ᐃᖃᓗᖕᓂ ᐸᐃᕆᕝᕕᖓ ᑎᒡᓕᒡᕕᐅᕗᑦ 4−ᖑᖅᓱᖅᑕᐅᓪᓗᑎᒃ ᐅᓪᓗᓂ 9−ᓂ
ᐃᓱᒫᓗᒃᑐᑦ ᑲᑎᒪᔨᐅᖃᑕᐅᔪᑦ ᑕᑯᒃᓴᐅᑎᑦᑎᕗᑦ ᑕᕐᕆᔭᓕᐊᖑᔪᒥ ᐊᐱᕆᓪᓗᑎᒃ ᐃᑲᔪᖅᑕᐅᔪᒪᓂᕐᒧᑦ ᑭᖑᓂᐊᒍᑦ First Steps ᐸᐃᕆᕝᕕᖓ ᑐᕌᒐᕆᔭᐅᒃᑲᓐᓂᓚᐅᖅᑎᓪᓗᒍ ᐱᓇᓱᐊᕈᓯᐅᓚᐅᖅᑐᒥ
ᐃᖅᑲᓇᐃᔭᖅᑏᑦ ᐊᒻᒪ ᐊᖓᔪᖅᑳᑦ ᐃᖃᓗᖕᓂ First Steps ᐸᐃᕆᕝᕕᖓ, ᐅᕙᓂ ᑕᑯᒃᓴᐅᔪᒥ, ᐅᖃᖅᐳᑦ ᐊᑲᖅᓴᙱᑉᐳᑦ ᐃᒡᓗᕐᔪᐊᖅ ᐃᓵᖅᑕᐅᓚᐅᕐᓂᖓᓂ ᑎᓴᒪᐃᖅᓱᖅᑕᐅᓪᓗᓂ ᐅᓪᓗᓂ 8−ᓂ ᑕᒪᑐᒪᓂ ᑕᖅᑭᐅᔪᒥ. (ᐋᑎ ᓴᑏᓯᐊᓐ ᐊᔾᔨᓕᐅᖅᑕᖓ)
For the English version of this story, please see Iqaluit daycare robbed 4 times in 9 days.
ᐊᖓᔪᖅᑳᑦ ᐊᒻᒪ ᐃᖅᑲᓇᐃᔭᖅᑏᑦ ᐃᖃᓗᖕᓂ ᐸᐃᕆᕝᕕᖕᒥ ᑕᑯᓯᒪᔪᓂ ᑎᓴᒪᓂ ᐃᓵᖅᑕᐅᓂᐅᔪᒥ ᐱᓇᓱᐊᕈᓯᐅᔪᒥ ᐅᖃᖅᐳᑦ ᐊᑲᖅᓴᖅᓯᒪᙱᓚᑦ ᐊᒻᒪ ᓴᐱᓕᖅᖢᑎᒃ.
“ᑎᒡᓕᓪᓚᕆᒃᑐᑦ ᓂᕿᓂᑦ ᕿᑐᕐᙵᑦᑎᑦᑎᓐᓂ,” ᐅᖃᓚᐅᖅᐳᖅ ᔪᓕᐊ ᒪᒃᑖᓄᑦ, ᐊᖓᔪᖅᑳᖑᔪᖅ ᒪᕐᕉᖕᓂ ᓱᕈᓯᕐᓂ ᐅᐸᓲᖑᔪᓂ First Steps ᐸᐃᕆᕝᕕᖓᓂ, ᕙᐃᔅᐳᒃᑯᑦ. ᑭᖑᓂᐊᒍᑦ ᓇᓗᓇᐃᖅᓯᓚᐅᖅᐳᖅ ᐃᓱᒫᓘᑎᖓᓂ ᐅᖃᓪᓚᖃᑎᖃᖅᑎᓪᓗᒍ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓂ.
“ᓄᓇᓕᕗᑦ ᐋᓐᓂᐊᕐᔪᐊᖅᐳᑦ ᑭᓯᐊᓂ ᐊᒃᑐᐃᓪᓚᕆᓪᓗᐊᙱᓚᖅ ᕿᑐᕐᙵᑦᑎᑦᑎᓐᓂ ᐊᒻᒪ ᒪᒃᑯᒃᑐᖁᑎᑦᑎᓐᓂ,” ᒪᒃᑖᓄᑦ ᑎᑎᕋᓚᐅᖅᐳᖅ ᖃᕋᓴᐅᔭᑎᒍᑦ ᑭᖑᓂᐊᓂ ᐸᐃᕆᕝᕕᖓᑕ ᑲᑎᒪᔨᐅᖃᑕᐅᔪᖅ ᐊᓛᓇ ᑰᓪᔅ ᐃᓕᓯᓚᐅᖅᑎᓪᓗᒍ ᖃᐃᖁᔨᓂᐅᔪᒥ ᐃᓅᖃᑎᒌᖑᔪᓄᑦ ᓯᐊᒻᒪᖅᑎᑦᑎᓂᐅᔪᒥ ᕿᓂᖅᑐᒥ ᐃᑲᔪᖅᑕᐃᓂᕐᒥ ᓇᓗᓇᐃᖅᓯᓂᕐᒥ ᐊᓕᐸᐃᓂᑦ ᐊᔾᔨᓕᐅᕈᒻᒧᑦ ᐊᔾᔨᓕᐅᖅᑕᐅᔪᓂ.
ᓯᕗᓪᓕᖅᐸᐅᔪᖅ ᐃᓵᖅᑕᐅᓂᖅ ᐱᓚᐅᖅᐳᖅ ᐅᒃᑐᐱᕆ 7−ᒥ, ᐱᓇᓱᐊᕈᓯᐅᑉ ᓯᕗᓂᐊᓂ ᖁᔭᓕᓐᓇᐅᑎᓪᓗᒍ, ᐅᖃᓚᐅᖅᐳᖅ ᒫᑎᓴᓐ ᑯᐊᒫᒃ, ᐸᐃᕆᕝᕕᐅᑉ ᑐᑭᒧᐊᒃᑎᑦᑎᔨᓄᑦ ᐃᑲᔪᖅᑎᖓ.
“ᐅᓄᖅᑐᓂ ᓂᕿᓂ ᑎᑭᓴᐃᓚᐅᖅᐳᒍᑦ ᖁᔭᓕᓐᓇᐅᑎᓪᓗᒍ ᓂᕆᑎᑦᑎᔪᓐᓇᕐᓂᐊᕋᑦᑕ ᐅᓪᓗᕈᒻᒥᑕᖃᖅᑎᓪᓗᑕ ᓱᕈᓯᕐᓂ,”ᐅᖃᓚᐅᖅᐳᖅ.
“ᑕᐃᒫᒃ [ᐊᓕᐸᒃᑏᑦ] ᐃᓯᓚᐅᖅᐳᑦ ᐊᒻᒪ ᐃᓗᓖᖅᑕᐅᑦᑎᐊᖅᖢᓂ ᖁᐊᒃᑯᕕᖕᒥ, ᖁᐊᖃᐅᑎ ᐊᒻᒪ ᒪᒃᐱᖅᑕᖅᑐᑦ ᑕᒪᒃᑭᓂ ᐊᔾᔨᒌᙱᑦᑐᓂ ᓂᕿᓂᑦ, ᑕᒪᒃᑭᑦ ᓂᕿᕗᑦ ᐱᔭᐅᕗᑦ.”
ᑯᐊᒫᒃ ᐅᖃᓚᐅᖅᐳᖅ ᐃᒻᒥᓂᒃ ᐊᒻᒪ ᐃᓱᒻᒥᖅᑐᐃᔨᖓ ᑲᐃᓚ ᑭᖕ ᐃᓇᖏᖅᓯᔪᓐᓇᓚᐅᖅᐳᑦ ᓂᕿᓂ. ᓂᕆᐅᓚᐅᖅᐳᑦ ᑎᒡᓕᖕᓂᐅᔪᖅ ᐊᑕᐅᓯᐊᑐᐃᓐᓇᕐᓂᐊᕐᓂᖓᓂ.
ᐊᒻᒪ ᑎᒡᓕᒡᕕᐅᒃᑲᓐᓂᓚᐅᖅᐳᑦ ᒪᕐᕈᒋᔭᖓᓂ ᐅᒃᑐᐱᕆ 8−ᒥ.
ᐊᓕᐸᖅᑏᑦ ᓂᕿᓂ ᐱᒃᑲᓐᓂᓚᐅᖅᐳᑦ, ᑭᓯᐊᓂ ᑕᒪᒃᑭᐅᙱᓵᖅᑐᒥ, ᐊᒻᒪ ᑎᒡᓕᓚᐅᕆᕗᑦ ᖃᔅᓯᒐᓚᖕᓂ ᓵᒻᓴᖕ ᖃᕋᓴᐅᔭᕋᓛᓂ, ᑲᒃᑭᐅᑎᒃᓴᓂ, ᐸᐃᑉᐹᓂ ᐊᓪᓕᕈᑎᒃᓴᓂ ᐊᒻᒪ ᐃᖂᑎᕐᓴᑦ, ᑯᐊᒫᒃ ᐅᖃᓚᐅᖅᐳᖅ.
ᐸᐃᕆᕝᕕᖓ ᐊᓱᐃᓛᒃ ᑎᒡᓕᒡᕕᐅᒃᑲᓐᓂᓚᐅᖅᐳᖅ ᐱᖓᔪᖓᓐᓂ, ᖁᔭᓕᓐᓇᐅᑎᓪᓗᒍ ᐱᓇᓱᐊᕈᓯᐅᑉ ᓄᙳᐊᓂ.
ᑕᐃᑲᓂ, ᐅᖃᓚᐅᖅᐳᖅ, ᓂᕿᒃᑲᓐᓂᕐᓂ ᐱᒃᑲᓐᓂᖅᖢᑎᒃ ᐊᒻᒪᓗᑦᑕᐅᖅ ᖃᕋᓴᐅᔭᕋᓛᓂ ᕿᒪᒃᑕᐅᓚᐅᖅᑐᓂ ᓯᕗᓂᐊᓂ ᐃᓵᖅᑕᐅᓂᐅᓚᐅᖅᑐᒥ. ᑎᒡᓕᒻᒪᕆᓚᐅᖅᐳᑦ ᑎᑎᕋᕐᕕᐅᑉ ᑳᐱᓕᐅᕈᑎᖓᓐᓂ.
“ᑭᓇ ᑕᐃᒪᐃᓐᓇᔭᖅᐸ?” ᑯᐊᒫᒃ ᐊᐱᕆᓚᐅᖅᐳᖅ. “ᐃᖅᑲᓇᐃᔭᓲᖑᕗᒍᑦ ᐅᓪᓗᓕᒫᖅ ᐊᒻᒪ ᑎᒡᓕᖅᖢᑎᒃ ᑳᐱᓕᐅᕈᑎᑦᑎᓐᓂ.”
ᓇᓚᐅᑦᑖᕆᓚᐅᖅᐳᖅ ᐊᖏᓂᖓᓂ ᑎᒡᓕᒃᑕᐅᔪᓂ ᑕᐃᑯᖓ ᑎᑭᖦᖢᒍ $5,000−ᐸᓘᓚᐅᖅᐳᑦ, ᓇᑉᐸᓪᓗᐊᑲᓴᖓᓂ ᐊᑭᐅᓚᐅᖅᑐᒥ ᓂᕿᓂᑐᐊᖅ. ᕿᑎᐊᓂ ᒪᕐᕉᖕᓂ ᐊᒻᒪ ᑎᓴᒪᓂ ᐱᓇᓱᐊᕈᓯᕐᓂ ᓂᕿᓪᓗᐊᓂ ᑎᒡᓕᒃᑕᐅᓚᐅᖅᐳᑦ.
ᑭᖑᓂᐊᒍᑦ ᐱᖓᔪᖓᓐᓂ ᐊᓕᐸᓐᓂᐅᔪᒥ, ᐊᓪᓚᕝᕕᓕᕆᔩᑦ ᐃᓕᓯᓚᐅᖅᐳᑦ ᐊᔾᔨᓕᐅᕈᑎᓂ.
ᐅᓐᓄᕐᔪᐊᒥ ᐅᒃᑐᐱᕆ 15−ᒥ, ᐸᐃᕆᕝᕕᖓ ᑎᒡᓕᕝᕕᐅᒃᑲᓐᓂᓚᐅᖅᐳᖅ ᐊᒻᒪ ᑕᐃᑲᓂ ᑰᓪᔅ ᑐᓂᓯᔪᓐᓇᓚᐅᖅᐳᖅ ᐊᔾᔨᓕᐅᖅᑕᐅᓂᑯᓂ ᐸᓖᓯᒃᑯᓐᓄᑦ.
ᐸᐃᕆᕝᕕᖓ, ᐱᔨᑦᑎᕋᖅᓯᒪᔪᒥ ᓄᓇᓕᖕᓂ ᑕᐃᒪᙵᓂ 1992−ᒥ, ᒫᓐᓇᐅᔪᒥ ᐸᖅᑭᓲᖑᕗᑦ 26−ᓂ ᓱᕈᓯᕐᓂ. ᐊᐅᓚᑦᑎᕗᖅ ᑮᓇᐅᔭᓕᐅᕋᓱᐊᙱᖦᖢᑎᒃ, ᑐᙵᕕᖃᖅᑐᒥ ᐊᑭᓕᐅᑎᓂ ᐊᖓᔪᖅᑳᑦ ᐊᑭᓖᕙᖕᓂᖏᓐᓂ ᐊᒻᒪᓗᑦᑕᐅᖅ ᑐᓐᓂᖅᑯᑕᐅᔪᓂ. ᑎᒡᓕᒃᑕᐅᔪᑦ ᖃᕋᓴᐅᔭᕋᓛᑦ ᑐᓐᓂᖅᑯᓯᐊᖑᓚᐅᖅᐳᑦ ᑲᑭᕙᒃ ᑲᑐᔾᔨᖃᑎᒌᖑᔪᓄᑦ.
ᓇᓪᓕᐅᒃᑯᒫᖃᕋᓗᐊᖅᑎᓪᓗᒍ, ᑯᐊᒫᒃ ᐅᖃᓚᐅᖅᐳᖅ ᐊᑯᓂᐅᓂᐊᖅᐳᖅ ᐊᒻᒪ ᐊᓪᓚᕝᕕᓕᕆᔨᐅᔪᓂ ᖃᐅᔨᒪᓪᓚᕆᙱᓚᑦ ᖃᓄᑎᒋ ᔭᒐᐃᓂᖏᓐᓂ ᐊᑭᓕᖅᑕᐅᓂᐊᕐᒪᖔᑕ ᑎᓴᒪᖓᑕ ᐃᓵᕐᓂᐅᓚᐅᖅᑐᒥ.
“ᓂᕿᒃᓴᖃᑦᑎᐊᙱᓐᓂᐅᔪᒥ ᐅᑭᐅᖅᑕᖅᑐᒥ, ᐸᐃᕆᕝᕕᒃ ᓂᕆᑎᑦᑎᔪᒪᕗᑦ ᓱᕈᓯᕐᓂ ᐱᔪᓐᓇᕐᓂᓕᒫᖏᓐᓂ ᐸᐃᕆᕝᕕᖕᒦᑎᓪᓗᒋᑦ ᐱᙱᑐᐃᓐᓇᕆᐊᖃᕐᓂᖏᓐᓂ ᐊᖏᕐᕋᖓᓐᓂ. ᑎᒡᓕᖕᓂᐅᔪᓂ, ᐊᔪᕐᓇᕐᓂᖅᓴᐅᕗᖅ ᑕᐃᒪᐃᑎᑦᑎᔪᓐᓇᕐᓂᐊᕐᓂᖏᓐᓂ,” ᑰᓪᔅ ᐅᖃᓚᐅᖅᐳᖅ.
ᑲᓇᑕᒥ ᐸᓖᓯᒃᑯᓐᓄᑦ ᐅᖃᑎᖓ Cpl. ᔪᐊᔾ ᕼᐊᓄᕆ ᓇᓗᓇᐃᖅᓯᓚᐅᖅᐳᖅ ᖃᕋᓴᐅᔭᑎᒍᑦ ᑎᑎᕋᕐᓂᐅᔪᒥ ᓄᓇᑦᓯᐊᖅ ᑐᓴᒐᒃᓴᓕᕆᔨᒃᑯᓐᓄᑦ ᐅᒃᑐᐱᕆ 16−ᒥ ᐃᓵᕐᓂᐅᔪᑦ ᖃᐅᔨᓴᖅᑕᐅᕗᑦ ᑭᓯᐊᓂ ᐅᖃᕈᒪᓚᐅᙱᓚᖅ ᐅᓂᒃᑳᕆᒃᑲᓐᓂᕐᓂᕐᒥ.
(0) Comments