ᐃᓄᐃᑦ ᐅᖃᐅᓯᖃᖅᐳᑦ ᐊᕙᑎᒥ ᐊᒃᑐᐃᓂᐅᔪᓂ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ

For English version, see Disappearing walrus, new invasive species: Inuit discuss impacts of Arctic shipping

ᐃᓚᖏᑦ ᐃᓄᐃᑦ ᖃᐃᖁᔨᓂᖃᖅᐳᑦ ᑲᑎᖅᓱᐃᓂᐅᔪᒥ ᖃᐅᔨᓴᕈᑕᐅᓚᐅᖅᑐᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ ᐱᐅᓂᕐᒥ ᐃᒃᐱᒍᓱᖕᓂᖃᕐᓂᕐᒧᑦ ᖃᓄᖅ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᐊᒃᑐᐃᕙᖕᓂᖓᓂ ᐳᐃᔨᓂᑦ.

ᐃᓱᒪᓕᐊᖑᔪᖅ ᓴᖅᑭᑎᑕᐅᓚᐅᖅᐳᖅ ᐊᖑᓇᓱᒃᑎᓂ ᔭᓄᐊᕆ 13−ᒥ ᐃᖏᐅᓕᒃ ᓄᓇᕗᒻᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᑲᑎᒪᕕᒡᔪᐊᕐᓂᐅᔪᒥ ᐃᖃᓗᖕᓂ.

“ᖃᐅᔨᒪᔪᐃᓐᓇᐅᕗᒍᑦ ᑕᒪᒃᑭᑦ ᓄᓇᓕᐅᔪᑦ ᐊᒃᑐᖅᑕᐅᓯᒪᓂᖏᓐᓂ,” ᐅᖃᓚᐅᖅᐳᖅ ᐅᓛᔪᒃ ᐊᑭᓱᒃ, ᐊᖓᔪᖅᑳᖑᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖑᔪᓂᑦ. “ᖃᐅᔨᒪᕗᒍᑦ ᐅᒥᐊᕐᔪᐊᑦ ᓄᖅᑲᔾᔮᙱᓐᓂᖏᓐᓂ. ᐃᓄᐃᑦ ᑲᑐᔾᔨᖃᑎᒌᖑᔪᑦ ᐃᓚᐅᖃᑕᐅᔭᕆᐊᖃᖅᐳᑦ.”

ᐊᑭᓱᒃ ᐅᖃᐅᓯᒃᓴᓕᐅᓚᐅᖅᐳᖅ ᐱᓕᕆᐊᖃᖅᑎᓪᓗᒍ ᐊᐱᖅᑯᑕᐅᔪᓂ ᑲᓇᑕᒥ ᐃᓄᖕᓄᑦ ᒪᒃᑯᒃᑐᓂ ᑲᑎᒪᔨᖓᑕ ᐊᖓᔪᖅᑳᖓᓂ ᒍᐃᓐ ᓇᑦᓯᕐᒧᑦ ᐅᓐᓄᓴᐅᔪᒥ ᑕᑯᒃᓴᐅᑎᑕᐅᓂᐅᔪᒥ ᑕᐃᒎᓯᓕᖕᒥ ᓯᕗᓕᖅᑏᑦ ᐅᖃᓪᓚᖃᑎᒌᖕᓂᐅᔪᒥ: ᐅᒥᐊᕐᔪᐊᒃᑰᖅᑎᑦᑎᓂᕐᒥ ᐊᒃᑐᐃᓂᐅᔪᓂ ᐊᒻᒪ ᐊᕕᒃᑐᖅᓯᒪᓂᐅᔪᓂ ᓯᕗᓪᓕᐅᑎᑕᐅᖁᔭᐅᔪᓂ.

ᐅᖃᓚᐅᖅᐳᖅ ᑕᕆᐅᕐᒥ ᐃᖏᕐᕋᓂᐅᔪᓂ, ᐃᓚᖃᖅᑐᒥ ᓴᓇᔭᐅᓯᒪᔪᓂ ᐅᒥᐊᕐᔪᐊᓂ ᐳᓚᕋᖅᑐᓄᑦ ᐅᒥᐊᕐᔪᐊᕐᓄᑦ ᐊᒻᒪ ᓇᖕᒥᓂᕆᔭᐅᔪᓂ ᐅᒥᐊᕐᔪᐊᓄᑦ, ᐸᒡᕕᓵᕆᕗᑦ ᐆᒪᔪᓂ ᐆᒪᔪᐃᑦ ᐅᑎᖅᑕᕐᓂᖏᓐᓂ ᐊᑐᖅᑕᐅᕙᒃᑐᓂ ᐊᒻᒪ ᕿᒪᐃᓪᓗᑎᒃ ᓱᕈᐃᓂᕐᒥᑦ.

ᐃᓂᖅᑎᕆᓚᐅᖅᐳᖅ ᓯᕗᓂᒃᓴᖅ “ᐱᐅᔾᔮᙱᓚᖅ” ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᑎᑦᑎᓂᕐᒥ ᑲᔪᓯᒍᑎᒃ ᒥᒃᖠᒋᐊᖅᑎᑕᐅᓂᐅᔪᒥ.

ᐊᑭᓱᒃ ᐅᖃᓚᐅᖅᐳᖅ ᑕᑯᔪᒪᓂᖓᓂ ᓇᐅᑦᑎᖅᓱᕐᓂᐅᔪᒥ ᐅᒥᐊᕐᔫᐊᒃᑰᖅᑎᑦᑎᓂᕐᒥ ᐊᖅᑯᑎᖏᓐᓂ ᓯᕗᓂᐊᓂ, ᐃᖏᕐᕋᑎᓪᓗᒋᑦ ᐊᒻᒪ ᑭᖑᓂᐊᒍᑦ ᐅᒥᐊᕐᔪᐊᑦ ᐃᑳᖅᑎᓪᓗᒋᑦ ᐅᑭᐅᖅᑕᖅᑐᒥ ᐃᒪᖓᒍᑦ.

ᐱᑕᖃᙱᓗᐊᕐᓂᖓᓂ ᖃᐅᔨᓴᕈᑕᐅᔪᓂ ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᓂᐅᔪᓂ ᐊᑲᐅᙱᓕᐅᕈᑕᐅᕗᖅ, ᐅᖃᓚᐅᖅᐳᖅ, ᐃᓚᒋᐊᖅᓯᓪᓗᓂ ᐊᖅᑯᑎᖓ ᐱᐅᓯᒋᐊᖅᑎᑕᐅᓂᐅᔪᒥ ᐱᒋᐊᖅᑎᑕᐅᓪᓗᐊᖅᐳᖅ ᐃᓄᐃᑦ ᖃᐅᔨᒪᔭᑐᖃᖏᓐᓂ, ᐅᕝᕙᓘᓐᓃᑦ ᐃᓄᐃᑦ ᐱᖅᑯᓯᑐᖃᖏᑎᒍᑦ ᖃᐅᔨᒪᓂᐅᔪᒥ.

ᖃᔅᓯᒐᓚᖕᓂ ᖁᙱᐊᖅᑎᐅᔪᓂ ᐅᖃᕆᐊᓪᓚᓚᐅᖅᐳᑦ ᐅᖃᐅᓯᒃᓴᒥᓂᑦ ᓇᑎᕐᒥ.

ᑕᐃᕕᑦ ᒪᑐ, ᑮᓇᐅᔭᓕᕆᔨᐅᔪᖅ ᐊᐃᕖᑦ ᐊᖑᓇᓱᒃᑎᓂ ᐊᒻᒪ ᒥᑭᒋᐊᕐᓂᐊᖅᑎᒃᑯᓐᓂ ᑲᑐᔾᔨᖃᑎᒌᖑᔪᓂ ᓴᓪᓕᓂᑦ, ᓴᖅᑭᑎᑦᑎᓚᐅᖅᐳᖅ ᐃᓱᒫᓘᑕᐅᔪᒥ ᒥᒃᖠᒋᐊᖅᑐᒥ ᐊᐃᕕᕐᓂ ᐅᓄᕐᓂᐅᔪᓂ ᐊᒃᐸᒃᑐᕐᔪᐊᕐᒥ, 140 ᑭᓛᒥᑐᐸᓗᖕᓂ ᓂᒋᕐᒥ ᓄᓇᓕᖕᓂ.

ᕿᑭᖅᑕᖅ ᑕᑕᑦᑎᐊᖅᐸᓚᐅᖅᐳᖅ ᐊᐃᕕᕐᓂᑦ, ᐅᖃᓚᐅᖅᐳᖅ, ᑭᓯᐊᓂ ᒫᓐᓇᓕᓴᐅᔪᓂ ᐊᕐᕌᒍᓂᑦ ᐃᓗᓕᖃᙱᓯᒪᕗᖅ.

“ᖄᖏᖅᓯᒪᓕᖅᑐᓂ ᐊᕐᕌᒍᓄᑦ ᒪᕐᕉᖕᓄᑦ ᑕᑯᓯᒪᙱᑦᑎᐊᖅᐳᒍᑦ,” ᒪᑐ ᐅᖃᓚᐅᖅᐳᖅ ᐃᓄᒃᑎᑐᑦ, ᑐᓵᔨᑎᒍᑦ. “ᑕᑯᓂᐊᖅᐳᒍᑦ ᐊᑕᐅᓯᕐᒥ ᒪᕐᕈᖕᓂᓪᓘᓐᓃᑦ, ᑭᓯᐊᓂ ᕿᑭᖅᑕᖅ ᑕᑖᑦᑎᐊᖅᐸᓚᐅᖅᓯᒪᕗᖅ ᐊᐃᕕᕐᓂᑦ.”

ᒪᑐ ᐸᓯᒃᖠᕗᖅ ᐊᕐᕌᒍᒐᓴᓂ ᓴᓇᔭᐅᓯᒪᔪᓄᑦ ᐅᓯᐊᕐᔪᐊᒃᑰᖅᑎᑦᑎᓂᕐᒥ ᐃᖏᕐᕋᓂᐅᔪᓂ ᐊᓯᔾᔨᕐᓂᐅᔪᒧᑦ.

“ᖃᐅᔨᓴᖅᑕᐅᓂᑯᓂ ᑎᑎᕋᖅᓯᒪᔪᖃᙱᓚᖓ, ᑭᓯᐊᓂ ᓱᓕᕗᖅ,” ᐅᖃᓚᐅᖅᐳᖅ.

ᐊᐃᕕᖅ ᐊᖑᓇᓱᒃᑎᓂ ᐊᒻᒪ ᒥᑭᒋᐊᕐᓂᐊᖅᑎᒃᑯᓐᓂ ᑲᑐᔾᔨᖃᑎᒌᖑᔪᓂ ᐃᒃᓯᕙᐅᑕᖓᐊᐃᒫᓐ ᐊᕿᐊᕈᖅ ᓴᖅᑭᑎᑦᑎᓚᐅᖅᐳᖅ ᐃᓱᒫᓘᑕᐅᔪᒥ ᓴᖑᓂᐅᔪᒥ ᐳᐃᔨᓂᑦ ᐅᓄᕐᓂᖏᓐᓂ ᑕᑯᓯᒪᔭᖓᓐᓂ ᐊᖑᓇᓱᒃᑎᓪᓗᒍ ᐊᕕᒃᑐᖅᓯᒪᓂᕆᔭᖓᓂ, ᐃᓚᖃᖅᑐᒥ ᐊᐅᓱᐃᑦᑐᕐᒥ.

“ᖃᐅᔨᒪᑦᑎᐊᖅᐳᖓ ᖃᓄᖅ ᐆᒪᔪᐃᑦ ᐊᒫᒪᒃᑎᑦᑎᓲᑦ ᐊᒃᑐᖅᑕᐅᓂᖏᓐᓂ,” ᐅᖃᓚᐅᖅᐳᖅ. “ᕿᓚᓗᒐᐃᑦ ᐃᒪᑦᑎᓐᓂ ᐊᔾᔨᒋᔪᓐᓃᖅᐸᖏᑦ. ᐃᓂᒋᔭᑦᑎᓐᓂᙶᙳᑦᑐᑦ.”

ᐊᓯᖏᑦ ᑲᑎᒪᖃᑕᐅᔪᓂ ᐅᖃᐅᓯᖃᓚᐅᖅᐳᑦ ᐃᓱᒫᓘᑕᐅᔪᓂ ᐸᒡᕕᓵᕆᔪᓂ ᐆᒪᔪᐃᑦ ᐊᔾᔨᒌᙱᓐᓂᐅᔪᓂ, ᐃᓚᖃᖅᑐᒥ ᓄᑖᓂ ᖁᐱᕐᕈᓂᑦ ᐊᒻᒪ ᑎᖕᒥᐊᓂᑦ, ᓴᖅᑭᑉᐸᒃᑐᓂ ᓄᓇᒥ ᐊᒻᒪ ᓯᒡᔭᒥ.

ᐅᓪᓗᓂ-ᑎᓴᒪᓂ ᑲᑎᒪᓂᐅᔪᖅ ᑲᒪᒋᔭᐅᖃᑕᐅᓚᐅᖅᐳᖅ ᓄᓇᕗᒻᒥ ᑐᙵᕕᒃᑯᓐᓂ, ᑭᒡᒐᖅᑐᐃᔨᐅᔪᑦ ᑲᑐᔾᔨᖃᑎᒌᖑᔪᒥ ᐃᓄᖕᓂ ᐃᓄᐃᑦ ᓄᓇᖓᓐᓂ, ᐊᒻᒪ ᑲᓇᑕᒥ ᐃᒪᖓᓂᒃ ᒥᐊᓂᖅᓯᔩᑦ.

ᑲᑎᒪᓂᖅ ᐃᓱᓕᓚᐅᖅᐳᖅ ᔭᓄᐊᕆ 15−ᒥ.