ᐃᓄᐃᑦ ᑲᑎᙵᓂᐅᔪᑦ ‘ᖁᕕᐊᑉᐳᑦ,’ ᐸᕐᓇᒃᓯᒪᓕᖅᐳᑦ ᐱᓕᕆᓂᕐᒥ ᑭᖑᓂᐊᒍᑦ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᒃᑯᑦ ᐅᖃᐅᔾᔨᐅᓂᖃᕐᓂᐅᔪᒥ: ᐆᐱᑦ

For English version, see Inuit groups ‘excited,’ ready to act after Supreme Court ruling: Obed

ᐃᓄᐃᑦ ᑲᑐᔾᔨᖃᑎᒌᖑᔪᑦ ᐸᕐᓇᐃᕙᓪᓕᐊᕌᓂᒃᐳᑦ ᖃᓄᐃᓕᐅᕈᑎᒃᓴᓂ ᒫᓐᓇᓕᓴᐅᔪᒥ ᖁᑦᑎᖕᓂᖅᐹᖅ ᐃᖅᑲᖅᑐᐃᔨᑦ ᑲᓇᑕᒥ ᓇᓗᓇᐃᖅᓯᔪᒥᒃ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᔪᓐᓇᕐᓂᖃᕐᓂᖓᓂ ᓱᕈᓯᕐᓂ ᐊᒻᒪ ᐃᓚᒌᓄᑦ ᐱᔨᑦᑎᕋᕐᓂᐅᔪᒥ.

“ᐅᕙᒍᑦ, ᐃᓅᓪᓗᑕ, ᖁᕕᐊᕐᔪᐊᖅᐳᒍᑦ ᐱᔪᓐᓇᕐᓂᐅᔪᒥ ᐊᔪᙱᓐᓂᖃᕐᓂᐊᕐᓂᑦᑎᓐᓂ ᐆᒥᖓ ᒪᓕᒐᐅᒧᒥ ᐊᒻᒪᓗ ᐊᑐᓕᖅᑎᑕᐅᓂᖓᓂ,” ᐅᖃᓚᐅᖅᐳᖅ ᓇᐃᑕᓐ ᐆᐱᑦ, ᐊᖓᒧᖅᑳᕆᔭᐅᔪᖅ ᐃᓄᐃᑦ ᑕᐱᕇᑦ ᑲᓇᑕᒥ, ᑲᓇᑕᒥ ᑲᑐᔾᔨᖃᑎᒌᖑᔪᒥ ᐃᓄᖕᓄᑦ ᑲᓇᑕᒥ, ᐊᐱᖅᓱᖅᑕᐅᓂᐅᔪᒥ.

ᐊᑲᐅᙱᓕᐅᕈᑕᐅᔪᒥ ᒪᓕᒐᐅᔪᒥ ᓇᓗᓇᐃᖅᓯᓂᕐᒥ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᐱᔪᓐᓇᕐᓂᖃᕐᓂᖓᓂ ᓇᖕᒥᓂᖅ ᓱᕈᓯᕐᓂ ᐊᒻᒪ ᐃᓚᒌᓄᑦ ᐱᔨᑦᑎᕋᕐᓂᐅᔪᒥ — ᓯᕗᓂᐊᓂ ᖃᐅᔨᒪᔭᐅᓚᐅᖅᑐᒥ ᐱᖁᔭᒃᓴᖅ C-92−ᒥ — ᖄᖏᖅᑎᑕᐅᓚᐅᖅᑐᒥ 2019−ᒥ.

ᐊᕐᕌᒍᑦ ᐱᖓᓱᑦ ᐊᓂᒍᖅᑎᓪᓗᒍ, ᑯᐸᐃᖕᒥ ᐊᔪᐃᓐᓇᕆᐊᕐᕕᖕᒥ ᐃᖅᑲᖅᑐᐃᕕᖕᒥ ᐅᖃᐅᔾᔨᐅᓂᖃᓚᐅᖅᐳᑦ ᒪᓕᒐᐅᔪᖅ ᐃᓚᖓᒍᑦ ᐱᖁᔭᕐᔪᐊᙳᖏᓐᓂᖓᓂ ᑭᖑᓂᐊᒍᑦ ᑯᐸᐃᖕᒥ ᒐᕙᒪᖓᑦ ᑭᐅᓗᓚᐅᖅᑎᓪᓗᒋᑦ ᒪᓕᒐᖅ ᓱᕋᐃᓂᖃᕐᓂᖓᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᒥ ᐱᔪᓐᓇᕐᓂᖃᕐᓂᖓᓂ.

ᒐᕙᒪᑐᖃᒃᑯᑦ ᐃᖅᑲᖅᑐᐃᕕᒃᑯᑦ ᐊᔪᐃᓐᓇᕆᐊᖃᕐᓂᕐᓂᖃᓚᐅᖅᐳᑦ, ᐊᒻᒪᓗ ᐃᓱᒪᓕᐊᖓᓂ ᕕᕗᐊᕆ 9−ᒥ, ᖁᑦᑎᖕᓂᖅᐹᖅ ᐃᖅᑲᖅᑐᐃᔨᑦ ᑲᓇᑕᒥ ᐊᔾᔨᒌᒃᑐᒥ ᓂᕈᐊᓚᐅᖅᖢᑎᒃ ᐅᖃᐅᔾᔪᐅᓂᖃᓚᐅᖅᐳᑦ “ᒪᓕᒐᖅ ᑕᒪᒃᑭᐅᒪᓂᖓᓂ ᐱᖁᔭᕐᔪᐊᖑᓂᖓᓂ ᐊᑑᑎᖃᕐᓂᖓᓂ.”

ᒪᓕᒐᖅ ᓇᓗᓇᐃᖅᓯᕗᖅ ᓄᓇᖃᖅᑳᖅᓯᒪᔪᓄᑦ ᐃᓄᖏᑦ ᑕᒪᒃᑭᐅᒪᔪᒥ ᐱᔪᓐᓇᕐᓂᖃᕐᓂᖏᓐᓂ ᓴᐳᔾᔨᓯᒪᓂᕐᒥ ᕿᑐᕐᙵᒥᓂᑦ ᐊᒻᒪ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᖑᔪᑦ ᐃᓱᒪᓕᐅᕆᔪᓐᓇᕐᓂᖏᓐᓂ ᓱᕈᓯᕐᓄᑦ ᐸᖅᑭᔭᐅᓂᖏᓐᓂ ᐃᓕᖅᑯᓯᑎᒍᑦ ᐅᖃᐅᔾᔪᖅᑕᐅᓯᒪᔪᒥ.

ᐆᐱᑦ ᐅᖃᓚᐅᖅᐳᖅ ᓄᓇᖃᖅᑳᖅᓯᒪᔪᓄᑦ ᑲᑐᔾᔨᖃᑎᒌᖑᔪᑦ ᐸᕐᓇᒃᓯᒪᓂᖏᓐᓂ ᐃᖅᑲᖅᑐᐃᕕᐅᑉ ᐃᓱᒪᓕᐊᖓᓐᓂ ᐊᒻᒪ ᐸᕐᓇᒃᓯᒪᕗᑦ ᐱᓕᕆᓂᕐᒥ ᓱᒃᑲᔪᒥ.

“ᐃᓄᕕᐊᓗᐃᑦ ᐊᕕᒃᑐᖅᓯᒪᓂᐅᔪᒥ ᑎᒥᖁᑕᐅᔪᑦ [ᓄᓇᑦᓯᐊᕐᒥ] ᐊᓂᒍᐃᓯᒪᕗᑦ ᐃᓚᖓᓐᓂ ᐱᖁᔭᕐᒥ, ᐊᒻᒪ ᓂᕆᐅᒃᐳᑦ ᐱᒋᐊᕐᓂᐊᕐᓂᖏᓐᓂ ᐊᑐᓕᖅᑎᑕᐅᓂᖓᓂ ᑖᔅᓱᒧᖓ ᕿᓚᒥᒻᒪᕆᐊᓗᒃ,” ᐅᖃᓚᐅᖅᐳᖅ.

“ᖃᐅᔨᒪᕗᒍᑦ ᓄᓇᑦᓯᐊᕗᒻᒥ, ᐊᒻᒪᓗ ᓄᓇᕕᖕᒥ, ᐅᖃᐅᔾᔨᓯᒪᕗᑦ ᒐᕙᒪᐅᔪᓂ ᓴᖅᑭᑎᑦᑎᔪᒪᓂᖏᓐᓂ ᐱᖁᔭᕐᒥ ᐅᕝᕙᓘᓐᓃᑦ ᓇᓕᒧᑕᖓᓂ ᐊᖅᓵᖅᓯᓂᕐᒥ ᐃᓚᖏᓐᓂ ᐱᔨᑦᑎᕋᕐᓂᐅᔪᓂ.”

ᑐᓴᒐᒃᓴᓕᐊᖑᔪᒥ ᕕᕗᐊᕆ 9−ᒥ, ᓄᓇᕗᒻᒥ ᑐᙵᕕᒃᑯᑦ ᐊᖓᔪᖅᑳᖓ ᐊᓗᑭ ᑰᑦᑎᖅ ᑕᐃᓯᓚᐅᖅᐳᖅ ᐃᖅᑲᖅᑐᐃᕕᐅᑉ ᐃᓱᒪᓕᐊᖓᓐᓂ “ᑲᔪᖏᖅᓴᐃᓂᕐᒥ ᖃᐅᒪᓂᐅᔪᒥ ᐱᔪᒪᓂᑦᑎᓐᓂ ᓇᖕᒥᓂᖅᓱᕐᓂᕐᒥ ᓄᓇᕗᒻᒥ ᐃᓄᖕᓄᑦ,” ᐃᓚᒋᐊᖅᓯᓪᓗᓂ ᒐᕙᒪᐃᑦ “ᑲᔪᓰᓐᓇᖅᑐᒥ ᐱᓕᕆᓂᖃᑦᑎᐊᖅᓯᒪᙱᓐᓂᖏᓐᓂ ᐊᒃᑐᖅᑕᐅᓴᕋᐃᑦᑐᓂ ᐃᓄᖕᓂ ᓱᕈᓯᕐᓂ, ᒪᒃᑯᒃᑐᓂ ᐊᒻᒪ ᐃᓚᒋᔭᐅᔪᓂᑦ.”

ᓄᓇᕗᒻᒥ ᑐᙵᕕᒃᑯᑦ, ᑲᒪᒋᔭᖃᖅᑐᒥ ᓇᓗᓇᐃᖅᓯᓂᕐᒥ ᑕᐃᒎᓯᑦ ᓄᓇᕗᒻᒥ ᐊᖏᕈᑕᐅᔪᒥ ᐱᓕᕆᐊᖑᓂᖏᓐᓂ, ᐋᖅᑭᒃᓯᒪᓂᖃᑦᑎᐊᖅᐳᑦ ᐱᕙᓪᓕᐊᑎᑦᑎᓂᕐᒥ ᐱᓕᕆᐊᖑᔪᓂ ᐊᒻᒪ ᐱᔨᑦᑎᕋᕐᓂᐅᔪᑦ ᓄᖅᑲᖅᑎᑦᑎᓂᕐᒥ ᐊᒻᒪ ᐱᑎᑦᑎᑦᑕᐃᓕᒪᓂᕐᒥ ᐱᔾᔪᑎᖃᑦᑐᒥ ᐃᓚᒌᓄᑦ ᐊᒻᒪ ᓱᕈᓯᕐᓄᑦ ᐱᔨᑦᑎᕋᕐᓂᐅᔪᓂ, ᑐᓴᒐᒃᓴᓕᐊᖑᔪᖅ ᐅᖃᓚᐅᖅᐳᖅ.

ᑰᑦᑎᖅ ᐅᖃᓚᐅᖅᐳᖅ “ᐃᖅᑲᖅᑐᐃᕕᐅᑉ ᐃᓱᒪᓕᐊᖓ ᓇᓗᓇᐃᖅᓯᕗᖅ ᐱᔪᓐᓇᕐᓂᕆᔭᑦᑎᓐᓂ ᐃᑲᔪᕐᓂᕐᒧᑦ ᑐᕌᖅᑎᑦᑎᓂᕐᒥ ᐅᑯᓂᖓ ᐱᓕᕆᐊᖑᓇᓱᐊᖅᑐᓂ ᓄᓇᕗᒻᒥ.”

ᐆᐱᑦ ᐅᖃᓚᐅᖅᐳᖅ ᒪᓕᒐᐃᑦ ᐊᒻᒪ ᐱᓕᕆᔾᔪᓯᐅᔪᑦ ᑕᐅᑦᑐᖓ ᐊᔾᔨᒋᔪᓐᓃᕐᓂᐊᖅᐳᖅ ᐊᑐᓂ ᐊᕕᒃᑐᖅᓯᒪᓂᐅᔪᒥ, ᒪᓕᒃᑐᒥ ᐊᕕᒃᑐᖅᓯᒪᓂᐅᑉ ᐱᔪᓐᓇᕐᓂᖓᓂ ᐱᓕᕆᓂᖏᓐᓂ ᑲᒪᒋᔭᐅᔭᕆᐊᓕᖕᓂ ᐃᒻᒥᓂᒃ ᐅᕝᕙᓘᓐᓃᑦ ᐱᑕᖃᖅᐸᒌᖅᑐᓂ ᐱᔨᑦᑎᕋᕐᓂᕐᒥ ᑐᓂᓯᔨᐅᔪᓄᑦ.

ᐱᒻᒪᕆᐅᓂᖓ, ᐅᖃᓚᐅᖅᐳᖅ, ᓄᓇᖃᖅᑳᖅᓯᒪᔪᓄᑦ ᐱᔪᓐᓇᕐᓂᖃᕐᓂᖅ ᓱᕈᓯᕐᓂ ᐊᒻᒪ ᐃᓚᒌᓄᑦ ᐱᔨᑦᑎᕋᕐᓂᐅᔪᒥ, ᓇᒡᓕᒍᓱᖕᓂᐅᔪᒥ ᐊᒻᒪ ᐸᖅᑭᓂᒃᒥ ᓱᕈᓯᕐᓂ ᐱᕙᒃᑕᖏᓐᓂ ᐃᓚᖏᓐᓂ ᕿᑎᐊᓃᓐᓂᐊᖅᐳᖅ ᐃᓱᒪᓕᐊᖑᔪᓂ.

ᓯᕗᓂᐊᓂ ᐱᖁᔭᒃᓴᖅ C-92−ᒥ ᒪᓕᒐᙳᕐᓂᖓᓂ, “ᖃᓄᐃᓐᓂᐅᔪᑦ ᓯᓚᑖᓂ ᐃᓚᒌᖑᔪᓂ ᐊᐅᓚᑕᐅᓂᖓᓐᓂ” ᑐᕌᖅᑎᑦᑎᒐᔪᓚᐅᖅᐳᖅ ᐃᓱᒪᓕᐊᖑᓂᐅᔪᓂ ᐱᓕᕆᐊᖑᔪᓂ ᓄᓇᖃᖅᑳᖅᓯᒪᙱᑦᑐᓂ ᒐᕙᒪᐅᔪᓂ ᐊᒻᒪ ᑲᑐᔾᔨᖃᑎᒌᖑᔪᓂ ᐊᖅᓵᖅᓯᓂᕐᒥ ᓄᓇᖃᖅᑳᖅᓯᒪᔪᓄᑦ ᓱᕈᓯᕐᓂ ᐃᓚᖏᓐᓂ, ᐆᐱᑦ ᐅᖃᓚᐅᖅᐳᖅ.

ᐅᖃᓚᐅᖅᐳᖅ “ᐊᔪᖅᓴᕐᓂᖅ ᐅᕝᕙᓘᓐᓃᑦ ᐊᑐᐃᓐᓇᖃᕐᓂᕐᒥ ᐃᓅᓕᓴᖅᑕᐅᓂᕐᒧᑦ ᐸᖅᑭᔭᐅᓂᖏᓐᓂ [ᐃᓚᓕᐅᔾᔭᐅᒐᔪᓚᐅᖅᐳᑦ] ᐃᓱᒪᒃᓴᖅᓯᐅᕆᓂᐅᔪᓂ ᐊᒻᒪ ᐃᓱᒪᓕᐊᖑᔪᓂ ᑲᓇᑕᒥ ᐊᕕᒃᑐᖅᓯᒪᓂᐅᔪᓂ ᐅᑭᐅᖅᑕᖅᑐᕐᒥᓪᓘᓐᓃᑦ ᓴᓇᔭᐅᔪᓂ ᐃᓄᖕᓂ ᓱᕈᓯᕐᓄᑦ.”

ᖄᒃᑲᓐᓂᐊᒍᑦ ᐱᔪᓐᓇᕐᓂᖃᕐᓂᕐᒥ ᐊᒻᒪ ᑲᒪᒋᔭᖃᕐᓂᕐᒥ, ᐆᐱᑦ ᐅᖃᓚᐅᖅᐳᖅ ᒪᓕᒐᖅ “ᐅᕙᑦᑎᓐᓂ ᐱᔪᓐᓇᖅᑎᑦᑎᓂᐊᖅᐳᖅ ᑕᐅᑐᒃᑕᑐᐊᖃᑲᐃᓐᓇᒃᑲᓐᓂᕐᓂᕐᒥ ᑐᓂᓯᓂᕐᒥ ᐃᑲᔪᖅᓱᐃᓂᐅᔪᒥ ᐃᓚᒌᖑᔪᓄᑦ ᐊᒻᒪ ᓱᕈᓯᕐᓄᑦ.”

ᐃᓄᐃᑦ ᑕᐱᕇᑦ ᑲᓇᑕᒥ ᐱᓕᕆᖃᑎᖃᓲᖑᕗᑦ ᒐᕙᒪᑐᖃᒃᑯᓐᓂ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓂᖓᓂ ᐱᒋᐊᕈᑕᐅᔪᒥ, ᓇᓗᓇᐃᖅᓯᔪᒥ ᓱᕈᓰᑦ ᐊᑐᐃᓐᓇᖃᕐᓂᖏᓐᓂ ᐱᓪᓚᕆᐅᔪᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓅᖃᑎᒌᖑᔪᓄᑦ ᐊᒻᒪ ᐃᓕᓐᓂᐊᕐᓂᕐᒧᑦ ᓴᓇᓯᒪᔪᓂ, ᐱᔨᑦᑎᕋᕐᓂᕐᒥ ᐊᒻᒪ ᐃᑲᔪᖅᓱᐃᓂᐅᔪᓂ.

ᑮᓇᐅᔭᖃᖅᑎᑕᐅᓂᖓ ᑕᒪᒃᑭᓄᑦ ᐃᓄᖕᓄᑦ ᓱᕈᓯᕐᓄᑦ, ᐃᓱᒪᒋᓇᒍ ᓇᒦᓐᓂᖏᓐᓂ ᑲᓇᑕᒥ ᓄᓇᖃᕐᕕᒋᔭᖏᓐᓂ, ᑐᒃᓯᕋᖅᑕᐅᔪᓐᓇᖅᐳᖅ ᐅᕘᓇ ᐃᓄᐃᑦ ᓱᕈᓰᑦ ᓯᕗᓪᓕᐅᑎᑕᐅᓂᖓᓂ ᐱᒋᐊᕈᑕᐅᔪᒥ.