ᐃᖃᓗᖕᓂ ᑲᑎᒪᔨ ᐹᖅᓯᕗᖅ ᑲᓇᑕᒥ ᐸᓖᓯᒃᑯᓐᓂᑦ ᐱᓕᕆᐊᖑᓂᖓᓂ ᐅᖃᓗᖕᓕᐅᔪᒥ

For the English version of this story, please see Iqaluit councillor confronts RCMP about treatment during call for service.

ᐃᖃᓗᖕᓂ ᑲᑎᒪᔨ ᓴᐃᒪᓐ ᓇᑖᖅ ᐃᓚᓕᐅᔾᔨᓚᐅᖅᐳᖅ ᑐᑭᓯᓇᑦᑎᐊᖅᑐᒥ ᐅᖃᐅᓯᒃᓴᒥ ᐊᑯᓂᐅᔪᒥ ᐅᖃᓪᓚᖕᓂᐅᔪᒥ ᑲᓇᑕᒥ ᐸᓖᓯᒃᑯᓐᓄᑦ ᑕᐃᑲᓂ ᒫᔾᔨ 25−ᒥ ᓄᓇᓕᐸᐅᔭᒥ ᑲᑎᒪᔨᓄᑦ ᑲᑎᒪᓂᐅᔪᒥ: ᐊᓂᑕᐅᑎᑦᑐᓐᓇᖅᑕᒋᑦ.

“ᐅᖃᓘᑎᓂᒃ ᓈᓴᐅᑎᖃᖅᐳᖓ ᐃᒃᐱᐊᕐᔪᓐᓂ,” ᓇᑖᖅ ᐅᖃᓚᐅᖅᐳᖅ ᐃᓄᒃᑎᑐᑦ ᑐᓵᔨᑎᒍᑦ.

“ᐅᖃᐅᓯᕆᔪᓐᓇᕐᓂᐊᖅᐸᒃᑲ ᐃᓚᖏᓐᓂ ᑲᓇᑕᒥ ᐸᓖᓯᒃᑯᑦ ᐃᓚᒋᔭᐅᔪᓂ ᐱᔨᑦᑎᕋᙱᑦᑐᓂ ᐱᔨᑦᑎᕋᙱᑦᑐᓂ ᓂᕆᐅᒋᔭᓐᓂ ᐊᒻᒪ ᐲᖅᑕᐅᔪᓐᓇᕐᓗᑎᒃ.”

ᓇᑖᖅ ᐊᑐᐃᓐᓇᖃᖅᑎᑦᑎᓚᐅᖅᐳᖅ ᐃᓂᖅᑎᕆᓂᐅᔪᒥ ᐃᓚᒋᔭᐅᓪᓗᓂ ᑕᑭᔪᒥ ᐅᖃᐅᓯᒃᓴᓕᐅᕐᓂᕐᒧᑦ ᑲᓇᑕᒥ ᐸᓖᓯᒃᑯᑦ ᓄᑖᙳᕆᐊᖅᑎᑦᑎᑎᓪᓗᒋᑦ ᑲᑎᒪᔨᐅᔪᓂ ᐱᕋᔭᖕᓂᕐᒧᑦ ᐊᒻᒪ ᐸᓖᓯᒃᑯᓐᓂ ᖃᓄᐃᓕᐅᕐᓂᐅᔪᓂ ᑭᓪᓕᓯᓂᐊᕐᓂᖓᓂ ᑕᖅᑭᓄᑦ ᔭᓄᐊᕆᒥ ᐊᒻᒪ ᕕᕗᐊᕆᒥ ᐃᖃᓗᖕᓂ.

ᓇᑖᖅ ᑐᓂᓯᓚᐅᙱᓚᖅ ᐊᑎᓂ ᐅᖃᐅᓯᖃᕐᓂᖓᓂ ᐹᖅᓯᓂᐅᔪᒥ ᐸᓖᓯᒃᑯᓐᓂ ᐅᖃᓚᐅᖅᐳᖅ ᖃᓄᐃᓚᐅᕐᓂᖓᓂ ᐅᖃᓗᒃᑲᒥ ᐊᖏᕐᕋᖓᓂ. ᖃᓄᐃᓐᓂᐅᔪᖅ “ᒫᓐᓇᓕᓴᐅᙱᓚᖅ,”ᐅᖃᓚᐅᖅᐳᖅ.

“ᐊᐱᕆᔭᐅᓚᐅᖅᐳᖓ, ‘ᐊᐅᓪᓚᕈᒪᕖᑦ?’” ᓇᑖᖅ ᐅᖃᓚᐅᖅᐳᖅ. “ᐅᖃᐅᔾᔭᐅᓚᐅᖅᐳᖓ ᑕᐃᒪᓐᓇ, ᐅᖃᓘᑎᖃᕋᓗᐊᖅᑎᓪᓗᖓ ᐊᓯᐊᓂ ᐃᓄᖕᒥ ᑎᒍᔭᐅᖁᔨᓪᓗᖓ. ᐊᐱᕆᓚᐅᖅᐳᑦ ᐊᐅᓪᓚᕈᒪᖕᒪᖔᕐᒪ ᓄᓇᓕᖕᓂ. ᑕᐃᒪᓐᓇ ᑐᓴᒃᑲᓐᓂᕈᒪᙱᑦᑐᖓ”

Sgt. ᓯᒃᕙ ᐃᕙᓄᕙ ᐊᑐᐃᓐᓇᖃᖅᑎᑦᑎᓚᐅᖅᐳᖅ ᓇᑖᕐᒥ ᒪᒥᐊᓐᓂᐅᔪᒥ ᐊᑐᕐᓂᑯᖓᓐᓄᑦ ᐊᒻᒪ ᐅᖃᐅᑎᓚᐅᖅᐸᖓ ᐸᓖᓯᓕᒫᖅ ᐃᖃᓗᖕᓂ ᑕᐃᑲᓃᑉᐳᑦ ᐱᔨᑦᑎᕋᕐᓂᕐᒧᑦ ᐊᒻᒪ ᓴᐳᔾᔨᓯᒪᓂᕐᒧᑦ.

ᐅᖃᐅᔾᔨᓚᐅᖅᐳᖅ ᓇᑖᕐᒥ ᐅᖃᐅᓯᒃᓴᓕᐅᕈᓐᓇᓚᐅᙱᓐᓂᖓᓂ ᐊᑐᕐᓂᑯᖏᓐᓂ ᐅᓂᒃᑳᕆᓯᒪᓂᐅᔪᓂ ᐱᓯᒪᙱᒻᒪᑦ.

“ᑭᓯᐊᓂ ᐅᖃᐅᑎᔪᓐᓇᖅᐸᒋᑦ ᐱᓕᕆᓂᖅᑕᖃᕐᓂᖓᓂ ᑕᐃᒪᐃᑦᑐᓄᑦ ᑎᑎᕋᕐᕕᑦᑎᓪᓄᐊᕈᒪᒍᕕᑦ ᐊᒻᒪ ᐅᖃᐅᓯᕆᒃᑲᓐᓂᕆᐊᖅᑐᕐᓗᒍ” ᐅᖃᓚᐅᖅᐳᖅ. “ᐹᒐ ᒪᑐᐃᖓᐃᓐᓇᐅᔭᕐᓂᐊᖅᐳᖅ.”

ᐃᓄᐃᑦ ᑎᑎᕋᖅᑕᐅᑎᑦᑎᔪᓐᓇᖅᐳᑦ ᐱᓪᓚᕆᐅᔪᓂ ᐅᖃᐱᓘᑕᐅᔪᓂ ᑲᓇᑕᒥ ᐸᓖᓯᒃᑯᓐᓄᑦ ᐸᓖᓯᒃᑯᑦ ᐃᓄᓕᒫᓄᑦ ᐅᖃᐱᓗᖕᓂᐅᔪᓂ ᐱᓕᕆᓂᐅᔪᒥ. ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᑲᒪᒋᔭᖃᕐᓂᖏᓐᓂ ᐅᖃᐱᓘᑕᐅᔪᓂ ᒫᓐᓇᓕᓴᐅᔪᒥ ᐱᓕᕆᐊᖑᕐᔪᐊᖅᓯᒪᕗᑦ.

ᐃᓅᖃᑎᒌᖕᓄᑦ ᕿᒥᕐᕈᔭᐅᓂᖓ ᐊᒻᒪ ᐅᖃᐱᓘᑎᓄᑦ ᑎᓕᔭᐅᓯᒪᔪᑦ ᓴᖅᑭᑎᑦᑎᓚᐅᖅᐳᑦ ᐅᓂᒃᑳᓕᐊᒥ ᓄᕕᐱᕆᒥ ᐅᓂᒃᑳᕆᔪᒥ ᐊᕐᕌᒍᒐᓴᓂ ᑕᑭᓂᐅᔪᒥ ᑲᑎᑉᐸᓪᓕᐊᓂᐅᔪᓂ ᐅᖃᐱᓗᖕᓂᐅᔪᓂ ᐊᒻᒪ ᖁᑦᑎᖕᓂᖅᓴᐅᔪᒥ ᑕᐃᒪᐃᒐᔪᖕᓂᖓᓂ ᐅᓄᕐᓂᐅᔪᓂ ᐲᖅᑕᐅᔪᓂ ᐅᖃᐱᓘᑎᓂᑦ.

ᐅᓂᒃᑳᓕᐊᖅ ᐃᒪᐃᖁᔨᓇᔭᖅᐳᖅ ᓄᓇᕗᒻᒥ ᑲᓇᑕᒥ ᐸᓖᓯᒃᑯᑦ ᐃᓱᒪᒋᔭᖃᕐᓂᖏᓐᓂ ᓄᓇᕘᑉ ᐊᔾᔨᐅᙱᓐᓂᖓᓂ ᖃᓄᐃᓕᖓᓂᖏᓐᓂ ᐊᒻᒪ ᐃᖅᑲᓇᐃᔭᖅᑎᑦᑎᓗᑎᒃ ᐃᓯᐊᖑᔪᒥ ᐸᓖᓯᐅᔪᒥ ᕿᒥᕐᕈᓂᕐᒧᑦ ᐅᖃᐱᓘᑎᐅᔪᓂᑦ.

ᐅᔾᔨᕆᔭᐅᓚᐅᖅᐳᖅ ᐅᓄᕐᓂᐅᔪᓂ ᐅᖃᐱᓘᑎᓂᑦ — 75−ᓂ ᐊᕐᕌᒍᓄᑦ ᑎᓴᒪᓄᑦ ᕿᑎᐊᓂ 2018−ᒥ ᐊᒻᒪ 2022−ᒧᑦ — ᐊᑦᑎᖕᓂᖅᓴᐅᓚᐅᖅᐳᖅ ᑲᓇᑕᒥ ᑕᐃᒪᐃᒐᔪᖕᓂᖓᓂ, ᐱᔾᔪᑕᐅᔪᓐᓇᖅᑐᒥ ᐱᑕᖃᙱᓗᐊᕐᓂᖓᓂ ᐅᒃᐱᕈᓱᖕᓂᕐᒥ ᐊᒻᒪ ᐱᑕᖃᙱᓗᐊᕐᓂᖓᓂ ᐅᔾᔨᕈᓱᖕᓂᕐᒥ ᐃᓄᓕᒫᓄᑦ ᐅᖃᐱᓘᑎᓄᑦ ᐱᓕᕆᔾᔪᓯᐅᔪᒥ.

ᑕᐃᔅᓱᒪᓂ, ᑲᓇᑕᒥ ᐸᓖᓯᒃᑯᑦ ᐅᖃᖅᑎᖓ Cpl. ᔪᐊᔾ ᕼᐊᓄᕆ ᐅᖃᓚᐅᖅᐳᖅ ᑲᓇᑕᒥ ᐸᓖᓯᒃᑯᑦ ᓴᓇᓯᒪᓂᖏᓐᓂ ᖃᔅᓯᒐᓚᖕᓂ ᐱᐅᓯᒋᐊᖅᑎᑕᐅᓂᐅᔪᓂ ᐱᓕᕆᔾᔪᓯᐅᔪᒧᑦ, ᐃᓚᖃᖅᑐᒥ ᐃᖅᑲᓇᐃᔭᖅᑎᑦᑎᓂᕐᒥ ᑐᕌᖓᔪᒥ ᐃᖅᑲᓇᐃᔭᖅᑎᒥ ᖃᐅᔨᓴᕐᓂᕐᒧᑦ ᐅᖃᐱᓘᑎᐅᔪᓂᑦ.

ᕼᐊᓄᕆ ᑭᐅᓚᐅᙱᓚᖅ ᐅᓪᓗᖓᓂ ᑭᖑᓂᐊᒍᑦ ᑲᑎᒪᔨᒃᑯᑦ ᑲᑎᒪᓂᕆᓚᐅᖅᑕᖓᓂ ᐊᐱᕆᔭᐅᒐᒥ ᑕᐃᓐᓇ ᐊᑐᕐᓂᖃᐅᑎᖓ ᓱᓕ ᐃᓄᖃᕐᒪᖔᑦ ᐊᒻᒪ ᑭᓱᓂ ᐊᓯᖏᓐᓂ ᐱᐅᓯᒋᐊᖅᑎᑕᐅᓂᐅᔪᖃᕐᓂᖓᓂ ᑕᐃᒪᙵᓂ.

ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᑦ ᑎᑭᐅᑎᔪᓐᓇᓚᐅᙱᓚᑦ ᓇᑖᕐᒥ ᐅᖃᓘᑎᒃᑯᑦ ᐅᕝᕙᓘᓐᓃᑦ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᐅᖃᐅᓯᒃᓴᓕᐅᒃᑲᓐᓂᕐᓂᕐᒧᑦ.

ᐃᓄᐃᑦ ᐅᖃᐱᓘᑎᓕᐅᕈᓐᓇᖅᐳᑦ ᑲᓇᑕᒥ ᐸᓖᓯᒃᑯᓐᓄᑦ ᖃᕋᓴᐅᔭᑎᒍᑦ, ᑎᑎᖅᑲᒃᑯᑎᒍᑦ, ᐅᕝᕙᓘᓐᓃᑦ ᓱᒃᑲᔪᒃᑰᕈᑎᒃᑯᑦ ᐅᕘᓇ ᐃᓅᖃᑎᒌᖕᓄᑦ ᕿᒥᕐᕈᔭᐅᓂᖓ ᐊᒻᒪ ᐅᖃᐱᓘᑎᓄᑦ ᑎᓕᔭᐅᓯᒪᔪᑦ ᐅᕝᕙᓘᓐᓃᑦ ᖃᐅᔨᒋᐊᕐᓗᑎᒃ ᓄᓇᕗᒻᒥ ᑲᓇᑕᒥ ᐸᓖᓯᒃᑯᓐᓄᓪᓚᕆᒃ.