ᓄᓇᕕᒃ ᐅᖃᐅᓯᖃᑲᑕᒋᐊᖃᓕᕐᑐᖅ ‘ᐃᓅᖃᑎᒌᖕᓂᕐᒥ’ ᑯᑭᕐᑕᐅᔪᖃᓚᐅᖅᑎᓪᓗᒍ: ᑲᑎᕕᒃ ᓄᓇᓕᓕᒫᑦ ᒐᕙᒪᖓ

For English version, see Nunavik must talk about ‘social fabric’ after Inukjuak shooting, KRG says

ᓄᓇᕕᒻᒥᐅᑦ ᐅᖃᐅᓯᖃᑲᑕᒋᐊᖃᓕᕐᒪᑕ “ᐃᓅᖃᑎᒌᖕᓂᕐᒥ” ᑎᓯᐱᕆ 20-ᒥ ᐸᓖᓯᒃᑯᑦ ᖁᑭᕆᐊᖃᑕᐅᓚᐅᖅᑎᓪᓗᒋᑦ ᐃᓄᒃᔪᐊᒃᒥ ᐊᑕᐅᓯᖅ ᐃᓄᒃ ᑐᖁᓪᓗᓂ ᐊᒻᒪ ᐊᑕᐅᓯᖅ ᐋᓐᓂᕐᑕᐅᓪᓗᓂ ᐊᖓᔪᖅᑳᕆᔭᐅᔪᖅ ᒐᕙᒪᓕᕆᔨᓄᑦ ᐅᖃᓚᐅᕐᑐᖅ.

“ᓄᓇᕕᒻᒥᐅᑕᐅᓪᓗᑕ ᐅᖃᓪᓚᖃᑎᒌᒋᐊᖃᓕᕐᑐᒍᑦ ᐃᓅᖃᑎᒌᖕᓂᕐᒥ. ᒪᑯᐊ ᐋᓐᓂᕈᑎᐅᔭᓗᐊᕐᑐᑦ ᐊᑐᕐᑕᐅᙱᓐᓂᕐᓴᐅᔾᔪᑎᖏᓐᓂ ᕿᓂᕆᐊᖃᓕᕋᑦᑕ. ᑕᒪᑦᑕᓕᒫᖅ ᑲᑎᖃᑎᒌᒋᐊᖃᓕᕋᑦᑕ ᐱᑦᑎᐊᒋᓗᐊᕐᓂᐊᓗᒃ ᓄᖅᑲᖅᑎᔾᔫᒥᓇᓱᒡᓗᒍ ᓄᓇᒋᔭᑦᑎᓐᓂ,” ᑲᑎᒪᒃ ᓄᓇᓕᓕᒫᓄᑦ ᒐᕙᒪᒃᑯᑦ ᐃᒃᓯᕙᐅᑕᖓ ᒫᒋ ᐃᒧᑦᓗᒃ ᐅᖃᓚᐅᕐᑐᖅ ᑐᓴᒐᒃᓴᓕᐅᖅᑎᓪᓗᒋᑦ ᑎᓯᐱᕆ 23-ᒥ.

ᐃᒧᑦᓗᒃ ᐊᒻᒪ ᐃᓄᒃᔪᐊᒃᒥ ᒪᐃᔭ ᐹᐱ ᐃᐳ ᐅᖃᐅᓯᒃᓴᖃᓕᓚᐅᕐᒪᑎᒃ ᐅᑯᐊ ᑲᑎᕕᒃ ᓄᓇᓕᓕᒫᓄᑦ ᒐᕙᒪᒃᑯᑦ ᐅᖃᐅᓯᖃᕐᑎᓪᓗᒋᑦ “ᐊᐃᑉᐸᖓ ᖃᓄᐃᓕᐅᕈᑎᕐᔪᐊᖅ ᑕᒪᑐᒪᓂ ᐊᕐᕌᒍᒥ ᐸᓖᓯᓕᕆᓂᒃᑯᑦ.”

ᐅᓇ ᑎᓴᒪᒋᓕᕐᑕᖓ ᓄᓇᕕᒃᒥ ᐸᓖᓯᑦ ᖁᑭᕐᓴᖅᖢᑎᒃ ᐃᓄᖕᓂ ᑕᐃᒪᙵ ᓄᕕᐱᕆ 2024-ᖑᓚᐅᕐᓯᒪᔪᒥ, ᑐᖂᑦᑎᓪᓗᑎᒃ ᐋᓐᓂᕐᓯᓪᓗᑎᒡᓘᓐᓃᑦ 6-ᓂ ᐃᓄᖕᓂ. ᑎᓴᒪᑦ ᐃᓄᐃᑦ ᐃᓅᔪᓐᓃᕐᓯᒪᔪᑦ ᖁᑭᖅᑕᐅᓚᐅᖅᖢᑎᒃ ᐸᓖᓯᓄᑦ; ᒪᕐᕉᒃ ᐋᓐᓂᖅᑕᐅᓯᒪᑐᐃᓐᓇᖅᖢᑎᒃ.

ᐊᖑᑎ ᐊᒻᒪ ᓱᕈᓯᖅ ᐅᖃᐅᓯᐅᓚᐅᕐᑑᒃ ᐋᓐᓂᕐᓯᒪᒐᓗᐊᖅᖢᑎᒃ ᐅᓗᕆᐊᓇᖅᑐᒦᓗᐊᙱᓐᓂᕋᖅᑕᐅᓪᓗᑎᒃ ᒪᓐᑐᕆᐊᒥ ᐋᓐᓂᐊᕕᐊᓗᒃᒥ ᐅᓪᓛᒃᑯᑦ ᖃᓄᐃᓕᐅᕐᓂᖃᓚᐅᕐᑎᓪᓗᒋᑦ ᓄᓇᓕᖕᓂ ᐃᓄᖃᖅᑐᒥ 1,800-ᓂ ᓄᓇᕕᒃᓯ ᑕᑎᐅᔭᕐᔪᐊᑉ ᓯᒡᔭᖓᓃᑦᑐᒥᒃ.

ᐃᓚᖏᑦ ᖁᑭᖅᑕᐅᔾᔪᑎᖏᓐᓄᑦ ᐃᓅᔪᓐᓃᕐᓂᑰᓪᓗᑎᒃ, ᐅᖃᓚᐅᕐᑐᑦ ᑯᐸᐃᒃᒥ Bureau des enquêtes indépendantes ᐅᖃᓚᐅᕐᑐᑦ ᐊᐃᑉᐹᓂ ᑐᓴᒐᒃᓴᓕᐊᖏᓐᓂ ᐅᖃᐅᓯᖃᒃᑲᓐᓂᖅᖢᑎᒃ. ᑐᓴᒐᒃᓴᕆᔭᐅᔪᖅ ᐅᖃᕐᓯᒪᓚᐅᙱᑦᑐᖅ ᓱᕈᓯᖅ ᐊᖑᑎᓘᓐᓃᑦ ᐃᓅᔪᓐᓃᓚᐅᕐᒪᖔᑕ, ᐅᕝᕙᓘᓐᓃᑦ ᖃᖓ ᐃᓅᔪᓐᓃᓚᐅᕐᒪᖔᑕ.

ᑎᓯᐱᕆ 20 ᐱᒋᐊᓕᓵᕐᑎᓪᓗᒍ ᐸᓖᓯᒃᑯᑦ ᐅᖄᓚᔪᒥ ᑭᐅᓯᓚᐅᕐᓯᒪᖕᒪᑕ ᓄᓇᖃᕐᑐᒥ ᑖᓐᓇᓗ ᐅᖃᖅᖢᓂ ᑖᓐᓇᓗ ᐃᓚᖏᓪᓗ ᐋᖓᔮᖅᑐᒧᑦ ᑲᑉᐱᐊᓵᕆᔭᐅᓂᖓᓂ, ᐅᖃᕐᓯᒪᓚᐅᕐᑐᖅ ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᑐᓴᒐᒃᓴᖏᑦ. ᓯᕗᓪᓕᖅᐹᖑᓚᐅᕐᑐᖅ ᒐᕙᒪᓕᕆᔨ ᐅᖃᕐᑎᓪᓗᒍ ᐃᒥᐊᓗᖕᒧᑦ ᑕᐃᒪᐃᔾᔪᑎᖃᓚᐅᕐᓂᖏᓐᓂᒃ.

ᐸᓖᓯᒃᑯᑦ ᐅᐸᒃᑎᓪᓗᒋᑦ, ᐃᓄᒃ ᖁᑭᐅᑎᓕᔭᕐᑐᖅ ᐸᓖᓯᓄᑦ ᓵᖢᓂ ᐊᒻᒪ ᐅᑯᐊ ᑲᑎᕕᒃ ᓄᓇᓕᓕᒫᖅ ᒐᕙᒪᒃᑯᑦ ᑕᐃᔭᖏ “ᖁᑭᕐᓴᖃᑦᑕᐅᑎᓚᐅᑲᖕᓂᖏᓐᓂᒃ” ᑭᖑᓂᐊᒍᑦ. ᑖᓐᓇ ᐊᖑᑎ “ᖁᑭᐅᑦᑎᔭᕐᑐᖅ” ᐊᒻᒪ ᓱᕈᓯᖅ, ᑖᓐᓇᓕ ᐃᒡᓘ ᐃᓗᐊᓃᓐᓂᑯ, ᐋᓐᓂᖅᑕᐅᓕᓚᐅᕐᑐᑦ. ᑲᒪᒋᔭᐅᑲᐅᑎᒋᓪᓗᑎᒃ ᑕᕝᕙᓂ ᐊᒻᒪ ᖃᖓᑕᓲᒃᑯᑦ ᐊᐅᓪᓚᖅᑎᑕᐅᓪᓗᑎᒃ ᐋᓐᓂᐊᕕᐊᓗᒃᒧᑦ ᑕᐃᑲᓃᖢᑎᒡᓗ ᑎᓯᐱᕆ 23-ᒥ ᐅᓂᒃᑲᐅᓯᐅᑎᓪᓗᒋᑦ.

ᓘᓯ ᓇᐅᕋ, ᐃᓚᒋᔭᐅᔪᖅ ᐊᖑᑎᒧᑦ ᖁᑭᖅᑕᐅᔪᒧᑦ, ᐅᖃᓚᐅᕐᑐᖅ ᑖᓐᓇ ᐃᓚᖓ ᐊᖑᑎ ᖁᑭᕐᓴᖃᑕᐅᓂᕋᖅᑕᐅᔪᖅ ᐅᒃᐱᕈᓱᓚᐅᙱᑦᑐᖅ ᓲᖃᐃᒻᒪ ᐃᑲᔪᖃᑕᐅᔪᕕᓂᖅ ᖁᑭᖅᑕᐅᑎᓪᓗᒋᑦ ᐅᖃᓚᐅᕐᒪᓐ ᖁᑭᐅᑎᑕᖃᓚᐅᙱᓐᓂᖓᓂ ᖃᓂᒋᔭᖓᓂ ᐊᖑᑎᐅᑉ.

ᑯᐸᐃᒃᒥ ᖃᐅᔨᓴᖅᑎᐅᕙᒃᑐᑦ (Quebec’s Bureau des enquêtes indépendantes), ᖃᐅᔨᓴᖃᑦᑕᖅᑐᑦ ᐃᓄᐃᑦ ᐃᓅᔪᓐᓃᕌᖓᑕ ᐅᕝᕙᓘᓐᓃᑦ ᐋᓐᓂᕐᑕᐅᕐᔪᐊᕌᖓᑕ ᐸᓖᓯᓄᑦ ᑕᒪᑐᒥᖓ ᖃᐅᔨᓴᓯᒋᐊᓚᐅᕐᑐᑦ ᑎᓯᐱᕆ 20-ᒥ.

ᑕᓪᓕᒪᑦ ᖃᐅᔨᓴᖅᑏᑦ ᑎᑭᓚᐅᕐᓯᒪᔪᑦ ᐃᓄᒃᔪᐊᒃᒧᑦ ᑎᓯᐱᕆ 21-ᒥ, ᖃᐅᔨᓴᖅᑎᓄᑦ ᐅᖃᕐᑎ ᔨᐅᕆᒥ ᑳᒻᑐᐊᔅ ᐅᑲᓚᐅᕐᑐᖅ ᖃᕋᓴᐅᔭᒃᑯᑦ ᑎᑎᕋᖅᖢᓂ.

ᓄᓇᕕᒃᒥ ᐸᓖᓯᒃᑯᑦ ᐊᖓᔪᖅᑳᕆᑲᐃᓐᓇᖅᑕᖓᑦ ᔮᓐ-ᕗᕌᓐᓱᐊ ᐴᓂᐄ ᐃᓄᒃᔪᐊᒃᒧᐊᓚᐅᕐᒥᔪᖅ ᑲᑎᖃᑎᖃᕆᐊᖅᑐᖅᖢᓂ ᓄᓇᓖᑦ ᐊᐅᓚᑦᑎᔨᖏᑦ, ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᐅᖃᓚᐅᕐᑐᑦ.

ᐃᒧᑦᓗᒃ ᐅᖃᖃᑎᖃᓚᐅᕐᑐᖅ ᐃᐳᒥ, ᑖᓐᓇᓗ ᐃᓚᒋᔭᐅᔪᓂ ᐃᑲᔪᖅᑐᐃᓪᓗᓂ ᐊᒻᒪᓗ ᓄᓇᓖᑦ ᐃᑲᔪᖅᑕᐅᔭᕆᐊᖃᕐᐸᑕ ᐃᑲᔪᖅᑕᐅᔪᓐᓇᕐᓂᖏᓐᓂ ᖁᑭᖅᓴᖅᑐᖃᓚᐅᕐᑎᓪᓗᒍ.

“ᑲᑎᕕᒃ ᓄᓇᓕᓕᒫᑦ ᒐᕙᒪᒃᑯᑦ ᐃᑲᔪᖅᑐᐃᓯᒪᔪᑦ ᓯᕗᓕᐅᕐᑎᒋᔭᐅᔪᓂᒃ ᐊᒻᒪᓗ ᐃᑲᔫᑎᒃᓴᖃᖅᑎᑦᑎᓪᓗᑎᒃ,” ᑐᓴᒐᒃᓴᓕᐊᕆᔭᐅᔪᑦ ᐅᖃᕐᓯᒪᓚᐅᕐᑐᑦ.