨᓴᕐᓂᖃᓚᐅᖅᑐᖅ ᑲᓇᑕᒥ ᐸᓖᓯᒃᑯᓐᓄᑦ ᐱᓕᕆᓂᖓᓂ, ᐅᖃᓚᐅᖅᐳᖅ ᐸᓖᓰᑦ ᓄᖅᑲᖅᑎᑦᑎᓇᓱᐊᕐᓂᖏᓐᓂ ᐋᕐᓗᖅᑐᒥ “ᐅᐱᒋᔭᐅᕐᔪᐊᓪᓗᐊᖅᐳᑦ” ᐊᒻᒪ “ᑲᒪᓇᓚᐅᖅᐳᑦ.”

ᐱᔾᔪᑎᖓ ᑐᖁᖓᔪᓕᕆᔨᐅᑉ ᓱᓕᔪᓂᒃ ᖃᐅᔨᓇᓱᐊᕐᓂᖓᓂ ᐃᓱᒪᓕᐅᕆᓂᐅᙱᑉᐳᖅ ᐸᓯᒃᖠᓂᕐᒥ ᓲᕐᓗ ᐱᕋᔭᒃᑐᓄᑦ ᐃᖅᑲᖅᑐᖅᑕᐅᓂᐅᔪᒥ ᑕᐃᒪᐃᑉᐸᖕᓂᖓᓂ. ᑐᕌᒐᕆᔭᖓ ᓱᓕᔪᓂᒃ ᖃᐅᔨᓇᓱᐊᕐᓂᖓᓂ ᓈᓚᒃᑎᓂ ᐃᓱᒪᓕᐅᕆᓂᖓᓂ ᐱᔾᔪᑎᖓᓂ ᑐᖁᓂᐅᔪᒥ ᐊᒻᒪᓗ ᓴᓇᓗᑎᒃ ᐊᑐᓕᖁᔭᐅᔪᓂ.ᓄᓇᕗᒻᒥ ᑐᖁᖓᔪᓕᕆᔨᐅᑉ ᑎᑎᕋᕐᕕᖓ ᑐᓂᓯᓚᐅᖅᐳᖅ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ ᖃᕋᓴᐅᔭᑎᒍᑦ ᑲᓱᕐᕕᒃᓴᒥ ᒪᓕᖕᓂᕐᒧᑦ ᖃᓄᐃᓐᓂᐅᔪᓂ ᐅᖓᓯᒃᑐᒃᑯᑦ.

ᐊᑕᐅᓯᖅ ᓈᓚᒃᑎᐅᔪᒥ ᐅᖃᓚᐅᖅᐳᖅ ᐃᒻᒥᓃᕐᓂᖅ ᑭᒻᒥᕈᒻᒥ “ᑐᐊᕕᕐᓇᕐᓂᙳᖅᓯᒪᕗᖅ” ᑎᓴᒪᓂ ᐊᓯᖏᓐᓂ ᐃᓄᖕᓂ ᑐᖁᔪᓂ ᑕᐃᒪᓐᓇᑎᑐᑦ ᐋᕐᓗᖅᑑᖅ ᑐᖁᓂᖓᓂ ᐊᕐᕌᒍᑦ 6-ᖑᓕᖅᑐᓂ ᖄᖏᖅᓯᒪᔪᓂ.

ᕕᕗᐊᕆ 9, 2019−ᒥ, ᐋᕐᓗᖅᑐ ᐊᖏᕐᕋᖓᓃᓚᐅᖅᐳᖅ, ᕿᓄᖓᕐᔪᐊᖅᖢᓂ ᐊᒻᒪ ᐃᒻᒥᓃᕐᓂᐊᕐᓂᕋᖅᖢᓂ ᑲᐱᓯᓚᐅᖅᑎᓪᓗᒍ ᐊᐃᑉᐸᖓᓂ ᐅᓐᓅᓚᐅᖅᑎᓪᓗᒍ. ᐸᓖᓯᒃᑯᓐᓂ ᐊᓯᖏᓐᓂᓪᓗ ᐃᓯᖅᑎᑦᑎᔪᒪᓚᐅᙱᓚᖅ ᐊᖏᕐᕋᖓᓄᑦ. ᐸᓖᓰᑦ ᐊᔭᒃᓯᓪᓗᑎᒃ ᒪᑐᐃᖅᓯᓚᐅᖅᑎᓪᓗᒋᑦ ᓯᕗᓂᐊᓂ ᐹᖓᓂ, ᐋᕐᓗᖅᑐ ᐃᒻᒥᓂᒃ ᑲᐱᓯᓚᐅᖅᐳᖅ ᖁᖓᓯᖓᒍᑦ 11−ᖏᖅᓱᖅᖢᓂ, ᓱᓕᔪᓂᒃ ᖃᐅᔨᓇᓱᐊᕐᓂᖓᓂ ᑐᓴᓚᐅᖅᐳᑦ.

ᐸᓖᓰᑦ ᐅᓯᓕᐅᔾᔨᓚᐅᖅᐳᑦ ᐋᓐᓂᐊᕕᖕᒧᑦ ᐅᓄᙱᓐᓂᖅᓴᐅᔪᒥ 2 ᒥᓂᑦᓂ ᐅᖓᓯᒃᑎᒋᔪᒥ. ᐋᕐᓗᖅᑐ ᑎᑭᑐᐊᕐᒪᑦ ᐊᒻᒪ 30 ᑎᓂᑦᓄᑦ ᐅᖃᐅᓯᐅᓚᐅᖅᐳᖅ ᑐᖁᖓᓂᖓᓂ, ᐃᓗᐊᖅᓴᐃᔩᑦ ᑎᓪᓕᕐᓂᕐᒥ ᓇᓂᓯᔪᓐᓇᓚᐅᙱᓚᑦ.

ᐃᓚᖃᖅᑐᒥ ᐃᓱᒪᓕᐅᕆᓂᕐᒥ ᖃᓄᖅ ᐋᕐᓗᖅᑐ ᑐᖁᓚᐅᕐᓂᖓᓂ, ᓈᓚᒃᑏᑦ ᐊᐱᕆᔭᐅᓚᐅᕆᕗᑦ ᓴᓇᓂᕐᒥ ᐊᑐᓕᖁᔭᐅᔪᓂ ᐱᔪᒪᓂᐅᔪᒥ ᓄᖅᑲᖅᑎᑦᑎᓂᕐᒥ ᑐᖁᓂᐅᔪᓂ ᐊᔾᔨᐸᓗᐊᓂ ᓯᕗᓂᒃᓴᒥ.

ᐸᓖᓰᑦ ᐃᖅᑲᓇᐃᔭᖅᑎᑭᓗᐊᓚᐅᖅᐳᑦ ᐊᒻᒪ ᐱᓕᕆᐊᒃᓴᖃᓗᐊᖅᖢᑎᒃ ᑐᕌᖅᐸᓪᓕᐊᔪᒥ ᐋᕐᓗᖅᑑᑉ ᑐᖁᓂᖓᓂ. ᓈᓚᒃᑏᑦ ᐊᑐᓕᖁᔭᐅᓚᐅᖅᐳᑦ ᑲᓇᑕᒥ ᐸᓖᓯᒃᑯᑦ ᐋᖅᑭᐅᒪᑎᑦᑎᓂᖏᓐᓂ ᐱᖓᓱᓂ ᐸᓖᓯᐅᔪᓂ ᑭᒻᒥᕈᒻᒥ ᐸᓖᓯᒃᑯᕕᖓᓂ ᖃᖓᓕᒫᑦᑎᐊᖅ. ᓴᓇᓚᐅᕆᕗᑦ ᐊᑐᓕᖁᔭᐅᔪᓂ ᑕᐅᕘᓇ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ.

ᓈᓚᒃᑏᑦ ᓴᓇᓚᐅᖅᐳᑦ 31−ᓂ ᐊᑐᓕᖁᔭᐅᔪᓂ ᐅᖃᐅᓯᐅᔪᓂ ᐃᓚᖃᖅᑐᒥ ᐸᓖᓯᓕᕆᓂᕐᒥ ᐊᒻᒪ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ.

ᐸᓖᓯᓕᕆᓂᖅ

• ᐱᖓᓱᓂ ᐸᓖᓯᓂᑦ ᐃᓂᖃᖅᑎᑕᐅᓪᓗᐊᖅᐳᑦ ᓄᓇᓕᖕᓂ ᖃᖓᓕᒫᑦᑎᐊᖅ.
• ᓄᓇᓕᖕᓂ ᑲᓇᑕᒥ ᐸᓖᓯᒃᑯᑦ ᐸᓖᓯᒃᑯᕕᖓ ᐃᖅᑲᓇᐃᔭᖅᑎᑦᑎᓪᓗᐊᖅᐳᑦ ᒪᕐᕉᖕᓂ ᐅᖃᐅᓯᓕᖕᒥ ᐃᖅᑲᓇᐃᔭᖅᑎᒥᒃ ᐃᓚᒋᔭᐅᔪᒥᒃ ᐃᑲᔪᖅᓱᐃᓂᕐᒥ ᐅᖃᓗᒃᑎᐅᔪᓄᑦ ᐊᒻᒪ ᐸᓖᓯᒃᑯᓐᓂ.
• ᓄᑖᓂ ᑲᓇᑕᒥ ᐸᓖᓯᒃᑯᑦ ᐸᓖᓯᐅᔪᑦ ᐱᓪᓗᐊᖅᐳᑦ ᓄᓇᓕᖕᓂ, ᐃᓕᖅᑯᓯᒥ ᐊᒻᒪ ᓄᓇᓕᖕᓂ ᓄᓇᓕᖕᓄᑦ−ᑐᕌᖓᔪᓂ ᐱᓕᒻᒪᒃᓴᓂᐅᔪᒥ ᐊᒻᒪ ᓇᓗᓇᐃᔭᐃᔾᔪᔾᔭᐅᓂᕐᒥ.

ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ

• ᐃᓕᓯᒪᐃᓐᓇᖅᑐᓂ ᐃᓱᒪᒧᑦ ᐋᓐᓂᐊᖃᕐᓇᙱᑦᑐᓕᕆᓂᕐᒥ ᐃᓗᐊᖅᓴᐃᔨᓂᒃ ᐃᖅᑲᓇᐃᔭᖅᑎᑕᐅᓪᓗᐊᖅᐳᖅ ᐱᓕᕆᓂᕐᒥ ᐋᓐᓂᐊᕕᖕᒥ ᐊᑯᓂᐅᔪᒃᑯᑦ ᑐᙵᕕᐅᔪᒥ.
• ᓄᓇᓕᖕᓂ ᐃᓄᐃᑦ ᐃᖅᑲᓇᐃᔮᖃᖅᑎᑕᐅᓪᓗᐊᖅᐳᑦ ᐊᒻᒪ ᐱᓕᒻᒪᒃᓴᖅᑕᐅᓗᑎᒃ ᐃᓅᓯᓕᕆᔨᐅᓂᕐᓄᑦ.
• ᐊᖑᑎᓄᑦ ᐊᒻᒪ ᒪᒃᑯᒃᑐᓄᑦ ᑲᑎᙵᓂᐅᔪᓂ ᐊᒻᒪ ᑲᑎᕝᕕᐅᔪᓂ ᓴᖅᑭᑎᑕᐅᓪᓗᐊᖅᐳᑦ ᐊᒻᒪ ᐋᖅᑭᐅᒪᑎᑕᐅᓗᑎᒃ.

ᐃᑲᔪᕈᑎᒃᓴᐃᑦ ᐊᑐᐃᓐᓇᐅᕗᑦ ᐃᓄᖕᓄᑦ ᑲᑉᐱᐊᓇᖅᑐᒦᑦᑐᓄᑦ ᐊᒻᒪ ᐅᖃᓪᓚᖃᑎᖃᕆᐊᓕᖕᓂ ᑭᓇᑐᐃᓐᓇᒧᑦ:

ᑲᒪᑦᓯᐊᖅᑐᑦ ᐅᖃᓗᒡᕕᒃᓴ ᐃᑲᔪᖅᑕᐅᓂᕐᒧᑦ ᓄᓇᕗᒻᒧᑦ−ᑐᕌᖓᔪᒥ ᐊᒻᒪ ᐊᑐᐃᓐᓇᖃᖅᑎᑦᑎᕗᖅ ᐱᔨᑦᑎᕋᕐᓂᐅᔪᓂ ᐃᓄᒃᑎᑐᑦ. ᐅᖃᓘᑎᖓ: 979-3333 ᐃᖃᓗᖕᒥᐅᑕᓄᑦ ᐊᒻᒪ 1-800-265-3333 ᐊᓯᖏᓐᓄᑦ ᓄᓇᕗᒻᒥᐅᓄᑦ.

ᐃᒻᒥᓃᕐᓂᕐᒥ ᑐᐊᕕᕐᓇᖅᓯᓂᖓᓂ ᐅᖃᓗᒡᕕᒃᓴ ᐃᑲᔪᖅᑕᐅᓂᕐᒧᑦ ᐊᑐᐃᓐᓇᐅᒋᕗᖅ 24-7 ᖃᓪᓗᓈᑎᑐᑦ ᐊᒻᒪ ᐅᐃᕖᑎᑐᑦ ᐅᖃᓘᑎᒃᑯᑦ ᐅᕝᕙᓘᓐᓃᑦ ᐅᖃᓛᑎᕋᓛᑎᒍᑦ ᑎᑎᕋᕐᓂᐅᔪᒥ ᐅᕗᖓ 9-8-8.

ᐊᓪᓚᓄᑦ ᐊᒻᒪ ᐃᓄᖕᓄᑦ ᓂᕆᐅᖕᓂᖅ ᖃᓄᐃᙱᑦᑎᐊᕐᓂᕐᒧᑦ ᐅᖃᓗᒡᕕᒃᓴ ᐃᑲᔪᖅᑕᐅᓂᕐᒧᑦ: 1-855-242-3310 ᐅᕝᕙᓘᓐᓃᑦ ᐅᖃᓪᓚᒡᓗᓂ ᖃᕋᓴᐅᔭᑎᒍᑦ ᐅᕗᖓ hopeforwellness.ca.