ᖃᕋᓴᐅᔭᒃᑰᕈᑕᐅᔪᒥ ᓱᒃᑲᐃᑦᑐᒥ ᐅᑎᖅᐳᖅ ᐃᖃᓗᖕᓄᑦ ᐃᑲᕐᕋᑦ 24−ᓂ ᐊᔪᓕᓚᐅᖅᑎᓪᓗᒍ

For an English version of this article, please see Internet slowly returns to Iqaluit, 24 hours after outage.

ᐅᓄᕐᓂᖅᓴᐅᔪᓂ ᐃᑲᕐᕋᓂ 24 ᑭᖑᓂᐊᓂ ᐊᒥᓱᑦ ᐃᖃᓗᖕᒥᐅᑦ ᐊᓯᐅᔨᓚᐅᖅᑎᓪᓗᒋᑦ ᖃᕋᓴᐅᔭᒃᑰᕈᑕᐅᔪᒥ, ᓄᐊᑦᐅᐃᔅᑎᐅᓪ ᐊᒻᒪ ᐱᐅᓪ ᐱᔨᑦᑎᕋᕐᓂᖓ ᓱᒃᑲᐃᑦᑐᒥ ᐅᑎᖅᐸᓪᓕᐊᕗᖅ ᓄᓇᓕᐸᐅᔭᒧᑦ.

@body: ᓄᓇᖃᖅᑎᐅᔪᑦ ᐊᑐᓚᐅᖅᐳᑦ ᑕᑭᔪᒥ ᖃᕋᓴᐅᔭᒃᑰᕈᑕᐅᔪᒥ ᐊᑲᐅᙱᓕᐅᕈᑕᐅᔪᒥ ᐱᒋᐊᓚᐅᖅᑐᒥ 11−ᐸᓗᖕᒥ ᐅᓪᓛᒃᑯᑦ ᐋᒍᔅᑎ 3−ᒥ ᐊᒻᒪ ᐅᑎᖅᑎᑕᐅᑕᐃᓐᓇᓚᐅᖅᐳᖅ ᓄᐊᑦᐅᐃᔅᑎᐅᓪᑯᑦ ᓂᐅᕕᖅᐸᒃᑐᓄᑦ ᐋᒍᔅᑎ 4−ᒥ.

ᐅᖃᖅᑎᐅᔪᒥ ᐱᐅᓪᑯᓐᓄᑦ ᑭᐅᓚᐅᙱᓚᖅ ᑕᐃᑲᓂ ᐅᓪᓗᖓᓂ ᑐᒃᓯᕋᕐᓂᐅᔪᒧᑦ ᐅᖃᐅᓯᒃᓴᓂ ᖃᓄᐃᓐᓂᖓᓂ ᐱᔨᑦᑎᕋᕐᓂᖓᓂ.

ᐃᓚᖏᑦ ᓇᖕᒥᓂᖃᖅᑎᐅᔪᑦ ᒪᑐᓯᓚᐅᑲᒋᐊᖃᓚᐅᖅᐳᑦ ᐅᕝᕙᓘᓐᓃᑦ ᑮᓇᐅᔭᑐᐃᓐᓇᓄᑦ ᐱᔨᑦᑎᕋᕐᓂᐅᔪᒥ ᑕᐃᑲᓂ ᐊᑲᐅᙱᓕᐅᕈᑕᐅᔪᒥ.

ᐊᔪᓕᕐᓂᐅᔪᖅ ᐱᑎᑕᐅᓂᖃᓚᐅᖅᐳᖅ ᑲᓱᖃᑎᒌᒃᓯᒪᔪᓄᑦ ᐊᑲᐅᙱᓕᐅᕈᑕᐅᔪᒧᑦ ᐅᖃᓚᐅᖅᐳᖅ ᐋᓐᑐᕉ ᐋᓐᑐᓴᓐ, ᐋᔩᖃᑎᒌᖕᓂᕐᒧᑦ ᑐᑭᒧᐊᒃᑎᑦᑎᔨ ᓄᐊᑦᐅᐃᔅᑎᐅᓪᑯᓐᓂ, ᐃᓚᒋᐊᕈᑕᐅᔪᒥ ᐱᐅᓪᑯᓐᓄᑦ.

“ᐃᑉᐸᒃᓴᖅ, ᖃᕋᓴᐅᔭᒃᑰᕈᑕᐅᔪᒥ ᐊᒻᒪ ᐅᖃᓘᑎᕋᓛᖅᑎᒍᑦ ᓂᐅᕕᖅᐸᒃᑐᑦ ᐃᖃᓗᖕᓂ ᐅᔾᔨᕆᕙᓪᓕᐊᓚᐅᖅᐳᑦ ᐊᑲᐅᙱᓕᐅᕈᑕᐅᔪᓂ ᐱᔨᑦᑎᕋᕐᓂᖏᓐᓄᑦ,” ᐋᓐᑐᓴᓐ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᐅᓇ ᐱᑎᑕᐅᓚᐅᖅᐳᖅ ᐃᓗᐊᒍᑦ ᑲᓱᖃᑎᒌᒃᓯᒪᔪᓄᑦ ᐊᑲᐅᙱᓕᐅᕈᑕᐅᔪᒥ ᐊᒻᒪ ᐅᑎᖅᑎᕆᔪᓐᓇᓚᐅᖅᐳᒍᑦ ᑕᒪᒃᑭᐅᒪᔪᒥ ᐱᔨᑦᑎᕋᕐᓂᐅᔪᒥ ᐅᓪᓛᖅ.”

ᐃᖃᓗᖕᒥᐅᑕᖅ ᐲᑕ ᕼᐃᔾᓄᐅᐃᑦᔅ ᐅᖃᓚᐅᖅᐳᖅ ᐸᓂᖓ ᖃᕋᓴᐅᔭᑎᒍᑦ ᖃᐅᔨᓴᖅᑕᐅᓂᖃᕆᐊᖃᓚᐅᖅᐳᖅ ᐋᒍᔅᑎ 3−ᒥ ᐊᒋᐊᒐᕐᒧᑦ ᖃᐅᔨᓴᕐᓂᖓᓂ ᐅᕘᓇ Royal Conservatory ᓂᔾᔮᑎᑦᑎᓂᕐᒧᑦ ᑐᕌᓐᑐᒥ.

ᖃᕋᓴᐅᔭᒃᑰᕈᑕᐅᔪᒥ ᐊᑐᐃᓐᓇᖃᙱᓐᓂᕐᒥ, ᖃᐅᔨᓴᖅᑕᐅᓂᖓ ᑭᖑᕙᕆᐊᖅᑎᑕᐅᓚᐅᖅᐳᖅ ᐅᒃᑐᐱᕆᒧᑦ.

“ᐅᓇ ᐅᕙᑦᑎᓐᓂ ᐊᒃᑐᐃᓂᖃᕐᔪᐊᖅᓯᒪᕗᖅ, ᒫᓐᓇᐅᔪᒥ [ᐸᓂᒐ] ᐱᔭᕆᐅᖅᓴᒃᑲᓐᓂᕆᐊᖃᓕᖅᐳᖅ ᒪᕐᕉᖕᓄᑦ ᑕᖅᑭᓄᑦ,” ᐅᖃᓚᐅᖅᐳᖅ ᕼᐃᔾᓄᐅᐃᑦᔅ, ᑕᒪᒃᑭᓂ ᓄᐊᑦᐅᐃᔅᑎᐅᓪᒥ ᐊᒻᒪ ᐱᐅᓪᒥ ᖃᕋᓴᐅᔭᒃᑰᕈᑕᐅᔪᒥ ᑐᓂᓯᔨᐅᔪᓂ.

“ᓂᔾᔮᑎᑦᑎᓂᕐᒥ, ᐃᒃᓯᖕᓇᓚᐅᑲᒃᑯᕕᐅᒃ ᐅᕝᕙᓘᓐᓃᑦ ᐱᔭᕆᐅᖅᓴᙱᓪᓗᑎᑦ ᕿᓚᒻᒥᐅᔪᒥ, ᐊᓯᐅᔨᓂᐊᖅᐸᐃᑦ.”

ᐊᑐᐃᓐᓇᖃᕈᓐᓇᙱᓐᓂᕐᒥ ᖃᕋᓴᐅᔭᒃᑰᕈᑕᐅᔪᒥ ᐊᖏᕐᕋᒥ ᑕᐃᑯᖓ ᐅᓐᓄᓴᒃᑯᑦ−ᕿᑎᖅᐸᓯᐊᓄᑦ ᐋᒍᔅᑎ 4−ᒧᑦ, ᕼᐃᔾᓄᐅᐃᑦᔅ ᐃᖅᑲᓇᐃᔭᖅᐳᖅ ᓄᓇᕗᒻᒥ ᐅᑭᐅᖅᑕᖅᑐᒥ ᓯᓚᑦᑐᖅᓴᕐᕕᖕᒥ ᐊᒻᒪ ᐅᖃᓚᐅᖅᐳᖅ ᐱᔨᑦᑎᕋᕐᓂᖓ ᐊᑐᐃᓐᓇᐅᓚᐅᖅᐳᖅ ᑕᐃᑲᓂ.

ᑲᓇᐃᑎᐊᓐ ᓄᐊᑦᑯᑦ ᖃᖓᑕᓲᖅᑏᑦ ᐅᖃᓚᐅᖅᐳᖅ ᖃᕋᓴᐅᔭᒃᑰᕈᑕᐅᔪᒥ ᐱᔨᑦᑎᕋᕐᓂᖃᓚᐅᙱᓚᑦ ᐃᖃᓗᖕᓂ ᒥᑦᑕᕐᕕᖓᓂ ᐋᒍᔅᑎ 3−ᒥ, ᐱᑎᑦᑎᓚᐅᖅᑐᒥ ᑭᖑᕙᕆᐊᕐᓂᐅᔪᓂ ᑕᓪᓕᒪᓂ ᖃᖓᑕᓂᐅᓂᐊᖅᑐᓂ ᐊᒻᒪ ᑕᒪᒃᑭᑦ ᐅᓯᑲᑦᑕᖅᑕᐅᓂᐅᔪᑦ ᑎᑎᕋᓪᓚᕆᒡᓗᒍ ᐱᓕᕆᔭᐅᔭᕆᐊᖃᓚᐅᖅᐳᑦ.

“ᐃᑭᒪᔪᓄᑦ ᐊᐅᓚᑕᐅᓂᐅᔪᒥ ᐱᔭᕇᖅᑕᐅᓚᐅᖅᐳᑦ ᑎᑎᕋᖅᑕᐅᖔᖅᖢᑎᒃ ᐃᑉᐸᒃᓴᖅ ᐱᑎᑦᑎᓚᐅᖅᑐᒥ ᐃᓚᖏᓐᓂ ᑭᖑᕙᕆᐊᕐᓂᐅᔪᓂ, ᑭᓯᐊᓂ ᑕᒪᒃᑭᑦ ᐋᖅᑭᒃᑕᐅᓯᒪᓂᐅᔪᓂ ᖃᖓᑕᓂᐅᔪᑦ ᐊᐅᓚᑕᐅᓚᐅᖅᐳᑦ ᓴᓂᐊᓂ ᐃᓚᖏᓐᓂ ᐃᓚᒋᔭᐅᙱᑦᑐᒥ ᓄᖅᑲᖅᑎᑕᐅᓂᐅᔪᓂ ᐱᔾᔪᑎᖃᖅᑐᒥ ᓯᓚᒧᑦ ᐊᒻᒪ ᐋᖅᑭᐅᒪᑎᑦᑎᓂᐅᔪᓄᑦ,” ᑲᓇᐃᑎᐊᓐ ᓄᐊᑦ ᐅᖃᖅᑎᐅᔪᒥ ᑲᕙᓐ ᖃᑉᓗᑦᓯᐊᖅ ᐅᖃᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ.

“ᐅᓯᑲᑦᑕᕐᓂᐅᔪᒧᑦ ᑲᑎᙵᓂᐅᔪᓂ ᐊᖑᒻᒪᑎᓯᒪᔪᓐᓇᖅᐳᖅ ᐅᓯᔭᐅᔪᓂ, ᑭᓯᐊᓂ ᑕᒪᒃᑭᑦ ᐅᓯᔭᐅᓂᐅᔪᑦ ᖃᐅᔨᓴᖅᑕᐅᕗᑦ ᑎᑎᕋᕐᓂᐅᔪᒃᑯᑦ ᑭᓯᐊᓂ ᖃᕋᓴᐅᔭᒃᑰᕈᑕᐅᔪᒥ ᐅᑎᕈᓂ.”

ᐅᖃᐅᓯᐅᓪᓗᓂ ᖃᑉᓗᑦᓯᐊᕐᒧᑦ, ᒥᑦᑕᕐᕕᐅᑉ ᐅᐊᔭᖃᙱᑦᑐᒧᑦ ᑲᓱᖃᑎᒌᖕᓂᐅᔪᒥ ᐅᑎᖅᑎᑕᐅᓚᐅᖅᐳᖅ ᐋᒍᔅᑎ 4−ᒥ 9:30−ᐸᓗᖕᒥ ᐅᓪᓛᒃᑯᑦ ᐊᒻᒪ ᑯᖏᕙᕆᐊᕐᓂᖃᕈᓐᓃᓚᐅᖅᐳᑦ ᖃᖓᑕᓂᐅᔪᓂ ᐋᖅᑭᒃᑕᐅᓯᒪᓂᐅᔪᓄᑦ ᐅᓪᓗᖓᓂ.

ᕼᐃᔾᓄᐅᐃᑦᔅ ᐅᖃᓚᐅᖅᐳᖅ ᑕᐃᒪᑐᖅ ᖃᕋᓴᐅᔭᒃᑰᕈᑕᐅᔪᒥ ᐊᑲᐅᙱᓕᐅᕈᑕᐅᔪᓂ ᐋᖅᑭᒃᑕᐅᓂᖓᓂ ᕿᓚᒻᒥᐅᓛᒃᑯᑦ. ᓂᕆᐅᒃᑲᓐᓂᕆᕗᖅ ᐊᑲᐅᙱᓕᐅᕈᑎᖃᔾᔮᕈᓐᓃᕐᓂᖓᓂ ᐅᑭᐊᒃᓵᒥ, ᑕᒪᒃᑭᒐᓚᑦ ᐃᓕᓐᓂᐊᖅᑏᑦ ᓯᓚᑦᑐᖅᓴᕐᕕᖕᒥ ᐱᓕᕆᕙᖕᒪᑕ ᑕᒪᒃᑭᒐᓚᖕᓂ ᐃᓕᓐᓂᐊᕐᓂᖏᓐᓂ ᖃᕋᓴᐅᔭᑎᒍᑦ.

“ᖃᓄᐃᖅᓴᒃᓴᕋᐃᙱᕐᔪᐊᖅᐳᒍᑦ ᐊᒻᒪ ᑐᑭᓯᐅᒪᓪᓗᑕ ᓄᓇᓕᐅᓪᓗᑕ,” ᐅᖃᓚᐅᖅᐳᖅ. “ᑭᓯᐊᓂ ᓂᙵᖕᓇᒐᓚᒃᐳᖅ ᐃᓛᓐᓂᒃᑯᑦ ᐊᒻᒪ ᕿᐸᓇᖅᖢᓂ ᐃᓛᓐᓂᒃᑯᑦ ᐱᔭᕆᐊᖃᕐᔪᐊᖅᑎᓪᓗᑎᒃ ᐅᑯᓂᖓ ᐱᔨᑦᑎᕋᕐᓂᐅᔪᓂ .”

— ᑎᑎᖅᑲᖁᑕᐅᔪᓂ ᑕᐃᕕᑦ ᐱᐊᓐᒥ