ᐃᖃᓗᖕᓂ ᑲᑎᒪᔨᖏᑦ ᐊᖏᖅᐳᑦ $5.4 ᒥᓕᐊᓐᓂ ᐃᓄᖕᓄᑦ ᓂᕿᑖᕈᑎᒃᓴᓄᑦ ᐱᓕᕆᐊᖑᔪᒥ

For the English version of this story, please see Iqaluit council approved $5.4M food voucher program.

ᐃᖃᓗᖕᓂ ᓄᓇᓕᐸᐅᔭᕐᒥ ᑲᑎᒪᔨᖏᑦ ᖁᕕᐊᓚᐅᖅᐳᑦ ᐊᔾᔨᒌᒃᑐᒥ ᓂᕈᐊᕐᓂᕐᒥ ᐅᒃᑐᐱᕆ 9−ᒥ ᒪᓕᒐᙳᖅᑎᑦᑎᓂᕐᒥ ᓂᕿᑖᕈᑎᒃᓴᓄᑦ ᐱᓕᕆᐊᖑᔪᒥ ᐃᓄᖕᓄᑦ ᐃᓚᒌᖑᔪᓄᑦ ᓄᓇᓕᖕᒥ.

$5.4-ᒥᓕᐊᓐᓂ ᐱᓕᕆᐊᖑᔪᖅ ᐊᑭᓕᖅᑕᐅᕗᖅ ᓄᓇᖃᖅᑳᖅᓯᒪᔪᓄᑦ ᐱᔨᑦᑎᕋᕐᓂᕐᒧᑦ ᑲᓇᑕᒥ ᐅᕘᓇ ᐃᓄᐃᑦ ᓱᕈᓯᕐᓄᑦ ᓯᕗᓪᓕᐅᓗᑎᒃ ᐱᒋᐊᕈᑕᐅᔪᒥ ᐊᒻᒪ ᔪᐊᑕᓐ ᑐᙵᕕᖓᓂ.

ᐱᓕᕆᐊᖑᔪᖅ ᑐᕌᖓᓗᐊᑕᖅᐳᖅ ᐃᑲᔪᕐᓂᕐᒥ ᐃᓄᖕᓂ ᐃᓚᒌᖑᔪᓂ ᐊᒻᒪ ᓱᕈᓯᕐᓂ 18 ᑐᖔᓂ ᐅᑭᐅᓕᖕᓂ ᓂᐅᕕᕐᓂᕐᒧᑦ ᓂᕿᓂᑦ, ᐊᒻᒪᓗᑦᑕᐅᖅ ᖁᐃᖏᓕᓴᕐᓂ ᐊᒻᒪ ᐊᓯᖏᓐᓂ ᓱᓇᒃᑯᑖᓂ ᓱᕈᓯᕐᓄᑦ ᐅᑭᐅᓕᖕᓂ ᐱᖓᓱᓂ ᐊᒻᒪ ᐊᑖᓄᑦ, ᐅᖃᓚᐅᖅᐳᖅ ᓄᓇᓕᐸᐅᔭᕐᒥ ᐅᖃᖅᑎᐅᔪᖅ ᔨᐊᕝ ᐱᐅᓐ.

ᐱᐅᓐ ᐅᖃᓚᐅᖅᐳᖅ 1,300−ᐸᓗᖕᓂ ᐃᓚᒌᓂ ᐃᖃᓗᖕᓂ ᐱᕚᓪᓕᕈᑎᖃᕈᓐᓴᖅᐳᑦ ᐱᓕᕆᐊᖑᓂᐅᔪᒥ.

“ᐱᒻᒪᕆᕐᔪᐊᖑᕗᖅ, ᐃᑲᔪᕐᓂᖃᓪᓗᐊᖅᐳᖅ ᓂᐅᕕᒃᑲᓐᓂᕐᓂᕐᒥ ᑭᓱᑐᐃᓐᓇᓂ,” ᒪᐃᔭ ᓵᓚᒪᓐ ᐊᕙ ᐅᖃᓚᐅᖅᐳᖅ ᐊᐱᖅᓱᖅᑕᐅᓂᐅᔪᒥ.

ᑲᑎᒪᔨ ᐋᒻᐳᕐ ᐊᒡᓘᒃᑲᖅ ᐅᖃᓚᐅᖅᐳᖅ ᐱᐅᕗᖅ ᐃᖃᓗᖕᓄᑦ ᐃᓚᒋᔭᐅᖃᑕᐅᓂᕐᒥ ᐱᒋᐊᕈᑕᐅᔪᒥ ᐊᓯᖏᑦ ᓄᓇᓕᐅᔪᓂ ᐱᕚᓪᓕᕈᑎᖃᕐᓂᖏᓐᓂ.

ᐊᕐᕕᐊᑦ, ᓇᐅᔮᑦ, ᖃᒪᓂᑦᑐᐊᖅ, ᐸᖕᓂᖅᑑᖅ ᐊᒻᒪ ᑲᖏᖅᖠᓂᖅ ᐃᓚᒋᔭᐅᕗᑦ ᐊᓯᖏᓐᓂ ᓄᓇᓕᐅᔪᓂ ᐅᖃᐅᓯᖃᖅᓯᒪᔪᓂ ᐊᓪᓚᕝᕕᓕᕆᓂᐊᕐᓂᖏᓐᓂ ᐆᒥᖓ ᓂᕿᑖᕈᑎᒃᓴᓄᑦ ᐱᓕᕆᐊᖑᔪᒥ.

“ᐃᓱᒪᕗᖓ ᐱᐅᔪᒥ ᐊᒃᑐᐃᓂᖃᕐᓂᐊᕐᓂᖓᓂ ᓄᓇᓕᑦᑎᓐᓂ, ᐱᓗᐊᖅᑐᒥ ᐃᓄᖕᓂ ᓱᕈᓯᕐᓂ ᐊᒻᒪ ᐃᓚᒌᖑᔪᓂ ᐊᒃᑐᖅᑕᐅᓯᒪᕐᔪᐊᖅᑐᓂ ᖁᑦᑎᒃᑐᒥ ᐊᑭᖓᓂ ᐆᒪᓇᓱᐊᕐᓂᐅᔪᒥ,” ᐊᒡᓘᒃᑲᖅ ᐅᖃᓚᐅᖅᐳᖅ.

“ᓂᕆᐅᒃᐳᖓ ᐊᑯᓂᐅᔪᒥ ᐱᒋᐊᕈᑕᐅᓂᐊᕐᓂᖓᓂ.”

ᒪᓕᒃᑐᒥ ᑐᓴᒐᒃᓴᓕᐊᖑᔪᒥ ᓄᓇᓕᐸᐅᔭᕐᒥ ᓇᓗᓇᐃᖅᓯᓚᐅᖅᐳᖅ ᐱᔪᓐᓇᕋᔭᖅᑐᓂ ᐃᓄᖕᓂ ᐃᓚᒌᖑᔪᓂ ᐱᓂᐊᖅᐳᑦ $500 ᑕᖅᑭᑕᒫᒥ ᐊᑐᓂ ᓱᕈᓯᕐᒧᑦ ᐅᑭᐅᓕᖕᒥ 18−ᒥ ᐊᒻᒪ ᐊᑖᓄᑦ, ᖄᒃᑲᓐᓂᐊᒍᑦ $250−ᒥ ᓱᕈᓯᕐᓄᑦ ᐅᑭᐅᓕᖕᓂ ᐅᓪᓗᕐᒥ ᐊᑕᐅᓯᕐᒥ ᐊᕐᕌᒍᓄᑦ ᐱᖓᓱᓄᑦ.

ᐱᓇᓱᐊᕈᓯᐅᓚᐅᖅᑑᑉ ᑲᑎᒪᔨᖏᑦᑕ ᑲᑎᒪᓂᖓᓂ, ᐱᐅᓐ ᐅᖃᓚᐅᖅᐳᖅ ᑮᓇᐅᔭᖃᖅᑎᑕᐅᓂᐅᔪᖅ ᐊᑐᐃᓐᓇᐅᓂᖓᓂ ᒫᔾᔨ 31, 2025−ᒧᑦ.

ᑐᓴᒃᑲᓐᓂᓚᐅᕐᓇᑎᒃ ᒐᕙᒪᑐᖃᒃᑯᓐᓂ ᓄᑖᙳᕆᐊᖅᑎᑕᐅᓂᐊᕐᓂᖓᓂ ᐅᕝᕙᓘᓐᓃᑦ ᐅᖓᕙᕆᐊᖅᑕᐅᓂᖓᓂ, ᓄᓇᓕᐸᐅᔭᖅ ᐊᐅᓚᑦᑎᕗᑦ ᑕᐃᔅᓱᒥᖓ ᐃᓱᓕᕝᕕᒃᓴᖓᓂ ᐅᓪᓗᖓᓂ ᐃᓱᒪᒋᔭᐅᓪᓗᓂ, ᐅᖃᓚᐅᖅᐳᖅ.

ᕿᓚᒻᒥᐅᔪᒥ, ᓄᓇᓕᐸᐅᔭᕐᒥ ᐱᓕᕆᔨᐅᔪᓂ ᐊᐱᕆᕗᑦ ᐃᓄᐃᑦ ᐅᑕᖅᑭᓂᖏᓐᓂ ᐅᓂᒃᑳᕆᔭᐅᒃᑲᓐᓂᕐᓂᐊᖅᑐᓂ ᐱᔭᕇᖅᑕᐅᓇᓱᐊᕐᓂᖓᓐᓂ.

ᐱᐅᓐ ᐅᖃᓚᐅᖅᐳᖅ ᓂᕆᐅᖕᓂᐅᔪᖅ ᓂᕿᑖᕈᑎᒃᓴᐃᑦ ᐊᑐᐃᓐᓇᐅᓂᐊᕐᓂᖏᓐᓂ ᑐᓐᓂᖅᓴᖅᑕᐅᓂᕐᒧᑦ ᓄᕕᐱᕆ 1−ᒥ.

ᖃᓄᐃᓕᖓᓂᖓᓂ ᑎᑭᓐᓂᐊᕐᓂᖏᓐᓂ, ᐱᓪᓚᕆᐅᔪᒥ ᐸᐃᑉᐹᒥ ᐅᕝᕙᓘᓐᓃᑦ ᑮᓴᐅᔭᒃᑯᕕᖕᒧᑦ ᐃᓕᔭᐅᑲᐅᑎᒋᔭᐅᓂᖓᓂ, ᓱᓕ ᐋᖅᑭᒃᓱᖅᑕᐅᕗᖅ.

“ᖁᕕᐊᕐᔪᐊᖅᐳᒍᑦ ᑐᓂᓯᓂᕐᒥ ᐆᒥᖓ ᓄᓇᖃᖅᑎᒋᔭᑦᑎᓐᓄᑦ,” ᐱᐅᓐ ᐅᖃᓚᐅᖅᐳᖅ.

“ᐊᐱᕆᕗᒍᑦ ᓄᓇᖃᖅᑎᐅᔪᓂ, ᓱᓕᒃᑲᓐᓂᖅ, ᐅᕙᑦᑎᓐᓂ ᐅᑕᖅᑭᑦᑎᐊᖁᔨᓪᓗᑕ ᖃᔅᓯᐊᕐᔪᖕᓂ ᒪᓕᒃᑐᓂ ᐅᓪᓗᕐᓂ ᐱᓕᕆᑎᓪᓗᑕ ᑎᑎᕋᕐᕕᑦᑎᓐᓂ ᐋᖅᑭᒃᓱᐃᓂᕐᒥ ᐱᓕᕆᐊᖑᓂᐅᔪᒥ ᐊᒻᒪ ᓇᓗᓇᐃᖅᓯᓂᒃᑲᓐᓂᕐᓂᐅᔪᓂ ᐊᑐᐃᓐᓇᐅᔪᓂ ᓄᓇᓕᖕᓄᑦ.”