ᐃᓄᐃᑦ-ᒐᕙᒪᒃᑯᑦ ᐱᓕᕆᖃᑎᒌᖕᓂᖏᑦ ᐊᓯᙳᖅᐸᓪᓕᐊᔪᑦ, ᐅᖃᓪᓚᒃᑎᒋᔭᐅᔪᑦ ᐅᖃᕐᑐᑦ

For the English version of this story please see Inuit-Crown relationship has shifted in past 10 years, panelists say.

ᐱᓕᕆᖃᑎᒌᖕᓂᖏᑦ ᐅᑯᐊ ᐃᓄᐃᑦ ᐊᒻᒪ ᑲᓇᑕᐅᑉ ᒐᕙᒪᖏᑦ ᐊᓯᔾᔨᖅᐹᓪᓕᕐᓯᒪᓕᕐᒪᑕ ᐊᕐᕌᒍᑦ ᖁᓪᓕᑦ ᐃᓗᐊᓂ, ᑕᓪᓕᒪᑦ ᓯᕗᓕᐅᕐᑎᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᒻᒪ ᒐᕙᒪᒃᑯᓐᓂ ᐅᖃᓚᐅᕐᑐᑦ ᕕᕝᕗᐊᕆ 19-ᒥ ᐋᑐᕚᒥ.

ᒪᑭᕝᕕᒃ ᑯᐊᐳᕇᓴᓐᑯᑦ ᐊᖓᔪᖅᑳᖃ ᐲᑕ ᐋᑕᒥ, ᓄᓇᕗᑦ ᑐᙵᕕᒃᑯᑦ ᐊᐅᓚᑦᑎᔨᖓ ᑭᓕᒃᕙᒃ ᑲᑉᓘᓇ, ᐃᓄᐃᑦ ᑕᐱᕇᑦ ᑲᓇᑕᒥ ᒪᓕᒐᓕᕆᓂᕐᒧᑦ ᑐᑭᒧᐊᖅᑎ ᕗᐃᓕᐊᒻ ᑕᐃᕕᑦ, ᒐᕙᒪᒃᑯᑦ-ᓄᓇᖃᖅᑳᖅᑐᓄᓪᓕ ᐱᓕᕆᖃᑎᒌᓂᕐᒧᑦ ᐊᒻᒪ ᐅᑭᐅᕐᑕᖅᑐᓕᕆᓂᕐᒧᑦ ᒥᓂᔅᑕᐅᑉ ᑐᒡᓕᖓ ᕚᓗᕆ ᒋᑎᐊᓐ ᐊᒻᒪᓗ ᓄᓇᑦᓯᐊᕗᑦ ᒐᕙᒪᖓᑐ ᒥᓂᔅᑕᐅᑉ ᑐᒡᓕᖓ ᐃᓴᐱᓚ ᐸᐃᓐ ᐅᖃᓪᓚᓚᐅᕐᑐᑦ ᖃᓄᖅ ᑲᑎᖃᑎᒌᒃᑎᑦᑎᓂᖅ ᑎᓴᒪᓂᒃ ᐃᓄᐃᑦ ᐊᕕᒃᑐᕐᓯᒪᓂᖏᑦ, ᓯᕗᓪᓕᐅᑎᑕᐅᖁᔭᐅᓯᒪᔪᑦ ᐅᑯᓇᙵᑦ ᒐᕙᒪᒃᑯᓐᓂᒃ ᐊᒻᒪᓗ ᐋᖅᑭᒃᑕᐅᕙᓪᓕᐊᓂᖓ ᐃᓄᖕᓄᑦ ᐊᐅᓚᑕᐅᔪᖅ ᐊᑐᐊᒐᓕᕆᓂᖅ ᐃᑲᔫᑎᒻᒪᕆᐅᖕᒪᑕ ᐊᓯᐊᓄᐊᖅᐸᓪᓕᐊᓂᕐᒧᑦ.

ᑖᒃᑯᐊ ᑕᓪᓕᒪᑦ ᐃᓚᐅᓚᐅᕐᑐᑦ ᐅᖃᓪᓚᑲᑕᒃᑐᓂ ᐅᕙᓂ ᐊᖅᓴᕐᓃᑦ ᐃᖅᑲᓇᐃᔮᓂ ᑕᑯᔭᒐᖃᕐᕕᒃᒥ ᐊᒻᒪ ᑲᑎᒪᕕᒡᔪᐊᕐᓇᒥ ᐱᓇᓱᐊᕈᓯᐅᓚᐅᕐᑐᒥ ᐅᕙᓂ ᕌᔾᔪᔅ ᓴᓐᑐᒥ.

ᓇᐃᑕᓐ ᐅᐱᐊᑦ, ᐊᖓᔪᖅᑳᖅ ᐃᓄᐃᑦ ᑕᐱᕇᑦ ᑲᓇᑕᒥ, ᐅᖃᓪᓚᒃᐸᓪᓕᐊᔪᓂ ᑲᒪᔨᐅᓚᐅᕐᑐᖅ.

“ᐊᕐᕌᒎᓕᕐᑐᓂᒃ ᖁᓕᓂᑦ (10), ᐱᓗᐊᖅᑐᒥ ᐃᓄᖕᓂᑦ, ᐱᓇᓱᐊᑲᑕᖕᒪᑕ ᑲᑎᖃᑎᒌᒃᓯᒪᑎᑦᑎᓂᕐᒥᒃ ᑲᓇᑕᒥᐅᑕᑎᑐᑦ, ᑕᒪᓐᓇᓗ ᐊᒃᓱᕈᕐᓇᖅᖢᓂᓗ ᓇᓕᒧᒌᒃᑎᑦᑎᓇᓱᖕᓂᕐᒥ ᐊᕕᒃᑐᖅᓯᒪᓂᒃᑯᑦ ᓯᕗᓪᓕᐅᑎᓯᒪᔭᕆᐊᓕᖕᓂ ᐊᒻᒪ ᑲᓇᑕᒥ ᐊᑐᕆᐊᖃᕆᔭᐅᔪᓂᒃ,” ᐅᖃᕐᑐᖅ ᑕᐃᕕᑦ, ᐃᓄᐃᑦ ᑕᐱᕇᒃᑯᓐᓂᑦ, ᑲᑐᔾᔨᖃᑎᒌᒃᑐᑦ ᐃᓄᖕᓂ ᑭᒡᒐᖅᑐᐃᓪᓗᑎᒃ ᑲᓇᑕᒥ.

“ᑕᐃᒪᓐᓇᑦᑕᐃᓐᓇᐸᓗᒃ, ᐅᑯᓇᙵᑦ ᒐᕙᒪᑐᖃᒃᑯᓐᓂ ᐱᓇᓱᕈᓘᔭᕐᓯᒪᒻᒪᕆᖕᒪᑕ ᐱᓕᕆᖃᑎᖃᕋᓱᖕᓂᒃᑯᑦ ᐃᓄᖕᓂ ᑲᓇᑕᒥᐅᑕᓂᒃ ᐊᒻᒪᓗ ᐃᓄᐃᑦ ᐊᖏᖃᑎᒌᒍᑎᒃᑯᑦ ᑲᑐᔾᔨᖃᑎᒌᓂᒃ ᓇᓗᓇᐃᔭᐃᓇᓱᒃᖢᑎᒃ ᐊᒻᒪ ᐋᖅᑭᒃᓱᐃᓇᓱᒃᖢᑎᒃ ᓄᓇᓕᖕᓄᑦ ᓯᕗᓪᓕᐅᖁᔭᐅᔪᓂᒃ ᐊᕕᒃᑐᕐᓯᒪᔾᔪᑎᐅᓇᔭᙱᑦᑐᓂᒃ.”

ᐋᑕᒥ ᐅᖃᓪᓚᓚᐅᕐᑐᖅ ᐱᒻᒪᕆᐅᓂᖓᓂᒃ ᐊᔾᔨᒌᙱᑦᑑᑎᓂ ᐱᓕᕆᕙᓪᓕᐊᔾᔪᑎᖃᕐᓗᑎᒃ ᐃᑲᔫᑎᑖᕆᔭᖏᓐᓂᒃ ᒐᕙᒪᑐᖃᒃᑯᓐᓂᑦ, ᐱᓗᐊᕐᑐᒥ ᐃᓄᖕᓄᑦ ᐊᑭᑐᓂᕐᓴᓂ ᐆᒪᔾᔪᑎᖃᕆᐊᖃᖅᑐᓂ ᐅᑭᐅᕐᑕᖅᑐᕐᒦᑦᑐᓂᒃ.

“ᒐᕙᒪᒃᑯᓐᓄᑦ ᑐᑭᓯᓇᖅᑐᓂ ᐅᖃᖃᑦᑕᕐᓯᒪᒐᒪ ᐃᒪᓐᓇ ᖃᓄᐃᑦᑐᖃᕐᐸᑦ ᐅᑭᐅᕐᑕᖅᑐᕐᒥ ᒪᑯᐊ ᑮᓇᐅᔭᓕᐅᕈᑎᐅᕙᒃᑐᑦ ᐃᑲᔪᕋᔭᕐᒪᑕ ᖃᓪᓗᓈᓃᑦᑐᓂᒃ ᓲᖃᐃᒻᒪ ᑭᓱᓕᒫᑦ ᖃᓪᓗᓈᓂ ᓴᓇᔭᐅᕙᒃᑐᑦ,” ᐅᖃᕐᑐᖅ.

“ᐃᓱᒪᔪᖓ ᐅᓇ ᑲᔪᓰᓐᓇᕐᓂᐊᕆᐊᒃᓴᖓᓂ ᓇᓕᐊᒃ ᒐᕙᒪᐅᔪᖅ ᐊᖓᔪᖅᑳᖑᓕᖅᐸᑦ, ᐅᑯᐊᖑᒍᑎᓪᓘᓐᓃᑦ ᓕᐳᕈᓪ ᐅᕝᕙᓘᓐᓃᑦ ᑲᓐᓲᕕᑎᕝᑯᑦ.”

ᐋᑕᒥ ᐅᖃᓚᐅᕐᑐᖅ ᓕᐳᕈᓪ ᒐᕙᒪᒃᑯᓐᓄᑦ ᐃᓄᐃᑦ ᐅᖃᖃᑎᖃᖃᑕᐅᓯᒪᓕᕐᑐᑦ ᐃᓱᒪᓕᐅᕆᔪᓂᓪᓗ ᐃᓚᐅᓯᒪᓪᓗᑎᒃ ᓯᕗᓂᒃᓴᖏᑦ ᖃᓄᐃᓐᓂᐊᕆᐊᒃᓴᖏᓐᓄᑦ.

ᒐᕙᒪᒃᑯᑦ-ᓄᓇᖃᖅᑳᖅᑐᑦ ᐱᓕᕆᖃᑎᒌᖕᓂᖏᓐᓄᑦ ᒥᓂᔅᑕ ᒋᐅᕆ ᐊᓈᓐᑕᓵᖓᕇ ᑐᓴᖅᑎᑦᑎᓚᐅᕐᑐᖅ ᑕᖅᑭᖅ ᐱᒋᐊᓯᒪᓕᖅᑎᓪᓗᒍ ᓄᑖᒥ ᖃᓄᐃᓕᐅᕈᑎᐅᖃᑦᑕᕐᓂᐊᖅᑐᓂᒃ ᑲᑎᑎᑦᑎᓇᓱᖕᓂᕐᒥ ᐃᓄᐃᑦ ᓄᓇᖓᓄᑦ ᐊᑐᐊᒐᐃᑦ ᐃᓚᓕᐅᔾᕙᐅᓂᖏᓐᓂ ᒐᕙᒪᑐᖃᒃᑯᑦ ᐃᓱᒪᓕᐅᕆᓂᕆᕙᒃᑕᖏᓐᓄᑦ.

ᑲᑉᓘᓇ, ᓄᓇᕗᑦ ᑐᙵᕕᒃᑯᓐᓂᑦ, ᐅᖃᓚᐅᕐᑐᖅ ᓂᕆᐅᖕᓂᕋᖅᖢᓂ ᑐᑭᒧᐊᕈᑎᐅᓂᐊᖅᑐᑦ ᐃᓚᖃᒃᑲᓐᓂᕐᓂᐊᖁᓪᓗᓂᒋᑦ ᐃᑲᔫᑎᐅᔪᓐᓇᖅᑐᓂᒃ ᒐᕙᒪᑐᖃᒃᑯᓐᓂ ᐊᒻᒪᓗ ᒪᓕᒃᓯᒪᓂᕐᓴᐅᓗᑎᒃ ᐊᑐᐊᒐᕐᓂ ᐊᑐᓕᖅᑎᑦᑎᓂᕐᒥᒃ.

ᐃᖅᑲᓇᐃᔮᓂᒃ ᓴᖅᑭᔮᒐᖃᕐᓂᖅ ᐱᒋᐊᓚᐅᕐᑐᖅ ᕕᕝᕗᐊᕆ 17-ᒥ ᕕᕝᕗᐊᕆ 20-ᒧ.