ᐃᓄᒃ ᐊᕐᓇᖅ ᐃᓄᑑᓪᓗᓂ ᐃᓅᔪᓐᓃᕈᑎᖃᕋᓱᒋᔭᐅᔪᖅ ᐆᒻᒪᓯᕆᓂᕐᒧᑦ: ᑐᖁᖓᔪᓕᕆᔨ

ᐃᓕᓴᐱ ᐳᑐᒍᖅ, 61, ᐃᓅᔪᓐᓃᓚᐅᕐᒪ ᓄᕕᐱᕆ 12-ᒥ ᒪᓐᑐᕆᐊᒥ ᐅᖅᑯᐊᖅᓯᐅᖅᑎᓪᓗᒍ ᐃᒡᓗᐊᓗᓕᐊᕆᔭᐅᔪᒥ

ᑐᖁᖓᔪᓕᕆᔨᐅᑉ ᐅᓂᒃᑳᖏ ᐅᖃᐅᓯᖃᕐᑐᑦ ᓄᕕᐱᕆ 12-ᓂ ᐃᓕᓴᐱ ᐳᑐᒍᖅ, 61, ᐃᓅᔪᓐᓃᕈᑎᖓᓂ ᒪᓐᑐᕆᐊᒥ ᓄᓇᖃᕐᓂᑰᓪᓗᓂ ᓴᓪᓗᐃᑦᓂ ᐆᒻᒪᓯᕆᓂᕐᒨᖓᓇᓱᒋᔭᐅᓪᓗᓂ ᐅᖅᑯᐊᖅᓯᐅᑎᓪᓗᒍ ᐃᒡᓗᓕᐅᖅᑕᐅᕙᓪᓕᐊᔪᓂᒃ. (ᐊᔾᔨᙳᐊᖅ ᐅᕙᙵᑦ ᑕᐃᕕᑦ ᓵᑉᒪᓐ)

By ᒫᑕᓕᓐ ᕼᐊᐅᕕᑦ

ᐃᓕᓴᐱ ᐳᑐᒍᖅ, ᐃᓄᒃ ᐊᕐᓇ ᐃᓅᔪᓐᓃᓚᐅᕐᑐᖅ ᒪᓐᑐᕆᐊᑉ ᑕᐅᓐᑕᐅᓐᖓᓂ ᐃᒡᓗᐊᓗᓕᐊᕆᔭᐅᔪᓂ ᓄᕕᐱᕆᐅᓚᐅᕐᓯᒪᔪᒥᒃ ᐃᓅᔪᓐᓃᑐᐃᓐᓇᕐᓂᕋᖅᑕᐅᓚᐅᕐᑐᖅ ᑯᐸᐃᒃᒥ ᑐᖁᖓᔪᓕᕆᔨᓄᑦ ᖃᐅᔨᓴᖅᑐᓄᑦ.

ᐳᑐᒍᖅ, 61, ᓇᓂᔭᐅᓚᐅᕐᓯᒪᖕᒪᑦ ᑭᐅᔪᓐᓇᕈᓐᓃᕐᓯᒪᔪᖅ ᓄᕕᐱᕆ 13 ᐅᓪᓛᕌᓗᐊᓂ ᐃᒡᓗᐊᓗᓕᐊᕐᕕᖕᒥ ᕆᓂ ᓚᕙᒃ ᐳᓕᕚᑦ ᒥᒃᓵᓂ ᑲᐃᐳᑦ ᓯᑯᐃᐊ ᖃᓂᒋᔭᖓᓂ ᒪᓐᑐᕆᐊᒥ.

ᐃᓱᒪᒋᔭᐅᖕᒪ ᐃᓅᔪᓐᓃᕋᓱᒋᔭᐅᓪᓗᓂ ᐅᓐᓄᐊᖓᓂ ᐅᖅᑯᐊᖅᓯᐅᖅᑎᓪᓗᒍ ᐃᒡᓗᐊᓗᓕᐅᕐᕕᒃᒥ. ᐸᓖᓯᒃᑯᑦ ᑖᔅᓱᒥᖓ ᐃᕋᔭᐅᒃᑕᐅᓂᑰᙱᓐᓂᕋᐃᔪᑦ.

ᑐᖁᖓᔪᓕᕆᔨᐅᑉ ᐅᓂᒃᑳᖏᓐᓂᒃ, ᔫᓂ 16-ᖑᑎᓪᓗᒍ, ᓘᒃᑖᖅ ᓗᐃ ᓄᐊᒪᓐᑎᓐ ᑎᑎᕋᓚᐅᕐᑐᖅ ᐅᐃᕖᑐᑦ ᐆᒻᒪᑎᖓ ᓄᖅᑲᑐᐃᓐᓇᕋᓱᒋᓪᓗᓂᐅᒃ ᑕᐃᒪᓐᓇ ᐳᑐᒍᖅᒧ ᐃᓅᔪᓐᓃᕈᑎᐅᓪᓗᓂ. ᐅᖃᓚᐅᕐᑐᖅ ᐋᓐᓂᐊᖃᐅᕐᓂᖓᓂᒃ, ᐃᓚᒋᔭᐅᓪᓗᓂ ᐃᒥᐊᓗᒍᒪᐃᓐᓇᐅᔭᕐᓂᕐᒥᒃ, ᖀᕐᓱᖃᑦᑕᖅᖢᓂ, ᐳᕙᖏᑦᑎᒍᑦ ᓈᒻᒪᙱᓕᐅᕈᑎᖃᖅᖢᓂ ᐊᒻᒪ ᓂᕆᑦᑎᐊᖃᑦᑕᙱᓗᐊᖅᖢᓂ.

ᐳᑐᒍᖅ ᓴᓪᓗᐃᑦ, ᓄᓇᕕᒃᒥ ᓄᓇᖃᓚᐅᕐᓯᒪᔪᖅ ᐊᒻᒪᓗ ᓄᕕᐱᕆ 3-ᒥ ᒪᓐᑐᕆᐊᒧᐊᖅᖢᓂ ᑕᕝᕗᖓ ᐋᓐᓂᐊᕕᒥᒃ ᖃᐅᔨᓴᖅᑕᐅᔭᖅᑐᖃᑦᑕᕋᒥ.

ᐃᒥᐊᓗᓗᐊᕐᓯᒪᓂᒨᖓᓚᐅᙱᑦᑐᖅ ᓲᖃᐃᒻᒪ ᖃᐅᔨᓴᖅᑕᐅᖁᔭᐅᓯᒪᙱᓐᓂᖓᓄᑦ ᑐᖁᔾᔪᑎᖓᓂᒃ, ᓄᐊᒪᓐᑎᓐ ᑎᑎᕋᕐᓯᒪᓚᐅᕐᑐᖅ.

ᐅᓂᒃᑳᑎᒍᓪᓕ, ᐳᑐᒍ ᐃᓅᓕᓴᐅᑎᓂ ᐱᑲᑕᒍᓐᓃᓚᐅᕐᓯᒪᖕᒪᑦ ᖀᕐᓱᖃᑦᑕᕐᓂᖓᓄᑦ ᓄᕕᐱᕆ 6 ᐊᓂᒍᖅᑎᓪᓗᒍ ᑕᐃᒪᓐᓇᓗ ᓄᐊᒪᓐᑎᓐ ᐃᓱᒪᓕᓚᐅᕐᑐᖅ ᖀᕐᓱᓕᕐᓂᖅᐸᑦ ᐅᕝᕙᓘᓐᓃᑦ “ᐆᒪᑎᖓ ᐊᒃᓱᕈᓗᐊᓕᕐᓂᖓ” ᐃᓅᔪᓐᓃᕐᓂᖓᓄ ᐃᓚᒋᔭᐅᓇᓱᒋᓪᓗᓂᒋᑦ.

ᐳᑐᒎᑉ ᐅᐃᖓ, ᓄᐊ ᖁᐱᕐᕈᐊᓗᒃ ᐅᖃᓚᐅᕐᑐᖅ ᐃᓅᔪᓐᓃᕐᓂᖓ “ᓱᓕ ᐅᕙᓐᓄ ᐊᒃᑐᐃᓯᒪᔪᖅ.”

“ᐅᕙᓐᓄ ᐃᓄᑦᑎᐊᕚᓘᓚᐅᕐᒪᓐ,” ᖁᐱᕐᕈᐊᓗᒃ ᐅᖃᕐᑐᖅ.

ᐅᖃᓚᐅᕐᑐᖅ ᑐᑭᓕᐅᕆᔪᓐᓇᑦᑎᐊᓚᐅᕐᓂᖓᓂ ᖃᓪᓗᓈᑎᑐᑦ ᐊᒻᒪ ᐃᓄᒃᑎᑐᑦ ᐊᒻᒪᓗ ᐃᕐᖑᑕᖏᓐᓂ ᑲᒪᒋᔭᖃᕆᐊᒃᓴᖅ ᖁᕕᐊᒋᓪᓗᓂᐅᒃ. ᐅᖃᓚᐅᕐᒥᔪᖅ ᐋᓂ ᐳᑐᒍᕐᒥ ᐃᓚᖃᑦᑎᐊᕐᓂᖓᓂᒃ, ᓄᑲᖓ ᑎᑎᕋᐅᔭᒐᖅᑎ ᐃᓅᔪᓐᓃᓚᐅᕐᓯᒪᔪᖅ ᐋᑐᕚᒥ 2016-ᒥ.

ᖁᐱᕐᕈᐊᓗᒃ ᐅᖃᓚᐅᕐᑐᖅ ᑕᑯᓚᐅᙱᓐᓂᕋᖅᖢᓂ ᑐᖁᖓᔪᓕᕆᔨᐅᑉ ᐅᓂᒃᑳᖏᓐᓂᒃ ᐅᑯᓇᙵ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ ᐅᖄᓚᕝᕕᐅᑎᓪᓗᒍ ᔪᓚᐃ 13-ᒥ ᐊᒻᒪᓗ ᐅᖃᖅᖢᓂ ᑐᓴᖅᑎᑕᐅᓚᐅᙱᓐᓂᖓᓂᒃ ᐱᐊᓂᒃᑕᐅᓯᒪᓕᕐᓂᖓᓂ ᐊᖅᑭᐅᓚᐅᖅᑐᒥᓐ.

ᑐᖁᖓᔪᓕᕆᔨᐅᑉ ᐅᓂᒃᑳᖏᑦ ᑭᒃᑯᓕᒫᓄᑦ ᐅᖃᓕᒫᖅᑕᐅᔪᓐᓇᖅᑐᑦ ᑭᓯᐊᓂᓕ ᓴᖅᑭᑕᐅᔪᓐᓇᖅᖢᑎᒃ ᑕᐃᒪᐃᖁᔭᐅᒃᐸᑦ. ᖁᐱᕐᕈᐊᓗᒃ ᐅᖃᓚᐅᕐᑐᖅ ᐃᑭᐊᖅᑭᕕᒃᒥᑦ ᐊᑐᐃᓐᓇᖃᙱᓐᓂᖓᓂᒃ ᐊᖏᕐᕋᖓᓂ.

ᐃᓱᒪᓂᕋᓚᐅᕐᑐᕐᓕ ᐳᑐᒍᖅ ᕿᕿᓐᓂᑰᓇᓱᒋᓪᓗᓂᐅᒃ ᐃᒡᓗᐊᓗᒃᓴᒦᓚᐅᕐᓂᖓᓄᑦ ᑭᓯᐊᓂᓕ ᑐᖁᖓᔪᓕᕆᔨᐅᑉ ᐅᓂᒃᑳᖏ ᐅᖃᐅᓯᖃᙱᑦᑐ ᑕᐃᒪᐃᓐᓂᑰᓇᔭᕆᐊᒃᓴᖓᓂᒃ.

ᐃᓚᖏ ᒪᓐᑐᕆᐊᒥ ᐊᖏᕐᕋᖃᙱᑦᑐᓕᕆᔩᑦ ᖃᐅᔨᒪᔪᑦ ᐳᑐᒍᖅᒥ ᐃᓱᒪᒋᔭᐅᑦᑎᐊᑲᑕᒃᖢᓂ ᑭᓯᐊᓂᓕ ᓈᒻᒪᒃᓴᑲᑕᓚᐅᙱᑦᑐ ᑐᖁᖓᔪᓕᕆᔨᐅᑉ ᐅᓂᒃᑳᓕᐊᖏᓐᓂᒃ ᖃᓄᖅ ᐳᑐᒍᖅ ᐃᓅᔪᓐᓃᕐᓂᑰᖕᒪᖔᑦ.

ᐅᓂᒃᑳᓂᒃ, ᓄᐊᒪᓐᑎᓐ ᑎᑎᕋᖅᓯᒪᖕᒪᑦ: “ᒥᔅ ᐳᑐᒍᖅ ᕿᒪᐃᔪᓐᓇᕐᓯᔭᕌᖓ ᕿᒪᐃᖃᑦᑕᓚᐅᕐᒪᓐ” ᐊᖏᕐᕋᖃᙱᑦᑐᒃᑯᕕᖕᓂ ᐊᒻᒪᓗ ᓄᓇᓕᐸᐅᔭᓂ ᐱᓱᑲᑕᓕᖅᐸᒃᖢᓂ.

“ᐅᓇ ᓄᓇᖃᖅᑐᑐᖃᐅᓂᑯ ᓇᓂᓯᔪᓐᓇᙱᑦᑐᖅ ᐅᖅᑰᔪᒥᒃ ᐅᐸᒍᓐᓇᖅᑕᖓᓂ, ᐊᒻᒪᓗ ᐃᑲᕐᕋᖏ ᑭᖑᓪᓕᖅᐹᕆᔭᖏ ᐱᐅᔪᐊᓗᖕᒥ ᓴᓇᔭᐅᔪᒦᖢᓂ ᐊᒻᒪᓗ ᐃᒡᓗᓕᕆᔨᓄ ᑲᒪᒋᔭᐅᙱᖢᓂ,” ᐅᖃᕐᑐᖅ ᑕᐃᕕᑦ ᓵᑉᒪᓐ, ᐱᓕᕆᐊᒧᑦ ᑐᑭᒧᐊᖅᑎᑦᑎᔨ ᐅᑯᓄᖓ ᕆᓯᓕᐊᓐᔅ ᒪᓐᑐᕆᐊᓪ (Resilience Montreal), ᐅᓪᓗᒃᑯ ᐊᖏᕐᕋᖃᙱᑦᑐᓂ ᐅᐸᒐᒃᓴᖅ ᐳᑐᒎᑉ ᐅᐸᖃᑦᑕᖅᓯᒪᔭᖓ.

“ᐅᐊᑲᓪᓚᓗᐊᖅ ᑕᐃᒪᓐᓇ ᑭᓲᔪᓐᓃᖅᑕᐅᓯᒪᔭᕆᐊᒃᓴᖅ, ᑭᓯᐊᓂᓕ ᑐᖁᖓᔪᓕᕆᔨᐅᑉ ᐅᓂᒃᑳᖏ ᓱᓕᓇᔭᕐᓂᖏᓐᓂᒃ ᐊᒻᒪ ᐋᖅᑭᒃᓱᐃᓇᓱᙱᓪᓗᓂ ᖃᓄᐃᓕᖓᓂᕐᒥᒃ … ᓲᕐᓗ ‘ᐅᓇ ᐊᕐᓇᖅ ᐅᐸᒃᓯᒪᑐᐃᓐᓇᓪᓗᐊᖅᑐᕕᓂᒃ [ᐊᖏᕐᕋᖃᙱᑦᑐᒃᑯᕕᖕᒥ],” ᐅᖃᕐᑐᖅ.

“ᐊᒃᓱᕈᕐᓯᒪᕕᒡᔪᐊᕐᓇᖅ ᑕᐃᒪᓕ ᐃᒪᓐᓇᐅᖅᑰᔨᔪ ᓄᓇᖓ ᐃᓄᒋᐊᓄᑦ ᓄᓇᒋᔭᐅᑎᑕᐅᓯᒪᓪᓗᓂ ᐊᒻᒪᓗ ᐋᓐᓂᐊᕕᐊᓗᖃᙱᖢᓂ ᓄᓇᓕᒃ, ᑕᐃᒪᓕ ᐱᒃᑲᖅᑎᑦᑕᕆᐊᖃᖅᐹ ᐃᒥᖃᑦᑕᕐᓂᖓᓄᑦ,” ᐅᖃᕐᑐᖅ ᓇᑯᓴᑦ, ᐊᐅᓚᑦᑎᔨ ᑐᑭᒧᐊᖅᑎᑦᑎᔨ ᓄᓇᖃᖅᑳᖅᑐᓄᑦ ᐊᕐᓇᓄᑦ ᐊᖏᕐᕋᖃᙱᑦᑐᓕᕆᓂᕐᒥᒃ ᒪᓐᑐᕆᐊᒥ.

ᓇᑯᓴᑦ ᐅᖃᒪᐅᕐᑐᖅ ᐳᑐᒍ ᑕᑯᓚᐅᖃᑦᑕᓚᐅᕐᓂᕋᖅᖢᓂᐅᒃ ᑕᐅᓐᑕᐅᓐᒦᑲᑕᒃᑎᓪᓗᒍ.

“ᐱᐅᑦᑎᐊᓚᐅᕐᑐᖅ, ᖁᖓᐃᓐᓇᐅᔭᖅᖢᓂ ᐊᒻᒪ ᖁᕕᐊᓱᐃᓐᓇᐅᔭᖅᖢᓂ … ᖁᙱᐊᖅᑕᐅᖃᑦᑕᒐᑦᑕ ᑲᐃᐳᑦ ᓯᑯᐃᐊᒥ ᓄᓇᖃᖅᑳᖅᑐᑦ ᐅᓪᓗᖓᓂ ᐊᒻᒪᓗ ᐅᐸᒍᑏᓐᓇᐅᔭᖅᖢᓂ ᖁᙱᐊᖅᑕᐅᓐᓇᒥ,” ᓇᑯᓴᑦ ᐅᖃᕐᑐᖅ.

“ᖁᕕᐊᓱᖕᓂᖓ ᓴᖅᑭᔮᒻᒪᕆᖃᑦᑕᓚᐅᕐᑐᖅ ᐊᒃᓱᕈᕐᓇᕈᓘᔭᖅᑐᓂᒃ ᐊᑐᕋᓗᐊᖅᑎᓪᓗᒍ.” ᓵᑉᒪᓐ ᐃᖅᑲᐅᒪᖕᒥᔪᖅ ᐳᑐᒍᖅ “ᐅᖃᖃᑎᒋᔭᕐᓂᑦᑎᐊᓚᐅᕐᓯᒪᓂᖓᓂᒃ … ᐃᓱᒪᒋᔭᖃᑦᑎᐊᖅᖢᓂ ᐊᒻᒪ ᑐᙵᓇᑦᑎᐊᖅᖢᓂ.”

“ᐃᒃᐱᒍᓱᖕᓇᑦᑎᐊᓚᐅᕐᒥᔪᖅ ᐃᕐᖑᑕᖏᓐᓂᒃ ᐅᖃᖃᑎᖃᖅᖢᓂ ᐅᖄᓚᐅᑎᒃᑯᑦ, ᐃᓛᓐᓂ ᐃᙱᕐᕕᒋᓪᓗᓂᒋ,” ᐅᖃᕐᑐᖅ.

“ᐃᓅᖃᑎᑦᑎᐊᕚᓘᓚᐅᕐᑐᖅ ᐊᒻᒪᓗ ᐃᒡᓚᕐᓇᕈᓘᔭᕐᓇᖅᐸᒃᖢᓂ. ᑕᐃᒃᑯᐊᓕ ᐊᓯᐅᑐᐃᓐᓇᕆᐊᖃᓕᕐᒥᔪᑦ ᐅᖃᐅᓯᑎᒍᑦ.”

Share This Story

(0) Comments

Join the Conversation

Your email address will not be published. Required fields are marked *

*