ᐋᓯᕙᐅᑉ ᑎᑎᕋᐅᔭᒐᖓ ‘ᐅᒃᐱᒡᔪᐊᖅ’ ᐊᑭᑐᓛᖑᕗᖅ

For the English version of this story, please see Ashevak’s ‘The Enchanted Owl’ fetches record price at auction.

ᐱᑕᖃᓕᒪᙱᑦᑐᖅ ᐊᒻᒪ ᑐᖑᔪᖅᑑᓪᓗᓂ ᐱᒋᐊᕈᑎᕕᓂᖅ ᐃᓄᒃᑯᑦ ᑎᑎᕋᐅᔭᒐᖅᑎᒧᑦ ᑭᓄᔪᐊᒃ ᐋᓯᕙᒃᒧᑦ ᐅᓇ ᐅᒃᐱᒡᔪᐊᖅ ᖄᖏᕐᓯᓚᐅᕐᑐᖅ ᐊᑭᑦᑐᕋᐅᑎᓂᒃᑯᑦ ᓂᐅᕐᕈᑎᐅᓯᒪᔪᓂᒃ ᑎᓯᐱᕆ 2-ᒥ ᓂᐅᕐᕈᑎᐅᓪᓗᓂ $366,000-ᓄᑦ ᑲᓇᑕᒥᐅᑕᒧᑦ ᑲᑎᕐᓱᐃᔨᒧᑦ — ᐊᑭᑐᓛᖅ ᓴᓇᖃᑦᑕᖅᓯᒪᔭᖏᓐᓂᒃ.

“ᐅᒃᐱᒡᔪᐊᖅ ᐊᔾᔨᙳᐊᖑᔪᖅ ᐃᓄᐃᑦ ᓴᓇᐅᒐᖏᓐᓂᙶᖅᖢᓂ ᐊᒻᒪ ᑲᓇᑕᒥ ᓴᓇᔭᐅᕙᒃᑐᓂᒃ ᐊᔾᔨᖃᕆᓪᓗᓂ,” ᐅᖃᕐᑐᖅ ᒫᒃ ᓚᓐᑕᓐ, ᐱᒋᐊᖅᑎᑦᑎᔨᐅᖃᑕᐅᓯᒪᔪᖅ ᕘᔅᑦ ᐋᑦᔅᓂ (First Arts), ᑖᒃᑯᐊ ᑲᓇᑕᒥ ᓄᓇᖃᖅᑳᖅᑐᑦ ᓴᓇᐅᒐᖏᓐᓂ ᖃᐅᔨᒪᑎᑦᑎᔨᐅᕙᒃᑐᑦ ᐊᒻᒪ ᓂᐅᕐᕈᑎᖃᖅᑎᐅᕙᒃᖢᑎᒃ.

ᐃᓕᓴᕐᓇᖅᑐᖅ ᑎᑎᕋᐅᔭᖅᑎ ᑭᓄᔪᐊᒃ ᐋᓯᕙᒃ ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ ᑲᓇᑕᒥ (Order of Canada) 2012-ᖑᑎᓪᓗᒍ. ᐃᓅᔪᓐᓃᓚᐅᕐᓯᒪᔪᖅ 2013-ᒥ ᐊᕐᕌᒍᖃᓕᖅᖢᓂ 85-ᓂ. (ᐊᔾᔨᙳᐊᖁᑎᒋᔭᐅᔪᖅ)

ᐅᓇ ᕘᔅᑦ ᐋᑦᔅᓄᑦ ᑐᓂᔭᐅᓚᐅᕐᑐᖅ ᓂᐅᕐᕈᑎᒋᔭᐅᖁᔭᐅᓪᓗᓂ ᐅᑯᓇᙵ ᐊᒥᐊᓕᑲᒥ ᑲᑎᑦᑎᔨᓄᑦ ᔮᓐ ᐊᒻᒪ ᔪᐊᐃᔅ ᐳᕋᐃᔅᑯᓐᓄᑦ, ᑖᒃᑯᐊᒡᓗ ᐃᓄᐃᑦ ᐊᒻᒪ ᓄᓇᖃᖅᑳᖅᑐᑦ ᑎᑎᕋᐅᔭᒐᖏᓐᓂ ᑲᑎᓯᒪᔭᖏᑦ ᓱᒃᑲᐃᑦᑐᒥ ᓂᐅᕐᕈᑎᒋᕙᓪᓕᐊᓪᓗᓂᔾᔪᒃ. ᐅᓇ ᑐᖑᔪᖅᖢᓂ ᓴᖅᑭᔮᒐᖅ ᐱᓯᒪᓕᓚᐅᕐᓯᒪᔭᖓᓂ 1996-ᒥ.

ᖃᓄᐃᓕᖓᓂᐊᕐᓂᖓᓄᑦ ᖃᐅᔨᓇᓱᒍᑎᑦ ᑎᑎᕋᐅᔭᕐᓯᒪᔪᓂ ᐋᖅᑭᒃᓱᐃᓂᕐᒧᑦ ᐃᓚᒋᔭᐅᔪᑦ, ᐅᓇᓕ ᑎᑎᕋᐅᔭᒐᖅᑎᐅᓪᓗ ᐊᒻᒪ ᐅᔭᕋᖕᒧᑦ ᐋᖅᑭᒃᓱᐃᔨᐅᑉ ᐱᓕᕆᐊᕆᕙᒃᑕᖓ, ᑕᐃᒪᓐᓇᓗ ᐊᔾᔨᙳᐊᖑᓕᖅᐸᒃᖢᑎᒃ, ᓚᓐᑕᓐ ᐅᖃᕐᑐᖅ.

ᑐᖑᔪᕐᑐᖅ ᐅᒃᐱᒡᔪᐊᖅ ᓴᓇᔭᐅᓚᐅᕐᓯᒪᔪᖅ ᖃᐅᔨᓴᕈᑎᐅᓪᓗᓂ ᖃᓄᖅ ᑕᕐᓴᖃᕈᓂ ᐱᐅᓛᖑᓇᔭᕐᒪᖔᑦ ᑭᖑᓪᓕᖅᐹᖓᓂ ᐱᓕᕆᐊᖑᓕᕐᐸᑦ.

ᖃᐅᔨᓴᕈᑎᒋᔭᐅᔪᑦ ᓱᕋᒃᑎᖅᑕᐅᖃᑕᕐᓂᑯᑦ ᑕᒪᒃᑯᐊᓗ ᐊᔾᔨᓕᐅᖅᑎᑦᑎᔾᔪᑎᑦ ᐅᔭᕋᐃᑦ. ᑕᐃᒪᐃᓐᓂᖓᓄᑦ ᐅᓇ ᑐᖑᔪᖅᑐᖅ ᖃᐅᔨᓴᕈᑎᕕᓂᖅ “ᐱᑕᖃᓕᒪᙱᑦᑐᖅ” ᐊᒻᒪ “ᑖᓐᓇᑐᐊᖑᓪᓗᓂ ᑕᐃᒪᐃᑦᑐᖅ,” ᓚᓐᑕᓐ ᐅᖃᕐᑐᖅ.

ᐊᑎᕈᓯᖃᖅᑎᑕᐅᓪᓗᓂ Artist’s Proof II (ᑎᑎᕋᐅᔭᖅᑎᐅᑉ ᖃᐅᔨᓴᕈᑎᖓ) ᐊᔾᔨᒋᔭᐅᙱᒻᒥᔪᖅ ᓴᖅᑭᑕᐅᓯᒪᔪᓂ 50-ᓂ ᐅᔭᕋᖕᓂ ᐊᔾᔨᓕᐅᕐᓯᒪᔪᓂ ᐋᓯᕙᐅᑉ ᓴᓇᓯᒪᔭᖏᓐᓂᑦ ᐅᓇᓗ ᐅᒃᐱᒡᔪᐊᖅ ᓴᖅᑭᑕᐅᓚᐅᕐᓯᒪᓪᓗᓂ ᐊᐃᑉᐸᖏᓐᓂ ᑲᑎᕐᓱᖅᑕᐅᓯᒪᔪᓂᒃ ᑎᑎᕋᐅᔭᒐᕐᓂ 1960-ᒥ.

ᑖᒃᑯᐊᓕ ᓴᖅᑭᑕᐅᓂᑯ ᓴᖅᑭᔮᖅᑎᑦᑎᔾᔪᑎᐅᓚᐅᕐᑐᖅ ᒪᕐᕈᐃᓂ ᑕᕐᓴᐅᔪᓐᓇᖅᑐᓂᒃ: 25 ᓴᓇᔭᐅᓪᓗᑎᒃ ᐊᐅᐸᖅᑐᖃᖅᖢᓂ ᐊᒻᒪ ᕿᓂᖅᑕᖃᖅᖢᓂ, ᐊᒻᒪᓗ 25 ᑐᖑᔪᕈᔪᒃᖢᑎᒃ ᐊᒻᒪ ᕿᓂᖅᑕᖃᖅᖢᑎᒃ.

ᖃᓄᐃᓕᖓᓂᖓ ᐅᕘᓇ ᕘᔅᑦ ᐋᑦᔅ ᖃᕋᓴᐅᔭᒃᑯᑦ ᓴᖅᑭᔮᒐᖓ ᐅᖃᐅᓯᖃᕐᑐᖅ ᐅᓇ ᖃᐅᔨᓴᕈᑎ — ᑭᙵᓂ ᐅᔭᕋᖕᓂ ᑎᑎᕋᐅᔭᒐᖅᑎᒧᑦ ᐃᔨᕙᑦᓗᒃ ᐳᑐᒍᕐᒧᑦ ᓴᓇᔭᐅᔪᒃᓴᐅᓐᓂᖅᖢᓂ — “ᓴᖅᑭᑎᑦᑎᓯᒪᔪᖅ ᐊᑐᖅᑕᐅᓂᕐᓴᐅᕙᒃᑐᑦ ᑐᖑᔪᕐᓂᖃᖅᑐᓂ ᐱᒋᐊᓕᓵᖅᑎᓪᓗᒋᑦ ᑎᑎᕋᐅᔭᒐᓕᕆᓂᕐᒥ ᑭᙵᓂ.”

ᓂᐅᕐᕈᑎᐅᓚᐅᕐᑐᖅ ᑖᔅᓱᒥᖓ ᑐᖑᔪᖅᑐᒥ ᖃᐅᔨᓴᕈᑎᒥ ᐊᑭᑦᑐᕋᐅᑎᓂᕐᒥ ᖁᑦᑎᓛᖑᓯᒪᔪᖅ ᐆᒧᖓ ᐅᒃᐱᒡᔪᐊᖅ. ᐊᐅᐸᕐᓂᓕᒡᓕ ᓴᓇᓯᒪᔪᖅ ᓂᐅᕐᕈᑎᐅᓚᐅᕐᓯᒪᔪᖅ ᕼᐊᕗᓪ ᕙᐃᓐ ᐋᑦ ᐊᑭᑦᑐᕋᐅᑎᕝᕕᒃᒥ ᑐᕌᑐᒥ ᓄᕕᐱᕆ 20-ᒥ ᐊᑭᖃᖅᖢᓂ $289,250.

“ᐱᐅᔪᐊᓗᒃ” ᑐᖑᔪᖅᑐᖅ ᖃᐅᔨᓴᕈᑎᒥ ᐊᑭᑐᓂᕐᓴᐅᔾᔪᑎᐅᓚᐅᕐᑐᖅ, ᓚᓐᑕᓐ ᐅᖃᕐᑐᖅ, ᓲᖃᐃᒻᒪ ᓴᓇᔭᐅᕌᓂᒃᓯᒪᔪᖅ ᐊᑭᖃᕋᓱᒋᔭᐅᓚᐅᕐᓯᒪᔪᖅ ᒫᙵᑦ $200,000-ᓂᑦ ᒪᐅᖓ $300,000-ᓄᑦ.

ᐊᑭᑦᑐᕋᐅᑎᓂᖅ ᐱᒋᐊᖅᑕᐅᓚᐅᕐᓯᒪᔪᖅ ᐅᕙᙵᑦ $160,000-ᓂ ᐊᒻᒪ ᖁᕝᕙᖅᐸᓪᓕᐊᖏᓐᓇᖅᖢᓂ ᐊᑭᖃᓕᕐᒪᑦ ᑭᓯᐊᓂ ᐃᒪᓐᓇ $366,000 ᐅᕘᓇ ᔫᑑᑉ ᓴᖅᑭᔮᑲᐅᑎᒋᓯᒪᓪᓗᓂᐅᒃ ᓂᐅᕕᖅᑎᑦᑎᒐᓱᖕᓂᖅ.

ᓄᓇᑦᓯᐊᒥ ᐱᕙᓪᓕᐊᔪᑦ ᕘᔅᑦ ᐋᑦᔅᑯᓐᓄᑦ ᖃᐅᔨᓇᓱᓚᐅᕐᑐᑦ ᑭᓇ ᓂᐅᕕᓚᐅᕐᒪᖔᑦ ᑭᓯᐊᓂᓕ ᓂᐅᕕᖅᑐᕕᓂᖅ ᑐᓴᐅᒪᔭᐅᑎᑕᐅᙱᑦᑐᖅ.

ᓚᓐᑕᓐ ᐅᖃᓚᐅᕐᑐᖅ “ᖁᕕᐊᓇᖅ ᑲᓇᑕᒥᐅᑕᒧᑦ ᑲᑎᕐᓱᐃᔨᒧᑦ ᓂᐅᕕᖅᑕᐅᓚᐅᕐᒪ ᐊᒻᒪᓗ ᑲᓇᑕᒦᓐᓂᐊᖅᖢᓂ, ᐃᒪᓐᓇᐅᙱᖔᖅᑐᖅ ᐃᓕᖅᑯᓯᒃᑯᑦ ᐱᖁᑎᒋᔭᐅᔪᖅ ᐊᒥᐊᓕᑲᒥ ᐊᓯᐅᑐᐃᓐᓇᓕᕐᓗᓂ.”

ᐋᓯᕙᒃ, ᐃᓅᔪᓐᓃᕐᓂᑯ 2013-ᒥ, ᐊᕐᕌᒍᖃᓕᖅᖢᓂ 85-ᓂ, ᑎᑎᕋᐅᔭᒐᖅᑎᐅᓚᐅᕐᓯᒪᔪᖅ ᕿᑭᖅᑖᓗᒃᒥᐅᑕᐅᓪᓗᓂ ᐊᒻᒪᓗ ᓴᓇᙳᐊᖃᑦᑕᖅᖢᓂ, ᑎᑎᕋᐅᔭᒐᖅᐸᒃᖢᓂᓗ ᐅᑭᐅᕐᑕᖅᑐᕐᒥᙶᓯᒪᔪᓂ.

ᐃᓕᓴᕆᔭᐅᓯᒪᓛᖑᖃᑕᐅᓪᓗᓂ ᐃᓄᖕᓂ ᑎᑎᕋᐅᔭᒐᖅᑎᓂᒃ, ᐃᓕᓴᕆᔭᐅᔾᔪᑎᑖᓚᐅᕐᓯᒪᔪᖅ ᐃᓚᒋᔭᐅᔪᓄᑦ ᑲᓇᑕᒥ ᐊᑐᖅᑕᐅᓯᒪᔪᓄᑦ (Companion of the Order of Canada) ᐊᒻᒪᓗ ᑐᓂᔭᐅᓯᒪᒋᓪᓗᓂ ᒐᕙᓇ ᔭᓄᕈᒧᑦ ᐃᓕᓴᕆᔭᐅᔪᑎᒥ ᓴᓇᐅᒐᓕᐅᖃᑦᑕᕐᓂᕐᒧᑦ (Visual and Media Art).

ᓯᕗᓪᓕᖅᐹᖑᖃᑕᐅᓚᐅᕐᑐᖅ ᓴᓇᐅᒐᓂ ᐅᒃᐱᒡᔪᐊᖅ 1960-ᒥ, ᑖᓐᓇᓗ ᐃᓕᓴᕆᔭᐅᔾᔪᑎᒋᕙᒃᖢᓂᐅᒃ, ᑲᓇᑕᒥ ᓂᐱᙵᑕᕐᒥ ᐊᔾᔨᖃᓚᐅᕐᓯᒪᔪᖅ 1970-ᒥ.