ᐃᓄᒃᑎᑐᑦ ᐅᖃᕈᓐᓇᖅᑐᑦ ᐊᑐᐃᓐᓇᖃᓕᕐᐳᑦ ᐊᑭᖃᙱᑦᑐᒥ ᑐᓴᒐᒃᓴᓕᕆᓂᕐᒥᒃ

For the English version of this story, please see Inuktitut speakers get access to free media training.

ᐃᓄᒃᑎᑐᑦ ᐅᖃᕈᓐᓇᕐᑐᑦ ᐊᑐᐃᓐᓇᖃᕈᓐᓇᕐᓯᔪᑦ ᖃᕋᓴᐅᔭᒃᑯᑦ ᑐᓴᒐᒃᓴᓕᕆᓂᕐᒧᑦ ᐊᔪᕈᓐᓃᖅᓴᕈᑎᓂᒃ ᐊᑭᖃᙱᑦᑐᓂᒃ ᐅᕘᓇ ᐋᑐᕚᒦᑦᑐᓂᒃ ᑐᓴᐅᒪᔾᔪᑎᓕᕆᓂᕐᒧᑦ ᐊᔪᕈᓐᓃᖅᓴᖅᑎᑦᑎᔨᓂᒃ ᑐᕋᔅᑦᒪᐃᑯᔅ (Trustmakers).

ᔮᓐ ᒪᑲᐃ, ᐊᐅᓚᑦᑎᔨᐅᖃᑕᐅᔪᖅ ᑐᕋᔅᑦᒪᐃᑯᔅᑯᓐᓄ, ᑖᒃᑯᐊᓗ ᐱᓕᕆᐊᖃᕐᓯᒪᓪᓗᑎᒃ ᑲᓇᑕᐅᑉ ᐅᑭᐅᕐᑕᖅᑐᖓᓂ ᐊᕐᕌᒍᑦ ᖁᓕᑦ ᐅᖓᑖᓂ, ᑐᓴᖅᑎᑦᑎᓚᐅᕐᑐᑦ ᓄᒃᑎᕐᓂᐊᕐᓂᕋᖅᖢᑎᒃ ᕕᕝᕗᐊᕆᒥ ᐊᖅᓴᕐᓃᑦ ᐃᖅᑲᓇᐃᔮᓄᑦ ᑕᑯᔭᒐᖃᕐᕕᒃᒥ ᐊᒻᒪ ᑲᑎᒪᕕᒡᔪᐊᕐᓇᒥ ᐋᑐᕚᒥ.

ᒪᑲᐃ ᐅᖃᐅᓯᖃᓚᐅᕐᑐᖅ ᐱᔪᒪᕙᓪᓕᐊᓂᖏᓐᓂᒃ ᐊᔪᕈᓐᓃᖅᓴᕈᑎᐅᔪᓐᓇᖅᑐᓂᒃ.

“ᒐᕙᒪᐅᔪᑦ ᐊᒻᒪ ᓇᖕᒥᓂᖅ ᐊᐅᓚᑕᐅᔪᓄᑦ ᑲᑐᔾᔨᖃᑎᒌᑦ ᐊᒃᓱᕈᖅᓯᒪᓂᖏᓐᓄᑦ ᑎᑭᐅᑎᓇᓱᒃᖢᑎᒃ ᖃᔅᓯᐅᔭᕆᐊᖃᕐᓂᖏᓐᓂᒃ ᐃᖅᑲᓇᐃᔭᓕᖅᑎᑦᑎᔭᕆᐊᖃᖕᓂᖏᓐᓂ ᐃᓄᖕᓂ ᐊᒻᒪ ᓄᓇᖃᖅᑳᖅᑐᓂᒃ,” ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

“ᑐᑭᓯᔪᒍ ᐊᒻᒪ ᑐᓴᕐᓯᒪᓪᓗᑕ ᐱᑕᖃᕆᐊᖃᕐᓂᖓᓂᒃ ᐊᔪᕈᓐᓃᕐᓴᕈᑎᑕᖃᕆᐊᖃᕐᓂᖓᓂ ᐃᓄᖕᓄᑦ ᐅᖃᐅᓯᖓᒍᑦ.”

ᐃᓄᒃᑎᑐᑦ ᑎᑎᕋᕐᓯᒪᔪᑦ ᖃᕋᓴᐅᔭᒃᑯᑦ ᐃᓕᓐᓂᐊᕈᑎᒃᓴᖅ, ᓯᕗᓂᐊᒍᓪᓕ ᐊᑐᐃᓐᓇᐅᓚᐅᕐᑐᖅ $595-ᒧ ᐃᓕᓐᓂᐊᖅᑐᒧᑦ ᐊᑕᐅᓯᕐᒧᑦ, ᐊᑐᐃᓐᓇᙳᖅᑎᑕᐅᔪᖅ ᐊᑭᓖᙱᒃᑲᓗᐊᖅᖢᑎᒃ ᐅᕘᓇ ᑐᕋᔅᑦᒪᐃᑯᔅ ᖃᕋᓴᐅᔭᒃᑯᑦ ᓴᖅᑭᔮᒐᖓᓂ.

ᐊᔪᕈᓐᓃᖅᓴᕈᑎ 9-ᓂ ᐊᕕᒃᑐᖅᓯᒪᐅᕐᓂᖃᖅᑐᖅ ᐃᓚᖃᖅᖢᓂ 11-ᓂ ᓇᐃᑦᑐᓂ ᑕᕐᕆᔭᒐᒃᑯᑦ ᐊᔪᕈᓐᓃᕐᓴᕈᑎᓂᒃ, ᐊᒻᒪ ᑐᑭᒧᐊᕈᑎᖃᖅᖢᓂ ᖃᓄᖅ ᐊᔪᕈᓐᓃᖅᓴᕈᑎᐅᔪᓐᓇᖅᑐᓂᒃ ᐊᒻᒪ ᖃᐅᔨᓴᕈᑎᐅᔪᓐᓇᖅᑐᓂᒃ.

ᐃᓕᓐᓂᐊᒐᒃᓴᖅ ᐅᖃᐅᓯᖃᕐᑐᖅ ᒪᓕᒋᐊᓕᖕᓂ ᖃᓄᐃᓕᐅᕈᑎᒧᑦ ᒪᑯᓄᖓ ᐃᓄᒋᐊᓄᑦ ᐅᖃᓪᓚᖃᑦᑕᖅᑐᓄᑦ ᐊᒻᒪ ᑭᒃᑯᓕᒫᓄᑦ ᑲᑐᔾᔨᖃᑎᒌᓄᑦ ᐱᓗᐊᖅᑐᒥ ᑮᓇᐅᔭᓕᐅᕋᓱᙱᖢᑎᒃ ᑲᑐᔾᔨᖃᑎᒌᑦ.

ᐅᖃᓯᖃᕆᓪᓗᓂ ᖃᓄᖅ ᑐᓴᒐᒃᓴᓕᐅᖅᑎᑦ ᐊᐅᓚᑕᐅᕙᖕᒪᖔᑕ ᐱᓕᕆᐊᖏᑦᑎᒍᑦ, ᖃᓄᐃᑦᑐᓂ ᒪᓕᒋᐊᓕᖕᓂ ᐊᑐᖅᖢᑎᒃ ᐱᓕᕆᖃᑦᑕᕐᓂᖏᓐᓂᒃ ᐊᒻᒪᓗ ᖃᓄᖅ ᑐᓴᒐᒃᓴᓕᐅᕐᑎᑦ ᐅᖃᖃᑎᖃᖃᑦᑕᕐᓂᖏᓐᓂᒃ ᐅᖃᖅᑎᒋᔭᐅᔪᓂᒃ ᐊᒻᒪ ᑐᓴᒐᒃᓴᓕᐅᖅᑎᓂᒃ ᑕᒪᓐᓇᓗ “ᓈᒻᒪᙱᓕᐅᕈᑎᑎᒎᙱᓪᓗᓂ.”

“ᐅᒃᐱᕈᓱᒍᓐᓃᖅᑎᑦᑎᕙᖕᓂ ᑐᓴᒐᒃᓴᓕᕆᔨᑎᒍᑦ ᐊᑐᖅᑕᐅᕙᓚᐅᕐᓯᒪᖅᑰᔨᖕᒪᑦ,” ᒪᑲᐃ ᐅᖃᕐᑐᖅ. “ᐅᒃᐱᕈᓱᖕᓂᖃᙱᓪᓗᓂ ᓲᕐᓗ ᐃᓅᔪᓐᓃᕐᓇᖅᑐᖅ ᐃᒫᓂ.”

ᒪᑲᐃ ᐅᖃᓚᐅᕐᑐᖅ ᐱᓕᕆᐊᖓ ᐃᓚᐅᔪᓂᒃ ᐱᓕᕆᑎᑕᐅᖃᑦᑕᕐᓂᖏᓐᓂᒃ ᓴᖅᑭᔮᖅᑐᒃᑯᑦ ᑐᓴᐅᒪᔾᔪᑎᓕᕆᓂᕐᒧᑦ ᐱᓕᕆᖃᑎᒌᖕᓂᕐᒥᒃ. ᐅᓇ ᐊᓯᐊᒎᕈᑎᐅᔪᖅ ᐅᖃᐅᓯᕆᔭᖓᒍᑦ “ᓄᑕᐅᔪᓐᓃᖅᓯᒪᓗᐊᖅᑐᓂᒃ” ᐱᓕᕆᔾᔪᓯᕐᓂᒃ.

“ᓱᖁᑎᒃᓴᙱᓪᓚᕆᓚᐅᕋᑦᑕ ᐃᒻᒪᑲᓪᓚ 1960-ᖏᓐᓂ ᒫᑦ ᒥᐊᓐ ᐊᑐᖃᑦᑕᓚᐅᖅᑕᖏᓐᓂᒃ ᑐᓴᒐᒃᓴᓕᕆᓂᕐᒧᑦ ᐱᓕᕆᖃᑎᒌᖕᓂᒃᑯᑦ — ᑲᐃᕙᑎᑦᑎᑲᑕᖕᓂᖅ, ᐊᓯᐊᓂ ᐃᓱᒪᓕᖅᑎᑦᑎᓇᓱᖕᓂᖅ, ᓱᖁᑎᒃᓴᖅᑕᐃᓕᓂᖅ, ᐱᒃᑲᖅᑎᑦᑎᓇᓱᖕᓂᖅ,” ᐅᖃᕐᑐᖅ.

ᑐᕋᔅᑦᒪᐃᑯᔅ ᑐᓴᐅᒪᔾᔪᑎᓕᕆᓂᕐᒥᒃ ᐊᔪᕈᓐᓃᖅᓴᖅᑎᑦᑎᖃᑦᑕᖅᑐᑦ ᐱᓕᕆᖃᑎᖃᕐᓂᒃᑯᑦ ᓄᓇᕗᒥᑦ ᒐᕙᒪᒃᑯᓐᓂᒃ, ᒐᕙᒪᑐᖃᒃᑯᓐᓂ ᐅᑯᓂᖓ ᒥᕐᖑᐃᕐᓯᖅᕕᓕᕆᔨᒃᑯᑦ ᑲᓇᑕᒥ ᐊᒻᒪᓗ ᓄᓇᕗᒥᑦ ᐆᒻᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ.

ᒪᑲᐃ ᐅᖃᓚᐅᕐᑐᖅ ᐃᓱᒪᓂᕋᖅᖢᓂ ᐱᓕᕆᖃᑎᖃᕐᓂᕐᒥᒃ ᐃᓕᓐᓂᐊᕆᐊᕐᕕᒃᑲᓐᓂᕐᓂᒃ ᐅᑯᑎᑐᓇᖅ ᓄᓇᕗᒥᑦ ᐅᑭᐅᕐᑕᖅᑐᕐᒥ ᓯᓚᑦᑐᖅᓴᕐᕕᒃᒥᒃ ᐊᒻᒪᓗ ᓄᑖᒥ ᐃᓄᐃᑦ ᓄᓇᖓᓂ ᓯᓚᑦᑐᖅᓴᕐᕕᒡᔪᐊᕐᒥ ᐊᔪᕈᓐᓃᖅᓴᖅᑎᑦᑎᒃᑲᓐᓂᕈᒪᓂᕐᒧᑦ ᑐᓴᐅᒪᔾᔪᑎᓕᕆᓂᕐᒥᒃ.

ᐅᖃᓚᐅᕐᒥᔪᖅ ᐃᓕᓐᓂᐊᕈᒪᔪᓂᒃ ᐱᑕᖃᕐᓂᕐᓴᐅᓕᕐᓂᖓᓂ ᑲᑐᔾᔨᖃᑎᒌᓂᙶᖅᑐᓂᒃ ᐱᓕᕆᖃᑎᖃᖅᑐᓂᒃ ᐃᓅᓱᕐᑐᓂᒃ.

ᐅᓇ ᑲᒻᐸᓂ ᒪᓂᒻᒪᐃᓯᒪᒻᒥᔪᖅ ᐊᓯᖏᓐᓂᒃ ᐅᐸᒍᑎᓗᓂ ᐃᓕᓐᓂᐊᕈᑎᓂᒃ ᖃᓪᓗᓈᑐᑦ ᐊᒻᒪ ᐅᐃᕖᑐᑦ, ᑖᓐᓇᓕ ᑕᑯᒃᓴᐅᑲᐅᑎᒋᓐᓇᖅᑐᒃᑯᑦ ᐃᓕᓐᓂᐊᕐᓇᖅᖢᓂ ᐅᑯᓇᙵᑦ ᑐᕋᔅᑦᒪᐃᑯᔅ ᐃᓕᓐᓂᐊᕈᑎᓂᒃ ᐊᒻᒪ ᑐᓴᒐᒃᓴᓕᕆᓂᕐᒧᑦ ᐱᓕᕆᕝᕕᖓᓂ ᐋᑐᕚᒥ.

ᐅᑯᐊ ᑐᕋᔅᑦᒪᐃᑯᔅ ᓯᕗᓂᐊᒍᑦ ᐃᓕᓐᓂᐊᖅᑎᑦᑎᓯᒪᓪᓗᑎᒃ ᐃᓄᒃᑎᑐᑦ, ᒪᑲᐃ ᐅᖃᕐᑐᖅ ᐃᖅᑲᓇᐃᔭᖅᑎᖏᑦ ᕿᓂᕐᓂᖏᓐᓂ ᓄᑖᓂ ᐱᓕᕆᖃᑕᐅᔪᒪᔪᓂᒃ ᐊᖏᒡᓕᒋᐊᖅᑎᓐᓇᓱᒃᖢᓂᔾᔪ ᓄᑖᑦ ᐱᓕᕆᐊᒃᓴᐅᔪᓐᓇᖅᑐᑦ.

ᐅᖃᓚᐅᕐᒥᔪᖅ ᑐᙵᓱᒃᑎᑦᑎᓂᕋᖅᖢᓂ ᑐᓴᖅᑎᑕᐅᖃᑦᑕᕈᓂ ᐃᓄᒃᑎᑐᑦ ᐃᓕᓐᓂᐊᕈᑎᑦ ᐃᓗᐊᓃᑦᑐᓂᒃ, ᐃᓚᖃᕐᓗᑎ ᐊᔪᕈᓐᓃᖅᓴᕈᑎᑦ ᐊᒻᒪ ᓴᖅᑭᔮᑲᐅᑎᒋᓐᓇᖅᑐᑦ, ᑕᒪᒃᑯᐊ ᐊᑐᖃᑦᑕᖅᑐᑦ ᐊᑐᕆᐊᖃᖅᑕᖏᑦᑎᒎᕋᓗᐊᕐᒪᖔᑕ.