ᐃᖃᓗᐃᑦ ᑲᑎᒪᔨᖏᑦ ᓂᕈᐊᓚᐅᕐᑐᑦ ᐊᐃᑉᐸᕆᔭᐅᓂᐊᖅᑐᒥ ᐃᒪᖃᕐᕕᒃᓴᒥᑦ

For English version, see Iqaluit councillors vote to build 2nd water reservoir

ᐃᓚᒋᔭᐅᓪᓗᓂ ᐊᑯᓂᕈᓗᒃ ᐃᒪᓕᕆᔾᔪᑎᒃᓴᒥ ᓄᑖᙳᕆᐊᖅᑕᐅᔪᓄᑦ, ᓄᓇᓕᐸᐅᔭᐃᑦ ᑲᑎᒪᔨᖏ ᑕᒪᒃᑭᖅᖢᑎᒃ ᓂᕈᐊᓚᐅᕐᑐᑦ ᖃᓄᐃᓕᖓᓂᐊᕐᓂᖓᓄᑦ ᐋᖅᑭᒃᑕᐅᓯᒪᔪᓂ ᓄᑖᒥ ᐃᒪᖃᕐᕕᒃᓴᒥ ᓴᓇᓗᑎᒃ ᑕᓯᖅ ᔨᐅᕈᑏᓐ ᖃᓂᒋᔭᖓᓂ ᐃᒪᖅᑖᖅᐸᓪᓕᐊᒐᔭᖅᖢᑎᒃ ᖃᓂᒋᔭᖓᓂ ᐃᒪᖃᕐᕕᐅᔪᓐᓇᖅᑐᓂᒃ.

ᖃᓄᐃᓕᖓᓂᒃᓴᖓ ᐊᑐᕈᑎᐅᓂᐊᕐᑐᖅ $20 ᒥᓕᐊᓐ ᑖᓚᓂ ᐅᕙᙵᑦ $80 ᒥᓕᐊᓐᓂ ᓄᓇᓕᐸᐅᔭᐃᑦ ᐊᑐᕈᒪᓯᒪᔭᖏᓐᓂᒃ ᓱᓪᓗᓕᒃᑯᑦ ᐃᒪᖃᕈᑎᐅᕙᒃᑐᓂᒃ.

“ᐅᓇ ᑕᐃᒪᐃᓪᓚᕆᒃᑲᓗᐊᖅᑎᓪᓗᒍ, ᐅᕙᓐᓄᑦ ᐃᓱᒫᓗᖕᓇᕐᒪᑦ ᓲᖃᐃᒻᒪ ᐅᓗᕆᐊᓇᙱᑦᑐᒥᒃ ᐱᑕᖃᕐᓗᓂ, ᐃᒥᖅᑕᕐᕕᓕᕆᓂᕐᒥ, ᐃᖃᓗᖕᒥᐅᑦ ᐃᑲᔪᖅᑕᐅᔪᓐᓇᕋᔭᙱᒻᒪᑕ ᐃᒪᖃᕐᕕᒃᑕ ᑕᑕᓗᐊᕐᓂᖓᓄᑦ,” ᐅᖃᕐᑐᖅ ᑲᑎᒪᔨ ᕈᒦᓐ ᓯᑏᕙᓐᓴᓐ ᐱᓇᓱᐊᕈᓯᐅᓚᐅᕐᑐᒥ ᑲᑎᒪᑎᓪᓗᒋᑦ.

ᑭᒡᒐᖅᑐᐃᔪᑦ ᐅᑯᓂᖓ ᑲᓕᐅᔅ ᐱᓕᕆᐊᒃᓴᓄᑦ ᓯᕗᓕᐅᖅᑎᓄᑦ (Colliers Project Leaders) ᓴᖅᑭᑎᑦᑎᓚᐅᕐᒪᑕ ᒪᕐᕈᐃᓂ ᐃᓱᒪᓕᐅᕆᔭᐅᔾᔪᑎᐅᔪᓐᓇᖅᑐᓂ ᐋᒐᓯ 27-ᐅᑎᓪᓗᒍ ᐃᒪᓕᕆᓂᕐᒧᑦ ᐱᓕᕆᔾᔪᓯᒃᓴᓂ. ᑕᒪᕐᒥ ᐃᒪᕐᒥ ᐱᖃᑦᑕᕋᔭᖅᑐᑦ ᕿᑭᖅᑕᓕᒃ ᑕᕐᒥ ᐊᒻᒪ ᓂᐊᖁᙴᑉ ᑰᖓᓂ ᐅᕗᖓ ᑕᓯᖅ ᔨᐅᕈᑏᓐᒧᑦ, ᐊᒻᒪᓗ ᓄᓇᓕᐸᐅᔭᐃᑦ ᐃᒪᖃᐅᑎᖃᕐᕕᐊᓄᑦ.

ᓯᕗᓪᓕᖅ ᐃᓱᒪᒋᔭᐅᔪᖅ ᐃᓚᖃᕐᑐᖅ ᓴᓇᓗᑎᒃ ᐃᒪᖃᕐᕕᒃᓴᓂ ᑕᓯᖅ ᔨᐅᕈᑏᓐ ᐊᑭᑦᑎᐊᖓᓂ, ᑖᓐᓇᓗ ᐃᒻᒥᖅᐸᓪᓕᐊᒐᔭᖅᖢᓂ ᑰᖕᒥ ᐊᒻᒪ ᕿᑭᖅᑕᓕᒃ ᑕᓯᕐᒥ ᓱᓪᓗᓕᒃᑰᖓᔪᓂᒃ.

ᐊᐃᑉᐸᖓ ᐃᓱᒪᒋᔭᐅᔪᖅ ᐃᓚᖃᙱᑦᑐᖅ ᐃᒪᖃᕐᕕᒃᓴᒥ ᑕᓯᖅ ᔨᐅᕈᑏᓐ ᓴᓂᑦᑎᐊᖓᓂᒃ. ᑭᓯᐊᓂᓕ, ᐃᒪᖅ ᒪᕐᕉᖕᓂ ᐃᒪᖃᕐᕕᐅᕙᒃᑐᓂᒃ ᒥᓪᓗᐊᖅᑕᐅᖃᑦᑕᕋᔭᖅᑐᑦ ᑕᓯᖅ ᔨᐅᕈᑏᓐᒧᑦ, ᐅᓇ ᕿᑭᖅᑕᓕᒃ ᑕᓯᖅ ᐃᒻᒥᖅᐸᓪᓕᐊᓗᓂ ᓂᐊᖁᙴᑉ ᑰᖓᓂ.

ᐃᐊᓐ ᒪᒃᐲᓐ, ᑲᓕᐅᔅᒥ ᐃᖃᓗᖕᓂ ᐃᒪᓕᕆᓂᕐᒧᑦ ᑐᑭᒧᐊᖅᑎᑦᑎᔨ, ᐅᖃᓚᐅᕐᑐᖅ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᓯᕗᓪᓕᖅ ᐃᓱᒪᒋᔭᐅᓂᑯᑦ “ᐅᓗᕆᐊᓇᙱᓐᓂᕐᓴᐅᓇᔭᕐᓂᖓ”, ᓇᐃᓐᓂᕐᓴᒥ ᐊᑯᑦᑐᓂᖃᕐᓗᑎ ᐃᒪᖃᖅᕕᒃ ᑕᓯᖅ ᔨᐅᕈᑏᓐᒥ.

ᓯᕗᓪᓕᖅ ᐃᓱᒪᒋᔭᐅᓯᒪᔪᖅ ᐊᑭᑐᓂᕐᓴᐅᓇᔭᖅᖢᓂ ᓴᓇᔭᐅᓗᓂ. ᑭᓯᐊᓂᓕ, ᐊᐃᑉᐸᖓ ᐃᓱᒪᒋᔭᐅᔪᖅ ᐊᑭᑐᓂᕐᓴᐅᓇᔭᕐᒥᔪᖅ ᐊᐅᓚᑕᐅᓗᓂ ᓲᖃᐃᒻᒪ ᓴᐳᔾᔭᐅᓯᒪᔭᕆᐊᖃᕋᔭᕐᒪᑦ ᖁᐊᖅᑎᑕᐅᑦᑕᐃᓕᒪᓗᓂ.

ᐅᑯᑎᒎᓇᕐᓕ ᓇᐃᓴᐅᑎᑎᒍᑦ ᓄᓇᓕᐸᐅᔭᐃᑦ ᑎᑎᖃᖁᑎᖏᑦᑎᒍᑦ, ᓯᕗᓪᓕᖅ ᐊᑭᖃᕋᔭᖅᖢᓂ ᒫᓂ $153.6 ᒥᓕᐊᓐ, ᐅᓇᓕ ᐊᐃᑉᐸᖓ ᐊᑭᖃᕋᔭᖅᖢᓂ $111.6 ᒥᓕᐊᓐ.

ᑲᓕᐅᔅ ᐋᖅᑭᒃᓯᒪᔭᖏᑦ ᓴᖅᑭᑎᑦᑎᓯᒪᓚᐅᕐᑐᖅ ᐃᒪᖃᕋᔭᕐᓂᖓᓂ ᑎᑭᓪᓗᒍ 2050 ᑕᒪᐃᑎᒍᑦ ᐋᖅᑭᒃᓯᒪᔭᖏᑦᑎᒍᑦ. ᐅᖃᐅᓯᖃᓚᐅᙱᑦᑐᑦ ᖃᑯᒍ ᐱᐊᓂᒃᑕᐅᓇᔭᕆᐊᒃᓴᖓᓂᒃ, ᑭᓯᐊᓂᓕ ᓴᓇᓕᕆᐊᕋᔭᕐᑐᑦ 2026, ᐊᒻᒪᓗ ᐊᐃᑉᐸᖓ ᓴᓇᔭᐅᓕᕋᔭᖅᖢᓂ 2027-ᒥ.

ᐊᑭᓕᕐᓱᐃᓇᔭᖅᑐᑦ ᐊᑭᖏᓐᓂᒃ ᐅᕘᓇ $214 ᒥᓕᐊᓐᓂ ᐃᑲᔫᑎᒃᓴᓂ ᐃᖃᓗᐃᑦ ᒐᕙᒪᑐᖃᒃᑯᓐᓂ ᐱᔭᕕᓂᖏᓐᓂᒃ 2022-ᒥ ᐱᐊᓂᒃᑕᐅᓯᒪᔪᓂ ᓄᑖᙳᕆᐊᖅᑎᑦᑎᓂᕐᒧᑦ ᓄᓇᓕᐸᐅᔭᐃᑦ ᐃᒪᖃᕈᑎᖏᓐᓂᒃ.

ᑲᑎᒪᔨ ᑲᐃᐅᓪ ᓴᐳᑦ ᐊᐱᕆᓚᐅᕐᑐᖅ ᖃᓄᐃᓕᐅᕈᓐᓇᕆᐊᒃᓴᖏᓐᓂ “ᑕᒪᓐᓇ ᓱᑲᑎᑕᐅᓂᕐᓴᐅᓂᐊᕆᐊᒃᓴᖓᓂ,” ᓲᖃᐃᒻᒪ ᑕᒪᓐᓇ ᐱᓕᕆᐊᖑᓯᒪᑯᑖᓕᕐᒪ ᐱᒋᐊᖅᑎᑕᐅᓇᓱᒃᖢᓂ ᐊᒻᒪᓗ ᐱᐊᓂᒃᑕᐅᕝᕕᒃᓴᖓ ᐅᖃᖅᑕᐅᓯᒪᙱᖢᓂ.

ᒪᒃᐲᓐ ᐅᖃᓚᐅᕐᑐᖅ ᐱᓕᕆᐊᒃᓴᐅᑉ ᖃᓄᖅ ᓴᓇᔭᐅᓯᒪᓂᒃ, ᐅᖃᐅᓯᕆᓪᓗᓂᐅᒃ “ᐅᖁᒪᐃᑦᑐᓂ ᑭᕕᒃᓯᑲᑕᖕᓂᐅᓂᐊᕐᓂᖓᓂᒃ,” 30ᐳᓴᓐᑎᖓᓂ ᐱᐊᓂᒃᑕᐅᓕᕐᑐᖅ.

ᐊᒻᒪᓗ, ᐅᖃᖅᖢᓂ, ᐱᔪᓐᓇᐅᑎᓕᕆᓂᖅ ᐊᕐᕌᒍᒥ ᐱᐊᓂᒐᔭᕆᓪᓗᓂ.

“ᑕᒪᓐᓇ ᐱᐊᓂᒃᑕᐅᓇᓱᖕᓂᖓᓂᒃ ᐅᓇ ᖃᓄᐃᓕᖓᓂᒃᓴᖓ ᐱᐊᓂᒃᑕᐅᓂᐊᖅᑐᖅ ᐊᒻᒪᓗ ᓴᓇᔪᓐᓇᕐᓯᓗᑕ ᐱᔪᓐᓇᐅᑎᓂᒃ ᐱᑎᑕᐅᑐᐊᖅᐸᑕ,” ᒪᒃᐲᓐ ᐅᖃᕐᑐᖅ.

ᓴᐳᑦ ᐅᖃᒃᑲᓐᓂᖅᖢᓂ ᐃᑲᔫᑎᒃᓴᓂ ᕿᓂᒃᑲᓐᓂᕆᐊᖃᕐᓂᖏᓐᓂᒃ ᒐᕙᒪᑐᖃᒃᑯᓐᓂ ᐊᒻᒪ ᓄᓇᕗᒥᑦ ᑕᒪᒃᑯᐊ ᐃᒪᕐᒥ ᓄᑖᙳᕆᐊᖅᑎᑦᑎᓂᐅᔪᖅ ᐱᐊᓂᒃᑕᐅᔪᓐᓇᖁᓪᓗᒍ.

“ᓲᓕ ᒫᓐᓇ ᑐᐊᕕᕐᓇᖅᑐᒦᓐᓇᑦᑕ ᐃᒪᓕᕆᓂᒃᑯᑦ,” ᐅᖃᕐᑐᖅ.

“ᐅᓇ ᐊᖏᒡᓕᒋᐊᖅᑕᐅᕙᓪᓕᐊᑎᓪᓗᒍ ᐅᓇᓕ ᑭᖑᓪᓕᖅᐹ ᐱᓕᕆᓂᒃᓴᖅ ᓱᕋᒃᐸᓪᓕᐊᖕᒪᑦ ᐊᒻᒪᓗ ᐊᓯᔾᔨᕈᓐᓇᙱᖢᓂ.”