ᐃᓄᒃ ᓯᐊᕐᕆᔮᖅᑎ ᐃᓕᖅᑯᓯᕐᒥᓂ ᐃᓚᖃᖅᑎᑦᑎᕗᖅ ᖁᕕᐊᒋᔭᖓᓄᑦ
ᑲᓂᖅ ᐋᓗᑕᓐ ᐱᓕᕆᐊᓕᒃ ᓯᐊᕐᕆᔭᕈᓐᓇᑦᑎᐊᕋᓱᖕᓂᕐᒥ ᐱᒡᒍᓴᐅᑎᔪᓄᑦ ᐅᐃᓂᐱᒡᒥ
ᐱᒡᒍᓴᐅᑎᓂᒃᑯᑦ ᓯᐊᕐᕆᔮᖅᑎ ᑲᓂᖅ ᐋᓗᑕᓐ ᖁᕕᐊᓱᒡᕕᒃᓯᐅᓚᐅᕐᑐᖅ ᐃᖃᓗᖕᓂ, ᓯᐊᕆᔮᑲᑕᒃᖢᓂ ᐃᓚᒌᓪᓗ ᑎᓯᐱᕆ 18-ᖑᑎᓪᓗᒍ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᒧᑦ ᐊᓐᓂᑭᑦᑐᕐᕕᒃᒥᑦ. (ᐊᔾᔨᓕᐅᕆᔨ ᐋᑎ ᓴᑮᓯᐊᓐ)
For the English version of this story, please see Inuk skater brings culture to his passion.
ᐊᓐᓂᑭᑦᑐᕐᕕᒃᒥᑦ ᑲᓇᑕᐅ ᓯᑯᖓᓂ, ᑲᓂᖅ ᐋᓗᑕᓐ ᐊᔾᔨᒋᔭᐅᙱᓚᖅ, ᐃᒻᒪᖄᓪᓘᓐᓃᑦ ᑕᑯᓕᒪᓇᙱᑦᑐᖅ.
ᐋᓗᑕᓐ 16-ᓂ ᐊᕐᕌᒍᓕᒃ ᓯᐊᕐᕆᔮᖅᑎᐅᓪᓗᓂ ᐊᖑᑕᐅᓪᓗᓂ ᐃᓅᓪᓗᓂᓗ. ᐊᔾᔨᐅᙱᓐᓂᕋᖅᑕᐅᕙᒃᑐᖅ, ᐅᖃᓚᐅᕐᑐᖅ ᐊᔪᕈᓐᓃᖅᓴᖅᑎᖓᑦᑕ ᐃᓚᖓ.
“ᓯᐊᕐᕆᔮᖅᖢᖓ ᖁᕕᐊᒋᒐᒃᑯ,” ᐋᓗᑕᓐ ᐅᖃᓚᐅᕐᑐᖅ ᐊᐱᕆᔭᐅᒐᒥ ᐊᔪᙱᔾᔪᑎᖓᓂ.
ᓄᓇᑦᓯᐊᕐᒥ ᐱᕙᓪᓕᐊᔪᑦ ᐅᐸᒍᑎᒪᐅᕐᑐᑦ ᐋᓗᑕᓐᒥ ᑎᓯᐱᕆ 18-ᒥ ᐅᑭᐅᕐᑕᖅᑐᕐᒥ ᐅᑭᐅᒃᑯᑦ ᐱᙳᐊᕕᒡᔪᐊᕐᓇᐅᑉ ᐊᓐᓂᑭᑦᑐᕐᕕᐊᓂ ᖁᕕᐊᓱᒡᕕᒃᓯᐅᕐᕕᒋᓂᐊᖅᑕᖓᓂ ᐃᓚᖏᓪᓗ ᐱᒡᒍᓴᐅᑎᓵᖅᑎᓪᓗᒍ ᐅᕙᓂ ᒍᐊᑕᓐ ᓕᓂ. ᐅᐃᓂᐱᒡᒦᖢᓂ, ᐅᓪᓘᖕᓂᓪᓗ ᒪᕐᕉᖕᓂ ᐱᒡᒍᓴᐅᑎᓐᓇᖅᑐᒥ ᓯᐊᕐᕆᔮᖅᑎᓄᑦ ᐊᔾᔨᒌᙱᑦᑐᓂ ᐊᕐᕌᒍᖃᐅᕐᑐᓄᑦ ᐊᒻᒪ ᐊᔪᙱᓐᓂᖏᑦᑎᒍᑦ.
ᓯᐊᕐᕆᔮᖅᑎᑦ ᐊᔪᕈᓐᓃᖅᓯᒪᔪᑦ ᐅᕘᓇ ᓯᐊᕐᕆᔮᕐᓂᖅ ᑲᓇᑕᒥ (Skate Canada) ᐱᓕᕆᐊᖑᔪᒥ ᐊᔪᕈᓐᓃᖅᓴᕈᑎᒃᑲᓐᓂᖅ ᐊᔪᙱᓐᓂᕐᓴᓄᑦ. ᓲᕐᓗ, ᓇᓗᓇᐃᒃᑯᑎᓖᑦ 6-ᒥ ᓯᐊᕐᕆᔮᖅᑎᑦ ᐆᑐᓇᖅ ᐋᓗᑕᓐ ᒪᑯᓂᖓ ᐊᔪᕈᓐᓃᖅᓴᖅᑎᑕᐅᒃᑲᓐᓂᖃᑦᑕᖅᑐᑦ ᕿᒡᒋᕈᓐᓇᕐᓂᕐᒥᒃ ᒪᕐᕈᐃᕐᓗᑎ ᐊᒻᒪᓗ ᐅᐃᔾᔮᑲᑕᒃᐸᒡᓗᑎᑦ ᐱᓕᕆᐊᖏᓐᓄᑦ.

ᑲᓂᖅ ᐋᓗᑕᓐ ᓯᐊᕐᕆᔮᑲᑕᒃᖢᓂ ᐊᔪᙱᓐᓂᕐᒥᓂᒃ ᑕᑯᑎᑦᑎᑲᑕᒃᑐᖅ ᐅᑭᐅᕐᑕᖅᑐᕐᕕᒃᒥ ᐅᑭᐅᒃᑯᑦ ᐱᙳᐊᕕᔅᐊᕐᓇᒧᑦ ᐊᓐᓂᑭᑦᑐᕐᕕᒃᒥᑦ ᖁᕕᐊᓱᒡᕕᒃᒥᑦ ᓄᖃᖓᑎᓪᓗᒍ. (ᐊᔾᔨᓕᐅᕆᔨ ᐋᑎ ᓴᑮᓯᐊᓐ)
ᐋᓗᑕᓐ ᓯᐊᕐᕆᔮᖅᑎᑐᐊᖑᓚᐅᕐᑐᖅ ᐊᖑᑎᓂ ᓇᓗᓇᐃᒃᑯᑎᓕᒃᓂ 6-ᒥ ᐅᕙᓂ ᒍᐊᑕᓐ ᓕᓂ ᐱᒡᒍᓴᐅᑎᓂᕐᒥᒃ.
ᐊᑐᙱᒃᑲᓗᐊᖅᖢᓂ ᐱᒡᒍᓴᐅᑎᔾᔪᑎᖏᓐᓂ ᓯᐊᕐᕆᔮᖕᓂ ᐃᖃᓗᖕᓂ ᐊᒻᒪᓗ ᐃᖃᙱᓐᓂᕐᓴᐅᓪᓗᓂ ᐊᓐᓄᕌᕆᕙᒃᑕᖏᓐᓂ ᓯᓚᒥ ᐊᑐᕋᒥ ᐅᑯᓂᖓᐅᙱᑦᑐᖅ ᕿᕐᓂᖅᑕᓂ ᓯᓂᓕᕐᓯᒪᔪᓂ ᕿᓯᖕᓂ ᐊᒻᒪ ᒥᖅᑯᓕᖕᓂ ᐅᕙᙵᑦ ᐃᖃᓗᐃᑦ ᐋᑎᒃ ᕼᐃᐅ, ᐊᔪᕈᓐᓃᖅᓯᒪᔭᖏᓐᓂ ᑕᐅᑐᒃᑕᐅᑎᑦᑎᓚᐅᕐᑐᖅ ᕿᒡᒋᑲᑕᒃᖢᓂ ᐊᒻᒪ ᐅᐃᔾᔮᑲᑕᒃᖢᓂ ᐊᖏᕐᕋᖓᑕ ᓯᑯᐊᓂ.
ᐋᓗᑕᓐ ᐱᕈᕐᓯᒪᔪᖅ ᐃᖃᓗᖕᓂ. ᐊᕐᕌᒍᖃᓕᖅᖢᓂ 9-ᓂ ᐊᓐᓂᑭᑦᑐᕐᓂᕐᒥ ᐊᔪᕈᓐᓃᖅᓴᖅᑎᑕᐅᓚᐅᕐᓯᒪᔪᖅ. ᐊᔪᙱᑲᐅᑎᒋᓯᒪᓪᓗᓂᐅ ᑕᐃᒪᓐᓇᓗ ᓯᐊᕆᔮᕈᓐᓇᕐᓯᓇᓱᓕᓚᐅᕐᓯᒪᔪᖅ ᖁᙱᐊᖅᑕᐅᓐᓇᖅᑐᒥ.
“ᐱᒋᐊᓚᐅᕐᓯᒪᒐᒃᑯᑦ ᐊᒻᒪᓗ ᖁᕕᐊᒋᔭᕋ ᖃᐅᔨᓚᐅᖅᖢᖓ,” ᐅᖃᕐᑐᖅ.
ᐊᕐᕌᓂ ᐋᓗᑕᓐ ᐊᐅᔭᒃᑯᑦ ᐊᔪᕈᓐᓃᕐᓴᕆᐊᓚᐅᕐᓯᒪᔪᖅ ᐅᐃᓂᐱᒡᒥ ᐊᒻᒪ ᑭᖑᓂᐊᒍᑦ ᓄᒃᑎᖅᖢᓂ ᑕᕝᕗᖓ ᐊᔪᕈᓐᓃᕐᓴᒃᑲᓐᓂᕐᓂᐊᕐᒪᑦ.
ᒫᓐᓇᓕ, ᐱᒡᒍᓴᐅᑎᖃᑕᐅᔪᓐᓇᖅᓯᒐᒥ ᐋᓗᑕᓐ ᐱᓕᕆᐊᒃᓴᖃᕈᓘᔭᓕᕐᑐᖅ.
ᐃᓚᒋᓪᓗᒍ ᐃᓕᓐᓂᐊᖃᑦᑕᕐᓂᖓ ᐊᔪᕈᓐᓃᕐᓴᖃᑦᑕᖅᑐᖅ ᐅᓪᓗᑦ ᑎᓴᒪᓂ ᐱᓇᓱᐊᕈᓯᕐᒥ ᐊᒻᒪᓗ ᐊᔪᕈᓐᓃᖅᓴᖅᑎᑦᑎᕙᒃᖢᓂ ᐱᖓᓱᐃᖅᖢᓂ ᐱᓇᓱᐊᕈᓯᕐᒥ.
ᐋᓗᑕᓐ ᐸᕐᓇᒃᐸᓪᓕᐊᖕᒥᔪᖅ ᑭᖑᓪᓕᕐᒥ ᐱᒡᒍᓴᐅᑎᖃᑕᐅᕝᕕᒃᓴᖓᓄᑦ ᐅᕙᓂ ᒫᓂᑑᐸᒥ ᓵᓚᒃᓴᕋᓱᒃᑐᓂᑦ (Manitoba Provincial Championships) ᒫᔅᓯᐅᓕᕐᐸᑦ.
ᐊᖏᕐᕋᖓᓂ ᐅᖓᓯᒃᓴᓕᕋᓗᐊᖅᖢᓂ, ᐋᓗᑕᓐ ᐅᖃᕐᑐᖅ ᐃᓕᖅᑯᓯᕐᒥᓂ ᓱᓕ ᐊᑐᖃᑦᑕᕐᓂᖓᓂ ᐊᒻᒪᓗ ᑭᒡᒐᖅᑐᐃᓂᐊᕈᒪᓪᓗᓂ ᐊᔪᙱᓐᓂᖓᒍᑦ. ᐱᒡᒍᓴᐅᑎᓂᕐᒧᑦ ᐋᓐᓄᕌᖓ ᓴᓇᔭᐅᓚᐅᕐᓯᒪᔪᖅ ᐃᓄᒃᒧᑦ ᒥᕐᓱᖅᑎᒧᑦ, ᐊᒻᒪᓗ ᓯᐊᕐᕆᔮᖅᐸᒃᖢᓂ ᐃᓄᖕᓂᑦ ᐃᙱᖅᑏᑦ ᑎᑕᐅᑎᖏᓐᓄᑦ.
ᐆᒧᖓᓕ ᒍᐊᑕᓐ ᓕᓂ ᐱᒡᒍᓴᐅᑎᓂᕐᒧᑦ ᓂᕈᐊᓚᐅᕐᓯᒪᔪᖅ ᐆᒥᖓ ᑳᓕᕘᓂᐊᒧᑦ ᐃᖏᖅᖢᓂ ᐃᓕᓴᐱ, ᑖᓐᓇᓗ ᐱᓐᓇᕆᓛᕆᓂᕋᖅᖢᓂᐅᒃ ᐃᙱᖅᑎᓂᒃ ᐃᓄᒃᓂᑦ.
ᐋᓗᑕᓐ ᐅᖃᓚᐅᕐᑐᖅ ᐃᖃᓗᖕᓄᑦ ᐅᑎᓛᕈᒪᓂᕋᖅᖢᓂ, ᐊᒻᒪᓗ ᐊᔪᕈᓐᓃᖅᓴᖅᑎᑦᑎᔨᐅᖃᑦᑕᓕᕐᓗᓂ ᐊᒻᒪ ᐊᔪᕈᓐᓃᖅᓴᖅᑎᑦᑎᕙᒡᓗᓂ ᐃᓄᖕᓂ ᓯᐊᕈᔮᕈᓐᓇᕐᓂᕐᒥ ᖁᙱᐊᖅᑕᐅᕙᒡᓗᑎᒃ ᐊᖏᕐᕋᖓᓂ.
(0) Comments