ᑖᓐᓇ ᐃᓄᒃᑐᑦ ᖃᓕᐅᔮᖅᐸᐃᑦ ᑎᑎᕋᐅᓯᖅ—ᐊᑐᖅᑕᐅᔪᖕᓇᖅᑐᖅ ᐃᓄᐃᑦ ᐅᖃᐅᓯᓕᒫᖏᓐᓄᑦ ᑲᓇᑕᓕᒫᒥ. ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᖅᓯᒪᔪᑦ ᐃᓇᖏᖅᓯᔾᔮᖏᒻᒪᑦ ᖃᓂᐅᔮᖅᐸᐃᓂᒃ ᐊᒻᒪᓗ ᐃᓄᐃᑦ ᓄᓇᖓᓐᓂᑦ ᐊᕕᒃᑐᖅᓯᒪᔪᓂᑦ ᐊᑐᖅᑕᐅᔪᑐᖃᐃᑦ ᖃᓂᐅᔮᖅᐸᐃᑦ ᐊᓯᖏᓪᓗ ᐊᑐᖅᑕᐅᑐᐃᓐᓇᓚᖓᔪᑦ. ᐃᓄᐃᑦ ᑕᐱᕇᑦ ᑲᓇᑕᒥ ᐅᖃᖅᓯᒪᖕᒥᔪᑦ ᐃᓄᐃᑦ ᑎᑎᕋᐅᓯᑐᖃᕐᓂᒃ ᐊᑐᖃᑦᑕᖅᑕᖏᓐᓂᒃ ᐊᑐᖅᑕᐅᔪᑐᖃᕐᓂᒃ ᐊᓯᔾᔩᒋᐊᖃᔾᔮᖏᒻᒪᑕ.

ᐃᓄᒃᑐᑦ ᖃᓕᐅᔮᖅᐯᑦ – ᓄᐃᑕᐅᒪᔪᑦ ᐱᕙᓪᓕᐊᓂᕐᓄᓗ ᐊᔪᐃᓐᓈᖃᕐᓂᒧᓪᓗ

ᑐᓂᕐᕈᑎᒋᔭᕗᑦ ᐅᓪᓗᒥᐅᔪᖅ ᕿᑐᕐᖓᑎᓐᓄᑦ ᑭᖑᕚᖑᓛᕐᑐᓄᓪᓗ

By ᐊᓪᓚᑕᖏᑦ ᒥᐊᔨ ᓭᒪᓐ

For an English version of this commentary, see Inuktut Qaliujaaqpait — the product of history and determination

ᐅᐱᒍᓱᒻᒪᕆᓚᐅᔪᕗᖓ ᑐᓴᕆᐊᒥᒃ ᑲᑎᖕᖓᔨᖏᑦ ᐃᓄᐃᑦ ᑕᐱᕇᑦ ᑲᓇᑕᒥᒃᑯᑦ ᐊᑕᖏᕐᓱᑎᒃ ᐊᖏᕐᑐᕕᓂᐅᒋᐊᖏᑦ ᓄᑖᒥᒃ ᐃᓄᒃᑐᑦ ᐊᓪᓚᒍᓯᐅᓚᖓᓕᕐᑐᒥᒃ, ᐊᑦᓯᕋᐅᑎᖃᕐᓱᓂ ᐃᓄᒃᑐᑦ ᖃᓕᐅᔮᖅᐯᒥᒃ ᐊᓂᒎᑎᑎᑕᐅᓚᐅᕐᑐᒥᒃ ᑖᓐᓇ ᑕᕐᕿᖅ ᐱᒋᐊᕐᖃᒥᐅᑎᓪᓗᒍ. ᐃᓄᐃᑦ ᑕᐱᕇᑦ ᑲᓇᑕᒥ ᑐᑭᖃᕐᐳᑦ “ᐊᑕᐅᓯᐅᖃᑎᒌᓐᓂᖏᓐᓂᒃ ᑲᓇᑕᐅᑉ ᐃᓄᑐᐃᓐᓇᖏᑕ” ᐊᒥᓲᖕᖏᑐᓂᓪᓗ ᐆᑦᑐᕋᐅᑎᑦᓴᖃᑦᓯᐊᐳᖅ ᓄᑭᖃᕐᓂᓴᓂᒃ ᐃᓄᖁᑎᑦᑕ ᐊᑯᕐᓂ ᑲᑐᑦᔮᖃᖃᑎᒋᒍᑎᒋᓯᒪᔭᖏᓐᓂᒃ ᓱᕐᖁᐃᑐᒥᒃ ᐊᓐᓇᐅᒪᒍᑎᑦᓴᖏᓐᓂᒃ ᐃᓗᕐᖁᓯᑦᑕᓗ ᐅᖃᐅᓯᑦᑕᓗ. ᑕᒪᓐᓇ ᐅᕙᓐᓄᑦ ᒫᓐᓇᐅᑎᓪᓗᒍ ᐱᔪᕆᒪᓇᕐᑐᖅ.

ᔫᓂ 2011-ᒥᑦ ᑌᑦᓱᒪᓂ ᐊᖓᔪᕐᖃᒪᕆᒋᔭᐅᑦᓱᖓ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓄᑦ, ᓴᕐᕿᑎᑦᓯᓂᖃᓚᐅᕐᓯᒪᕗᒍᑦ ᓴᐱᖕᖏᓱᑕ ᓄᑕᐅᓯᓕᑎᕆᓂᖃᕈᑎᑦᓴᓂᒃ ᐊᓯᑦᔨᒋᐊᕈᑎᑦᓴᖏᓐᓂᒃ ᐃᓕᓐᓂᐊᓂᕐᒥᒃ ᐱᓇᓱᐊᕈᑎᑦᑕ. ᓄᐃᑦᓯᒍᑎᖃᓚᐅᔪᒍᑦ ᑲᓇᑕᓕᒫᒥ ᐱᓇᓱᒍᑎᐅᓚᖓᔪᓂᒃ ᐃᓄᑐᐃᓐᓀᑦ ᐃᓕᓐᓂᐊᓂᓕᕆᓂᖏᓐᓂᒃ 10-ᓂᒃ ᓴᐱᖕᖏᒪᕆᑦᑐᓂᒃ ᐃᒣᓕᖓᒋᐊᕈᑎᑦᓴᓕᐅᕐᓱᑕ ᓴᕐᕿᓂᖃᓚᐅᔪᓂᒃ ᑲᑐᑦᔮᕆᑦᓱᒋᑦ ᑕᐅᑐᕐᖂᕈᑎᑦᑎᓂᒃ ᕿᑐᕐᖓᑎᓐᓂᒃ ᐱᔪᓐᓇᓂᖃᑦᓯᐊᖁᔨᑦᓱᑕ ᐃᓕᓐᓂᐊᓯᒪᒋᐊᓕᖏᑎᒍᑦ, ᐊᑦᑕᓀᑦᑑᓗᑎᓪᓗ ᐃᓄᑦᑎᑐᑦ ᐃᓗᕐᖁᓯᕐᒥᒍᓪᓗ ᐅᖃᐅᓯᕐᒥᒍᓪᓗ. ᐃᒣᓕᖓᒋᐊᖁᔨᒍᑎᓕᐊᕗᑦ ᐃᓚᖃᓚᐅᔪᑦ ᐃᓂᓪᓓᒍᑎᖃᕐᑐᓴᐅᓂᕐᒥᒃ ᐊᑕᐅᓯᐅᓕᖓᑦᓯᐊᑐᒥᒃ ᐃᓄᑐᐃᓐᓇᓕᒫᑦ ᐊᓪᓚᒍᓐᓇᐅᑎᑦᓴᖓᓐᓂᒃ.

ᐃᓄᑐᐃᓐᓀᑦ ᑲᓇᑕᒥᐅᑦ ᐊᕐᕌᒍᒐᓵᓗᓐᓂ ᑕᒃᑯᖓ ᑎᑭᐅᑎᒐᓱᑦᓯᒪᕗᑦ ᑎᑭᐅᑎᕗᓪᓗ ᓄᑖᒥᒃ ᐱᕐᖁᓯᕐᑖᖃᒻᒥᐅᓚᖓᓕᕐᑐᒧᑦ.

ᐃᓄᑐᐃᓐᓀᑦ ᐅᖃᐅᓯᖏᓐᓂᒃ ᐱᐅᓕᐊᕐᓯᔩᑦ ᐃᓘᓐᓇᖏᓐᓂ ᓄᓇᓕᓐᓂ ᐃᓄᐃᑦ ᓄᓇᖓᑎᓕᒫᖏᓐᓂ ᐊᕐᖁᓯᐅᕆᓚᐅᔪᕗᑦ ᐃᓄᒃᑐᑦ ᖃᓕᐅᔮᖅᐯᕈᑎᑦᓴᓂᒃ. ᑕᒪᓐᓇ ᑐᑭᓕᒃ ᐊᑕᐅᓯᕐᒥᒃ ᐊᓪᓚᒍᓯᖃᓚᖓᓕᕐᑎᓗᑕ ᐃᓘᓐᓇᖏᓐᓂ ᐃᓄᐃᑦ ᐃᓕᒃᑯᕈᑎᒋᑦᓱᒋᑦ ᐅᖃᐅᓯᖏᓐᓂ ᐊᑐᕐᑕᐅᒍᓐᓇᓂᖃᑦᓯᐊᑐᒥᒃ.

ᑕᒪᑐᒪ ᓄᑖᖑᓗᓂ ᐊᓪᓚᒍᓯᕐᑕᖑᔪᖅ ᐊᑐᕐᑕᐅᓂᖓ ᓱᒃᑮᑐᒥᒃ ᐱᕙᓪᓕᐊᓚᖓᔪᖅ. ᑕᒐᑕᒐ ᐃᓄᑐᐃᓐᓀᑦ ᐊᓪᓚᒍᓯᖏᓐᓂᒃ ᐃᓇᖐᓚᖓᑦᔭᖏᑦᑐᖅ ᐊᓯᐅᑎᑦᓯᒍᑎᐅᓂᐊᕋᓂᓗ ᓄᓇᓕᓐᓂ ᐊᓪᓚᒍᓯᑐᖃᕆᔭᐅᔪᓂᒃ, ᐊᑐᕋᑦᓴᓕᐊᖑᒐᒥ ᐃᓚᐅᖃᑦᑕᓚᖓᑎᓪᓗᒍ ᑕᒐᑕᒐ ᐊᓪᓚᒍᓯᐅᒌᕐᑐᓄᑦ ᐱᐅᓯᒋᐊᕆᒍᑎᐅᓗᓂ ᐃᓄᑐᐃᓐᓀᑦ ᑐᓴᐅᒪᖃᑎᒌᒍᑎᖏᓐᓂᒃ. ᑐᓂᕐᕈᑎᒋᔭᕗᑦ ᐅᓪᓗᒥᐅᔪᖅ ᕿᑐᕐᖓᑎᓐᓄᑦ ᑭᖑᕚᖑᓛᕐᑐᓄᓪᓗ.

ᑕᐅᑐᖕᖑᐊᕈᓐᓇᓕᕐᖁᖓ ᐃᓄᑐᐃᓐᓀᑦ ᑲᓇᑕᒥᐅᑦ ᑐᓴᖃᑦᑕᐅᑎᑦᓯᐊᓂᕐᓴᐅᓛᓕᕐᓂᖏᓐᓂᒃ ᐊᒥᕐᖄᖃᑎᒌᒍᑎᖃᕐᓗᑎᓪᓗ ᐃᓪᓕᓇᕐᑐᓂᒃ ᐊᓪᓚᓯᒪᔪᖕᖑᐃᒍᑎᐅᕙᓐᓂᐊᑐᓂᒃ ᐃᓕᓐᓂᐊᑎᑦᓯᒍᑎᑦᓴᓕᐊᖑᕙᓚᖓᔪᓂᓪᓗ ᐱᐅᔪᐊᓗᓐᓂᒃ ᐃᓕᓐᓂᐊᑎᑦᓯᒍᑎᑦᓴᓕᐅᕐᓂᖅ ᐃᓱᒫᓗᓐᓇᕈᓐᓀᑎᓪᓗᒋᑦ ᕿᑐᕐᖓᕗᓪᓗ ᐳᕐᑐᓂᕐᓴᒥᒃ ᐃᓕᓐᓂᐊᕕᒻᒥᑦ ᐃᓕᓐᓂᐊᕇᖃᑦᑕᓕᕐᓗᑎᒃ ᑕᒪᒋᓐᓂᒃ ᐅᖃᐅᓰᓐᓂᒃ ᐊᑐᕈᓐᓇᓯᐊᕐᓗᑎᒃ ᐊᓪᓚᒍᓐᓇᓯᐊᕐᓗᒋᒃ ᐅᖄᒍᓐᓇᓯᐊᕐᓗᒋᓪᓗ.

ᓯᓚᕐᔪᐊᒥ ᐱᕙᓪᓕᐊᓂᑦᑎᓂᒃ ᓵᖕᖓᒐᑦᓴᖃᖃᑦᑕᕋᑦᑕ ᐃᓄᑐᐃᓐᓇᐅᖃᑎᒌᑎᒍᑦ. ᖃᓪᓗᓈᑦ ᐱᐅᓯᖏᓐᓂᒃ ᐱᐅᓯᕐᑖᑕᐅᒐᓱᑦᓯᒪᓂᑦᑎᓄᑦ ᐃᓱᐃᓪᓕᑕᐅᓯᒪᒻᒪᑦ ᐃᓅᓯᒃᑯᑦ ᐱᐅᓯᕗᑦ, ᐃᓚᒌᑎᒍᑦ ᐃᓂᓪᓚᖓᐅᓯᕗᑦ, ᐅᖃᐅᓯᕗᓪᓗ. ᑭᓯᐊᓂ ᐅᓪᓗᒥ ᑕᒫᓂᑦᑐᒍᑦ. ᐊᕐᕌᒍᓂ ᐊᓂᒍᕐᓯᒪᓕᕐᑐᓂ ᐊᑑᑎᓯᒪᔭᑦᑎᓂᒃ ᕿᒥᕐᕈᒋᐊᖃᖃᑦᑕᓚᐅᕋᑦᑕ ᑐᑭᓯᒍᒪᑦᓱᑕ ᐅᓪᓗᒥ ᑭᓇᒃᑰᓕᕐᒪᖔᑦᑕ ᓱᒧᓪᓗ ᐅᓪᓗᒥᐅᔪᖅ ᑌᒣᓕᖓᓂᖃᓕᕐᒪᖔᑦᑕ ᑐᑭᓯᒋᐊᖃᕐᓱᑕ. ᐅᑉᐱᕈᓱᑉᐳᖓᓕ ᑕᒐᑕᒐ ᑭᐴᑎᔫᓐᓂᒃ ᐊᕐᖁᑏᓐᓂᒃ ᐊᑐᕐᑐᑎᑐᑦ ᐱᐅᓯᖃᓕᕋᑦᑕ ᑭᖑᒧᑦ ᕿᕕᐊᑦᓭᓇᖏᓐᓇᕆᐊᖃᕐᓂᐊᐱᑖ ᐅᕝᕙᓘ ᓯᕗᓂᕐᒥᒃ ᐊᑑᑎᒍᓐᓇᓯᓂᐊᕐᑕᑎᓐᓂᒃ ᑐᕌᕐᕕᖃᖔᕐᓂᐊᓕᕐᐱᑕ. ᐃᓄᒃᑐᑦ ᖃᓕᐅᔮᖅᐯᒥᒃ ᐊᑐᕐᑕᖃᓯᓂᖅ ᑲᓇᑕᒥ ᐃᓄᑐᐃᓐᓇᓕᒫᓄᑦ ᐊᑐᕐᑕᐅᓯᓂᖓ ᑐᑭᓯᒍᑎᒋᕙᕋ ᓯᕗᒧᑦ ᐃᖏᕐᕋᒋᐊᕈᒪᓕᕆᐊᑦᑕ ᐃᓘᓐᓇᑕ ᐊᑕᐅᓯᐅᖃᑎᒌᖑᓗᑕ.

ᑌᒪᖕᖓᑦ ᐊᕐᕌᒍᐃᑦ ᓯᑕᒪᐅᔪᕐᑐᑦ ᐊᓂᒍᕐᐳᑦ ᐱᕙᓪᓕᐊᑎᑦᓯᒍᑎᖃᕆᐊᓯᓚᐅᕐᓯᒪᑎᓪᓗᑕᓂᑦ ᑲᓇᑕᓕᒫᒥ ᐱᓇᓱᒍᑎᐅᓚᖓᔪᓂᒃ ᐃᓄᐃᑦ ᐃᓕᓐᓂᐊᓂᖏᓐᓅᓕᖓᔪᓂᒃ, ᑲᔪᓯᑎᑦᓯᒍᑎᖃᕈᓐᓇᓯᓚᐅᕋᑦᑕ ᐅᖃᐅᓯᕐᒥᒃ ᐃᒣᓕᔪᒥᒃ “ᐃᓄᒃᑐᑦ” ᑐᑭᖃᓚᖓᑎᓪᓗᒍ ᐃᓘᓐᓇᑎᒃ ᐃᓄᑐᐃᓐᓇᐅᖃᑎᒌᑦ ᐊᑐᓂᑦ ᐅᖃᐅᓯᖏᓐᓂᒃ, ᓇᑭᒥᐅᔭᐅᒐᓗᐊᕈᑎᒃ ᐊᑦᔨᒌᖕᖏᑲᓗᐊᕐᐸᑕ ᐅᖄᒍᓯᖏᑦ. ᐅᕙᓐᓄᓕ ᑕᒪᓐᓇ ᑕᑯᒍᓐᓇᕈᑎᒋᓕᕐᑕᕋ ᐃᓄᑐᐃᓐᓀᑦ ᐊᑕᐅᓯᐅᖃᑎᒌᖕᖑᑎᓪᓗᒋᑦ. ᖄᖏᓐᓀᒍᑎᒋᒍᓐᓇᓕᕐᑕᕗᑦ ᐃᓘᓐᓇᖏᓐᓂᒃ ᐱᓂᐊᕐᓂᓕᕆᓂᑎᒍᑦ ᓱᓕᒐᑎᒃ ᐊᐳᕐᑕᕕᐅᕙᑦᑐᓂᒃ.

ᐅᖃᐅᓯᑦᑎᓄᑦ ᑭᓇᐅᓂᕗᓪᓗ ᖃᓄᐃᑦᑑᓂᕗᓪᓗ ᓴᕐᕿᔮᕐᑕᐅᕗᖅ, ᐅᖃᐅᓯᑦᑕᓗ ᖃᓄᐃᖕᖏᓯᐊᕐᓂᖓᓄᑦ ᖃᓄᐃᖕᖏᓯᐊᕐᑎᑕᐅᕗᒍᑦ. ᓂᕆᐅᒍᑎᖃᕈᒪᕗᖓ ᐊᑐᕈᓐᓇᓂᐊᕐᓗᑕ ᐃᓄᒃᑐᑦ ᐃᓘᓐᓇᖏᓐᓂ ᐅᖃᒍᓯᕐᓂ ᐊᓪᓚᒍᓯᕐᓂᓗ ᓯᕗᒧᓪᓗ ᑲᔪᓯᒍᑎᒋᓗᒋᑦ ᑌᒫᑦᓭᓇᖅ ᑲᑐᑦᔮᖃᕐᓱᑕ ᓄᓇᓂᒃ ᐃᓐᓄᐃᓯᒪᓇᓱᒍᑎᑦᑎᓂᒃ ᐱᔭᖃᖃᑎᒌᒐᓱᑉᐸᑲᑦᑕ ᐃᓄᑐᐃᓐᓇᐅᖃᑎᒌᑎᒍᑦ.

ᒥᐊᔨ ᓴᐃᒪᓐ ᐊᖓᔪᖅᑳᖑᓚᐅᖅᓯᒪᔪᖅ ᐃᓄᐃᑦ ᑕᐱᕇᑦ ᑲᓇᑕᒥ 2011−ᒥ ᓴᖅᑭᑎᑦᑎᑎᓪᓗᒋᑦ ᑲᓇᑕᒥ ᑐᕌᒐᖅ ᐃᓄᐃᑦ ᐃᓕᓐᓂᐊᕐᓂᓕᕆᓂᖓᓐᓄᑦ, ᐃᓚᖃᓚᐅᖅᖢᓂ ᐊᑐᓕᖁᔭᐅᓯᒪᔪᕐᒥᒃ ᓴᖅᑭᑎᑦᑎᓪᓗᑎᒃ ᐊᑕᐅᓯᕐᒥᒃ ᑎᑎᕋᐅᓯᕐᒥᒃ ᐃᓄᐃᑦ ᐅᖃᐅᓯᖏᓐᓄᑦ.

Share This Story

(0) Comments

Join the Conversation

Your email address will not be published. Required fields are marked *

*