ᐃᓄᐃᓐᓇᖅᑐᓐ ᖃᕋᓴᐅᔭᒃᑰᕈᓐᓇᕐᓯᕗᖅ ᐅᕘᓇ ᓄᑖᒃᑯ ᐅᖃᐅᓯᕐᓂ ᓇᓗᓇᐃᔭᖅᓯᓯᒪᔪᓄᑦ ᖃᕋᓴᐅᔭᒃᑯᑦ ᐃᓚᒃᓴᒧᑦ

For English version, see Inuinnaqtun goes digital with launch of new dictionary app

ᐃᓄᐃᓐᓇᖅᑐᓐ, ᐃᓄᐃᑦ ᐅᖃᓪᓚᐅᓯᖓ ᐊᑐᖅᑕᐅᕙᒃᑐᖅ ᐅᓄᓗᐊᙱᑦᑐᓄᑦ ᐅᑭᐅᕐᑕᖅᑐᕐᒥ ᖃᕋᓴᐅᔭᒃᑰᖓᓯᕗᖅ ᐊᒻᒪ ᐊᑭᖃᙱᑦᑐᒥ ᐅᖃᐅᓯᒧᑦ ᓇᓗᓇᐃᔭᕈᑎᓂ ᐃᓚᒃᓴᖃᖅᖢᓂ.

ᖃᕋᓴᐅᔭᒃᑯᑦ ᐃᓚᒃᓴᖅ ᐃᓱᒪᒋᔭᐅᓂᑯ ᐃᖃᓗᒃᑑᑦᑎᐊᕐᒥ ᕿᑎᕐᒥᐅᑦ ᐃᓕᖅᑯᓯᓕᕆᔨᒃᑯᑦ ᑲᑐᔾᔨᖃᑎᒌᖏᑦ, ᖃᐅᔨᒪᔭᐅᖕᒥᔪᑦ ᐃᒪᓐᓇ Pitquhirnikkut ilihautiniq ᐅᕝᕙᓘᓐᓃᑦ PI, ᐃᓄᐃᓐᓇᖅᑐᑦ ᑐᑭᖃᖅᖢᓂ “ᐃᓕᓐᓂᐊᕐᓂᖅ ᐃᓕᖅᑯᓯᑎᒍᑦ.”

ᖃᕋᓴᐅᔭᒧᑦ ᐃᓚᒃᓴᖅ ᐱᒋᐊᖅᑕᐅᓚᐅᕐᑐᖅ ᔪᓚᐃᒥ. ᐃᓗᓕᖃᖅᖢᓂ ᐅᖃᐅᓯᕐᓂ ᓇᓗᓇᐃᔭᖅᓯᓯᒪᔪᓂᒃ, ᐅᖃᐅᓯᕐᓂ ᐊᒻᒪ ᓂᐱᓕᐅᕐᓯᒪᔪᓂᒃ ᐅᓄᖅᑐᒻᒪᕆᐊᓗᖕᓂ ᐃᓄᐃᓐᓇᖅᑐᓐ ᐅᖃᐅᓯᕐᓂ ᐊᒻᒪ ᐅᖃᓪᓚᐅᓯᕐᓂ.

“ᐃᓱᒪᒐᑦᑕᓕ ᐊᓯᐅᑎᑦᑕᐃᓕᒪᓗᒍ ᐊᒻᒪ ᓴᖅᑭᑎᑦᑎᒃᑲᓐᓂᕐᓗᑕ ᐃᓄᐃᓐᓇᖅᑐᒥ ᐃᓅᓱᒃᑐᑦᑎᓐᓄ ᐊᒻᒪ ᐃᓄᐃᓐᓇᖅᑐᓐ ᐅᖃᕈᓐᓇᙱᑦᑐᓄ ᐃᓕᑦᑎᔪᒪᔪᓂᒃ ᐅᖃᐅᓯᑦᑎᐊᕚᓗᑦᑎᓐᓂ,” ᐅᖃᕐᑐᖅ ᐊᒥᓕ ᐊᖑᓚᓕᒃ, PI ᐊᐅᓚᑦᑎᔨ ᑐᑭᒧᐊᖅᑎᑦᑎᔨᖓ ᐊᒻᒪᓗ ᐱᓕᕆᓕᒪᓂᕐᓴᐅᓪᓗᓂ ᐃᓄᐃᓐᓇᖅᑐᓐ ᐅᖃᐅᓯᓕᕆᓂᕐᒥ.

ᐊᑐᕐᐸᒃᑐᑦ ᕿᓂᕈᓐᓇᖅᑐᑦ ᐃᓄᐃᓐᓇᖅᑐᓐ ᐅᖃᐅᓯᕐᓂ ᖃᕋᓴᐅᔭᒧ ᐃᓚᒃᓴᒥ ᐊᔾᔨᒌᙱᑦᑐᓂ ᐊᑐᕐᓗᓂ, ᐃᓚᖃᖅᖢᓂ ᑎᑎᕋᕐᓗᒍ ᓯᕗᓪᓕᖅᐹᖅ ᑎᑎᖃᖅ ᐅᕝᕙᓘᓐᓃᑦ ᖃᓪᓗᓈᑐᑦ ᑐᑭᖓ. ᐃᓚᖃᕐᒥᔪᖅ ᑐᓵᓪᓗᓂ ᑐᑭᒧᐊᕈᑎᒥ ᖃᓄᖅ ᐅᖃᐅᓯᖅ ᐅᖃᖅᑕᐅᖃᑦᑕᕐᒪᖔᑦ.

PI ᑐᓴᕐᑎᑕᐅᓯᒪᓕᕐᑐᑦ ᐃᓄᐃᓐᓇᖅᑐᓐ ᐅᖃᕈᓐᓇᖅᑐᓂ ᑖᔅᓱᒥᖓ ᖃᓄᖅ ᖃᕋᓴᐅᔭᒧᑦ ᐋᖅᑭᒃᓯᔪᓐᓇᕆᐊᒃᓴᖏᓐᓂ ᐊᒻᒪ ᖃᓄᖅ ᐃᓚᒃᓴᖅ ᐱᔪᓐᓇᕆᐊᒃᓴᖓᓂ, ᑖᓐᓇᓕ ᐊᑐᐃᓐᓇᐅᔪᖅ ᐋᓐᑐᕈᐊᐃᑦ (Android) ᐊᒻᒪ ᐋᐳᓪ (Apple) ᓴᓇᓯᒪᔭᖏᓐᓄᑦ, ᐅᖃᓚᐅᕐᑐᖅ ᐊᖑᓚᓕᒃ.

ᐊᓯᐅᑎᑦᑎᑦᑕᐃᓕᓂᖅ ᐃᓄᐃᓐᓇᖅᑐᓐ ᐅᖃᐅᓯᕐᒥ — ᐅᖃᐅᑎᐅᓪᓗᓂᓗ 500 ᑐᖔᓃᑦᑐᓂᒃ ᐃᓄᓂᖕ ᐅᖅᓱᖅᑐᕐᒥ, ᖁᒡᓗᖅᑑᕐᒥ ᐊᒻᒪ ᐃᖃᓗᒃᑑᑦᑎᐊᓂ ᐊᒻᒪᓗ ᐅᓗᕐᓴᖅᑑᕐᒥ ᓄᓇᑦᓯᐊᕐᒦᑦᑐᒥ — ᓯᕗᓪᓕᐅᑎᑦᑎᓯᒪᖕᒪᑕ PI-ᒥ ᐊᕐᕌᒎᓕᕐᑐᓂ ᑕᓪᓕᒪᓂᒃ.

ᐃᓄᐃᓐᓇᕐᑐᖅ ᐅᓗᕆᐊᓇᖅᑐᒦᒻᒪ ᐊᓯᐅᑐᐃᓐᓇᕆᐊᖃᕐᓂᖓ ᑭᖑᕚᕇᓂ ᒪᕐᕈᐃᓂ, ᐅᖃᓚᐅᕐᑐᑦ ᐃᓕᖅᑯᓯᓕᕆᔨᒃᑯᑦ ᑲᒪᑐᔾᔨᖃᑎᒌᖏᑦ ᖃᕋᓴᐅᔭᒃᑯᑦ ᓴᖅᑭᔮᒐᖓᒍᑦ.

ᑕᐃᒪᙵ 2021-ᒥ, PI ᑐᓂᔭᐅᓯᒪᓕᕐᑐᑦ ᒫᓂ $600,000-ᓂ ᐃᑲᔪᖅᑐᐃᔾᔪᑎᓂ ᐊᑯᓂᕈᓗᒃ ᐱᓕᕆᐊᕆᔭᐅᓂᐊᕐᓂᖓ ᐃᓄᐃᓐᓇᖅᑐᓐ ᐅᖃᐅᓰᑦ, ᐃᓚᖓᓕ ᐊᑐᖅᑕᐅᓪᓗᓂ ᐋᖅᑭᒃᓱᐃᓂᕐᒥ ᖃᕋᓴᐅᔭᓄᑦ ᐃᓚᒃᓴᒥ. ᐃᑲᔫᑎᖃᖅᑎᑦᑎᔪ ᐅᑯᐊᖑᓚᐅᕐᑐᑦ ᐅᑭᐅᕐᑕᖅᑐᕐᒥ ᖃᐅᔨᒪᓂᖅ ᑲᓇᑕᒥ (Polar Knowledge Canada), ᐋᑎᒃᓇᑦ ᐃᓄᐃᑦ ᓄᓇᖓᓂ ᖃᐅᔨᓴᕐᓂᕐᒧᑦ ᐱᓕᕆᐊᓂᒃ, ᐊᒻᒪᓗ ᒐᕙᒪᑐᖃᒃᑯᑦ ᓄᓇᖃᖅᑳᖅᑐᓄᑦ ᐊᒻᒪ ᐃᓄᐃᑦ ᐃᓕᖅᑯᓯᓕᕆᓂᕐᒥ ᐃᓕᓐᓂᐊᖅᑎᑦᑎᓂᕐᒧᑦ ᐱᓕᕆᔨᓂ.

ᐅᓇ ᐃᓚᒃᓴᖅ ᓴᓇᔭᐅᓯᒪᔪᖅ ᐱᖓᓱᓄ ᐱᓕᕆᖃᑎᒌᓄᑦ ᐅᑯᓇᙵ ᐱᙳᐊᖅᑯᓐᓂ, ᑮᓇᐅᔭᓕᐅᙱᖢᑎᒃ ᑲᑐᔾᔨᖃᑎᒌᑦ ᐸᓐᓂᕐᑑᒥ ᐋᖅᑭᒃᓱᐃᖃᑎᖃᖅᖢᑎᒃ ᐃᓕᓐᓂᐊᖅᑐᓕᕆᓂᕐᒨᖓᔪᓂᒃ ᓄᓇᖃᖅᑐᓂ ᐃᓄᑭᑦᑐᓂᒃ, ᐃᓄᒋᐊᓂᒃ ᐊᒻᒪᓗ ᓄᓇᖃᖅᑳᖅᑐᑦ ᓄᓇᓕᖏᓐᓂ.

ᖃᓄᐃᓕᐅᖅᐸᓕᐊᓚᐅᕐᑐᖅ ᐅᓇ PI ᑕᐅᑐᙳᐊᖅᑕᐅᓂᖓᒍ ᐋᖅᑭᒃᓱᐃᓂᕐᒥ ᐊᑐᐃᓐᓇᐅᔪᓐᓇᖅᑐᒥ ᐅᖃᐅᓯᕐᒧᑦ ᐃᑲᔫᑎᒃᓴᒥ ᐱᓪᓚᕆᙳᕐᑎᓐᓇᓱᒃᖢᓂ ᐊᕐᕌᒍᓕᒫ ᐅᑎᖅᑕᕋᐅᑎᐅᓚᐅᕐᑐᖅ ᐅᑯᓄᖓ ᐱᙳᐊᖅᑯᓐᓄ ᐅᖃᕐᑐᖅ ᑎᐅᕋᓐ ᑮᑦ, ᖃᐅᔨᓴᖅᑎ ᐅᑯᓄᖓ PI.

“ᐃᓱᒪᓕᓚᐅᕐᕋᑦᑕ ᖃᕋᓴᐅᔭᓄ ᐃᓚᒃᓴᒥ ᐊᑐᕈᒪᓪᓗᑕ ᖃᕋᓴᐅᔭᒃᑯᑦ ᓵᖅᑭᔮᒐᕐᒥᐅᙱᖔᖅᑐᖅ ᓲᖃᐃᒻᒪ ᐃᓄᐃᑦ ᐃᑭᐊᕿᕕᒃᒥ ᐊᑐᕐᓂᕐᓴᐅᒪᑕ ᐃᖃᓗᒃᑑᑦᑎᐊᕐᒥ ᐅᖄᓚᐅᑎᕋᓛᖏᑦᑎᒍᑦ,” ᐅᖃᕐᑐᖅ ᑮᑦ, ᐃᓚᒋᔭᐅᓚᐅᕐᑐᖅ ᐃᓚᒃᓴᖅ ᐋᖅᑭᒃᓱᖅᑕᐅᕙᓪᓕᐊᓂᖓᓂ.

“ᐃᓚᒋᔭᐅᒃᑲᓐᓂᓚᐅᕐᒥᔪᖅ ᑖᓐᓇ ᖃᕋᓴᐅᒧᑦ ᐃᓚᒃᓴᖅ ᐋᖅᑭᒃᓯᒪᓪᓗᓂ ᐃᑭᐊᕿᕕᒃᑰᓯᒪᙱᒃᑲᓗᐊᕐᓗᓂ ᐊᑐᒐᒃᓴᐅᓗᓂ ᐊᒻᒪ ᐊᐅᓪᓛᕐᓯᒪᓗᑎᒃ ᐅᖃᐅᓯᕐᓄᑦ ᓇᓗᓇᐃᔭᖅᓯᓯᒪᔪᑦ ᐊᑐᖅᑕᐅᔪᓐᓇᕐᓗᑎᒃ.”

ᐅᓇ ᐃᓚᒃᓴᖅ ᐃᓄᐃᓐᓇᖅᑐᓐ ᐅᖃᐅᓯᕐᓂ ᐱᑕᖃᐅᑦᑎᐊᖅᑐᖅ ᐃᓐᓇᕐᓂ ᑲᑎᒪᑎᑦᑎᕙᒃᖢᑎᒃ ᐃᖃᓗᒃᑑᑦᑎᐊᕐᒥ ᐊᒻᒪ ᖃᐅᔨᒪᔨᓂ ᐊᑭᓕᖅᓱᖅᑕᐅᓪᓗᑎᒃ ᐅᑯᓇᙵᑦ PI ᐅᖃᐅᓯᖅ ᑎᑎᕋᖅᑕᐅᕙᓪᓕᐊᓂᖓᓄᑦ.

ᐊᕕᒃᑐᖅᓯᒪᓂᒃᑯᑦ ᑲᑎᒪᔨᕋᓛᑦ ᐃᓄᐃᓐᓇᖅᑐᓐ ᖃᐅᔨᒻᒪᕆᖕᓂ ᑕᐃᔭᐅᔪᑦ ᐃᓂᕼᐊᓕᐅᖃᑎᒌᑦ (Inikhaliuqatigiit) ᐃᑲᔪᓚᐅᕐᒥᔪᖅ ᐅᖃᐅᓯᕐᓂ ᐃᓕᐅᖃᐃᕙᓪᓕᐊᓂᒃᑯᑦ ᐊᒻᒪ ᐅᖃᐅᓯᕐᓂ ᐅᖃᑲᑕᒃᖢᑎᒃ ᓂᐱᓕᐅᖅᑕᐅᕙᒃᖢᑎᒃ ᐃᓚᒃᓴᒧᑦ.

“ᒫᓐᓇ ᐃᓄᖕᓂ ᑲᑎᕐᓱᐃᕙᓪᓕᐊᒐᒃᑕ ᑲᑎᕐᓱᐃᓇᓱᒃᑎᓪᓗᑕ ᐅᖃᐅᓯᕐᓂ, ᐱᓕᕆᐊᖃᕐᓂᕐᓴᐅᓪᓗᑕ ᐊᕙᑎᒋᔭᐅᒧᑦ ᐅᖃᐅᓯᕆᔭᐅᕙᒃᑐᓂᒃ ᐃᓄᐃᓐᓇᖅᑐᑦ ᓄᓇᒥ ᐅᖃᖅᓯᒪᔪᓂᒃ, ᖃᓄᐃᓕᖓᓂᖏᓐᓂ ᐊᒻᒪ ᓯᓚᐅᑉ ᖃᓄᐃᓐᓂᖓᓄᑦ,” ᐅᖃᕐᑐᖅ ᑮᑦ, ᖃᐅᔨᓴᖃᓯᐅᑎᓚᐅᕐᒪᑦ ᐃᓄᐃᑦ ᓄᓇᓕᕆᓂᕐᒧᑦ ᖃᐅᔨᒪᔭᖏᓐᓂᒃ.

ᐃᓄᐃᓐᓇᖅᑐᑦ ᐅᖃᐅᓯᕐᒥ ᓇᓗᓇᐃᔭᕈᑎ ᐃᓚᒃᓴᖅ ᓱᓕ ᐱᓕᕆᐊᖑᕙᓪᓕᐊᔪᖅ ᐅᑯᓄᖓ PI ᐅᖃᐅᓯᕐᓂ ᐃᓚᓯᕙᓪᓕᐊᑲᑕᒃᑎᓪᓗᒋᑦ ᑲᑎᑉᐸᓪᓕᐊᔭᖏᓐᓂ.

ᒪᑯᑎᑑᖓᙱᖢᓂ ᐅᖃᓕᒫᒐᓕᐊᖑᓯᒪᔪᓂ ᓇᓗᓇᐃᔭᕈᑎᓂ ᐅᖃᐅᓯᕐᓂ, ᐊᑐᖃᑦᑕᕐᑐᑦ ᐃᓚᒃᓴᒥ ᓄᑖᙳᕆᐊᖅᑎᑦᑎᖃᑦᑕᕆᐊᖃᕐᑐᑦ ᐃᓕᑦᑎᓂᐊᕈᒪᒍᑎ ᐃᓄᐃᓐᓇᖅᑐᑦ ᐅᖃᐅᓯᕐᓂ ᐊᒻᒪ ᐅᖃᓪᓚᐅᓯᕐᓂ.