ᐊᒥᓱᑦ ᓄᓇᕗᑦ ᒐᕙᒪᑯᓐᓄᑦ ᐃᖅᑲᓇᐃᔭᖅᑎᐅᔪᑦ ᖃᐅᔨᒪᙱᒻᒪᑕ ᐃᓄᐃᑦ ᐅᖃᐅᓯᖓᒍᑦ ᐱᔪᓐᓇᐅᑎᖏᓐᓂᒃ: ᐅᖃᐅᓯᕐᒧᑦ ᑲᒥᓯᓇ

“ᖃᐅᔨᒫᓂᙱᓐᓂᖅ ᐱᖁᔭᖅᔪᐊᕐᒥᑦ ᐊᒻᒪᓗ ᐅᔾᔨᕈᓱᓕᖅᑎᑦᑎᓂᕐᒧᑦ ᖃᓄᐃᓕᐅᕈᑎᐅᔪᑦ ᐱᔪᓐᓇᐅᑎᖃᕐᓂᕐᒥᑦ ᐃᖅᑲᓇᐃᔭᕈᓐᓇᕐᓗᑎᒃ ᐃᓄᒃᑐᑦ ᓴᕿᑎᑦᑎᒍᑎᐅᕗᖅ ᐱᓕᕆᕝᕕᒃᒥᑦ ᑕᒪᒃᑯᐊ ᐃᖅᑲᓇᐃᔭᖅᑎᐅᔪᑦ ᖃᐅᔨᒪᙱᖢᑎᒃ ᐱᔪᓐᓇᐅᑎᖏᓐᓂᒃ ᐊᒻᒪᓗ ᐊᐅᓚᑦᑎᔨᐅᔪᑦ ᖃᐅᔨᒪᙱᒃᑭᓪᖢᑎᒃ ᐱᓕᕆᐊᕆᔭᕆᐊᖃᖅᑕᖏᓐᓂᒃ,” ᐅᓂᒃᑳᑦ ᐅᖃᖅᓯᒪᔪᑦ.

“ᐊᕐᕌᒍᒐᓴᐃᑦ ᐊᓂᒍᕐᓯᒪᕗᑦ ᑕᐃᒪᙵᑦ ᐃᖅᑲᓇᐃᔭᖅᑎᐅᔪᑦ ᐱᔪᓐᓇᐅᑎᖃᓕᖅᑎᓪᓗᒋ (2008-ᒥ) ᐃᖅᑲᓇᐃᔭᕐᕕᖏᓐᓂᒃ ᐃᓄᐃᑦ ᐅᖃᐅᓯᖓᓂᒃ ᐊᑐᕐᓗᑎᒃ ᓴᓇᒍᓐᓇᕐᓗᑎᒃ ᒐᕙᒪᒃᑯ ᐃᖅᑲᓇᐃᔭᕐᕕᖏᓐᓂᒃ, ᑭᓯᐊᓂᓕ ᒫᓐᓇ ᐃᓱᒪᕐᓱᖂᔨᙱᑦᑐᑦ ᐊᑐᕆᐊᒃᓴᖅ ᐅᖃᐅᓯᖏᓐᓂ ᑲᑎᒪᓂᒃᑯᑦ ᐊᒻᒪ ᑎᑎᕋᐅᓯᒃᑯᑦ.”

ᐅᑯᓇᙵᑦ 106 ᐃᓄᒃᑐᑦ-ᐅᖃᕈᓐᓇᖅᑐᓂᒃ ᖃᐅᔨᓴᕈᑎᒥ ᐃᓚᐅᓂᑯᓂᒃ, 73 ᐳᓴᓐᑎᖏ ᐅᖃᓚᐅᕐᑐᑦ ᑎᑎᕋᕐᕕᖕᒥ ᐅᖃᓪᓚᑲᑕᒍᓐᓇᑦᑎᐊᙱᓐᓂᕋᖅᖢᒋᑦ ᐃᓄᒃᑐᑦ ᐅᕝᕙᓘᓐᓃᑦ ᐅᖃᓪᓚᓚᐅᕐᓯᒪᖏᖢᑎᒃ ᐱᓕᕆᐊᖏᑦᑎᒍᑦ ᐃᓄᒃᑐᑦ.

ᑎᑎᕋᕐᕕᒃ, ᐊᐅᓚᑕᐅᓪᓗᓂ ᐅᖃᐅᓯᕐᓄᑦ ᑲᒥᓯᓇᒧᑦ ᕼᐊᓚᓐ ᑲᓚᖓᖕᐳᒡᒧᑦ, ᐅᖃᓚᐅᕐᑐᖅ ᓄᓇᕗᑦ ᒐᕙᒪᒃᑯᑦ ᐱᔭᒃᓴᖃᓂᖏᓐᓂᒃ ᑕᒪᓐᓇ ᐊᓯᙳᖅᑎᓂᖓᓄᑦ.

ᑕᐃᒪᓐᓇ ᐃᓱᖃᕐᑎᓪᓗᒍ, ᑲᒥᓯᓇᐅᑉ ᑎᑎᕋᕐᕕᖓ ᓄᓇᕗᑦ ᒐᕙᒪᒃᑯᓐᓂ ᐱᖁᔨᓚᐅᕐᑐᑦ ᑐᓴᐅᒪᑎᑦᑎᖁᔭᐅᓪᓗᑎ ᐃᖅᑲᓇᐃᔭᖅᑎᐅᑉ ᐱᔪᓐᓇᐅᑎᖏᓐᓂᒃ ᐃᓄᒃᑐᑦ ᑎᑎᕋᕐᓯᒪᓗᑎᒃ, ᑖᓐᓇᓗ ᐃᓚᖃᕐᓗᓂ ᐊᑐᐊᒐᕐᒥᒃ ᐊᔾᔨᐅᙱᑎᑦᑎᑦᑕᐃᓕᓂᕐᒨᖓᔪᓂᒃ.

ᑎᑎᕋᕐᕕᒃ ᐊᒻᒪ ᐅᖃᓚᐅᕐᒥᔪᖅ ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᓕᖅᑎᑦᑎᓂᕐᒧᑦ ᐊᑐᐊᒐᖏᑦ ᓱᖅᑯᐃᓇᑦᑎᐊᕆᐊᖃᕐᓗᑎᒃ ᐃᖅᑲᓇᐃᔮᖅᑖᕋᓱᖕᓂᕐᓴᐅᔪᓐᓇᕐᓂᐊᕐᒪᑕ ᐊᒻᒪᓗ ᐃᖅᑲᓇᐃᔮᒧᑦ ᐃᓄᒃᑐᑦ ᐊᐱᖅᓱᖅᑕᐅᕙᒡᓗᑎᒃ.

ᐊᓯᖏᑦ ᐃᓱᒪᓕᐊᕆᔭᐅᔪᑦ ᑎᑎᕋᕐᕕᖕᒥ ᓴᕿᓯᒪᔪᑦ ᑭᐅᔪᕕᓃᑦ ᐃᓱᒪᓕᐊᕆᔭᖏᓐᓂᒃ. ᐃᓚᖏᑦ ᐅᖃᕐᓯᒪᖕᒪᑕ ᐊᑐᐃᓐᓇᖃᕆᐊᖃᕐᓂᖓᓕᒃ ᐅᖃᐅᓯᕐᒧᑦ ᐃᓕᓐᓂᐊᕈᑎᒃᓴᓂᒃ ᐊᒻᒪ ᐱᓕᕆᔾᔪᑎᒃᓴᓂᒃ ᐃᖅᑲᓇᐃᔭᕐᕕᒃᒥᑦ, ᐅᑯᓂᖓ ᐃᓚᖃᕐᓗᑎᒃ ᐃᓄᒃᑐᑦ ᐊᑐᒐᒃᓴᓂᒃ ᖃᕋᓴᐅᔭᓄᑦ ᐃᓚᒃᓴᓂᒃ ᐊᒻᒪ ᓇᕿᑦᑕᐅᑎᓂᒃ, ᑖᒃᑯᐊᓕ ᐃᑲᔪᕋᔭᒻᒪᕆᖕᒪᑕ ᐃᖅᑲᓇᐃᔭᖅᑎᓂᒃ ᐅᖃᐅᓯᕐᒥ ᐊᑐᒃᑲᓐᓂᕈᓐᓇᕐᓂᕐᒥᒃ.

ᐊᒥᓱᑦ ᑭᐅᔨᐅᔪᑦ ᐅᖃᕐᓯᒪᖕᒥᔪᑦ ᐊᑐᖃᑦᑕᕈᑎᒃ ᐃᓄᒃᑐᑦ ᐃᖅᑲᓇᐃᔭᕐᕕᖕᒥᑦ ᐊᔪᕐᓇᙱᓐᓂᕐᓴᐅᓇᔭᕐᓂᖓᓂᒃ ᐊᒥᓲᓂᕐᓴᓂᒃ ᐃᓄᖕᓂ ᐃᖅᑲᓇᐃᔭᖅᑐᖃᕈᓂ ᐊᒻᒪ ᐃᑲᔪᖅᑐᐃᓂᕐᓴᓂ ᐃᖅᑲᓇᐃᔭᖅᑐᓂᒃ ᐃᓄᒃᑐᑦ ᐅᖃᕈᓐᓇᖅᑐᓂᒃ.

“ᑐᕌᒐᕗᓪᓕ ᑭᓇᑐᐃᓐᓇᖅ ᓄᓇᕗᒥᑦ ᐃᓅᓯᖃᕈᓐᓇᕐᓗᑎᒃ ᐅᖃᐅᓯᕐᒥᑦ ᐊᑐᕈᓐᓇᖅᑕᖏᑦᑎᒍᑦ,” ᑲᒥᓯᓇᐅᑉ ᑎᑎᕋᕐᕕᖓ ᐅᖃᓚᐅᕐᑐᑦ.

ᓄᓇᕗᒥ, ᐱᖓᓲᖕᒪᑕ ᐅᖃᐅᓰᑦ ᐱᓪᓚᕆᐅᑎᑕᐅᔪᑦ: ᐃᓄᒃᑐᑦ, ᖃᓪᓗᓈᑎᑐᑦ ᐊᒻᒪ ᐅᐃᕖᑐᑦ.

ᑭᓯᐊᓂᓕ ᖃᓪᓗᓈᑐᑦ ᐅᖃᐅᓯᖅ ᐊᑐᖅᑕᐅᓂᕐᓴᐅᓂᖓᓄᑦ ᐱᔨᑦᑎᕋᐅᑎᓕᕆᓂᒃᑯᑦ, ᓄᓇᕗᒥ ᐱᖁᔭᖅᑕᖃᖅᑐᖅ ᐅᑯᓂᖓ ᐅᖃᐅᓯᓪᓚᕇᑦ ᐱᖁᔭᖅᔪᐊᖏᓐᓂᒃ ᐊᒻᒪ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᖅᔪᐊᕐᒥᑦ ᑕᒪᒃᑯᐊ ᓄᓇᕗᒥᑦ ᐃᓄᐃᑦ ᐅᐃᕖᓪᓗ ᓄᓇᖃᖅᑐᑦ ᓴᐳᔾᔨᓯᒪᔪᓐᓇᖁᓪᓗᒋᑦ ᓇᖕᒥᓂᖅ ᐅᖃᐅᓯᖏᓐᓂᒃ.

ᐅᑯᑎᒎᓇᕐᓕ 2016-ᒥᑦ ᖃᐅᔨᓇᓱᒍᑎᕕᓂᕐᓂᒃ, ᐃᓄᒃᑐᑦ, ᐅᖃᐅᓯᖃᖅᑐᖅ ᑕᒪᐃᓐᓂ ᐃᓄᒃᑎᑐᑦ ᐊᒻᒪ ᐃᓄᐃᓐᓇᕐᑐᓐ, ᐅᖃᐅᓯᕐᖓᐅᑎᒋᔭᐅᖕᒪᑦ 63 ᐳᓴᓐᑎᓄᑦ ᓄᓇᕗᒻᒥᐅᓄᑦ.

ᖃᔅᓯᐅᓂᖏᑦ ᐃᓄᒃᑐᑦ ᐅᖃᐅᓯᖃᖅᑳᖅᓯᒪᔪᑦ ᐅᓂᕐᓯᕚᓪᓕᕐᓯᒪᔪᑦ 1000-ᓄᑦ 2011-ᒥᑦ, ᑕᒪᐃᓐᓂ ᐳᓴᓐᑎᑎᒍᑦ ᒥᒃᖠᕚᓪᓕᕋᓗᐊᖅᑎᓪᓗᒋ 4.5 ᐳᓴᓐᑎᒥ ᐊᕐᕌᒍᓂ ᐊᓂᒍᓵᕐᓯᒪᔪᓂᒃ.

ᑎᑎᕋᕐᕕᒃ 13-ᓂ ᐅᖃᐅᓯᕐᒧᑦ ᕿᐱᓘᑎᓂᒃ ᑐᓂᔭᐅᓚᐅᕐᑐᑦ ᐊᕐᕌᓂ

2017/18 ᐊᕐᕌᒍᒧᑦ, ᑎᑎᕋᕐᕕᖓ ᐅᖃᐅᓯᕐᓄᑦ ᑲᒥᓯᓇᐅᑉ ᓄᓇᕗᒥᑦ ᑎᑎᕋᐅᓯᖃᕐᓯᒪᕗᑦ 13-ᓂᑦ ᐅᖃᐅᓯᕐᒨᖓᔪᓂᒃ ᕿᐱᓘᑎᓂᒃ.

ᑖᒃᑯᓇᙵᑦ ᐃᓱᒫᓘᑎᓂᒃ, ᐱᖓᓱᒃ ᐊᒃᑐᐊᓂᖃᓚᐅᕐᑐᑦ ᓄᓇᕗᑦ ᒐᕙᒪᒃᑯᑦ ᐱᓕᕆᕝᕕᖏᓐᓂᒃ, ᑎᓴᒪᑦ ᕼᐋᒻᒪᓚᓄᑦ, ᐱᖓᓱᑦ ᒐᕙᒪᑐᖃᒃᑯᑦ ᐱᓕᕆᕝᕕᖏᓐᓄᑦ ᐊᒻᒪᓗ ᐱᖓᓱᒃᑲᓐᓃᑦ ᓇᖕᒥᓂᖅ ᐱᓕᕆᕝᕕᒋᔭᐅᔪᓄᑦ.

11 ᕿᐱᓘᑎᑦ ᐱᔾᔪᑎᖃᖅᖢᑎᒃ ᐃᓄᒃᑐᑦ ᐅᖃᐅᓯᐅᑉ ᒥᒃᓵᓅᖓᔪᓂᒃ, ᐊᒻᒪ ᒪᕐᕉᒃ ᐊᒃᑐᐊᓪᓗᑎᒃ ᐅᐃᕖᑐᑦ ᐊᑐᖅᑕᐅᕙᖕᓂᖓᓂᒃ.

ᒪᕐᕉᒃ ᕿᐱᓘᑎᐅᔪᑦ ᐱᒋᐊᕈᑎᖃᕐᓯᒪᔪᑦ ᕼᐋᒻᒪᓚᒃᑯᓐᓂᑦ ᓂᕈᐊᕐᓇᒥ ᖁᒡᓗᖅᑑᖅᒥᑦ ᐊᒻᒪ ᓴᓪᓕᓂ, ᑖᒃᑯᓇᓂᓕ ᕼᐋᒻᒪᓚᒃᑯᑦ ᓂᕈᐊᒐᒃᓴᓕᐅᕐᓂᕐᒧᑦ ᖃᐅᔨᑎᑦᑎᔾᔪᑎ ᖃᓪᓗᓈᑎᑑᖓᓚᐅᕐᓂᖏᓐᓂᒃ.

ᕿᐱᓘᑎᐅᔪᖅ ᓴᓪᓕᓂᑦ ᓴᕿᓚᐅᕐᐳᖅ ᓴᕿᓯᒪᓂᑯᒧᑦ, ᑭᓯᐊᓂᓕ ᖁᒡᓗᖅᑑᖅᒥᑦ ᕿᐱᓘᑎᒋᔭᐅᔪᖅ ᕼᐊᒻᒪᓚᑯᓐᓂᒃ ᓂᕈᐊᕐᓂᕐᒥᒃ ᑭᖑᕙᕆᐊᖅᑎᑦᑎᔾᔪᑎᐅᓚᐅᕐᓯᒪᔪᖅ.

ᐊᓯᖏᑦ ᕿᐱᓘᑎᐅᔪᑦ ᑐᓴᖅᑎᑦᑎᔾᔪᑎᐅᓇᓱᓚᐅᕐᑐᑦ ᑎᑎᕋᕐᕕᒃᒥ ᐱᑕᖃᙱᓗᐊᕐᓂᖓᓂᒃ ᐃᓄᒃᑐᑦ ᐅᖃᐅᓯᒃᑯᑦ ᐅᖃᖃᑎᒋᔭᐅᔪᓐᓇᖅᑐᓂᒃ ᖃᔅᓯᒐᔭᖕᓂᒃ ᓇᖕᒥᓂᖅ ᐱᓕᕆᕝᕕᐅᔪᓂᒃ ᐊᒻᒪ ᑭᒃᑯᓕᒫᓅᖓᔪᓄᑦ ᐱᓕᕆᕝᕕᖕᓂ.

ᑎᑎᖃᕐᕕ ᐊᒻᒪ ᕿᒥᕐᕈᐊᓚᐅᕐᒥᔪᖅ ᑎᑎᕋᕐᓯᒪᔪᓂᒃ ᑐᓴᖅᑎᑦᑎᒍᑎᐅᕙᒃᑐᓂᒃ ᓄᓇᕗᒥᑦ ᐱᓕᕆᕝᕕᖕᓂᒃ 2017-ᒥᑦ, ᐃᓚᖃᖅᖢᓂ ᑐᓴᒐᒃᓴᓕᐊᑦ, ᐸᐃᑉᐹᑰᖓᔪᑦ ᐊᑭᓐᓇᕐᒥᐅᑕᓂᒃ ᐊᒻᒪᓗ ᑭᒃᑯᓕᒫᓄᑦ ᐱᔨᑦᑎᕋᐅᑎᓕᕆᓂᕐᒧᑦ ᑐᓴᒐᒃᓴᓕᕆᓂᒃᑯᑦ.

ᐅᑯᓇᙵᓪᓕ 336-ᓂ ᑐᓴᐅᒪᑎᑦᑎᒍᑎᓂ ᑎᑎᕋᕐᕕᐅᑉ ᖃᐅᔨᓴᖅᑕᖏᓐᓂᒃ, 89 ᐳᓴᓐᑎ ᐱᓕᕆᐊᖑᓂᑯᑦ ᓄᓇᕗᑦ ᐅᖃᐅᓯᓪᓚᕆᖏᓐᓂᒃ ᐊᑐᕐᖢᑎᒃ—ᖁᕝᕙᖅᐹᓪᓕᖅᑐᖅ 87 ᐳᓴᓐᑎᐅᓚᐅᕐᑐᒥ ᐊᕐᕌᒍ ᓯᕗᓂᐊᓂᒃ—ᐊᒻᒪᓗ ᓴᕿᑕᐅᕙᒃᖢᑎᒃ ᑐᑭᓕᕇᒃᖢᑎᒃ.

ᑭᓯᐊᓂᓕ ᐃᓚᖓ ᐃᓄᐃᑦ ᐅᖃᐅᓯᖓᓂᒃ ᓴᐳᔾᔨᓯᒪᓂᕐᒧᑦ ᐱᖁᔭᖅᔪᐊᖅ ᐱᖁᔨᓯᒪᔪᖅ ᓇᖕᒥᓂᖅ ᐱᓕᕆᐊᖑᔪᓂᒃ ᐃᓚᒋᔭᐅᔪᑦ ᐊᒻᒪ ᒐᕙᒪᑐᖃᒃᑯᑦ ᐱᓕᕆᕝᕕᖏ ᐊᒻᒪ ᐱᓕᕆᔨᖏᑦ ᑐᓴᐅᒪᔾᔪᑎᒃᓴᓕᐊᖏᑦ ᐊᒻᒪ ᐱᔨᑦᑎᕋᐅᑎᖏᑦ ᐃᓄᒃᑑᕆᐊᖃᕐᓂᖏᓐᓂᒃ, ᑖᓐᓇᓗ ᐱᒋᐊᕐᓯᒪᓪᓚᕆᖕᓂᑰᓪᓗᓂ 2017 ᐊᑯᓐᓂᐊᓂᑦ, ᓱᒃᑲᐃᓐᓂᕐᓴᐅᕗᑦ ᑕᐃᒪᐃᓕᐅᖅᐸᓪᓕᐊᓂᕐᒥᒃ.

ᐃᓚᖓᑦ 3 ᐱᖁᔭᖅᔪᐊᕐᒥ ᐱᖁᔨᓯᒪᖕᒪᑦ ᑕᒪᒃᑯᐊ ᑲᑐᔾᔨᖃᑎᒌᖑᔪᑦ ᑎᒥᐅᔪᓪᓗ ᑐᓴᐅᒪᔭᒃᓴᓕᐊᖏᑦ ᑎᑎᖃᑎᒍᑦ, ᒪᓂᓴᐅᑎᖏᑦᑎᒍ ᐱᓕᕆᐊᖏᓐᓄᑦ ᐊᒻᒪ ᐱᔨᑦᑎᕋᐅᑎᓕᕆᓂᖅ ᐃᓄᒃᑑᕆᐊᖃᕐᓂᖏᓐᓂᒃ, ᑖᓐᓇᓗ ᐅᓂᒃᑳᖅ ᐅᔾᔨᕆᓯᒪᓂᕋᖅᖢᓂ ᑕᐃᒪᓐᓇ ᐊᑯᓂᐅᓂᕐᓴᐅᓇᔭᕐᓂᖓᓂᒃ ᐊᒻᒪ ᑮᓇᐅᔭᖅᑐᕐᓂᕐᓴᐅᓇᔭᕐᓂᖓᓂᒃ ᒥᑭᓐᓂᕐᓴᓄᑦ ᐱᓕᕆᐊᓄᑦ.

ᑭᓯᐊᓂᓕ ᑎᑎᖃᕐᕕᒃ ᐅᖃᓚᐅᕐᑐᖅ “ᓵᙵᓂᖏᓐᓂᒃ ᐱᔪᒪᙱᓐᓂᕐᒥᒃ” ᒐᕙᒪᑐᖃᒃᑯᓐᓂᒃ ᐱᔭᕆᐊᓕᒃᑎᒍᑦ, ᑖᓐᓇᓗ ᑲᑎᒪᓂᒃᓴᓂᒃ ᐋᕿᒃᓱᐃᒍᑎᐅᓕᓚᐅᕐᖢᓂ ᑲᓇᑕᒥ ᑮᓇᐅᔭᓕᕆᔨᕐᔪᐊᓂᒃ.