ᐃᓄᒃᑎᑐᑦ ᓂᕈᐊᕈᑎᒃᓴᓂᒃ ᐃᓚᐅᑎᑕᐅᑐᐃᓐᓇᕆᐊᓕᒃ ᑭᖑᓪᓕᕐᒥ ᒐᕙᒪᑐᖃᒃᑯᑦ ᓂᕈᐊᕆᐊᖃᓕᕐᐸᑕ: ᑲᓇᑕᒥ ᐊᖓᔪᖅᑳᖅ ᓂᕈᐊᖅᑐᓕᕆᓂᕐᒧᑦ

ᓯᑕᕚᓐ ᐱᕉ ᐱᒋᐊᖅᑎᑦᑎᔪᒪᔪᖅ ᐃᓱᒪᓕᐅᕆᓂᕐᒥᒃ ᑭᖑᓪᓕᖅᐹᓂ ᐅᓂᒃᑳᓂᙶᖅᑐᓂᒃ

ᓂᕈᐊᕐᓇᐅᓚᐅᖅᑐᒥ, ᐅᖃᓚᐅᕐᑐᖅ ᐸᕐᓇᒃᓯᒪᓕᕐᓂᕋᖅᖢᓂ ᐃᓄᒃᑎᑐᑦ ᐃᓚᐅᑎᑦᑎᓂᕐᒥᒃ ᒐᕙᒪᑐᖃᒃᑯᑦ ᓂᕈᐊᕈᑎᒃᓴᖓᓂᒃ ᓄᓇᕗᒥᑦ ᑭᖑᓪᓕᕐᒥ ᓂᕈᐊᕐᓇᐅᓕᕐᐸᑦ ᐅᑯᐊ ᑲᓇᑕᒥ ᒪᓕᒐᓕᕆᕕᒃᒥᑦ ᐊᖏᖅᐸᑕ ᐱᓕᕆᐊᖑᔪᒪᔪᒥ. (ᐊᔾᔨᙳᐊᖅ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ)

By ᑕᐃᕕᑦ ᕕᐊᓐ

ᑲᓇᑕᒥ ᓂᕈᐊᖅᑐᓕᕆᔨᒃᑯᓐᓄᑦ ᐊᖓᔪᖅᑳᖅ, ᓯᑕᕚᓐ ᐱᕉ, ᐅᖃᒪᐅᕐᑐᖅ ᐃᓄᒃᑎᑐᑦ ᑎᑎᕋᕐᓯᒪᔪᓂᒃ ᓄᓇᕗᒥᑦ ᓂᕈᐊᕈᑎᒃᓴᓂᒃ ᑕᑯᓛᕈᒪᓪᓗᓂ ᑭᖑᓪᓕᕐᒥᒃ ᒐᕙᒪᑐᖃᒃᑯᑦ ᓂᕈᐊᖅᑎᑦᑎᓕᖅᐸᑕ.

ᑲᓇᑕᒥ ᒪᓕᒐᓕᕆᔨᕐᔪᐊᓄᑦ ᑲᑎᒪᔨᕋᓛᑦ ᖃᓄᐃᓕᐅᕈᑎᓄᑦ ᐊᒻᒪᓗ ᒪᓕᒐᓕᕆᓂᕐᒥᒃ ᐱᓕᕆᐊᖃᕐᓂᕐᒧᑦ ᐃᓱᒪᓕᐅᕆᓚᐅᕐᒪᑕ ᐊᓯᙳᖅᑎᑦᑎᖁᔨᓪᓗᑎᒃ ᐅᓂᒃᑳᓃᑦᑐᓂᒃ ᓴᖅᑭᑕᐅᓂᑯᓂᒃ ᔫᓃᐅᑎᓪᓗᒍ.

ᐅᓂᒃᑳᑦ ᖃᐅᔨᓴᕈᑎᒋᔭᐅᓯᒪᖕᒪᑕ ᓄᓇᖃᖅᑳᖅᑐᑦ ᐅᖃᓪᓚᐅᓯᖏᓐᓂᒃ ᒪᐅᓇ ᒐᕙᒪᑐᖃᒃᑯᑦ ᓂᕈᐊᕈᑎᒋᕙᒃᑕᖏᓐᓂᒃ ᐊᒻᒪᓗ ᐃᓱᒪᓕᐅᕆᓕᓚᐅᖅᖢᑎᒃ ᑕᒪᓐᓇ ᐱᓕᕆᐊᖑᓂᐊᕈᓂ ᐅᑯᐊ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᐱᓕᕆᖃᑎᖃᕆᐊᖃᖅᑐᑦ ᓂᕈᐊᖅᑐᓕᕆᔨᒃᑯᓐᓂᒃ ᓄᓇᕗᒥᑦ ᐃᓄᐃᑦ ᐅᖃᐅᓯᖏ ᐃᓚᐅᑎᑕᐅᔪᓐᓇᕐᓂᐊᕐᒪᑕ ᒐᕙᒪᑐᖃᒃᑯᑦ ᓂᕈᐊᕈᑎᖏᓐᓂᒃ ᓄᓇᕗᒥ ᓂᕈᐊᓕᖅᐸᑕ.

ᐅᓇ ᐱᓕᕆᐊᒃᓴᖅ ᐊᖏᖅᑕᐅᔭᕆᐊᖃᖅᑐᖅ ᓱᓕ ᒪᓕᒐᓕᕆᔨᕐᔪᐊᓄᑦ.

ᐱᕉ ᐅᖃᓚᐅᕐᑐᖅ ᓂᕈᐊᒐᒃᓴᐅᔪᑦ ᐊᒻᒪ ᒐᕙᒪᑐᖃᒃᑯᑦ ᐊᕕᒃᑐᖅᓯᒪᐅᕐᓂᖏᑦ ᒪᓕᒐᓕᕆᓂᒃᑯᑦ ᐊᑎᕐᒥᖕᓂ ᐃᓄᒃᑎᑐᑦ ᑐᓂᓯᓯᒪᔭᕆᐊᖃᕋᔭᖅᑐᑦ ᓴᖅᑭᔮᕈᓐᓇᕐᓂᐊᕐᒪᑕ ᓂᕈᐊᕈᑎᓂᒃ ᓄᓇᕗᒥᑦ, ᑭᓯᐊᓂᓕ ᑕᒪᓐᓇ ᐊᔪᕐᓇᕋᔭᙱᑦᑐᑦ ᓲᖃᐃᒻᒪ ᓂᕈᐊᒐᒃᓴᐅᔪᑦ ᐅᖃᐅᓯᕆᔭᐅᔪᓂᒃ ᐅᖃᕈᓐᓇᖃᑦᑕᕐᒪᑕ ᐊᒻᒪ,ᓗ ᑐᓂᓯᔪᓐᓇᕋᔭᖅᖢᑎᒃ ᐃᓄᒃᑎᑑᓕᖓᔪᓂᒃ.

“ᐃᓱᒪᔪᖓᓕ ᑕᒪᓐᓇ ᐱᓕᕆᐊᕆᓗᐊᕆᐊᖃᔾᔮᒋᓐᓂᖓᓂᒃ,” ᐅᖃᕐᑐᖅ ᐊᐱᖅᓱᖅᑕᐅᑎᓪᓗᒍ ᓄᓇᑦᓯᐊᕐᒥ ᐱᕙᓪᓕᐊᔪᓂᒃ.

ᐱᕉ ᐅᖃᐅᓯᖃᑐᐃᓐᓇᓚᐅᕐᑐᖅ ᐃᓄᒃᑎᑐᑦᒥ, ᑕᒪᑐᒧᖓ ᖃᓄᐃᓕᐅᕈᑎᐅᓂᐊᖅᑐᓂᒃ ᐱᓕᕆᐊᖃᖅᐸᓪᓕᐊᑎᓪᓗᒋ ᐊᒻᒪᓗ ᖃᐅᔨᒪᙱᓐᓂᕋᖅᑐᖅ ᐃᓄᐃᓐᓇᖅᑐᓐ ᐊᑐᖅᑕᐅᓇᔭᕆᐊᒃᓴᖓᓂ ᓂᕈᐊᕈᑎᓂᒃ.

ᑭᓯᐊᓂ ᑕᒪᑐᒧᖓ ᑐᓗᖅᑕᕐᕕᖃᕋᔭᕐᑐᑦ ᒪᓕᒐᖅ ᐅᖃᕐᓯᒪᓇᔭᕐᓂᖓᓂ ᓂᕈᐊᕈᑎᓂ ᐊᑎᖅ ᐊᔾᔨᖃᕆᐊᖃᕋᔭᕐᓂᖓᓂᒃ ᓇᓗᓇᐃᒃᑯᑎᒋᔭᐅᔪᑎᑐᑦ, ᐊᒻᒪᓗ ᒐᕙᒪᒃᑯᑦ ᐃᓄᖕᓂ ᐊᔾᔨᒌᙱᑦᑐᓂ ᐊᑎᖃᖅᑎᑦᑎᖁᔨᓇᔭᙱᖢᑎᒃ, ᐅᖃᕐᑐᖅ.

ᑖᓐᓇ ᒪᓕᒐᖅ ᐊᓯᙳᕆᐊᖃᕐᑐᖅ.

“ᑕᐃᒪᐃᑦᑐᓐᓇᕐᒪᓐ, ᖃᓄᑐᐃᓐᓇᖅ ᐊᔪᙱᑦᑐᓐᓇᖅᑐᒍ ᒪᓕᒐᕆᔭᐅᔪᖅ ᐋᖅᑭᒋᐊᖅᑕᐅᒃᐸᑦ.” ᐱᕉ ᐅᖃᕐᑐᖅ.

ᓱᓕ ᓇᓗᓇᕐᑐᖅ ᓂᕈᐊᖅᑐᓕᕆᓂᕐᒧᑦ ᒪᓕᒐᖅ ᐋᖅᑭᒋᐊᖅᑕᐅᔭᕆᐊᖃᕐᒪᖔᑦ ᑖᓐᓇ ᐱᓕᕆᐊᕆᔭᐅᔪᒪᔪᖅ ᑲᔪᓯᔪᓐᓇᕐᓂᐊᕐᒪᓐ.

“ᑭᓯᐊᓂᓕ ᐱᓕᕆᐊᕋᓱᖕᓂᒃᑯᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ ᐱᑕᖃᕐᒪᓐ ᑲᓇᑕᒥ ᓂᕈᐊᖅᑐᓕᕆᓂᕐᒧᑦ ᒪᓕᒐᖅᒥ ᐱᕕᖃᖅᑎᑦᑎᔪᓐᓇᖅᑐᒥ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᑲᒪᒋᔭᖃᖅᑎᑕᐅᓗᑎᒃ ᐊᓯᙳᖅᑕᐅᔪᓂᒃ ᑕᐃᒪᐃᙱᑉᐸᓪᓗ ᒪᓕᒐᓕᕆᓂᕐᒥᒃ ᐊᓯᙳᖅᑎᑦᑎᔭᕆᐊᖃᕋᔭᕐᒪᑕ ᑖᓐᓇ ᐊᓯᙳᖅᑕᐅᔪᒪᔪᖅ ᐋᖅᑭᒃᑕᐅᓯᒪᙱᑉᐸᑦ,” ᐅᖃᕐᑐᖅ ᒫᑎᐅ ᒪᒃᑲᓇ, ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᐅᖃᓪᓚᒃᑎᒍ.

ᔫᓂ 22ᒥ, ᓄᓇᕗᑦ ᒪᓕᒐᓕᕆᔨᖓ ᓘᕆ ᐃᓪᓚᐅᖅ ᓴᖅᑭᑎᑦᑎᓚᐅᕐᒪᑦ ᐱᖁᔭᒥᒃ ᐋᖅᑭᒋᐊᖅᑎᑦᑎᔾᔪᑎᐅᔪᓐᓇᖅᑐᒥ ᑲᓇᑕᒥ ᓂᕈᐊᖅᑐᓕᕆᓂᕐᒧᑦ ᒪᓕᒐᖅᒥ ᑕᒪᒃᑯᐊ ᓂᕈᐊᕈᓐᓇᖅᑐᑦ ᐊᑐᕈᓐᓇᖁᓪᓗᒋᑦ ᓄᓇᖃᖅᑳᖅᑐᑦ ᐅᖃᐅᓯᖓᒍᑦ. ᐅᓇ ᓴᖅᑭᑕᐅᓚᐅᕐᑐᖅ ᑕᖅᑭᑦ 6 ᐊᓂᒍᖅᑎᓪᓗᒍ ᑲᑎᒪᔨᕋᓛᓄᑦ ᐊᖏᖅᑕᐅᓚᐅᖅᑎᓪᓗᒍ ᑕᒪᓐᓇ ᖃᐅᔨᓴᖅᑕᐅᖁᓂᖓ.

ᐃᓪᓚᐅᖅ, ᑲᑎᒪᔨᕋᓛᓂ ᐃᓚᐅᓚᐅᖅᑐᖅᑕᐅ, ᐅᖃᓚᐅᕐᑐᖅ ᐱᖁᔭᐅᖁᔭᖓ ᐊᓂᒍᖅᑎᑕᐅᓇᔭᖁᓪᓗᓂᐅᒃ ᑭᖑᓪᓕᕐᒥ ᒐᕙᒪᑐᖃᒃᑯᑦ ᓂᕈᐊᕐᓂᓕᕆᓚᐅᙱᓐᓂᖏᓐᓂ.

ᐃᓄᒃᑎᑐᑦ ᓂᕈᐊᕈᑎᓂ ᐱᑕᖃᕐᓂᖅ ᐃᓚᒋᔭᐅᓯᒪᖕᒪᓐ ᑐᓗᖅᑕᕈᑎᐅᔭᑦᑐᓂᒃ ᓂᕈᐊᕐᓂᕐᒧᑦ, ᑖᔅᓱᒪᓗ ᐱᕉ ᓂᕈᐊᕈᓐᓇᖅᑐᑦ ᓂᕈᐊᕆᐊᖅᑐᕐᓂᕐᓴᐅᔪᓐᓇᕐᓗᑎᒃ.

ᓯᑎᐱᕆᒥ ᒐᕙᒪᑐᖃᒃᑯᑦ ᓂᕈᐊᕐᓂᓕᕆᑎᓪᓗᒋ ᓄᓇᕗᒥᑦ 34 ᐳᓴᓐᑎᑐᐃᓐᓇᐅᓚᐅᕐᑐᑦ ᓂᕈᐊᕈᓐᓇᖅᑐᓂᒃ ᓂᕈᐊᕆᐊᖅᑐᖅᑐᑦ, ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᑎᑎᕋᕐᓯᒪᔭᖏᑦᑎᒍᑦ.

ᐱᕉ ᐱᓕᕆᑦᑎᐊᕐᓂᕐᓴᐅᔪᒪᖕᒪᒡᒎ ᐃᓄᐃᑦ ᐅᖃᐅᓯᖏ ᐱᑕᖃᐃᓐᓇᕐᓗᑎᒃ ᐱᓕᕆᐊᖃᕐᓂᖏᓐᓂᒃ, ᓂᕈᐊᕐᓂᓕᕆᓂᑯᑐᐊᖑᙱᑦᑐᖅ.

“ᐅᓇ ᓴᖅᑭᑎᑦᑎᔾᔪᑎᐅᓂᕐᓴᖅ ᐅᖃᐅᓯᓕᕆᓂᕐᒥᒃ,” ᐅᖃᕐᑐᖅ.

ᐱᕉ, ᐃᖃᓗᖕᓃᓚᐅᕐᑐᖅ ᐱᓇᓱᐊᕈᓯᐅᓚᐅᕐᑐᒥ 2022 ᑲᑎᒪᕕᒡᔪᐊᕐᓇᖓᓂ ᑲᓇᑕᒥ ᓂᕈᐊᖅᑐᓕᕆᔨᓄᑦ ᐱᓕᕆᔨᒋᔭᐅᔪᓄᑦ ᐊᒻᒪᓗ ᓄᑖᒥ ᓂᕈᐊᖅᑐᓕᕆᔨᒃᓴᒥ ᕿᓂᕐᖢᑎᒃ ᓄᓇᕗᒧᑦ.

ᓂᕈᐊᖅᑐᓕᕆᔨ ᑲᒪᒋᔭᖃᖅᑐᖅ ᓂᕈᐊᖅᑐᓕᕆᓂᕐᒥᒃ ᐊᐅᓚᑦᑎᔨᐅᓂᕐᒥᒃ ᓄᓇᕗᒥᑦ ᐊᒻᒪᓗ ᐃᑲᔪᖅᖢᓂ ᑲᓇᑕᒥ ᓂᕈᐊᖅᑐᓕᕆᔨᒃᑯᓐᓂᒃ ᓂᕈᐊᒐᒃᓴᓕᕆᓂᒃᑯᑦ, ᐱᕉ ᐅᖃᓚᐅᕐᑐᖅ.

“ᐃᓄᐃᑦ ᖃᐅᔨᒪᓂᖏᓐᓂᒃ ᐊᑐᖃᑦᑕᕋᑦᑕ. ᓂᕈᐊᖅᑐᓕᕆᔨᕗᑦ ᐱᓕᕆᔨᒻᒪᕆᐅᓛᖑᕙᖕᒪᑦ ᒪᐅᓇ ᓄᓇᓕᖕᓂ ᖃᐅᔨᒪᓂᖓᓄᑦ ᐊᒻᒪᓗ ᑐᑭᓯᓯᒪᓂᖓᓄᑦ ᐊᒃᓱᕈᕈᑎᐅᔭᑦᑐᓂᒃ,” ᐅᖃᕐᑐᖅ.

2018-ᒥ ᑭᖑᓪᓕᖅᐹᒥ ᓂᕈᐊᖅᑐᓕᕆᔨᒃᑯᑦ ᑲᓇᑕᒥ ᐃᖅᑲᓇᐃᔮᓴᕐᒥ ᓴᖅᑭᔮᖅᑎᑦᑎᓚᐅᕐᓯᒪᖕᒪᑕ ᓂᕈᐊᖅᑐᓕᕆᔨᐅᓂᐊᕐᑐᒥ ᓄᓇᕗᒥᑦ, ᑭᓯᐊᓂᓕ ᐱᓇᓱᒃᑐᖃᓗᐊᓚᐅᕐᓯᒪᙱᒻᒪ ᐊᐅᔭᐅᑎᓪᓗᒍ.

Share This Story

(0) Comments

Join the Conversation

Your email address will not be published. Required fields are marked *

*