ᐸᓖᓯ ᐃᓅᑭ ᐴᒃ ᓱᖏᐅᑎᕙᓪᓕᐊᔪᖅ ᐊᐅᐸᕐᑐᒥ ᐊᓐᓄᕌᒥ

For the English version of this story, please see First Nunavut Inuk officer in decades still getting used to red serge.

ᐃᓅᑭ ᐴᒃ ᓱᖏᐅᑎᕙᓪᓕᐊᔪᖅ ᐊᑎᕆᓕᕐᑕᖓᓂ.

“ᐊᔾᔨᐅᖂᔨᙱᑦᑐᖅ ᑳᓐᔅᑕᐳᓪ ᑎᑎᕋᖅᖢᒍ ᑎᑎᕋᖅᑕᓐᓂ ᖃᕋᓴᐅᔭᒃᑯᑦ,” ᐅᖃᓚᐅᕐᑐᖅ ᐊᐱᕐᓱᖅᑕᐅᑎᓪᓗᒍ.

“ᑎᑎᕋᓕᒪᒐᒪ ᑲᑕᑦ ᑕᖅᑭᐅᓕᕐᑐᓂ 6-ᓂ, ᑳᓐᔅᑕᐳᓪ — ᐅᐊᕈᓗᒃ, ᐅᐊᑲᓪᓚᖔ.”

ᐴᒃ ᓯᕗᓪᓕᖅᐹᖑᔪᖅ ᐃᓄᒃ ᑲᑕᑦ (ᐅᓇᑕᕐᑐᒃᓴᙳᐊᖅ) ᓄᓇᕗᒥᐅᑕᖅ ᐊᓂᒍᐃᓪᓗᓂ ᐸᓖᓯᓄᑦ ᐃᓕᓐᓂᐊᕐᕕᒃᒥ, ᑏᐴ ᐊᕕᒃᓯᒪᓂᒃᑯᑦ, ᓴᔅᑳᑦᓱᐊᐊᓐᒥ ᑕᐃᒪᙵᓂ 2003-ᒥ — ᑖᔅᓱᒪ 21-ᓂ ᐊᕐᕌᒍᓕᐅᑉ ᐃᓅᕝᕕᕕᓂᐊᑕ ᐊᕐᕌᒍᖓᓂ.

ᐴᒃ ᐊᓂᒍᐃᓚᐅᕐᑐᖅ ᕆᔾᔭᐃᓇ ᐃᓕᓐᓂᐊᕐᕕᒃᒥ ᔭᓄᐊᕆ 6-ᒥ ᐃᓚᖏ ᐅᐸᒍᑎᓯᒪᓪᓗᑎᒃ ᐃᓚᒋᔭᐅᓪᓗᓂ ᓄᓇᕗᒧᑦ ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐊᒻᒪ ᓄᓇᕗᒥᒃ ᐸᓖᓯᒃᑯᓐᓄᑦ ᐊᖓᔪᖅᑳᕆᔭᐅᔪᖅ ᐋᓐᑐᕉ ᐸᓛᑲᑖᕐ.

ᐴᒃ ᐃᖅᑲᐅᒪᔪᖅ ᐅᖃᐅᓯᐅᓂᑯᒥ ᑖᔅᓱᒧᖓ ᐆᒧᖓ ᑰᐳᕈᓪ ᔪᐊᔾ ᕼᐊᓐᕆ ᐃᖃᓗᐃᑦ ᐸᓖᓯᒃᑯᓐᓃᑦᑐ, ᑖᓐᓇᑦᑕᐅᖅ ᐃᓅᒋᓪᓗᓂ.

“ᐅᕙᓐᓄ ᐅᖃᓚᐅᕐᒪᑦ, ᐱᓕᕆᐊᖃᖅᐸᓪᓕᐊᓪᓗᑕ, ‘ᐱᒻᒪᕆᐅᓕᒑᔪᑎᑦ ᐊᓂᒍᐃᒍᕕᑦ.”

“ᐅᓇ ᐊᒃᓱᕈᕈᑎᒋᒃᑲᓐᓂᓕᓚᐅᕐᑕᕋ ᐊᓂᒍᐃᓇᓱᒃᖢᖓ,” ᐴᒃ ᐅᖃᕐᑐᖅ.

“ᐅᑯᐊ ᖁᕕᐊᓇᓛᑦ ᑕᖅᑭᑦ 6 ᐃᓅᓯᕐᓂ ᐊᑐᒃᑲᓐᓂᕈᒪᓇᔭᙱᑕᓯ,” ᐅᖃᓚᐅᕐᑐᖅ ᐅᖃᐅᓯᖃᖅᖢᓂ ᐃᓕᓐᓂᐊᕆᐊᕐᕕᖓᓂ.

ᐅᓇᑕᕐᑐᒃᓴᙳᐊᑦ ᐱᓕᕆᑎᑕᐅᑲᑕᐃᓐᓇᕐᐸᒃᑐᑦ ᐊᒻᒪᓗ ᐊᓯᐊᓄᐊᙲᓐᓇᖅᖢᑎᒃ ᐃᓕᓐᓂᐊᕐᕕᖓᑕ ᑕᖅᑭᓂ 6-ᓂ, ᐅᖃᕐᑐᖅ.

ᓴᐅᒥᐊᓂᒃ, ᐸᓖᓯ ᑰᐳᕈᓪ ᔪᐊᔾ ᕼᐊᓐᕆ, ᒪᓕᒐᓕᕆᔨᒃᑯᓐᓄᑦ ᒥᓂᔅᑕ ᑕᐃᕕᑦ ᐊᕿᐊᕈᖅ, ᓄᓇᕗᒥᑦ ᐸᓖᓯᑯᓐᓄ ᐊᖓᔪᖅᑳᖅ ᐋᓐᑐᕉ ᐸᓛᐊᑕ, ᐸᓖᓯ ᐃᓅᑭ ᐴᒃ, ᓯᕗᓕᐅᕐᑎ ᐸᐅᓗᓯ ᐊᕿᐊᕈᖅ ᐊᒻᒪ ᐸᓖᓯ ᓯᑖᕝ ᓵᔾᔭᓐᑦ ᒪᐃᔪ ᐹᓖᓐ ᒥᓛᓐᓴᓐ ᐊᔾᔨᓕᐅᕐᑕᐅᔪᑦ ᐴᒃ ᐊᓂᒍᐃᑎᓪᓗᒍ ᐸᓖᓯᓄᑦ ᐃᓕᓐᓂᐊᕐᕕᒃᒥ ᔭᓄᐊᕆ 6-ᖑᑎᓪᓗᒍ. (ᐊᔾᔨᙳᐊ ᐅᕙᙵᑦ ᓯᕗᓕᐅᕐᑎᐅᑉ ᑎᑎᕋᕐᕕᖓᓂ)

ᐅᓪᓛᒃᑯᑦ 5:30 ᒪᑭᑉᐸᒃᖢᑎᒃ ᐊᒻᒪᓗ ᐃᓕᓐᓂᐊᖅᐸᒃᖢᑎᒃ ᐊᒻᒪ ᐊᔪᕈᓐᓃᖅᓴᖅᐸᒃᖢᑎᒃ 8:00-ᒥ ᐅᓪᓛᒃᑯᑦ 4:30-ᒧ ᐅᓐᓄᓴᒃᑯᑦ. ᓂᕆᐊᓂᒃᑳᖓᑕ ᐅᓐᓄᒃᑯᑦ, ᐱᓕᕆᐊᖃᖅᐸᒃᖢᑎᒃ ᐃᓕᓐᓂᐊᖅᑕᖏᓐᓂ ᐊᒻᒪ ᐱᐊᓂᒃᐸᒃᖢᑎᒃ 10:00-ᒥ ᐅᓐᓄᒃᑯᑦ.

“ᑭᓯᐊᓂᓕ ᐃᓱᐊᒍᑦ ᖃᐅᒪᓂᐅᔪᖅ ᐱᓕᕆᑐᐃᓐᓇᕐᓇᖅᑐᖅ,” ᐅᖃᕐᑐᖅ.

ᐴᒃ ᐅᖃᓚᐅᕐᑐᖅ ᐸᓖᓯᓂ ᐱᐅᒃᓴᖃᑦᑕᓕᓚᐅᕐᓯᒪᓂᖓᓂ ᓱᕈᓯᐅᓪᓗᓂ ᐊᖅᑯᑎᓂ ᐱᙳᐊᑲᑕᒃᖢᓂ ᐃᖃᓗᖕᓂ.

“ᐸᓖᓯᑕᖃᐃᓐᓇᖃᑦᑕᓚᐅᕐᒪᑦ, ᐊᒻᒪᓗ ᐱᐅᒋᓚᐅᕐᑕᒃᑲ ᐅᕙᑦᑎᓐᓂ ᐅᓗᕆᐊᓇᙱᑦᑐᒦᑎᑦᑎᓚᐅᕐᒪᑕ,” ᐅᖃᕐᑐᖅ.

“ᐱᐅᒋᓚᐅᕐᒥᒐᒃᑯᑦ ᐊᐅᐸᕐᑐᖅ ᐊᑐᕐᑕᖓ,” ᐅᖃᕐᑐᖅ ᐸᓖᓯᒃᑯᑦ ᐊᓐᓄᕌᖏᓐᓂ. “ᐱᐳᒋᑦᑎᐊᒻᒪᕆᓚᐅᕋᒃᑭ. ᓇᓗᓇᐃᒃᑯᑎᒻᒪᕆᐅᓪᓗᓂ.”

15-ᓂ ᐊᕐᕌᒍᖃᖅᖢᓂ ᐃᓚᐅᓕᓚᐅᕐᓯᒪᔪᖅ ᐊᖑᑎᑦ ᕼᐋᑭᖅᑐᓂ ᐊᒻᒪ ᐱᙳᐊᖃᑕᐅᓯᒪᓪᓗᓂ ᐃᖃᓗᐃᑦ ᐸᓖᓯᒃᑯᑦ ᐊᑭᕋᕆᓪᓗᓂᒋᑦ. ᐊᒻᒪ ᐃᓚᒋᓯᒪᓪᓗᓂᒋᑦ.

“ᖁᕕᐊᓇᑦᑎᐊᓚᐅᕐᑐᖅ ᐅᐸᒃᓯᒪᓪᓗᒋᑦ, ᐊᒻᒪᓗ ᐊᑕᐅᓰᖅᖢᖓ ᐃᓱᒪᓪᓗᖓ, ᐄᓛᒃ, ᐸᓖᓯᐅᓛᕐᒥᒐᒪ,” ᐅᖃᕐᑐᖅ.

ᐊᕐᕌᒍᑦ ᐊᓂᒍᕐᓯᒪᓕᖅᑎᓪᓗᒋᑦ ᐃᓕᓐᓂᐊᕋᓱᓕᓚᐅᕐᓯᒪᔪᖅ ᐊᑐᕈᓐᓇᓛᕐᒪᑦ ᐊᐅᐸᖅᑐᒥ ᐊᓐᓄᕌᓂ.

ᑕᐃᒪᓕ ᐃᓚᖏᓐᓂ ᐅᖃᕐᑎᓪᓗᒍ ᐸᓖᓯᓂ ᐃᓚᐅᔪᒪᓂᕋᖅᖢᓂ ᓄᑲᖓ ᑖᔅᓱᒥᖓ ᕿᕕᐊᖅᖢᓂ ᐅᖃᓚᐅᕐᑐᖅ ᑐᑭᖃᕐᑐᖅ ᐴᒃ ᐸᓖᓯᙳᓛᕐᓂᖓᓂ ᐃᓚᒌᑦᑎᓐᓂ.

“ᐋᒪᐃ, ᑕᐃᒪᐃᑐᐃᓐᓇᕋᒪᖃᐃ,” ᐅᖃᕐᑐᖅ.

“ᐊᕿᑦᑐᖓᕈᔪᒡᓗᓂ ᑭᓯᐊᓂ ᐸᓖᓯᐅᓐᓇᕐᑐᖅ, ᐊᑭᑦᑐᖓᕈᔪᖂᕋᒪ.”

ᑕᖅᑭᐅᕋᑖᕐᑐᒥ, ᐴᒃ ᐃᖃᓗᒃᑑᑦᑎᐊᕐᒥ ᐸᓖᓯᐅᓕᕐᑐᖅ.

ᐅᖃᓚᐅᕐᑐᖅ ᐱᒋᐊᑦᑎᐊᕐᓯᒪᓂᖓᓂ ᐃᓄᖕᓄᑦ ᑐᙵᓱᒃᑎᑕᐅᕙᒃᖢᓂ ᐊᒻᒪ ᐃᓕᓴᕆᔭᐅᕙᒃᖢᓂ ᐸᓖᓯᐅᓕᓵᕐᓂᖓᓂ.

ᑕᑯᕙᒃᑐᖅ ᓱᕈᓯᕐᓂ, ᑖᔅᓱᑐᓇ ᐊᕐᕌᒎᓕᕐᑐᑦ ᓯᕗᓂᐊᓂ, ᑕᑯᔭᕌᖓᒥ ᐊᓐᓄᕌᖓᓂ “ᐃᔨᓂ ᖃᐅᒻᒪᖃᑦᑕᖅᑐᑦ” ᐊᒻᒪ ᐅᖃᓪᓚᕝᕕᐅᓕᖅᐸᒃᖢᓂ.

ᐴᒃ ᐅᖃᓚᐅᕐᑐ ᑕᑯᖃᑦᑕᕐᓂᖓᓂ ᐃᓄᖕᓂ “ᐱᐅᒃᓴᙱᓪᓚᕆᒃᑐᓂ ᐸᓖᓯᓂ,” ᑭᓯᐊᓂᓕ ᑕᒪᒃᑯᐊ ᐅᓄᙱᑦᑐᕈᓗᐃᑦ.

“ᑲᑕᓕᕐᓇᖅᑐᑦ ᑭᓯᐊᓂᓕ ᑕᐃᒪᐃᓐᓇᕐᒪᑦ ᐃᖅᑲᓇᐃᔮᒧᑦ, ᕼᐃᓖ?”