ᐃᓄᐃᑦ ᐃᑦᑕᕐᓂᓴᓄᑦ ᐱᓕᕆᐊᒃᓴᐅᔪᖅ ᐅᓗᕆᐊᓇᖅᑐᒦᑉᐳᑦ ᐱᔾᔪᑎᖃᖅᑐᒥ ᑮᓇᐅᔭᖃᖅᑎᑕᐅᓂᐅᔪᒥ ᑭᖑᕙᕆᐊᖅᑕᐅᓂᖓᓂ

For the English version of this story, please see Inuit archives project at risk due to funding delays.

ᐃᓄᐃᑦ ᑕᑯᓐᓇᕋᒃᓴᓕᕆᔨᒃᑯᑦ ᐅᖃᖅᐳᖅ ᐃᑦᑕᕐᓂᓴᓂᑦ ᖃᕋᓴᐅᔭᒃᑰᓕᖅᑎᑕᐅᓂᖓᓂ ᐱᓕᕆᐊᒃᓴᐅᔪᖅ ᐅᓗᕆᐊᓇᖅᑐᒦᑉᐳᖅ ᐱᔾᔪᑎᖃᖅᑐᒥ ᐊᓯᔾᔨᕐᓂᐅᔪᓂ ᐊᓪᓚᕝᕕᓕᕆᓂᖓᓂ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᓂ ᐅᖃᐅᓯᕐᒥ ᑮᓇᐅᔭᖃᖅᑎᑕᐅᓂᐅᔪᒥ.

ᑮᓇᐅᔭᓕᐅᕋᓱᐊᙱᑦᑐᒥ ᑲᑐᔾᔨᖃᑎᒌᖑᔪᖅ ᐱᓕᕆᓯᒪᕗᑦ ᖃᕋᓴᐅᔭᒃᑰᓕᖅᑎᑦᑎᓇᓱᐊᕐᓂᕐᒥ ᐊᕐᕌᒍᒐᓵᓗᖕᓂ ᓂᐱᓕᐅᕆᔭᐅᕙᖕᓂᑯᓂ, ᑕᒪᒃᑭᑦ ᐊᔾᔨᓕᐅᖅᑕᐅᔪᑦ ᐃᓄᖕᓂ ᐊᔾᔨᒌᙱᕈᓘᔭᖅᑐᓂ ᐅᖃᐅᓯᒃᓴᐅᔪᓂ, ᐃᖅᑲᐅᒪᕙᕗᒻᒧᑦ: ᐃᖅᑲᐅᒪᕙᕗᑦ ᐱᓕᕆᐊᒃᓴᐅᔪᒥ.

ᐱᓯᒪᕗᑦ $1 ᒥᓕᐊᓐᐸᓗᖕᓂ ᐃᑦᑕᕐᓂᓴᓄᑦ ᐱᓕᕆᐊᒃᓴᒧᑦ ᑕᐃᒪᙵᓂ 2018−ᒥ ᐅᕘᓇ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᓄᑦ ᐅᖃᐅᓯᕐᒥ ᐊᒻᒪ ᐃᓕᖅᑯᓯᒥ ᐱᓕᕆᐊᖑᔪᒥ.

ᑭᓯᐊᓂ, 2023−ᒥ, ᐊᓪᓚᕝᕕᓕᕆᓂᕐᒥ $9.7 ᒥᓕᐊᓐᐸᓗᖕᓂ ᐅᕘᓇ ᒐᕙᒪᑐᖃᑯᑦ ᐱᓕᕆᐊᖑᔪᒥ ᓅᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓄᑦ, ᒪᓕᒐᑎᒍᑦ ᑭᒡᒐᖅᑐᐃᔨᐅᔪᓂ ᐃᓄᖕᓄᑦ ᐱᔪᓐᓇᕐᓂᖅᑖᖅᓯᒪᔪᓄᑦ, ᑐᓐᓂᖅᓴᐃᓂᕐᒥ ᐃᓄᒃᑐᑦ ᓴᐳᔾᔨᓯᒪᓂᖓᓂ, ᐅᑎᖅᑎᕆᓂᕐᒥ ᐊᒻᒪ ᐆᒻᒪᖅᑎᑦᑎᕆᒃᑲᓐᓂᕐᓂᕐᒥ ᐱᓕᕆᐊᒃᓴᐅᔪᓄᑦ.

ᑕᖅᑭᓂ 19−ᖑᖅᐳᖅ ᑕᐃᒪᙵᓂ ᑕᑯᓐᓇᕋᒃᓴᓕᕆᔨᒃᑯᑦ ᐱᓯᒪᓂᖏᓐᓂ ᐊᖏᐸᓗᒃᑐᒥ ᑮᓇᐅᔭᓂ ᐱᓕᕆᐊᒃᓴᐅᔪᒧᑦ, ᐅᖃᓚᐅᖅᐳᖅ ᒪᓃᑦᑐᖅ ᑖᒻᑉᓴᓐ, ᐃᓱᒻᒥᖅᑐᐃᔨᐅᔪᖅ ᐃᓄᐃᑦ ᑕᑯᓐᓇᕋᒃᓴᓕᕆᔨᒃᑯᓐᓄᑦ

ᐅᖃᓚᐅᖅᐳᖅ ᐊᔪᕐᓇᕐᓂᕋᖅᐸᖓ ᐱᓂᕐᒥ ᑭᐅᓂᐅᔪᓂ ᓄᓇᕗᒻᒥ ᑐᙵᕕᒃᑯᓐᓂ.

“ᐊᐱᕆᑐᐊᕌᖓᑦᑎᒍᑦ, ᐅᖃᐅᔾᔭᐅᕗᒍᑦ, ‘ᐱᓕᕆᐊᕆᕙᕗᑦ ᐊᒻᒪ ᐃᓕᔅᓯᓐᓂ ᖃᐅᔨᑎᑦᑎᓛᖅᐳᒍᑦ,'” ᐅᖃᓚᐅᖅᐳᖅ.

“ᑕᐃᒫᒃ ᐅᑕᖅᑭᕗᒍᑦ ᒪᕐᕉᖕᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᓂ ᐊᒻᒪ ᑮᓇᐅᔭᖅᑖᖅᐸᓪᓕᐊᙱᖦᖢᑕ ᓄᓇᕗᒻᒥ ᑐᙵᕕᒃᑯᓐᓂ.”

ᐃᓚᖏᑦ ᓂᐱᓕᐅᕆᓯᒪᔪᑦ ᑕᑯᓐᓇᕋᒃᓴᓕᕆᔨᒃᑯᑦ ᐱᓕᕆᔭᖏᓐᓂ ᖃᕋᓴᐅᔭᕐᑯᓕᖅᑎᑕᐅᓂᖏᓐᓂ ᐃᓗᓕᖃᖅᐳᑦ ᓂᐱᓕᐅᕆᓂᐅᔪᓂ ᐃᓄᑐᖃᕐᓂ ᐅᖃᐅᓯᖃᖅᑐᓂ ᐱᖅᑯᓯᑐᖃᖅᑎᒍᑦ ᖃᐅᒡᒪᓂᐅᔪᒥ ᐊᒻᒪ ᐊᑐᖅᐸᓚᐅᖅᑕᖏᓐᓂ, ᐋᔩᖃᑎᒌᖕᓂᐅᔪᓂ ᑐᕌᖅᑎᑦᑎᔪᒥ ᓴᖅᑭᑎᑕᐅᓂᖓᓂ ᓄᓇᕗᒻᒥ, ᐊᒻᒪ ᒪᒃᑯᖕᓂᖅᓴᐅᔪᒥ ᑭᖕ ᑭᒡᒐᖅᑐᐃᔨᖓᓂ ᑲᓇᑕᒥ ᒥᐊᕆ ᓴᐃᒪᓐᒥ ᐅᓇᑕᖅᑐᒥ ᐃᓄᐃᑦ ᐱᔪᓐᓇᕐᓂᕆᔭᖏᓐᓄᑦ ᑲᓇᑕᐅᑉ ᒪᓕᒐᓕᐅᖅᑎᖏᓐᓂ.

ᑖᒻᑉᓴᓐ ᐅᖃᓚᐅᖅᐳᖅ 40-ᓂ-ᐅᑭᐅᓕᒃ ᑮᓇᐅᔭᓕᐅᕋᓱᐊᙱᑦᑐᒥ ᑲᑐᔾᔨᖃᑎᒌᖓ ᓵᙵᓂᖓᓂ “ᐱᕐᔪᐊᖑᔪᒥ ᖃᓄᐃᓕᖓᓂᐅᔪᒥ” ᑮᓇᐅᔭᖃᖅᑎᑕᐅᙱᓪᓗᓂ.

” ᖃᕋᓴᐅᔭᕐᑯᓕᖅᑎᑕᐅᑎᑦᑎᙱᒃᑯᑦᑕ [ᐅᑯᓂᖓ ᓂᐱᓕᐅᕆᓯᒪᔪᓂ], ᐊᓯᐅᔨᓂᐊᖅᐸᕗᑦ ᖃᖓᒃᑲᓐᓂᐅᔪᒥ ᓯᖃᓪᓕᑐᐃᓐᓇᕆᐊᖃᕐᓂᕐᒥ,” ᐅᖃᓚᐅᖅᐳᖅ ᐊᐱᖅᓱᖅᑕᐅᓂᕐᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.

“ᑕᒪᒃᑭᑦᑎᐊᖅ ᐊᔾᔨᓕᐅᓚᐅᖅᑕᕗᑦ, ᐅᓇ ᑕᑯᒐᓛᖕᓂᑐᐃᓐᓇᐅᕗᖅ ᑐᖅᑯᖅᑕᐅᓯᒪᔪᓂ ᐃᑦᑕᕐᓂᓴᐅᔪᓂ. ᐃᓄᑐᖃᓕᒫᑦ ᐅᖃᓪᓚᒃᑐᓂ ᐃᑦᑕᕐᓂᓴᐅᔪᓂ ᐃᓅᔪᓐᓃᖅᓯᒪᓕᖅᐳᑦ, ᐊᒻᒪ ᐊᔭᐅᑉᐱᐊᖏᑦ ᒫᓐᓇ ᖁᙱᐊᖃᑦᑕᓕᖅᐸᖏᑦ.”

ᓄᓇᕗᒻᒥ ᑐᙵᕕᒃᑯᑦ $9.7 ᒥᓕᐊᓐᐸᓗᖕᓂ ᐊᕕᒃᑐᖅᑕᐅᓂᕐᒥ ᐱᓕᕆᐊᒃᓴᐅᔪᓄᑦ ᓲᕐᓗ ᑕᐃᒃᑯᐊ ᐊᕐᕌᒍᑦ ᑕᓪᓕᒪᓄᑦ ᐅᖓᑖᓂ, ᐱᒋᐊᕐᓗᓂ ᑮᓇᐅᔭᓕᕆᓂᕐᒧᑦ ᐊᕐᕌᒍᖓᓂ 2023-24−ᒥ.

ᐅᒃᑐᐱᕆ ᐱᒋᐊᕐᓂᖓᓂ, ᑐᓂᓯᓚᐅᖅᐳᖅ ᑐᒃᓯᕋᕐᓂᐅᔪᒥ ᑐᒃᓯᕋᐅᑎᓂ 2024-25−ᒧᑦ ᐊᒻᒪ ᑮᓇᐅᔭᖃᖅᑎᑕᐅᔪᓂ ᖃᓄᐃᓕᐅᕐᓂᐅᔪᓂ ᐱᔭᕇᖅᓯᒪᔭᕆᐊᖃᖅᐳᑦ ᒫᔾᔨ 31, 2025−ᒥ.

ᑖᒻᑉᓴᓐ ᐅᖃᓚᐅᖅᐳᖅ ᑐᒃᓯᕋᕐᓂᐅᔪᓂ ᑐᒃᓯᕋᐅᑎᓄᑦ ᐊᕐᕌᒍᒥ ᑭᖑᕙᓗᐊᖅᐳᖅ ᐊᒻᒪ ᐅᓇᐅᖔᓪᓗᐊᖅᐳᖅ 2025-26−ᒧᑦ, ᑐᓂᓯᓂᕐᒥ ᑲᑐᔾᔨᖃᑎᒌᖑᔪᓂ ᐱᕕᒃᓴᖃᒃᑲᓐᓂᕐᓂᖏᓐᓂ ᐱᓕᕆᓂᕐᒧᑦ.

ᑐᓴᕋᒃᓴᓕᕆᔨᒃᑯᑦ ᐃᑦᑕᕐᓂᓴᐃᑦ ᖃᕋᓴᐅᔭᒃᑰᓕᖅᑎᑕᐅᓂᖓᓂ ᐱᓕᕆᐊᒃᓴᐅᔪᖅ ᐱᓯᒪᒐᓛᒃᐳᖅ ᑮᓇᐅᔭᓂ ᐅᕙᓂ ᐊᒻᒪ ᑕᐃᑲᓂ ᐱᖓᓱᓂ ᐊᕈᒃᑐᖅᓯᒪᓂᐅᔪᓂ ᐃᓄᖕᓄᑦ ᑲᑐᔾᔨᖃᑎᒌᖑᔪᓂ, ᐅᖃᓕᒫᒐᖃᕐᕕᖕᒥ ᐊᒻᒪ ᐃᑦᑕᕐᓂᓴᐃᑦ ᑲᓇᑕᒥ, ᐊᒻᒪ ᐊᓯᖏᓐᓂ ᓄᓇᕗᒻᒥ ᑐᙵᕕᒃᑯᓐᓂ ᑮᓇᐅᔭᖃᖅᑎᑦᑎᓂᐅᔪᒥ ᑲᑎᙵᓂᐅᔪᓂ, ᑭᓯᐊᓂ ᑖᒻᑉᓴᓐ ᐅᖃᓚᐅᖅᐳᖅ ᑲᑐᔾᔨᖃᑎᒌᖓ ᐱᔭᕆᐊᖃᖅᐳᑦ $500,000−ᐸᓗᖕᓂ ᐱᔭᕇᖅᓯᓂᕐᒧᑦ.

“ᐃᖅᑲᓇᐃᔭᖅᑎᑦᑎᔭᕆᐊᖃᖅᐳᒍᑦ ᐃᓄᖕᓂ ᖃᐅᔨᒪᔪᓂ ᐅᖃᐅᓯᕐᒥ ᐊᒻᒪ ᐅᖃᓪᓚᐅᓯᓂ, ᐃᖅᑲᓇᐃᔭᖅᑎᓂ ᓇᓗᓇᐃᖅᑕᐅᕙᓪᓕᐊᓂᖓᓂ, ᐃᖅᑲᓇᐃᔭᖅᑎᑦᑎᓗᑕ ᑲᒻᐸᓂᐅᔪᒥ ᖃᕋᓴᐅᒃᑰᓕᖅᑎᑦᑎᓂᕐᒥ, ᐱᒋᐊᖅᑎᑦᑎᓗᑎᒃ ᐱᔨᑦᑎᕋᖅᑎᓪᓚᕆᑦᑎᓐᓂ — ᐊᖏᔪᐊᓘᓪᓗᓂ ᐱᓕᕆᐊᒃᓴᐅᕗᖅ,” ᐅᖃᓚᐅᖅᐳᖅ.

ᑕᒪᑐᒪᓂ ᐊᕐᕌᒎᔪᒥ, ᑖᒻᑉᓴᓐ ᓇᓚᐅᑦᑖᕆᕗᖅ ᐃᖅᑲᓇᐃᔭᖅᑎᖏᑦ ᖃᕋᓴᐅᔭᒃᑰᓕᖅᑎᑦᑎᓯᒪᕗᑦ 20 ᐳᓴᓐᑎᐸᓗᖕᒥ ᐊᒥᐊᒃᑯᔪᓂ ᓂᐱᓕᐅᕆᔭᐅᓯᒪᔪᓂ, ᓱᓕ ᐊᑖᒍᑦ ᐅᖃᖅᑕᖏᓐᓂ ᑎᑎᕋᖅᓯᒪᔭᕆᐊᓕᖕᓂ ᐊᑖᒍᑦ ᐊᒻᒪ ᑐᑭᓕᐊᖑᓗᑎᒃ.

“ᐊᓯᖏᑦ ᐃᓄᐃᑦ ᐅᕙᑦᑎᓐᓂ ᑎᑎᕋᕈᔾᔨᓯᒪᕗᑦ, ᑎᑎᕋᓚᐅᖅᓯᒪᙱᓚᒍᑦ ᐅᕙᑦᑎᓐᓂ,” ᐅᖃᓚᐅᖅᐳᖅ ᑖᒻᑉᓴᓐ. “ᐅᓇ ᐅᓂᒃᑳᖅᑐᐊᕗᑦ, ᐊᒥᓱᓂ ᑐᓴᒐᒃᓴᐅᔪᓂ ᑎᑎᕋᖅᓯᒪᓂᕆᕙᕗᑦ, ᓱᓕᔪᒥ ᐅᖃᐅᓯᒃᓴᓂ ᐅᖃᖅᐳᒍᑦ.”

ᓄᓇᕗᒻᒥ ᑐᙵᕕᒃᑯᑦ ᐊᐱᕆᔭᐅᓚᐅᕋᓗᐊᖅᐳᑦ ᑭᓯᐊᓂ ᑐᓂᓯᓚᐅᙱᓚᑦ ᐅᖃᐅᓯᒃᓴᓂ ᐆᒧᖓ ᐅᓂᒃᑳᓕᐊᖑᔪᒧᑦ.