ᐃᖃᓗᐃᑦ ᑲᑎᒪᔨᖏᑦ ᐃᑲᔪᖅᑐᐃᕗᑦ ᐳᐃᔾᔪᕋᕐᕕᒃ ᐊᑐᖅᑕᐅᔪᒪᑎᓪᓗᒍ ᐋᓕᐊᓇᐃᑦᑯᓐᓄᑦ

For English version, see Iqaluit council grants pool access, equipment rentals for Alianait

ᐊᓕᐊᓇᐃᑦ ᖁᕕᐊᓱᖃᑎᒌᖕᓂᕐᒧᑦ ᐸᕐᓇᐅᑎ ᓄᑖᓂ ᐱᓕᕆᐊᒃᓴᓂ ᐱᓕᕆᐊᖃᕈᑎᐅᕗᑦ ᐃᖃᓗᖕᓄᑦ ᐅᑎᖅᐸᑦ ᑕᖅᑭᐅᓂᐊᖅᑐᒥ.

ᐋᓐᑐᕉ ᒧᐊᕆᓴᓐ, ᖁᕕᐊᓲᑎᒃᓴᒧᑦ ᐊᐅᓚᑦᑎᔨᐅᖃᑕᐅᔪᖅ ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᑲᑎᒪᔨᖏᓐᓄ ᒪᐃ 13-ᖑᑎᓪᓗᒍ ᖁᕕᐊᓲᑎᓕᕆᔨᒃᑯᑦ ᖃᓄᐃᓕᐅᖅᑎᑦᑎᓂᐊᕐᓂᕋᖅᖢᑎᒃ ᓄᓇᓕᐸᐅᔭᐃᑦ ᐳᐃᔾᔪᕋᕐᕕᖓᓂ — ᐅᖃᐅᓯᕆᓪᓗᓂᐅ ᐱᐅᓛᖑᖃᑕᐅᔪᒥᑦ ᖃᓄᐃᓕᐅᕐᕕᒃᒥᑦ.

ᑖᔅᓱᒧᖓᓕ ᐊᒻᒪ ᐊᓯᖏᓐᓂ ᐱᓕᕆᔾᔪᑎᓂᒃ ᐊᒻᒪ ᐳᐃᔾᔪᕋᖅᕕᒃᒥ ᐊᑐᕈᒪᓂᕐᒧᑦ ᐱᔪᒪᔾᔪᑎᒋᓚᐅᖅᑕᖏ ᐊᖏᖅᑕᐅᓇᓱᒃᖢᓂ ᑲᑎᒪᔨᓄᑦ — ᑕᒪᕐᒥᒡᓗ ᐱᔪᒪᔭᖏᑦ ᑲᑎᒪᔨᓄᑦ ᐊᖏᖅᑕᐅᔪᐃᓐᓇᐅᓚᐅᖅᖢᑎᒃ ᐃᑲᔪᕈᒪᓪᓗᑎᒃ.

“ᓄᑖᒥ ᐊᑐᕋᓱᒍᒪᓕᓚᐅᕋᑦᑕ, ᕿᓚᐅᔾᔭᖅᑎᑦᑎᑲᑕᒡᓗᑕ ᐊᒻᒪ ᐊᓯᖏᓐᓂ ᐃᖏᖃᑦᑕᖅᑐᓂ ᐅᕙᓂ ᓱᕈᓰᑦ ᐳᐃᔾᔪᕋᕐᕕᒃᒥ ᑲᑎᖃᑎᒌᓂᐅᓂᐊᖅᑐᒥᒃ,” ᐅᖃᕐᑐᖅ.

“ᖃᐅᔨᒪᒐᑦᑕ ᐅᓇ ᓱᕈᓯᕐᓄᑦ ᖁᕕᐊᒋᔭᐅᑦᑎᐊᕐᓂᐊᖅᑐᖅ ᓄᓇᓕᖕᓃᑦᑐᓂᒃ.”

ᐊᒻᒪᓗ, ᒧᐊᕆᓴᓐ ᓄᓇᓕᐸᐅᔭᓄᑦ ᐱᔪᒪᓚᐅᕐᑐᖅ 40-ᓂ ᐃᓯᕈᓐᓇᐅᑎᒃᓴᓂ ᐱᔪᒪᓪᓗᓂ ᐅᕗᖓ ᐳᐃᔾᔪᕋᖅᕕᒃᒥ ᖃᓄᐃᓕᐅᑲᑕᖕᓂᐊᖅᑐᓄ ᐃᓚᐅᓂᐊᖅᑐᓂ ᖁᕕᐊᓲᑎᖃᕐᓂᕐᒥᒃ.

ᐃᓄᐃᑦ ᓄᓇᕗᒥᑦ, ᓄᓇᕕᒃᒥ, ᑲᓛᓪᖡᑦ ᓄᓇᖓᓂ ᐊᒻᒪ ᐊᓛᔅᑲᒥᙶᖅᑐᖃᕐᓂᐊᖅᖢᓂ ᐃᓚᒋᔭᐅᓂᐊᖅᑐᓂᒃ ᖁᕕᐊᓲᑎᖃᕐᓂᕐᒥᒃ.

ᐊᓕᐊᓇᑦ ᐱᔪᒪᒐᓚᒃᑕᓂ ᓄᓇᓕᐸᐅᔭᓂ ᐅᑯᓇᙵᑦ “ᒪᓕᒃᓯᒪᓚᐅᕐᑐᑦ ᐊᑐᖅᑕᐅᓯᒪᓂᑯᕕᓂᐅᓕᖅᑐᓂᒃ,” ᒧᐊᕆᓴᓐ ᐅᖃᕐᑐᖅ, ᐃᓚᖃᖅᖢᑎᒃ ᐊᖏᔪᒥᒃ ᑐᐱᕐᒥ ᐊᑐᕈᒪᓪᓗᑎᒃ ᑖᓐᓇᓗ ᐊᑐᖅᑕᐅᕙᒃᖢᓂ ᖁᕕᐊᓱᖃᑎᒌᖕᓇᒥ.

ᐊᐱᕆᓚᐅᕐᒥᔪᖅ ᐊᑐᕈᒪᓪᓗᓂ ᓄᓇᓕᐸᐅᔭᐃᑦ ᐊᒃᑕᕐᕕᖏᓐᓂᒃ, ᖁᐃᔭᖅᑐᕐᕕᖏᓐᓂᒃ, ᓄᓇᓯᐅᑎᓄᑦ ᐊᖅᑯᑎᒃᑯ ᓄᖃᑲᑕᒍᑎᒃᓴᖏᓐᓂ, ᖁᙱᐊᖅᑕᐅᕝᕕᒃᒥ ᐊᑐᕆᐊᓕᖕᓂ ᐊᒻᒪ ᐃᒃᓯᕙᐅᑕᕐᓂᒃ.

ᐅᖃᓚᐅᕐᒥᔪᖅ ᐅᖃᓪᓚᖃᑎᖃᑲᑕᖕᓂᕐᒥᓂᒃ ᐃᖃᓗᐃᑦ ᐃᓐᓇᑐᖃᐃᑦ ᑲᑐᔾᔨᖃᑎᒌᖏᓐᓄᑦ ᐊᑐᕈᓐᓇᕆᐊᒃᓴᖏᓐᓂ ᐃᓐᓇᑐᖃᐃᑦ ᖃᕐᒪᖓᓂ ᖃᓄᐃᓕᐅᕐᕕᐅᓂᐊᕐᓗᓂ ᐊᒻᒪ ᓴᓇᑲᑕᒡᕕᐅᓂᐊᕐᓗᓂ.

ᒥᐊᕆᓴᓐ — ᐊᐅᓚᑦᑎᔨᐅᔪᖅ ᖁᕕᐊᓱᖃᑎᒌᖕᓇᐅᓂᐊᖅᑐᒥ ᐱᖃᑎᖃᖅᖢᓂ ᑎᑕᒃᑎᒥ ᔭᖅᑲ ᐲᑐᓴᓐᒥ — ᑐᓴᖅᑎᑦᑎᓚᐅᕐᒥᔪᖅ ᐊᓯᖏᓐᓂ ᖃᓄᐃᓕᐅᕈᑎᓂ ᑲᑎᒪᔨᓄᑦ ᖃᓄᐃᓕᐅᖅᑕᐅᓂᐊᖅᑐᓂᒃ ᐃᓄᖕᓄᑦ.

ᐊᓕᐊᓇᐃᑦ ᐱᓕᕆᖃᑎᖃᕐᓂᐊᖅᑐᑦ ᑲᑭᕙᒃ ᑲᑐᔾᔨᖃᑎᒌᓂᒃ ᐃᓅᓱᒃᑐᓂ ᑎᑭᑎᑦᑎᓂᕐᒥ ᕿᑭᖅᑕᓂ ᓄᓇᓕᖕᓂᙶᖅᑐᓂᒃ ᐃᑲᔪᕐᓂᐊᖅᑐᓂ ᑐᓴᐅᒪᔾᔪᑎᓕᕆᓂᕐᒥᒃ ᐊᒻᒪ ᖃᐅᒻᒪᖅᑯᑎᒃᓴᓕᕆᓂᕐᒥᒃ ᑕᕝᕙᓂ.

ᐊᒻᒪᓗ, ᐅᖃᓚᐅᕐᑐᖅ ᑕᒪᑐᒪᓂ ᐊᕐᕌᒍᒥ ᖃᓄᐃᓕᐅᕐᓇ ᐱᕕᖃᕈᑎᐅᓂᐊᕐᓂᖓᓂᑦᑕᐅᖅ ᖁᕕᐊᓲᑎᖃᕐᓂᕐᒥᒃ ᑲᓇᑕᒥ ᓄᓇᖃᖅᑳᖅᑐᑦ ᐅᓪᓗᖓᓂ ᔫᓂ 21-ᖑᓕᕐᐸᑦ. ᓯᕗᓂᐊᒍᓪᓕ ᐊᓕᐊᓇᐃᑦ ᖁᕕᐊᓲᑎᖃᕐᓇᐅᑎᓪᓗᒍ ᐊᑕᐅᑦᑎᒃᑰᖃᑎᖃᖅᐸᓚᐅᕐᑐᖅ ᑲᓇᑕᐅᑉ ᐊᒻᒪ ᓄᓇᕗᑦ ᐅᓪᓗᖏᓐᓂᒃ, ᑭᓯᐊᓂᓕ ᑕᒪᑐᒪᓂ ᐊᕐᕌᒍᒥ ᖁᕕᐊᓲᑎᖃᕐᓂᖅ ᐋᖅᑭᒃᑕᐅᓯᒪᖕᒪᑦ ᔫᓂ 19-ᒥ 22-ᒧ.

“ᑎᑕᑲᑕᖕᓂᕐᒧᑦ ᖁᕕᐊᓲᑎᖃᕐᓂᖅ ᖁᕕᐊᓇᐃᓐᓇᐅᔭᖅᑐᖅ ᐃᖃᓗᖕᓂᑦ,” ᐅᖃᕐᑐᖅ ᑲᑎᒪᔨ ᒥᑐᓴᓕ ᑯᓄᒃ, ᐅᖃᐅᓯᖃᖅᖢᓂ ᐊᓕᐊᓇᐃᑦ ᐃᑲᔪᖅᑕᐅᔪᒪᓂᖏᓐᓄᑦ ᑎᑎᖃᖏᓐᓂᒃ.

“ᐅᒃᐱᕈᓱᒃᑐᖓ ᐃᑲᔪᕆᐊᖃᕐᓂᑦᑎᓐᓂ ᑖᔅᓱᒥᖓ ᓲᖃᐃᒻᒪ ᖁᕕᐊᓇᑦᑎᐊᕐᓂᐊᕐᒪᑦ.”

ᑲᑎᒪᔨ ᐋᒻᐳ ᐊᒡᓘᒃᑲᖅ ᖁᕕᐊᓱᒻᒪᕆᓚᐅᕐᑐᖅ ᑕᒪᑐᒪᓂ ᖃᓄᐃᓕᐅᕐᓇᐅᑉ ᐅᓪᓗᖏᓐᓂ, ᐅᖃᖅᖢᓂ ᐃᓄᐃᑦ “ᑲᑎᖃᑦᑕᒪᕐᒪᑕ ᐊᒃᓱᕈᓐᓇᑐᒧᑐᐃᓐᓇᐅᙱᑦᑐᖅ ᑭᓯᐊᓂᓕ ᖁᕕᐊᓲᑎᖃᕐᓂᕐᒧᑦ.”

ᒫᓐᓇᓕ, ᑲᓛᓪᖡᑦ ᓄᓇᖓᓂᕐᒥᐅᑕᖅ ᑎᑕᒃᑏ Sauwestari ᐅᐸᒍᑎᓂᐊᕐᓂᖏᓐᓂ ᑐᓴᐅᒪᔭᐅᔪᑦ.